1 Jṉ. 1 - Yus Papí: Shuarja̱i̱ Yus Yamaram Chicham Najanamu

Tuke iwiaaku átinia nérenniuri̱

¹ Ashí naṉkamamia nú yaunchu Yusa Uchirí̱ tuke pujuuyayi. Nusha iisha anturkaitji. Nekas ii ji̱ji̱a̱i̱ wáinkiaitji. Wáinkiarsha ii uwejé̱ja̱i̱sha antiṉkiuitji. Nisha Yusan ti paant awajeakᵘ Chícham tíminiaiti. Tura tuke iwiaaku átinia nérennuiti. Nuna áateajrume.

² Iwiaaku átinia nérenniusha paant nekanamiayi nusha Jesukrístuiti. Iisha Ni wainkia asar nu étsereaji. Tura tuke iwiaaku átinia nérenniuri̱ asa tuke Yus Apaja̱i̱ pujuyayi. Tura yamaikia iiní̱ paant ajatrámsakrin atumniasha ujajrume.

³ Yus Apaja̱i̱sha ni Uchirí̱ Jesukrístuja̱i̱sha tsaniṉkiar nekas chikichík ajaji. Tura atumsha núnisrumek iiji̱a̱i̱ chikichík ajasúk tusar wainkiamajnia nuna tura anturkamajnia nunasha ujajrume.

⁴ Kúntutsja̱i̱nchu ti shiir warasaruk tusan ju̱na áatjarme.

Yus tsáapniniaiti

⁵ Yus imiá tsáapnin asamtai kiritin Niiṉkia peṉké atsawai. Nu chichaman Jesukrístu iin unuitiamprakrin nuna atumniasha ujajrume.

⁶ “Niji̱a̱i̱ tsaniṉkia pujaji” táyatar kiritniunam pujustinia áintsar yajauch túramunam pujakrikia wáitraji tura nekas péṉkera nu túratsji.

⁷ Yuska tuke tsáapninium pujuwiti. Iisha núnisrik tuke tsáapninium pujakrikia nuamtak nawamnaikiar pujuiniaji. Túrakrin Yus ni Uchirí̱ Jesukrístu numpe̱ja̱i̱ ashí ii yajauch túramuri̱n japirtamji.

⁸ “Wi tunaan túrichuitjiai” tákurkia ímia iik anaṉmamaji. Antsu nekasa nuka chichaatsji.

⁹ Antsu ii yajauch túramuri̱ Yus paant ujakrinkia Yuska tsaṉkurtámprattaji. Tura ashí ii tunaari̱n asakátramprattaji. Yuska tí peṉker asa Ni tana nuna tímiatrusaṉ umikmin asa túrattawai.

¹⁰ Kame “tunaan túrichuitjiai” tákurkia “Yuska wáitriniaiti” taji. Ni chichame̱sha ii enentái̱nkia pujurtamtsuji.