1 Kur. 2 - Yus Papí: Shuarja̱i̱ Yus Yamaram Chicham Najanamu

Kristu krúsnum jakamu étserma

¹ Wisha yatsuru, atumíin jeamaj nui̱ Yus Chichaman ti neka chichainia áintsaṉ tura íwiasanak ujakchamajrume.

² Tura atumji̱a̱i̱ pujakun aya chikichkiniak nekaatniun enentáimpramjai. Ju̱i̱ti, Jesukrístu tura Jesukrístu krúsnum jakamu.

³ Nékayatan kakarmachu sapijmiashím jearmiajrume.

⁴ Yus Chichaman ujaakun ti neka chichainia áintsaṉ nupetkataj tu enentáimturchamajrume. Antsu Yusa kakarmari̱ncha tura ni Wakaní̱ncha paant iniakmasan Yus Chichaman ujakmajrume.

⁵ Aentsu nekatairi̱ji̱a̱i̱ Yus enentáimtuschatniuiti antsu Yusa kakarmari̱ paant nekaarum Yus enentáimtustiniaitrume. Nuní̱ asamtai Yus Chichaman tu ujakmajrume.

Yusa Wakaní̱ Yúsnan jintintiawai

⁶ Túmaitiat Yusa nekatairi̱ átsuk. Yúsnan unuimiáraruja̱i̱ Yusa nekatairi̱n áujmatji. Tura Yusa nekatairi̱ṉkia aentsu nekatairi̱ áintsachuiti. Ju̱ nuṉkanam akupin ainia nuna nekatairi̱nchuiti Yúsnaka. Ju̱ nuṉkanam akupniúka ishichik pujus amukachartatuak.

⁷ Yaunchu ju̱ nuṉka atsa̱i̱ṉ Yus iin uwemtikrampratniun enentáimpramiayi ti shiir pujusármi tusa. Ju̱ Yusa enentáimmiari̱ yaunchu nekanachmiayi tura yamaikia nu nekaar áujmatji.

⁸ Ju̱ nuṉkanam akupniúka nuna peṉké nekaacharmiayi. Nékainiakka ii Uuntri̱ timiá shiira nuna krúsnum mácharu a̱a̱yi.

⁹ Yaunchu Yus Papinium áarchamukait “Shuar Yusan aneana nuna Yus tí shiiran susattawai. Susattana nuka timiá péṉker asamtai ‘shuar wáinkiachman, antukchamuncha, enentáimtachmancha’ Yus susattawai.” Isa. 64:4

¹⁰ Tura Yusa Wakaní̱ ii enentái̱n pujurtamuk Yus suramsattajnia nuna yamái paant jintintramji. Nu Wakancha imia Yus enentáimmiancha mash nékawai.

¹¹ Shuar enentáimna nuna chíkich shuar nekaamniakait. Antsu aya ní enentái̱ji̱a̱i̱ṉ nékatsuk. Núnisaṉ aya Yusa Wakaní̱ Yúsnan paant nékawai.

¹² Ju̱ nuṉkanmaya̱ aents enentáimiainia nuja̱i̱ Yusna nekaachminiaiti. Antsu Yusa Wakaní̱n iin súramaj nuja̱i̱ Yus shiir tsaṉkatramajnia nu nekaamniaitji.

¹³ Yusa Wakaní̱ jintintramji Yúsnan chichastinian Ni wakera áintsaṉ. Ni chichame̱n súramji. Túramtai ii nékamuja̱i̱ Yúsna étsertsuji. Tuma asamtai imia Yusna nuka Yusja̱i̱ péṉker wekainia nu jintíaji.

¹⁴ Yus shuarcha Yusa Wakaní̱niun ántatsui ántraiti tusa. Aya Yusa Wakaní̱ jintintiámniaitkiui Yus shuarcha nuna peṉké nekaachmin áiniawai.

¹⁵ Antsu Yusa Wakaní̱n takaku ashí mash iis péṉkera nuna nekaamniaiti. Ni túrana nunasha chíkich shuar sumamtikiachminiaiti.

¹⁶ Yus Papinium yaunchu áarmaiti “¿Yusa enentáimmiari̱ ya neka. Tura Yusan ya jintintiámniait?” Isa. 40:13 tu áarmaiti. Tuma ai̱ṉ iikia Yus shuar ájinia nu, Kristu enentáimna núnisrik enentáimji.