1 Sam. 12 - Yus Papí: Shuarja̱i̱ Yus Yamaram Chicham Najanamu

Samuir aentsun áujas ikiuamu

¹ Nuyá̱ Samuir ashí Israer shuaran chicharuk “Nekaatarum átum chichaakrum ‘Iisha úunt akupin takustai’ ashí tímiarumna nuna úunt akupniuncha atumín apujtusmajrume.

² Yamaikia nekaatarum, atumí úunt akupniuri̱ juramkittiarme. Wikia yamaikia úuntach ajasjai túrunan jemperurjai. Tura iistarum, winia uchirka atumji̱a̱i̱ pujuartatui natsa asanak yamaiya̱ ímiaja̱i̱sha atumji̱a̱i̱ wekainiuyajai.

³ Uunt Yus íimmianum tura Ni anaikiamusha pujamunmaṉ sumamtikruatarum. ¿Yana waakari̱niak tura yana umpururi̱niak atái jurukniuitiaj tura yanak wáitkiasuitiaj? ¿Yaki kuítian akirak útsutkuisha umirkaitiaj? Wats sumamtikruatarum túrawakrumin awaṉtuktiatjarme.”

⁴ Takui̱ ni áiniak “Iin anaṉkartuamsha kasartasha kasarkartukchaitme tura yajauchikia peṉké awajkartuschaitme nuyá̱ aents takakna nusha jurukchaitme” tiármiayi.

⁵ Tuíniakui nisha chichaak “Ju̱ tsawantinkia Ni anaikiamuri̱ji̱a̱i̱ Uunt Yusaiti atumí makurmatniuka. Warí winia makuratniuka peṉké wáinkiachurme” tímiayi. Takui̱ nisha chichainiak “Núnaka Uunt Yussha nekas nékawai” tiármiayi.

⁶ Nuya̱n Samuir aentsun chicharainiak “Uunt Yusaiti Muisaisan tura Araunan anaikiamia nu núnisaṉ atumí aparí̱ncha Ejiptunmaya̱ ji̱i̱rmia nusha núnaka nékawai.

⁷ Wats yamaikia weankátarum tura Uunt Yus íimmianum ju̱na enentáimtikratajrume. Warí atumniasha tura atumí aparí̱ncha Uunt Yussha urutmáya waitnentrampraitrum.

⁸ Jakup Ejiptunam pujusu ai̱ ukunam atumí uuntri̱ Uunt Yusan seawarmiayi. Nuya̱ṉka Uunt Yus Muisaisan Araunja̱i̱ akuptúkaram Ejiptunmaya̱nka ji̱i̱rar jú̱ nuṉkanam matsasármiayi.

⁹ Túramaitiat Israer shuarka Uunt Yusan ni Yusri̱n kajinmatkiarmiayi. Túram Uunt Yuska Ásurnumia̱ suntara uuntri̱ Sésarai̱ Jiristíu aentsnum tura Muápnumia̱ akupniúnam suruk iniasarmiayi. Nisha mesetan najatiarmiayi.

¹⁰ Tura Israer shuarka Uunt Yusan seainiak ‘Uunt Yus umirkatin iniaisa asar Aminí̱sha tunáa túraji. Túrar Paarja̱i̱ Astarte umirkarji. Túrasha yamaikia ii nemasri̱ya̱ uwemtikkiarturta túrawakmiṉkia Ame umirkattaji’ tímiarme.

¹¹ Tákurmin nuiṉkia Uunt Yus Jirupáaran, Parakan, Jeptin tura Samuiran akuptúrmakmiarme. Nuya̱ṉka atumí nemasri̱ya̱ aṉkant awajtámsamiarme túrunarum aṉkant matsamsamiarme.

¹² Tura atumíṉkia Uunt Yus atumí akupniúri̱ wáiniatrum Amuna úunt akupniuri̱ Najas atumí winitramu wainkiarum chichartakrum ‘Atsá nekaska iini̱sha úunt akupin atí iin akuptámkatin’ tímiarme.

¹³ Yamaikia átum úunt akupin achikmarumna nuka ju̱á tura átum seamarmena núnaka ju̱á Uunt Yus yamaikia suramsarmena.

¹⁴ Uunt Yus ashamakrum takarkurmeka tura Ni chichame̱sha umirkárum tura Uunt Yus akupkámu umirkatin wakerakrumka atumsha núnisaṉ atumí úunt akupniuri̱sha atumí Yusri̱n Uunt Yusai̱ shiir matsamsattarme.

¹⁵ Tura Uunt Yusa chichame̱sha umíachkurmeka núnisaṉ Uunt Yus akupkámusha umirkatin nakitiakrumka antsu nuiṉkia atumí úuntri̱n túramia núnisaṉ atumí úunt akupniuri̱ncha tura atumniasha Uunt Yuska kajertamkattarme.

¹⁶ Wats yamaikia káunkatarum. Túrarum tí tsuumain Uunt Yus iniakmastatna nu atumí ji̱ji̱a̱i̱ wáinkiatarum.

¹⁷ Wats ¿nekaschak yamaikia trikiu juutai̱ tsawantait? Túmaitkiuisha wi Uunt Yusan untsuktatjai túramtai átum úunt akupin seakrum ti yajauch túraitrumna nu nekaak tusa Uunt Yuska ipiamtan yumiji̱a̱i̱ naṉkaamas akupkáttawai” tímiayi Samuir.

¹⁸ Nuya̱ṉka Samuir Uunt Yusan untsukmiayi túramtai nu tsawantin Uunt Yus ipiamtan yumiji̱a̱i̱ akupkámiayi. Túrunamtai ashí Israer shuarka Uunt Yusan núnisaṉ Samuirnasha tí ashamkarmiayi.

¹⁹ Nuyá̱ ashí Israer shuar Samuiran chicharainiak “Ame takartámin kajinkiara̱i̱ṉ tusam Uunt Yus ame Yúsrum seatiarta. Warí ii tunaarí̱sha ti untsurí áiniamunmaṉ úunt akupin seamkur ti yajauchia nu ataksha patatmámkarji.”

²⁰ Tuíniakui Samuir Israer shuaran chicharainiak “Ashamkairap. Túrasha ju̱ tunáa átum ashí túraitrume. Túmaitkiuisha Uunt Yusai̱ya̱ṉka kanakiirap antsu nekas enentáiji̱a̱i̱ Uunt Yus enentáimtakrum umirkatarum.

²¹ Najankamu yus ainia nuní̱ kanakiirap. Warí yáimtancha yáimkiachmin tura uwemtikkiartutnasha uwemtikkiarturchamnia ásar peṉké ántar áiniawai.

²² Warí Uunt Yuska ni naari̱ uunt asamtai ní shuari̱nkia ajapanka ikiukchattawai. Warí Ni shuar awajsatniun Niṉkia wakerukuiti.

²³ Tura wikia atumí seattsukka Uunt Yusai̱sha tunaan túrashtajai antsu aya péṉkera nunak tura naka wekasatniun jintintiátjarme.

²⁴ Núnisrumek atumí yaintmaktaj tusa Uunt Yuska Ní kakarmari̱ ti uunta nuna iniakmasu asamtai aya Uunt Yusak ashamkatniuitrume. Túrakrum nekas enentáiji̱a̱i̱ tuke shiir enentáimtustiniaitrume.

²⁵ Túmaitkiuisha yajauch túratin wakerakrumni̱ṉkia atumsha atumí úunt akupniuri̱ji̱a̱i̱ mash amukáttarme.”