1 Pit. 2 - Yus Papí: Shuarja̱i̱ Yus Yamaram Chicham Najanamu

¹ Tuma asamtai ashí yajauch ana nu iniaisatarum. Anaṉkartin ántar chichamtin átin, chikichna wakeruktin, ashí tsanumpratniusha iniaisatarum.

^2-3 Antsu Uunt Jesukrístu waitnenkartutairi̱ nekapsa asarum uchi yama akiinia muntsun ti wakeruinia áintsarmek Yusa chichame̱ aya péṉkerkea nu ti wakeruktarum. Yusa chichame̱ja̱i̱ tuke tsawant tsakakrum tuke uwemprami tusarum túratarum.

Iwiaaku kaya

⁴ Ii Uuntri̱ Kristu kaya ántsaṉkete. Tura shuar kayan yajauchin nakitiáinia núnisaṉ Jesukrístun nakitrarmiayi. Tura kayan tí peṉkeran wakeruinia núnisaṉ Yuska “winia Uchir tí peṉkeraiti” tusa Jesukrístun achikmiayi. Atumsha Jesukrístu weantuktarum. Ni iwiaaku káyaiti.

⁵ Atumsha iwiaaku kaya ántsaṉketrume. Tuma asarum Yus wiji̱a̱i̱ ni je̱e̱n je̱a̱mti tusarum tsaṉkamaktarum. Tura nútiksarmek Jesukrístui̱ atumí iwiaakmari̱ tsaṉkamaktarum Yus wakera nuna túrutati tusarum. Jesukrístuja̱i̱ tura asarum Yus shiir enentáimtikrume.

⁶ Jesukrístunun Yusa Papirí̱i̱n jú̱nis áarmaiti “Iistarum. Kayan tí peṉkeran achikjiai” Yus tímiayi. “Je̱a̱n emka apujtuamuri̱ atí tusan Seúnnum ápujeajai. Nin enentáimtana nu ántar enentáimtachu asa natsa̱rchattawai.” Isa. 28:16

⁷ Kristu nekas Yusa uchirí̱nti nekas tírum enentáimtarmena nu “kaya tí peṉkeraiti” tárume. Antsu Krístun nekas enentáimtuiniatsna nú kaya nakitrámuiti. Ju̱ áarmaiti “Je̱a̱n je̱a̱min nakitrarmia nú kaya je̱a̱n emka apujtuamuri̱ atí tusa apujamuiti.” YKan. 118:22

⁸ Tura ju̱sha aarma awai “Tukumak iniaartin káyaiti.” Isa. 8:14 Kame shuar Jesukrístunun etserkamun nakitiakka ¿enentáinium itiur péṉker wekasat? Wats, nú shuar Krístun umirainiachu ásar tuke túrunatin asamtai tukumainiawai.

Yus achikmaitrume

⁹ Tura átumka Yus achikmaitrume. Tura wínian pujurtursarat tusa yajauchinmaya̱ Uunt Yus akantámkaitrume. Yusna asarum péṉker enentáimin ajasurme. Tura sumakma asarum Yúsnaitrume. Nisha winia péṉkerun etserturkarat tusa túraiti. Kame kiritniunmaya̱ jiinkirum ni tsáapnintri̱n wekasatniun achirmákurme.Jiin. 19:5-6; Muis. 10:15; Isa. 61:6

¹⁰ Yaunchu nusháa shuar áuyarme. Tura antsu yamaikia Yus shuar ajasrum, Niniu ajasurme. Use. 1:9-10; Rum. 9:25-26 Yus shuar ajatsrumni̱ṉ ¿ya waitnentrampramia? Antsu yamaikia Yus waitnentramuitrume. Use. 2:23; Rum. 11:30

“Yúsnaitjiai” tu enentáimsatin

¹¹ Yatsurtirmin tájarme Yusna ajasrum ju̱ nuṉkanam írar matsatu asarum atumí aya̱shi̱ wakerana nu tsaṉkatkairap. Aya̱shim wakerana nu túrakmiṉkia ame enentáim nuja̱i̱ yajauch ajastatui.

¹² Yus shuarchanum péṉker wekasatarum. Túrakrumni̱ṉkia nisha yamái “Yus shuar yajauch túruiniawai” ántar tuíniayataṉ ukunmaṉka Yusja̱i̱ iṉkiunaiktin tsawant jeamtai péṉker wekarmena nuna enentáimturmasar nú shuarsha Yusan shiir awajsártatui.

¹³ Kristu atumí Uuntri̱ asamtai ju̱ nuṉkanam akupin áiniana nusha umirkatniuitrume. Uunt akupin ashí akupin asamtai umirkatarum.

¹⁴ Tura ni akupeamuri̱ ainia nusha tunaan túruinia núnaka asutiáti tura péṉkeran túruinia núnaka shiir awajsati tusa úunt akupin akupkámu ásarmatai umirkatarum.

¹⁵ Nekas péṉker wekaamurmiji̱a̱i̱ enentáimcha ainia nu netse chichaamuri̱ itiatmamtikiatarum tusa Yus wakerawai.

¹⁶ Tunaanumia̱ aṉkant ajasu asarum péṉker wekasatarum. Túrasha wi aṉkant ajaschajak tusarum náṉkamsarum yajauch túrawairap. Antsu Yusna asarum ni wakera nuna umirkátjai tusarum anearum wekasatarum.

¹⁷ Ashí aents shiir enentáimtustarum. Yus shuar ainia nusha aneetarum. Yus ashamkatarum. Úunt akupniusha shiir awajsatarum.

Yus shuarti katsuntratin

¹⁸ Takarniutirmesha ame úuntrum péṉker shiir enentáimturmakuisha tura yajauchitkiuisha umirkatarum.

¹⁹ Nekaatarum. Ántar wáitkiarmainia nui̱ “Yus iirui” tu enentáimsa katsunteakrumka tí peṉkeraiti.

²⁰ Yajauch túrawakmin asutiámamtai katsunteakmeka nui̱sha wariṉ ati. Antsu péṉker túrawakmin asutiámamtai katsunteakmeka ju̱ka Yusai̱ tí peṉker túrame.

²¹ Núnisaṉ túrunatin achikmaitrume. Kristu wáitrutmasmiarme nui̱ Wi túraj núnisaṉ túrawarmi tusar wáitsamiayi.

²² Krístuka tunaan peṉké túrachmiayi. Tura chikichkinkesha peṉké anaṉkachmiayi. Isa. 53:9

²³ Kátsekeamsha Niṉkia katsekachmiayi. Wáitkiamsha “yapajmiáktaj” tíchamiayi. Antsu “winia Apar Yus iistí” tímiayi Yus péṉker túrin asamtai.

²⁴ Kristu imia Niṉki ni aya̱shí̱i̱n ii tunaari̱n entsakí̱ krúsnum jarutramkamiaji. Kame iikia yajauch túrutainmaṉka jákaitji. Túmaitiatar naka péṉkera nuja̱i̱ métek túratniunam iwiaakji. Ántsarik Ni asutniámuja̱i̱ iikia tsuámaruitji.

²⁵ Murik ni pujutái̱ri̱n waketkitniun nékatsna ántsarmek atumsha meṉkaka wekaimiarme. Tura yamaikia atumí wáitmauri̱i̱n waketkintrume. Atumí waitmau Krístuiti atumí enentái̱n wainnia nu.