1 Kur. 14 - Yus Papí: Shuarja̱i̱ Yus Yamaram Chicham Najanamu

Niisháa chicham unuimiáttsuk chichastin

¹ Nu asamtai aneṉkratin atarum. Tura núnisrumek Yúsnan péṉkera nu takastin wakeruktarum. Imiankaska Yus Chicham etserkatin péṉkeraiti.

² Núja̱i̱ṉkia niisháa chichamja̱i̱ unuimiatsuk chichastin péṉkerchaiti. Iis, nu shuar chíkich shuarja̱i̱ chichatsuk aya Yusja̱i̱ chichaawai. Ni chichame̱ peṉké antukchamniaiti. Yusa Wakaní̱ nin chichastinian suawai túrasha tana nu nekaachminiaiti.

³ Antsu Yus Chichaman étserea nuka shuaran yaya̱wai. Shuaran ikiatsuártasa tura ikiaká̱rtasa túrasha atsaṉkrattsa yaya̱wai.

⁴ Niisháa chichamja̱i̱ unuimiatsuk chichaana nuka aya niṉki katsua̱rtinian yáintmamui. Antsu Yus Chichaman étserea nuka ashí Yus shuaran ikiatsuáwai.

⁵ Atumsha ashí mash niisháa chichamja̱i̱ chichasku tusan wakerajrume. Túrasha nuna naṉkaamas Yus Chicham etserkaku tusan wakerajrume. Aya chichastinji̱a̱i̱ṉkia ju̱ imiá péṉkerchakait. Kame chichasma jintíakmeka maak. Nuja̱i̱ Yus shuar tsakarartatui.

⁶ Enentáimpratarum, yatsuru. Nui̱ iraakun aya niisháa chichamja̱i̱ chichaaknaka ¿itiura yáiṉtatjarum? Antsu Yus winia jintintruamuncha tura wi nékajna nunasha étserkunka yáiṉtatjarme. Yus Chichamnasha tura ashí Yúsnancha jintinkiuncha yáiṉtatjarme.

⁷ Peemsha tura tumaṉsha wi tájana áintsaṉ áiniawai. Péṉker tuntuiyamuka paant nekaamniaiti. Tura péṉker tuntuiyachkuiṉkia, nu tuntuiyamu nekaachminiaiti.

⁸ Suntarsha mesetnum wénakui ni uuntri̱ ni wakeramun ujaktinian kachun umpuawai. Paant umpuakuiṉkia suntarsha ni wakeramun nekaawartatui. Tura paant umpuachkuiṉkia suntarsha ¿itiurak mesetnum wétinian iwiarat?

⁹ Atumji̱a̱i̱sha núniskete. Nekaachmin chichamja̱i̱ chichaakminkia ¿támena nuna itiur nekaawartata? Nase chichartsumeash.

¹⁰ Ju̱ nuṉkanmaya̱ chichamka ti untsurí írunui. Nu chichaman nékakka ashí antukmin áiniawai.

¹¹ Tura chíkich shuara chichame̱n ántachkunka níji̱a̱i̱ṉkia yajaya̱ apachia áintsanak ajajai. Nisha wíji̱a̱i̱ṉkia yajaya̱ apachia áintsaṉkete.

¹² Tuma asamtai Yusa takatri̱ ti wakera asarum ashí Yus shuaran ikiarartatna nú takat nekas wakeruktarum.

¹³ Nu asamtai niisháa chichamja̱i̱ chichaitkiumka chichasumna nu jintiartin Yus seatá.

¹⁴ Niisháa chichamja̱i̱ Yusan áujeaknaka nekas winia wakantruja̱i̱ áujeajai tura áujsajna nuna nékatsjai.

¹⁵ Antsu wikia jú̱nisan enentáimjiai. Yusan áujeakun winia wakantruja̱i̱sha áujsattajai tura enentáimtsuk áujsashtatjai. Kantamkuncha kantamaj nuna enentáimkiun winia wakantruja̱i̱sha kantamáttajai.

¹⁶ Amesha shuar iruntramunam aya wakanmiji̱a̱i̱ niisháa chichamja̱i̱ Yus shiir yumiṉsakmincha nekaachmin asamtai nékachuka ámiji̱a̱i̱ métek áujsatniun jeatsui.

¹⁷ Ti shiir Yus yumiṉsam áujeatsmeash tura chíkichka Yusja̱i̱ ikiakáatsme.

¹⁸ Ashí átum nusháa chichamja̱i̱ chicharmena nuna naṉkaamas wikia chichaajai. Nuna Yusan yumiṉsajai.

¹⁹ Túmaitiatnak untsurí chichamja̱i̱ chichasan ántumtikiashtinji̱a̱i̱ṉkia naṉkaamas Yus shuar iruntramunmaṉka aya seṉku chichamchiji̱a̱i̱ṉ tiintjiai paant jintintiáwartaj tusan.

