1 Akup. 9 - Yus Papí: Shuarja̱i̱ Yus Yamaram Chicham Najanamu

Yus Saramúṉja̱i̱ chícham najanamu

¹ Nuyá̱ Saramúṉsha Uunt Yusa Je̱e̱n nuyá̱ úunt akupin pujutai̱ je̱a̱ncha amuk tura ni túrataj tu enentáimmia núnaka ashí umikiu ai̱

² Uunt Yus Saramúṉkan Kapaunnum wantintiukmia nútiksaṉ ataksha wantintiukmiayi.

³ Nuyá̱ Uunt Yus chicharuk “Ame seatmena nuna anturkajme tura nu je̱a̱ je̱a̱rtinmena nui̱ winia Naar tuke shiir awajtai̱ asamtai ti shiir imiatkincha awajsájai. Tuma asamtai tuke tsawant shiir enentáimtusan wainkiatjai.

⁴ Tura ámeka ame apa Tawit Wi akupkámu chichaman nekas enentái̱ji̱a̱i̱ umik ímiatrus túrimia nútiksam túrakminkia

⁵ ame apa Tawitian nekas umiktatjai tusan chicharkun ‘Israer shuarnum amé weanmaya̱ṉ tuke akupin átiniaiti’ tímiaj núnisaṉ aminí̱ya̱ Israernumka tuke úunt akupin ártiniaiti.

⁶ Tura atumsha núnisaṉ atumí uchirí̱sha Wi akupkámu chicham umitsuk Wini̱ya̱ kanakrum chíkich yus enentáimtakrumni̱ṉkia

⁷ Wi Israer shuaran nuṉkan súsarmiaj nuya̱ṉka ji̱i̱ran akuprartatjai. Tura Winia náarun Shiir Awajtai̱ Je̱a̱ atí tusan imiatkincha awajsámaj nunasha ajapa ikiuktiatjai. Túramtai Israer shuarka ashí nuṉkanmaya̱ aents áujmattsar wishiktai̱ juákartatui.

⁸ Ántsaṉ ju̱ Je̱a̱ imiá páantniua ju̱na ashí nuní̱ naṉkaamainia wáinkiar wishikiainiak ‘¡Aaj, ju̱sha! ¿Urukakua jú̱nikiuit? ¿Urukamtaik ju̱ nuṉkancha tura Yusa Je̱e̱ncha Uunt Yussha jú̱tikiait?’ tiártatui.

⁹ Tuíniakui ‘Warí Uunt Yus ni Yusri̱ Ejiptu nuṉkanmaya̱n ni we̱a̱trí̱n ji̱i̱r yaruakmia nuna nekas enentáimtustinian iniaisar ántar yusan tikishmátrar shiir awajáiniakui Uunt Yus ashí itiurchatja̱i̱ sumamtikiawaruiti’ tiártatui” tímiayi Uunt Yus Saramúṉkan.

Saramúṉ Jiraman akikma

¹⁰ Nuyá̱ 20 uwí naṉkaamasmanum Saramúṉka mai̱ je̱a̱n, Jiuwáa Je̱e̱ncha tura úunt akupin pujutai̱ je̱a̱ncha je̱a̱mak amukmiayi.

¹¹ Nu je̱a̱n je̱a̱mkat tusa Tírunmaya̱ úunt akupin Jiram sétruncha tura séprisnasha nuyá̱ kúrinkia ní wakeramun Saramúṉkan akuptúrmiayi. Túramtai 20 pepru Kariréanmaya̱n suramiayi Jiraman.

¹² Túram Jiram Tírunmaya̱ jiinkí̱ Saramúṉ pepru súsarmia nuna iyutaj tusa werimiayi. Túrasha péprun wakerukcharmiayi.

¹³ Tura chichaak “¿Warí péprua ainia surusarumna ju̱sha, yatsuruá?” tímiayi. Tinia náari̱nkia “Kapur nuṉka” anaikiamiayi tura yamaisha núkete náari̱ṉkia.

¹⁴ Jiramka 9.000 ripra kurin úunt akupniun akuptúrmiayi.

