1 Kur. 15 - Yus Papí: Shuarja̱i̱ Yus Yamaram Chicham Najanamu

Kristu nantakmia

¹ Ataksha yatsuru, uwempratin chichaman wi etserkamaj nuna atumín enentáimtikrattsan wakerajrume. Nu chichamsha atumsha enentáimturarum tariarurme.

² Nu chichamsha átum ántar enentáimtachkurmeka uwempraitrume. Wi ujakmajrum nu tuke enentáimtaitkiurmeka nekas uwempraitrume.

³ Winia ujatkámunak ujakmajrume. Nu chichamsha ashí naṉkaamas úuntaiti. Ju̱i̱ti nu chicham, Ii tunaari̱n asakártasa Kristu jarutramkamiaji, Yus Papinium tana núnisaṉ.

⁴ Tura jakamtai iwiarsarmiayi. Nuyá̱ menaintiú tsawant tsawa̱rmanum Yus Nin iniantkímiayi, Yus Papinium tana núnisaṉ.

⁵ Nantaksha Pítrun wantintiukmiayi nuyá̱ ni akatrámuri̱ncha wantintiukarmiayi.

⁶ Nuya̱ṉka kiniantusa naṉkaamas Yus shuaran wantintiukarmiayi. Nú shuarnumia̱sha ishichik jákaru áiniawai tura untsurí tuke pujuiniawai.

⁷ Nuya̱sha Sántiakun tura nuyá̱ ashí ni akatrámuri̱n wantintiukmiayi.

⁸ Ashí amúamunmasha winiasha wantintiurkamiayi, wi yajauch wekáa ai̱ṉ.

⁹ Wisha Yus shuaran ti yajauch awajsa asan chíkich Yus akatrámuja̱i̱ ímianchaitjiai. Nekas winia péṉkeruja̱i̱ ni akatrámuri̱ntjiai tíchamniaitjiai.

¹⁰ Antsu Yus ti shiir waitnentak winia enentái̱rui̱ pujurtus péṉker najataiti. Nu asamtai winia kakarmarja̱i̱ takaschaitjiai antsu Yus waitnenkartin asa winia enentái̱rui̱ takaakui ashí ni akatrámuri̱n naṉkaamas takasuitjiai.

¹¹ Tura wi takaakuisha tura ni takainiakuisha mái̱ péṉkerkete. Nu chichamka mash étsereaji tura nu chichamsha átum enentáimtusmarme.

Jákaru nantakiartatui

¹² Iisha “Kristu jakamunmaya̱ nantakniuiti” tu étsereaji. ¿Itiur nuikia shuar jakamunmaya̱ nantakchatniuiti tuinia?

¹³ Jakamunmaya̱ nantakchatniuitkiuiṉkia nuikia Krístusha nantakchaiti.

¹⁴ Tura Kristu nantakchaitkiuiṉkia ii ujajnia nu peṉké ántraiti, atumsha Kristu enentáimtarmena nusha ántraiti.

¹⁵ Núnisaitkiuiṉkia iisha “Yus Krístun iniantkímiayi” tákur waitruamji. Iis, nekas jakamunmaya̱ nantakchamniaitkiuiṉkia nuikia nekas Yus Krístun iniantkichuiti.

¹⁶ Jaka nantakchatniuitkiuiṉkia imia Krístusha iniantkichmaiti.

¹⁷ Tura Kristu iniantkichmaitkiuiṉkia átum Kristu enentáimtamusha peṉké ántraiti. Tunaarumsha asakárchamu áiniawai.

¹⁸ Núnisaitkiuiṉkia Yus shuar jákaru ainia nu tuke meṉkakaru áiniawai.

¹⁹ Iikia Kristu enentáimtusar tuke Niji̱a̱i̱ shiir pujustin nákaji. Tura aya jú̱ nuṉkanam pujustiniaitkiurkia Kristu ántar enentáimtakrin ashí naṉkaamas waitnentrampratniuitji.

²⁰ Antsu imiankas Kristu jakamunmaya̱ nantakniuiti. Ashí ukunam jakanmaya̱ tuke jákashtinian nantakiartatna nuna Ni émtukuiti.

