1 Kur. 7 - Yus Papí: Shuarja̱i̱ Yus Yamaram Chicham Najanamu

Nuatkatniush nuatkashtincha péṉkerkete

¹ Ayu. Átum áatrurmarmena nuna yamaikia ujaktajrume. Shuar nuatteachkusha péṉkeraiti.

² Tura ti tsanirmatniun enentáimtuinia ásar ashí áishmaṉ ní nuwe̱nak nuatkati tura ashí nuwa̱ ní aishri̱niak niniumkati.

³ Áishmaṉsha ni aishri̱ asa nuwe̱ túratniua nuna umiktiniaiti. Núnisaṉ nuwa̱sha ni nuwe̱ asa ni áishri̱n túratniua nuna umiktiniaiti.

⁴ Núwa̱ka niṉki ni aya̱shí̱ nérenniuchuiti antsu ni áishri̱niuiti. Núnisaṉ áishmaṉsha niṉki ni aya̱shí̱ nérenniuchuiti antsu ni nuwe̱nuiti.

⁵ Ni aya̱shi̱n suritnaikiashtin áiniawai. Tura mai̱ itit awajnaitsuk Yusan áujsatniun wakeruiniakka ishichik tsawant kanakmin áiniawai. Tura nuiṉkia atak tsaniṉ pujustin áiniawai. Túracharmataiṉkia iwianchi uuntri̱ Satanás, tunaanum iniartinian útsutkattawai katsuntratniun tujintiakui.

⁶ Ayu. Tura nuní̱ atumín áatrayatnak núja̱i̱ṉkia “ashí shuar páchitsuk nuatkatniuiti” tátsujai. Nuatkatniuitkiumka péṉkeraiti.

⁷ Túramtai “ashí wiji̱a̱i̱ métek nuatkachuitkiuṉka maak ainti” tajai. Tura Yus ashí shuaran métek najanachuiti. Chikichan nuatkatniun súsaiti tura chikichnaka yúpichuch katsuntratniun súsaiti.

⁸ Natsancha tura waje̱ncha ju̱na tajai “Wiji̱a̱i̱ métek nuattsuk pujusrumka péṉkeraiti.”

⁹ Tura katsuntratniun tujintkiarka nuatkarti. Tura ti katsuntrachmin nekapeakum nuatkatin péṉkeraiti.

¹⁰ Nuatnaikiarun antsu tajai “Nuwa̱ nuatkamuka áishri̱n ikiukchatniuiti” tajai. Núnaka ii Uuntri̱ Kristu akupkaiti aya winia chichampruchuiti.

¹¹ Túramtai ni áishri̱n ikiukkia atak niniurtutsuk niṉki pujusti tura tsaniṉ pujustinian wakerakka ataksha ni áishri̱ni̱ṉ waketkiti. Núnisaṉ áishmaṉsha ni nuwe̱n ajapashtiniaiti.

¹² Chíkich shuaran ju̱na tajai wikia ii Uuntri̱ Kristu ju̱na akupkachuiti. Yus shuara nuwe̱ṉka Yus shuarchaitkiuṉka tura ni áishri̱ji̱a̱i̱ pujustinian wakerakka péṉkeraiti, ajapashtiniaiti tajai.

¹³ Núnisaṉ Yus shuara aishri̱ Yus shuarchaitkiuṉka tura ni nuwe̱ja̱i̱ pujustinian wakerakka péṉkeraiti, ikiukchatniuiti.

¹⁴ Nú nuwa̱ka “Yus shuarchaja̱i̱ tsaniṉ pujakun Yusja̱i̱ yajauch ajastatjai” tu enentáimprashtiniaiti. Antsu ni Yus shuar asamtai ni aishri̱ niji̱a̱i̱ pujá asa péṉker ajasminiaiti Yusja̱i̱. Núnisaṉ núwa̱ka Yus shuarchaitiat ni aishri̱ Yus shuaraitkiuiṉkia niji̱a̱i̱ tsaniṉ pujá asa péṉker ajasminiaiti Yusja̱i̱. Núnisaṉ ni uchirí̱sha péṉker ajasmin áiniawai Yusja̱i̱. Núnischaitkiuiṉkia ni uchirí̱ Yus shuarcha uchirí̱a áintsar ainti.

¹⁵ Tura áishmaṉsha nuwa̱sha Yus shuarcha ana nu kanaktinian wakerakka túrati. Yus shuar nuja̱i̱ aṉkantaiti. Núnisaṉ asati. Tuke mánaiktinian Yus nakitramaji.

¹⁶ ¿Núwa̱ka ni aishri̱ Yus shuar ajastatna nuna nekas nékawak. Tura áishmaṉsha ni nuwe̱ Yus shuar ajastatna nuna nekas nékawak? Yus shuarcha nuka wétinia wakerakka wetí.

¹⁷ Wátsek. Shuar Yus shuar ajaska Yus nin najanama áintsaṉ tuke átiniaiti. Tura pujumia áintsaṉ pujusminiaiti. Núnaka ashí Yus shuarnum akupeajai.

¹⁸ Iis, Yus shuar ajasúka Israer shuaraitkiuṉka tuke Israer shuar atí. Tura Israer shuarchaitkiuṉka Israer shuar ajastaj tusa wakerukchatniuiti.