Saramúṉ chíkich najantkamu

¹⁵ Jiuwáa Je̱e̱n tura ni je̱e̱n nuyá̱ nuṉkan irumar najantkattsa núnisaṉ Jerusaréṉka wenuke̱ncha najatkattsa nuyá̱ Ásur, Mikitiu ántsaṉ Jeser pépruncha je̱a̱mkattsa úunt akupin Saramúṉka aentsun irurmiayi.

¹⁶ Kame Ejiptunmaya̱ akupin Parauṉ taa Jeser péprunka nupetak nuya̱ṉka ekemákmiayi tura Kanaan aents nú peprunam pujuarmia núnaka ashí kajeṉmiayi. Tura nuatnaiyakui ántar sútaiya̱ nútikias ni nawantri̱ Saramúṉkan nua̱ri̱n nú peprunka susamiayi.

¹⁷ Nuyá̱ Saramúṉka péprun Jeseran tura pakanam amia nú Pit-jiurúnasha ataksha iwiarak je̱a̱mkamiayi.

¹⁸ Tura chananumka Paaratja̱i̱ tura Tatmur

¹⁹ núnisaṉ ashí péprunam ikiusarman Saramúṉ takaruya nui̱sha. Ántsaṉ karu matsatai̱ pepru irunmia nunasha nuyá̱ kawainium ekeemtan unuimiatkaru matsamtai̱ pépruncha tura Jerusaréṉnum áitkiasaṉ Ríwianunam nuyá̱ ni akupeamuri̱ nuṉkanam je̱a̱mkatniun wakerimia núnaka ashí umikmiayi.

²⁰ Israer shuara uchirí̱nchu antsu Amur, Jet, Píris, Jep tura Jípius shuar nui̱ ashí juákarunka

²¹ núnisaraṉ nu aentsu shuari̱ ni úkuri̱n nú nuṉkanam juákarum Israer shuara uchirí̱ amuktaj tukamá tujintkiarmia núnaka Saramúṉ kakarmaja̱i̱ takamtiksarmiayi. Tura núnaka yamaisha tuke túruiniawai.

²² Antsu Israer shuar uchirí̱nkia chikichkiṉkisha Saramúṉka iniatai̱ya nútiksanka kakarmaja̱i̱ṉkia takamtiksacharmiayi. Antsu niṉkia mesetnum mánin tura yaintri̱ núnisaṉ suntara uuntri̱ tura mesetnum mánitiai̱ kárun uuntri̱ nuyá̱ kawainium ekemkatniun unuimiátkaru uuntri̱ ármiayi.

²³ Tura úuntri̱n nuyá̱ takatan wáinin Saramúṉ anairamuka 550 ármiayi tura aents takakmainianka ni wainiarmiayi.

²⁴ Núnisaṉ Parauṉka nawantri̱sha Tawitia Pépruri̱ya̱ jiinkí̱ Saramúṉ je̱a̱n je̱a̱rmia nui̱ támiayi. Nuyá̱ Mírun kumpin je̱a̱ncha je̱a̱mmiayi.

²⁵ Saramúṉsha ashí uwitin ni najanamua nú aestutai̱niam Uunt Yusan shiir awajuk tura taṉkun maa takamtsuk áeseamuncha tura kuṉkuinniasha chikichik uwitini̱ṉ menaintiú Uunt Yusan áestimiayi.

²⁶ Núnisaṉ úunt akupin Saramúṉka Etum nuṉkanam Iratnum ayamach Isiunjipírnum Kapantin Nayantsa kaanmatkari̱n uunt kanun najantkamiayi.

²⁷ Tura Jiramka ni yaintri̱ nayantsanam wekaatan ti unuimiátkarun núnisaṉ nayantsancha ti nekainian Saramúṉka yáintri̱ji̱a̱i̱ métek uunt kanunam akuprámiayi.

²⁸ Túrunawar Upirnum jeawar nuyá̱ kurin achikiar 280 kintiaran júkiar úunt akupniun Saramúṉkan itiariármiayi.