²⁰ Yatsuru, uchia áintsarum enentáimprairap. Kuirchia áintsarum yajauch túrashtin enentáimpratarum tura chíkich írunna nuja̱i̱ uunt enentáimpratniua áintsarum enentáimpratarum.

²¹ Yus Papinium áarmaiti “Yajaya̱ shuaran akupkan niisháa chichamja̱i̱ chichastatjai. Tura núja̱i̱sha anturtukchartatui” Isa. 28:11-12 tawai Yus.

²² Núja̱i̱ṉkia páantaiti, nusháa chichamja̱i̱ chichastinkia Yus shuarchan ashamtikiar enentáimtikratniun Yus súsaiti. Yus shuaran tu enentáimtikratniun súsachuiti. Antsu Yus Chichaman etserkatniunka Yus shuarchan enentáimtiktsuk Yus shuaran yáiṉtinian súsaiti.

²³ Tuma ai̱ṉ nékachusha tura Yus shuarchasha Yus shuar iruntramunam waya̱ṉka tura ashí niisháa chichamja̱i̱ chichainianak wainkiaṉka “mash waurka ajasárai” enentáimturmarchartatuak.

²⁴ Tura Yus Chicham étserkurminkia nékachusha tura Yus shuarchasha nui̱ waya̱ṉka ashí tárumna nuja̱i̱ ni yajauch túramuri̱n íimias enentáimturtatui.

²⁵ Núja̱i̱ṉkia ni enentái̱n ú̱mak ana nuna paant wainiak tikishmátar Yusan shiir awajsattawai. Tura “nekas Yus atumji̱a̱i̱ pujawai” títiatui.

Ashí tuke shiir takastarum

²⁶ Ayu, jú̱nisaiti yatsuru. Átum irunkurmin shuar takastinian Yus nin susamu túrati. Kantamátniuncha, jintintiátniuncha, Yus iwiainiakman ujaktinniasha, nusháa chichamja̱i̱ chichastinniasha, nusháa chichasman jintíatniuncha ashí Yus shuar Yusja̱i̱ tsakararti tusar ju̱na mash takasárti.

²⁷ Nusháa chichamja̱i̱ chichainiakka chikichik chikichik chichasarti. Tura jímiarchik menaintiuchiksha chichasarti. Tura ni timianka jintiartiniaiti.

²⁸ Jintiartin atsakuiṉkia nusháa chichamja̱i̱ iruntramunam chichaschatniuiti. Antsu niṉki Yusja̱i̱ chichasti.

²⁹ Núnisaṉ jímiarchiksha menaintiuchiksha Yus Chichaman etserkarti. Tura chíkich shuar nui̱ iruntrar ni etserkamun enentáimprarti péṉkerashit tusar.

³⁰ Tura chikichik chichaakui Yus chikichan nui̱ pujana nuna yamaram chichaman súakuiṉkia emka chicháa nu iniaisati.

³¹ Núnisrum Yus Chicham etserkatin wakerarmena nu chikichik chikichik chichasrum ashí jeattarme. Núja̱i̱sha Yus shuar unuimiárar kaka̱rartatui.

³² Yúsnan etserainia nuka tuke enentáimprar chichastin áiniawai. Enentáimtsuk náṉkamsaṉ chichasmin áiniatsui.

³³ Yuska pachimtak chichaman nakitiak shiir chichasmanak wakerawai. Chíkich nuṉkanmasha ashí Yus shuar iruntramunam túrainia áintsarum atumsha túratniuitrume.

³⁴ Yus shuar iruntramunam nuwa̱ chichastin surimkiamuiti. Yus akupea núnisaṉ núwa̱ka chichatsuk umin átin áiniawai.

³⁵ Inintrústinian wakerakka ni je̱e̱n waketkin ni áishri̱n nui̱ aniasti. Ashí iruntramunam nuwa̱ chichastin natsantaiti.

³⁶ Ju̱sha enentáimpratarum. Yus Chicham atumji̱a̱i̱ naṉkamnachmai. Núnisaṉ aya atumíini̱ṉ Yus Chicham jeartámchaiti. Chíkich nuṉkanmasha Yus shuarti túrutai̱ atumsha enentáimpratniuitrume.

³⁷ Atumíin shuar “Yus Chichaman tuke etserniuitjiai” tu enentáimtumatsuash. Tura chíkich shuarsha “Yusa Wakaní̱ tuke winia akuptaiti” tu enentáimtumatsuash. Nu shuarka wi áatjarmena nuna enentáimprar “nekas Yúsnan tíniuiti” tiartí.

³⁸ Tu táchakuiṉkia nisha ántrar áiniawai.

³⁹ Nu asamtai yatsuru, Yus Chicham etserkatin wakeruktarum. Nusháa chichamja̱i̱ unuimiatsuk chichastincha surimkiairap.

⁴⁰ Túmaitiat antukchamin awajtsuk ashí shiir túratarum.