1 Sam. 10 - Yus Papí: Shuarja̱i̱ Yus Yamaram Chicham Najanamu

¹ Nuna ti Samuirsha asuitin achik Sáuran muuknum ukatak mukuná chicharuk “¿Ni aentsri̱n Israer shuarnum uuntri̱ ati tusanchuk Uunt Yus anaitiamka?

² Tuma asamtai yamái wini̱ya̱ṉka kanakim Piṉjiamínkia nuṉké náṉkatkamunam Sersanam Rakir iwiarsamua nui̱ jimiará áishmaṉ wáinkiartatme. Nisha chichartamainiak ‘Umpuru e̱a̱rmena nuka wainkiamuiti’ turamartatui. Tura yamaikia ame ápaka umpurunka tiikia enentáimtatsui antsu ámin nekaska enentáimturmawai. Túmak ‘¿uchirsha urukakit?’ tu pujawai turamartatui” tímiayi.

³ “Tura wesam ensena numi Tapur wajana tímianai ajasámin menaintiú aents Pitirnum Yusan enentáimtuttsa wena chíkichkia menaintiú chípiun nuyá̱ chíkichkia menaintiú páṉkan tura chíkichkia ichiṉnanam winiu piákun takaku iṉkiunmaktaj tusar jiintiurmakiartatui.

⁴ Nuyá̱ amikmátmawar jimiará páṉkan amasártatui tura amesha achiktatme.

⁵ Nu túram Yusa náintri̱n Jiristíu suntar matsamkarua nui̱ wétatme. Tura péprunam waya̱wamin áestakur enentáimtutai̱nmaya̱ kitiaran, tampurnasha piṉkiuincha nuyá̱ árpancha tuntuiki̱ wininiamunam úkumur Yúsnan etserin untsurí Yúsnan etserki̱ akarainia wáinkiartatme.

⁶ Nuikia Yusa Wakaní̱ ámin eṉkemturmattawai. Túrunam Yúsnan etserniuja̱i̱ métek amesha etserkattame. Nuya̱ṉka chíkich aents ajastatme.

⁷ Nu túrunamtainkia ame enentáimsam túramnia nu túrata. Warí Yus yaintmaktatui.

⁸ Nuya̱ṉka ámeka Jirkar naint émkitia. Tura nui̱ ámiji̱a̱i̱ métek iruntrar emka takamtsuk áestuatniun nuyá̱ Yus shiir awajkur áestuatniun áestuattsan jeattajai. Ame túrattamna núnaka Wi mash jintintrattajme. Tuma asamtai Wi nui̱ jeamam siati tsawant nákarsata” tímiayi.

⁹ Nu tutai Saursha Samuiran ikiuktiaj tusa apajá̱rmatai nui̱ Yus ni enentái̱n yapajtiuámiayi. Tura nu tsawantai̱k Samuir timia nuka ashí uminkiamiayi.

¹⁰ Kame Saur ni takarniúri̱ji̱a̱i̱ naint jeawarmatai Yúsnan etserin iṉkiuṉtai tusar untsurí winitiarmiayi. Nuya̱ṉka Yusa Wakaní̱ Sáuran kakarmaja̱i̱ taruram Yúsnan etserin armia núnisaṉ nisha etserkamiayi.

¹¹ Tura Yúsnan etserin armia núnis nisha Yúsnan étsereakui péprunmaya Sáuran nékarmia nuka nuna wáinkiar mái̱ tunai ajainiak “Kisha uchirí̱sha ¿urukaya. Nisha Yúsnan etserin ajasáik?” tiármiayi.

¹² Tura chikichik chichaak “¿Au etserniu aparí̱sha ya ainia?” tímiayi. Tuma asamtai Saursha ¿Yúsnan etserniuchuashia? tiniu ármiayi.

¹³ Yúsnan etsersua umik Saurka Yus áestakur enentáimtutai̱niam jeamiayi.

¹⁴ Tura Saur takarniúri̱ji̱a̱i̱ jeamtai iichri̱ inintrak “¿Tui̱ wémarum?” tutai Saur áimiuk “Umpuru e̱a̱ktai tusar wémaji. Tura wáinkiachar Samuirai̱ wémaji” tímiayi.

