1 Kur. 16 - Yus Papí: Shuarja̱i̱ Yus Yamaram Chicham Najanamu

Yusa kuitri̱ irurtin

¹ Yusa kuitri̱ irurtinkia Yus shuaran Karaseanam tímiaj núnisnak atumniasha tájarme.

² Ashí tumiṉtin Yus súramna áintsam akankám ikiusta. Núja̱i̱ṉkia wi jeattaj nui̱ yaunchu akankámu mash irurmin átatui.

³ Nui̱ jeancha átum anaiyarmena nu shuaran papiji̱a̱i̱ Jerusaréṉnum akupkáttajai. Tura atumí kuítrumin ai̱sha ii yachi̱n súsartatui.

⁴ Wisha wéminiaitkiuiṉkia wiji̱a̱i̱ wéartatui.

Papru irasártatna

⁵ Wi Masetúnianam wétiniaitjiai tura nuyá̱ Kurintiunam jeattajai.

⁶ Nui̱sha untsurí tsawant pujuschatjash. Ishichik nantusha wéchamnianum pujuschatjash. Tura wi atak wéakui atumsha yáintkiarum shiir akuptúkchattarpash.

⁷ Aya wárik naṉkaamaktinian nakitiajai. Antsu Yus wakerakuiṉkia untsurí tsawant atumji̱a̱i̱ pujustaj tajai.

⁸ Tura ju̱i̱ṉ Ipisiunam Pintikiustís nampernum pujustatjai.

⁹ Ju̱i̱ṉkia Yusa takatri̱ tí shiir takastin awai. Tura untsurí shuar wi takaamun nakitiáiniawai.

¹⁰ Timiutéu nui̱ jeamtaiṉkia shiir awajsatarum sapijmiaka̱i̱ṉ. Nisha wiji̱a̱i̱ métek Yusa takatrí̱n takaawiti.

¹¹ Nu asamtai nakitrairap. Antsu yáiṉkrum winí̱ shiir akupkatarum. Chíkich yachi̱ji̱a̱i̱ tatí tusan nákajai.

¹² Apurusnasha chíkich yachi̱ji̱a̱i̱ winí̱ iirmasarti tusan ti seamjai túrasha peṉké nakiarmai. Kame ni aṉkant aku nui̱ winishtimpiash.

Áujmamsamu

¹³ Aneara tariarum Yus nekas enentáimtustarum. Áishmaṉchakaitrum kakaram ajastarum.

¹⁴ Anenkartamuja̱i̱ mash túratarum.

¹⁵ Ayu, yatsuru. Estepanasa shuari̱ ashí emka Akaya nuṉkanam Yus shuar ajasárman nékarme. Nisha Yus shuaran yáiṉtajtsar tuke takainiawai.

¹⁶ Nisha tura ashí niji̱a̱i̱ métek yáiṉkiar takainia nú shuar seatmana nu tuke túratarum.

¹⁷ Estepanassha Jurtunátusha Akaikiusha atumíiya̱ táarmatai shiir waraajai. Átum yajá pujakrum tujintiarmena nuna túrawarmai.

¹⁸ Nisha winia shiir enentáimtikrurarai. Núnisaṉ shiir enentáimtikramprattarme. Nuní̱ aents tuke shiir enentáimtustiniaiti.

¹⁹ Asia nuṉkanmaya̱ Yus shuar amikmátmainiawai. Akirasha ni nuwe̱ Prisiraja̱i̱sha ashí Yus shuar ni je̱e̱n Yus Chichaman irunturarusha Jesusa náari̱i̱n amikmátmainiawai.

²⁰ Ashí ii yachi̱sha amikmátmainiawai. Nuamtaksha shiir awajnáisarum amikmániatarum.

²¹ Wi Papru asan jú̱chiniak winia uwejruja̱i̱ áaran amikmajrume.

²² Ii Uuntri̱ Jesukrístun aneachuka yajauchiniam yumiṉkramu atí. Ii Uuntri̱yá, wari tatá.

²³ Ii Uuntri̱ Jesukrístu yaintmakarti.

²⁴ Jesukrístunu asakrumin atumín ashí ti aneajrume. Nu atí.