1 Kur. 6 - Yus Papí: Shuarja̱i̱ Yus Yamaram Chicham Najanamu

Nuamtak Yus shuarak itiurchatan nui̱ṉ iwiaratin

¹ Yus shuarka chíkich Yus shuarja̱i̱ itiurchat pujakka úuntnum untsunáik Yus shuarchanum iwiarashtiniaiti. Antsu Yus shuar írunna nuja̱i̱ iwiarati.

² Enentáimpratarum. Amuukatin tsawantai̱ Yus shuarka ashí ju̱ nuṉkanmaya̱ shuara tunaarí̱ mash nekaawartatui. Tura ashí tunáa nekaatniuitkiurmeka itiur yúpichuchia nu nekaashtatrum.

³ Nu arantcha nayaimpinmaya̱ suntara túramuri̱sha nekaattaji péṉkerashit tusarⁱ. Nayaimpiniam túrawarma nekaatniuitkiurkia itiura ju̱ nuṉkanmaya̱ nu tujintkiattajⁱ.

⁴ Pai, itiurchat ákuiṉkia Yus shuar peṉké tujintiainiana nuja̱i̱ iwiaratarum antsu.

⁵ Natsa̱a̱ruk tusan nuna tájarme. ¿Kame atumíinkia chikichkisha ni yachi̱ itiurchatri̱ péṉker iwiaramnia atsawak?

⁶ ¿Urukamtai Yus shuar ni yachi̱ji̱a̱i̱ itiurchat pujakka Yus shuarchanum iwiaratniun wea?

⁷ Atumí itiurchatri̱ úuntnum jukirmeka núja̱i̱ṉkia átum tujintkiamu páantaiti. Natsantchakait. Antsu itiurchat ana nusha ¿urukamtai katsuntram asakátsum? Kasamkámusha ¿urukamtai katsuntram asakátsum?

⁸ Antsu átumka nuamtak yachi̱ji̱a̱i̱ itiurchat awajnáiyarme tura kasarnáiyarme.

⁹ Tunáa túrinkia Yus akupeamunam pachinkiachmin ainia nu nékatsrumek. Anaṉnawairap. Ashí tsanirma nusha najankamu yusan tikishmátniusha, nuamtak áishmaṉja̱i̱ tsanirmasha,

¹⁰ kasasha, ashí kuítian ikiauwincha, nampencha, tsanumniusha, yajauch chichainia nusha, chíkich shuaran anaṉkawar atantin ainia nusha Yus akupeamunma nuí̱ peṉké waya̱shtin áiniawai.

¹¹ Atumíya̱sha chíkich chíkich nuna túrin armai. Tura yamaikia ii Uuntri̱ Jesusa kakarmari̱ji̱a̱i̱sha tura ii Yusri̱ Wakaní̱ kakarmari̱ji̱a̱i̱ atumí enentái̱ shiir ajasuíti, atumsha Yusna ajasurme tura tuke péṉker ajasurme.

Ii aya̱shí̱ Yusa Je̱e̱nte

¹² “Ashí túramniaitjiai” tiniu áiniawai nuka nekasaiti. Tuma ai̱ṉ nuka péṉker wekasatniun mash yáintkiashtatui. Nekas ashí túramniaitjiai tura náṉkamas túratniuja̱i̱ nupetnakchattajai.

¹³ Ju̱nasha tiniu áiniawai “Apatuk wakeja̱i̱nchu tura wake apatkuja̱i̱nchu mai̱ ántraiti.” Apatkuja̱i̱ wakesha nekas mái̱ metek enentáimpratin áiniawai tura Yus mái̱ metek amuktatui. Núnisaṉ ii aya̱shi̱ ii Uuntri̱ Krístunuiti tura Kristu ii aya̱shi̱ nérenniuiti. Tuma asamtai ii aya̱shí̱ji̱a̱i̱ tsanirmashtiniaiti.

¹⁴ Tura Yus ii Uuntri̱ Jesusan iniantkímia núnisaṉ ii aya̱shí̱ncha nu kakarmari̱ji̱a̱i̱ iniantkíttiawai.

¹⁵ Ashí ii aya̱shi̱i̱n Kristu aya̱shímkiaiti. ¿Nu átumka nékatsrumek? Winia aya̱shrusha Kristu aya̱shí̱i̱ya̱ asamtai ¿itiurak nuna tsanirí̱ aya̱shí̱n najanattaj? Peṉké túrachminiaitjiai.

¹⁶ Kame ¿ju̱sha nékatsrumek? Áishmaṉ tsaniri̱ji̱a̱i̱ tsaniṉkiar chikichik aya̱shtinia áinis ajainiawai. Núnisaṉ Yus Papinium áarmaiti, “Mai̱ chikichik aya̱shtinia áinis ajasártatui” Naṉ. 2:24

¹⁷ Tura shuar ii Uuntri̱ Krístuja̱i̱ tsaniṉkiar mai̱ chikichík wakantin ajainiawai.

¹⁸ Tuma asamtai tsanirmatniunmaya̱ yájaya̱ṉ wainkiarum pisartarum. Chíkich tunáa írunna nu ii aya̱shí̱nkia ti yajauch awajeatsui. Túrasha shuar tsanirmakka ní aya̱shi̱niak yajauch awajeawai.

¹⁹ Yusa Wakaní̱ ame enentáimin pujurtamu asamtai ame aya̱shim ni je̱e̱nte. Nu Wakanniaka Yus amasuiti. ¿Nuka nékatsrumek? Tuma asamtai ame aya̱shim nérenchaitme.

²⁰ Kristu numpe̱ja̱i̱ sumakma asamtai aya̱shmisha wakanmisha Yusna áiniawai. Yusna asamtai Yus shiir awajnásti tusam aya̱shmiji̱a̱i̱ péṉker túratniuitme.