¹⁹ Israer shuaraitkiumsha tura Israer shuarchaitkiumsha nuka enentáimtuschatniuiti. Aya Yus tana nu umirkatin nekas enentáimtustiniaiti.

²⁰ Yus shuar ajasúka nuik pujumia áintsaṉ pujusminiaiti.

²¹ Chíkich shuara takarniúri̱ asam ti itiurchat pujakmesha itiurchat enentáimpraip. Tura aṉkant jiinkimniaitkiumka jiinkitia.

²² Aṉkantchaitkiumka aṉkantaitkiumsha ju̱ enentáimprata. Takarniuka Yus shuar ajas tuke chíkich shuara takarniúri̱nkiusha shiir enentáimpratniuiti Kristu nin tunaanumia̱ aṉkant awajsámtai. Tura shuar takarniuchua nu Yus shuar ajas Kristu takarin ajasuíti.

²³ Ti wáitsamiayi Kristu iin aṉkant awajtámsatniun. Ni numpe̱ja̱i̱ sumakma asarum shuar emetamu áirap.

²⁴ Tuma asamtai shuar Yus shuar ajas nuik pujumia áintsaṉ yamaisha pujusti tura Yusan enentáimtus wekasati.

²⁵ Nuwa̱ natsa túratniua nuna yamaikia áujmatjai. Kristu ju̱na akupkachmai tura Kristu aneṉkratmari̱ ti nekapsa asamtai wi tájana nu antukminiaiti.

²⁶ Tuma asamtai ju̱na tajai. Ti itiurchatnum pujá asakrin shuar aya jú̱nisaṉ nuattsuk pujustin péṉkeraiti.

²⁷ Nuatkaitkiumka núwem ikiukip. Nátsaitkiumka nuwa̱ e̱a̱kaip.

²⁸ Tura nuatkumka tunáa túratsme. Nuwa̱sha niniurtukka nisha tunáa túrachuiti. Túrasha nuatnaikiaru ju̱ nuṉkanam itiurchatan ti wáinkiartatui. Nú itiurchatnumia̱ wi uwemtikraintjiai.

²⁹ Yatsuru, ju̱na tájarme. Ishichik tsawant taasai. Ju̱ya̱ṉka nuatkaru ainia nuka aya ni nua̱ri̱n enentáimprashtiniaiti antsu Yusna enentáimtustiniaiti.

³⁰ Núnisaṉ tuke Yúsnan enentáimsar útainia nusha utcha áintsar pujustin áiniawai. Warainia nusha warascharua áintsar pujustin áiniawai. Súmainia nusha sumakcharua áintsar pujustin áiniawai. Ju̱ nuṉkanmaya̱ja̱i̱ itit awajmámsashtiniaitji.

³¹ Núnisaṉ aya jú̱ nuṉkanam péṉker pujustin ti takaschatniuiti. Ashí jú̱ nuṉkanmaya̱ṉka amuukatniuiti.

³² Jú̱ nuṉkanmaya̱ja̱i̱ṉ itit ajaschak tusan wakerajrume. Nátsaka Yúsnan enentáimtawai ni wakera nuna umiktinian.

³³ Túrasha nuatkaka ju̱ nuṉkanmaya̱n enentáimtawai ni nua̱ri̱n shiir enentáimtiksattsa.

³⁴ Núnisaṉ nuwa̱ natsasha nuatkamusha niisháa enentáimiainiawai. Nuwa̱ natsa Yúsnan enentáimtawai ni aya̱shí̱sha ni wakaní̱sha tuke Yusja̱i̱ shiir atí tusa. Tura nuatkamuka ju̱ nuṉkanmaya̱n enentáimtawai ni áishri̱n shiir enentáimtiksattsa.

³⁵ Atumín yáiṉtajtsan ju̱na tájarme. Itiurchat awajsattsan wakeratsjai antsu shiir wekaakrum itit awajtsuk Yus shiir enentáimtustarum tusan wakerajai.

³⁶ Tura shuar ni nawantri̱ natsan nuatnaikiati tákuṉka péṉkeraiti. Nawantri̱n natsa tuke apujsatniun nakitiakka surukminiaiti. Nusha tunaachuiti.

³⁷ Tura chíkichka tuke natsan apujsataj tákuṉka nekas péṉkeraiti. Apujsatin itiurchatchaitkiuiṉkia tura ni nawantri̱ nuatnakchatniuitkiuiṉkia apujsatniuiti. Apujsaṉka nekas péṉker túraiti.

³⁸ Tuma asamtai nuatmamtikiaṉka péṉker túrayi tura apujsaṉka nu naṉkaamas péṉker túrayi.

³⁹ Nuwa̱ aishri̱ iwiaaku pujakuiṉkia tuke niji̱a̱i̱ tsaniṉ pujustiniaiti. Tura ni aishri̱ jakamtai aṉkant ajas ni wakera nuja̱i̱ Yus shuaran iis niniumkatniuiti

⁴⁰ tura tuke nuatnatskesha nu naṉkaamas nekas shiir pujustatui. Tú enentáimjiai wikia tura Yusa Wakanísha métek tátsuash.