1 Jṉ. 5 - Yus Papí: Shuarja̱i̱ Yus Yamaram Chicham Najanamu

Ju̱ nuṉkanmaya̱ nupetkatin

¹ Ashí “Jesus Yusa Uchirí̱ Krístuiti” tu enentáimtana nú shuar Yusa uchirí̱nti. Tura aparí̱ aneakrikia ni uchirí̱sha aneattaji.

² Yus Apa aneakur tura Ni wakera nu umirkur Yusa uchirí̱sha ashí aneattaji.

^3-4 Yus aneakur Ni tana nu umiktatji.Mat. 11:30; Jṉ. 14:15 Ashí Yusa uchirí̱ya nu Yusan nekas enentáimta asa, ashí ju̱ nuṉkanmaya̱ írunna nuna núpeteawai. Nu asamtai Yus tana nu umirkatin itiurchatchaiti.

⁵ Aya “Jesus Yusa Uchirí̱nti” tu enentáimtana nú shuar ju̱ nuṉkanmaya̱ ana nuna awakkamniaiti.

Jesukrístu Yusa Uchirí̱nti

⁶ Jesukrístu jú̱ nuṉkanam taa entsaja̱i̱ imiantkui Yus nayaimpinmaya̱ chichaak “Ju̱ka winia aneamu Uchiruiti” tímiayi. Tura nuyá̱ Jesus jakamtai ni numpé̱ puármiayi. Entsaja̱i̱ imianin ni takatrí̱n naṉkamamiayi túrasha iin jarutramak ni takatrí̱n ju̱ nuṉkanam amukmiayi. Chikichkinkikia túrutsuk mái̱ metek tura asamtai Yusa Uchirí̱ya nu paant nekanamniaiti. Yusa Wakaní̱sha tuke nekas tiniua nu métek tawai.

^7-8 Nu asamtai menaint “Yusa Uchirí̱nti” Jesusan tuíniawai. Nayaimpiniam Yus Apa tura Jesukrístu, Chícham aa nu tura Yus Wakancha, nuṉkanmasha Yus Wakancha, entsasha tura numpasha. Mash métekrak tuíniawai.

⁹ Aents étserainiakui ántureaji. Nuna naṉkaamas Yus ni Uchirí̱n tana nu nekas anturkatniuitji.

¹⁰ Yusa Uchirí̱n enentáimtana nú shuar ni enentái̱ncha nékawai. Antsu Yus ni Uchirí̱n timian enentáimtatsna nú shuar Yusan enentáimtachu asa Yusan “wáitriniaiti” tawai.

¹¹ Yus ni Uchirí̱n timia ju̱i̱ti. Tuke iwiaaku pujutai̱ nérenniuiti tura nu iwiaakmancha iin suramsaitji.

¹² Yusa Uchirí̱ji̱a̱i̱ tsaniṉ wekaana nú shuar, nu iwiaakmaja̱i̱ iwiaaku pujuiniawai. Tura Yusa Uchirí̱ji̱a̱i̱ tsaniṉ wekaatsna nú shuar, nu iwiaaku átinnium pujatsui.

Yus nekas enentáimtustin

¹³ Yusa Uchirí̱ nekas enentáimtakrum tuke amuicha iwiaakmaja̱i̱ iwiaaku pujarme. Nu nekaatarum tusan ju̱na áatjarme.

^14-15 Yus wakeramuja̱i̱ métek seakrinkia anturtamji. Tura anturtamkurin ii seamaj nu nekas takusua nu enentáimpramniaitji. Nu neka asar Yus ti shiir enentáimtaji.

¹⁶ Tunáa awai jákatniunam júana nu. Shuar nu tunaan túramtaiṉkia Yus áujtustin ántraiti. Tura shuar chíkich tunaan túrakuiṉkia nuka nekas Yus áujtustiniaiti. Nekas jákatniunam júatsna nú tunaan túraitkiuiṉkia iwiaaku átinian Yus susattawai.

¹⁷ Ashí yajauchⁱ ana nuka tunaiti. Tura jákatniunam júatsna nú tunaasha awai.

¹⁸ Nekas Kristui̱ akiinia nú shuar yajauch túrutainmaṉ tuke enentáimias wekaatsui. Antsu Yusa Uchirí̱ nin tí peṉker wainkiui íwianch antiṉkiachminiaiti.

¹⁹ Iikia nekas Yúsnaitji tura ashí ju̱ nuṉkanmaya̱ shuar iwianchnia áiniawai.

²⁰ Yusa Uchirí̱ ju̱ nuṉkanam taa nekas Yus ana nuna paant jintintramji. Yusa Uchirí̱ Jesukrístuja̱i̱ tsaniṉkia wekaakur nekas Yúsja̱i̱sha tsaniṉkiar wekaaji. Nekas Yus asa tuke iwiaaku átinia nuna nérenniuiti.

²¹ Uchiru, ju̱ nuṉkanmaya̱n ni yusri̱ya ímiatrus enentáimtuiniana nui̱ atumsha páchitkia áirap. Nuke atí.