1 Sam. 11 - Yus Papí: Shuarja̱i̱ Yus Yamaram Chicham Najanamu

Saur Japisan Amun aents mesetnumia̱ aṉkant awajsamu

^1-5 Najas Amun aents Japisja̱i̱ mániatai tusa Karaatnum matsamtúkarmiayi. Tura Japisja̱i̱ áishmaṉ nétaru armia nu Najasan chicharainiak “Iiji̱a̱i̱ chícham najanata túrawakmin umirkattaji.” Tutai Najas aya̱k “Ju̱ enentáiji̱a̱i̱ chichaman najanattajai. Atumíya̱ chikichik untsuuri̱ ji̱ ana nuna ukuinkiati tura ashí Israer shuar wishiktai̱ atí” tímiayi.

^6-11 Saur nu chichaman antukmia nui̱ Yusa Wakaní̱ kakarmari̱ nin tarurmiayi. Túram ti naṉkaamas kajekmiayi. Israernumia̱ áishmaṉ ashí iruntrarti tusa chichaman akupkámiayi. Akupkámtai Israer shuar Uunt Yusan ashamkar traisiantu mir áishmaṉkan Israernumia̱ jíintrarmiayi tura traintia mir Jutanmaya̱ jíintrarmiayi. Tura Japisa etserniuri̱n áikiar chichainiak “Kashin tí tsue̱r ura ajasmanum aṉkant awajnástatme” tímiayi. Japisa aentsri̱ chichama etserniu chichamen antukar warasarmiayi. Tura ni nemasri̱n Amun aentsun chicharainiak “Kashin atumniaka iiji̱a̱i̱ itiur túratin wakeram núnisrum túrattarme” tímiayi. Tura kashin tsawa̱tsa̱i̱ṉ Saur ashí aentsja̱i̱ menaint irumpramun nakak Amun aentsu matsamkamuri̱n káshik jatek tí tsue̱r ura ámanum maa amukar tsakiṉmakarmiayi.

^12-15 Kame Samuirka aentsun chicharuk “Jirkarnum wéartai nui̱ akupin anaikiami” tímiayi. Tura ashí aents Jirkarnum wéar nui̱ Uunt Yus íimmianum Sáuran úunt akupin awajsarmiayi. Núnisaṉ shiir pujaji tusar Yus íimmianum Yusan áestuawarmiayi túrawar ashí tí warasarmiayi.