¹⁵ Tutai iichri̱ chichaak “¿Samuirsha warintramarum? Winiasha waitneasam ujatkata”

¹⁶ takui̱ Saursha íichri̱n aya̱k “Umpuru wáinkiarman paant ujatmákmaji” tímiayi. Tura akupin ajastinian Samuir ujakmia núnaka peṉké etserkachmiayi.

Míspanam Saur úunt akupin awajsamu

¹⁷ Samuir Mispa péprunam Yus íimmianum ashí Israer shuar káunkarat tusa untsukarmiayi.

¹⁸ Tura ashí iruntrarmatai Israer shuaran Samuir chicharainiak “Israera Uunt Yusri̱ ju̱na túramprume ‘Wi Ejiptu nuṉkanmaya̱ Israer shuartirmin emetamu pujutirmin núnisaṉ ashí nuṉkanmaya̱ akupin ainia wáitkiarmasarmia nuya̱sha aṉkant awajsaitjiarme.’

¹⁹ Tura átumka túramaitiatrum atumí Uunt Yusri̱ ashí itiurchatnumia̱ tura wáitiamunmaya̱ aṉkant awajtámsa nu nakitrarume. Túrarum chichakrum ‘¡Atsá! Antsu úunt akupin iin akuptámkatin amasta’ tákurmeka wats yamaikia Uunt Yus íimmianum atumí we̱a̱k tura atumí shuari̱ji̱a̱i̱ṉ iruntratarum” tiármiayi.

²⁰ Nuya̱ṉka ashí Israer we̱a̱k weantkarat tusa Samuir untsukarmiayi tura Piṉjiamín weanmaya̱ achintkiámiayi.

²¹ Túrunamtai Piṉjiamín wea armia nu weantkarmia nui̱ Matri aentsri̱ achintkiámiayi. Tura Matri aentsri̱ya̱ Kisha uchirí̱n Saur náamkamiayi. Antsu Sáurnasha e̱a̱kar wáinkiacharmiayi.

²² Nuya̱ṉka Uunt Yusan ataksha anintruiniak “Nu áishmaṉ ¿túkek ju̱i̱ tátata?” tuíniakui Uunt Yus chicharainiak “Wats iistarum ju̱i̱ṉ warirí̱ itiamu áiniana nui̱ṉ ú̱mak pujawai” tímiayi.

²³ Nuyá̱ tseke weriar ú̱mak pujamunmaya̱ itiarmiayi. Tura támatai Israer shuarja̱i̱ iruntrarmia nui̱ apatka iismasha niṉkia chikicha yakai̱ya̱ nuyá̱ naṉkaamas náyauyayi.

²⁴ Tura Samuirka ashí Israer shuaran chicharainiak “¿Uunt Yus anaikiama nu wáintsurmek? ¡Ashí Israernumka peṉké chikichkisha niji̱a̱i̱ métekka atsawai!” tímiayi. Takui̱ warainiak “¡Ii akupniúri̱ tuke iwiaaku atí!” tusar charaatum ajarmiayi.

²⁵ Samuir Israer shuaran úunt akupin túratniua nuna ujakármiayi. Tura papí pénuimiunam áarmiayi tura Uunt Yus íimmianum eem ikiusmiayi.

²⁶ Nuyá̱ Samuir Israer shuaran amikmá ikiuak wémiayi tura aṉkant aṉkant atumí je̱e̱n waketratarum tímiayi. Tura Saursha ni je̱e̱n Kawaanam wémiayi. Wéakui Yus aentsu enentái̱n chicharsarmia nu aents kakaram armia nuja̱i̱ irunar wéarmiayi.

²⁷ Ti yajauch aents armia nu chichainiak “¿Ju̱sha iincha itiurak uwemtikrampratajⁱ?” tiarmia nuna nakitrar súsatniua nunasha nin itiarcharmiayi. Antsu niṉkia tútaisha pachimiaschamiayi.