^21-22 Yaunchu Ataṉ yajauch túramtai ashí shuar jákatin áiniawai. Núnisaṉ yamaikia Krístuja̱i̱ṉ tuke atakka jákashtinian nantakiartiniaiti. Iis, chikichik áishmaṉja̱i̱ṉ jákatin naṉkamnamiayi. Nuka Ataṉauyayi. Núnisaṉ chikichik áishmaṉja̱i̱ nantaktin naṉkamnamiayi. Nuka Krístuiti.

²³ Yus wakerana nui̱ Yusna nu mash nantakiartatui. Kristu emka juukma áintsaṉ émtukim nantakniuiti tura atak ju̱ nuṉkanam tara ashí ni shuari̱n júuktinia áintsaṉ iniantkíttiawai.

²⁴ Nuiṉkia mash amuukattawai. Nui̱ Kristu ashí uuntri̱ ashí akupniuncha, núnisaṉ ashí jú̱ nuṉkanam írunna nunasha nupetak emesrattawai. Krístusha ashí mash ni Aparí̱n susattawai. Tura Yus Apa ashí akupin nuikia átatui.

²⁵ Iis, jú̱nisaṉ átatui. Emka Yus Apa ashí ni nemasri̱n nupetak Krístun susattawai akupin atí tusa.

²⁶ Tura ni nemasri̱n nupetak ashí amúamunam jákatniuncha nupetkattawai.

²⁷ Yus Apa ashí Krístun súsaiti ashí akupin atí tusa.YKan. 8:6 Yus Papinium tu áarmaiti. Tura “ashí Krístun súsaiti” táyat Yus Apancha susamuiti tatsui. Antsu Yus Apa ashí Nin susa asa Niṉki súsachmaiti.

²⁸ Tura Yus Apa ashí mash ni Uchirí̱n Krístun nekas susamtai Kristu nuikia ashí akupin ajas atak ni Aparí̱n mash awaṉtuki̱ núnisaṉ surumaktatui. Nuiṉkia Yuska tuke ashí naṉkamantu átatui.

²⁹ Wats, shuar jakaan enentáimtusar imiantinniasha ¿urukamtia nuna túruinia? Jákaru nantakchatniuncha ¿urukamtai imianainia?

³⁰ Iikia ¿urukamtai tuke jániṉkiaruitiajⁱ? Nantakchatniuitkiuiṉkia antra wáitsaintji.

³¹ Atsá, peṉké áintsachuiti. Nu asamtai átum ii Uuntri̱ Jesukrístu enentáimtakrumin wi shiir enentáimtajrume. Tura wisha tuke tsawantin ti itiurchat pujakun jákatniua áintsaṉ pujajai.

³² Jakamunmaya̱ nantakchatniuitkiuiṉkia wi kajen shuarja̱i̱ Ipisiunam peṉké ántranak mánikiuitjiai. Maa, úunt ya̱wa̱a ánis kajen armai. Wats, nantakchatniuitkiuiṉkia antsu “yurumár nampektai kashin jákashtatjik” Isa. 22:13 tíminiaitji.

³³ Anaṉnawairap. “Péṉkeraitiatam yajauch shuarja̱i̱ tsaniṉkia wekaakmeka yajauch máatrattame” tiniu áiniawai.

³⁴ Tunáa ikiuakrum péṉker wekasatin shiir enentáimpratarum. Iis, shuar Yusan nékainiachu tuke awai. Atumín natsa̱a̱ruk tusan tájarme.

Iniantkímiu aya̱sh takustatji

³⁵ Shuarsha inintrúschanpiash ¿jákarusha itiurak nantakiarat. Nantakiarsha warí aya̱shniak takusarat?

³⁶ Enentáimtsuk inintrawai. Jiṉkiái araamsha jaka áintsaṉ amúatsuk. Túrayat tsapatsuk.

³⁷ Tsapaitniuri̱sha araatsme antsu trikiu jiṉkiaichisha chíkich áraka jiṉkiaichiri̱sha araame.

³⁸ Nuyá̱ tsapakuisha Yus wakerana núnisaṉ ní tsapaitniuri̱ncha suawai. Tura aṉkant aṉkant tsapaitniuri̱nkia súsaiti.

³⁹ Núnisaṉ ashí aya̱sh métekcha áiniawai. Aentsnaka niishaaiti. Kuntinniasha niishaaiti. Nanamtinniasha namaknasha niisháa áiniawai.

⁴⁰ Nayaimpiniam yaa írunui tura ju̱ nuṉkanam írunna nuja̱i̱ nusháa íimtin áiniawai. Nayaimpinmaya̱sha nuṉkaya̱sha shíirmari̱ nushaaiti.

⁴¹ Etsá̱ winchari̱sha nantunusha yáanusha mash nushaaiti. Nuamtak yaaksha chikicha winchari̱ṉkia chikichnaja̱i̱ṉkia nushaaiti.

⁴² Núniskete jaka nantaktincha. Káurtinnium iwiarsam jákashtinnium nantaawai.

⁴³ Antra nu iwiarnawai, shiira nu nantaawai. Kakarmachua nu iwiarnawai, kakarma nu nantaawai.

⁴⁴ Ju̱yá̱ aya̱sh iwiarnawai, nayaimpinmaya̱ aya̱sh nantaawai. Ju̱yá̱ aya̱sh átsuk. Núnisaṉ nayaimpinmaya̱ aya̱shsha awai.

⁴⁵ Yus Papinium nuní̱ áarmaiti “Emka áishmaṉ ni naari̱ Ataṉ, aents ajas iwiaaku ajasmiayi.” Naṉ. 2:7 Ukunmaṉka yamaram Ataṉka áintsaṉ Kristu, wakan asa ashí aentsun nekas iwiaaku átinian susamniaiti.

⁴⁶ Nayaimpinmaya̱ aya̱shkia émkachuiti antsu ju̱yá̱ aya̱sh émkaiti tura nuyá̱ nayaimpinmaya̱ nu.

⁴⁷ Emka áishmaṉ nuṉkaja̱i̱ najanamu asa nuṉkaya̱iti. Ukunmaya̱ áishmaṉsha ii Uuntri̱ Kristu asa nayaimpinmaya̱iti.

⁴⁸ Ataṉka áintsaṉ ainia nusha ju̱yá̱ aya̱shtin áiniawai. Kristu áintsaṉ ainia nusha nayaimpinmaya̱ aya̱shtin áiniawai.

⁴⁹ Yamái ju̱yá̱ áiniakur ukunam nayaimpinmaya̱ aya̱shtin ajastatji.

⁵⁰ Ju̱na tájarme yatsuru. Aya̱sh númpentin asa nayaimpiniam Yus akupeana nui̱, waya̱chminiaiti. Iis, káutaiṉkia káurchatniunam waya̱chminiaiti.

⁵¹ Yaunchu u̱kma nu yamái nekaatarum. Ashí jákashtatji antsu ashí yapajniáttaji.

⁵² Tura pusarⁱ muíttsarni̱ṉ ti wárik yapajniáttaji. Tura ashí iruntrarat tusa umpuartatui. Nú umpuamunmasha Yus shuar jákaru ainia nu káurchamnianum nantakiartatui. Iisha nuiṉ yapajniáttaji.

^53-54 Jú̱ kautaiṉkia káushtai̱n entsanar jakamnia nusha jákachminian entsantratniuiti. Nu túrunamtaisha Yus Papinium aarma uminkiattawai “Jáchataiji̱a̱i̱ jatain Yus takamtsuk nupetak amukuiti.

⁵⁵ Jatái̱yá̱, ¿itiura yamaisha nupetmaktatam? Jatái̱yá̱, ijiukrati maṉkartutairmesha ¿tui̱ aa?” Isa. 25:8; Use. 13:14

⁵⁶ Yaunchu Yus akupkámu tiniu asamtai shuar umitsuk tunaan tura jákatniuiti.

⁵⁷ Antsu yamaikia ii Uuntri̱ Jesukrístu túramuja̱i̱ jákatniunka Yus nupetrutmakuiti. Tura iincha nuja̱i̱ uwempratniun amaakui shiir yúmiṉkiaji.

⁵⁸ Nu asamtai aneamu yatsuru, pee anearum yawe̱tsuk nú nukap Yusa takatri̱ takastarum. Ii Uuntri̱ Krístuja̱i̱ tsaniṉkia takaarum nuka peṉké ántrachuiti. Nu paant nékarme.