1 Akup. 7 - Yus Papí: Shuarja̱i̱ Yus Yamaram Chicham Najanamu

Saramúṉka je̱e̱ armia nu

¹ Nuya̱ṉka Saramúṉ ni je̱e̱n je̱a̱muk 13 uwí pujuras ashí amukmiayi.

² Núnisaṉ Ríwianunmaya̱ Kampunniu Je̱e̱ táman esantí̱ṉkia 50 mitru tura waṉkantí̱ṉkia 25 mitru nuyá̱ yakiri̱ṉkia 15 mitru jean sétruja̱i̱ je̱a̱mmiayi. Tura kuatru setru pekaka ukukmanumsha nui̱sha aya sétruk patarmauyi.

³ Tura 15 pau pekakmanum 45 páunam setru numiji̱a̱i̱ yakí̱ awa̱rma arma nui̱ setru tápraja̱i̱ ajintrukma armai.

⁴ Áṉkamuri̱ṉkia menaint pekakma armai. Túrar chikichik áṉkamu chíkich menaint irunmia nuja̱i̱ íṉkiuasmak armai.

⁵ Wáitiri̱sha tura pauri̱sha 4 yantamen métekrak nú nekapkanak ashí takaru ármiayi. Nuyá̱ áṉkamuri̱sha menaintiú pekakar íṉkiuasmak íṉkiuasmak ikiusma ármiayi.

⁶ Núnisaṉ nu je̱a̱nam waya̱tniuncha Páunmaṉ Wá̱i̱ti̱a̱i̱ncha esantí̱ṉkia 25 mitru tura waṉkantí̱ṉkia 15 mitru jean najantkamiayi. Tura nuna nákari̱n chíkich wa̱i̱ti̱a̱i̱ eem té̱a̱mun najanamiayi. Nusha kampurmasha sútarchisha iruniarmiayi.

⁷ Ántsaṉ Pujusár Sumamtiktai̱ je̱a̱ncha aya setru numiji̱a̱i̱ṉ nuṉkaya̱ juarki̱ numi winiarma ímianai anujturmiayi.

⁸ Tura ni pujumia nu je̱a̱sha chikicha nuja̱i̱ métek je̱a̱mmiayi. Núnisaṉ ni nuwé̱ Parauṉka nawantri̱ je̱e̱sha núninniak je̱a̱ ámiayi.

⁹ Kame nu je̱a̱ armia nuka á̱a̱ri̱sha tura initri̱sha aeprukmari̱sha yakiri̱sha kaya tí kuit ainia nu tsupirar iwiarkarma métekrak ármiayi.

¹⁰ Aeprukmari̱nkia kaya tí kuit uunt ármiayi. Nusha 4,5 mitru jeá tura chíkich 3,60 mitru jeasha ármiayi.

¹¹ Yakisha núnisaṉ kaya tí kuitji̱a̱i̱ najanamu setru numiji̱a̱i̱ nekapmakar nakarma ármiayi.

¹² Tura a̱a̱ri̱ wenuke̱ṉka kaya menaintiú pekakar tura setru nakarman wiya̱rar Jiuwá Uunt Je̱e̱n je̱a̱marmia tímiatrusrik najantkamu ármiayi. Tura Yusa Je̱e̱ initia̱ á̱a̱ri̱nish tura Je̱a̱ nuyá̱ á̱a̱ri̱sha núnisrik najantkamuyi.

Tírunmaya̱ Jiraman Saramúṉ iniarma

¹³ Tura úunt akupin Saramúṉ akupak Tírunmaya̱n Jiraman itiamiayi.

¹⁴ Jiramka Neptarí weanmaya̱ waje̱ uchirí̱yayi. Ni aparí̱ṉkia Tírunmaya̱uyayi tura yaṉkú jiruja̱i̱ takakmauyayi. Kame Jiramka tí neka ti enentáimin asa énentaimsaṉsha ní wakeramun yaṉkú jiruja̱i̱ najanatniun nékauyayi. Úunt akupin Saramúṉkan tarí ni timia núnaka tímiatrusaṉ ashí najantkamiayi.

¹⁵ Jiramka jimiará paun yaṉkú jiruja̱i̱ najanamiayi. Tura nuna yakiri̱ṉkia uchu mitru antsu tenteri̱ seṉku mitru jeá ármiayi.

¹⁶ Tura pau najanamunam cháikin ekentkatniuncha yaṉkú jiru unuikmaja̱i̱ jímiaran yakiri̱nkia jimiará mitru íniaṉkasaṉ 25 sentimitru jean tura chikichnasha jimiará mitru íniaṉkasaṉ 25 sentimitru jean najanamiayi.

¹⁷ Ekentratin páunam neka núninian tura íkiarma ánin ikiarmanum chikichik páunam tura 7 ekentratniuri̱ najantkamai.

¹⁸ Pau nanajamunam cháikin ekenkatniun najanamia nu nukuktinniaka kranatu neré nakumar najanak jimiará pekakman nekanam téntakmiayi tura chíkich ekentinniasha tímiatrusaṉ najanamiayi.

¹⁹ Ekentratin pau pekaka najantkamunam kuku̱jia núnin 1,8 mitru jeá najantkamu iruniarmai.

²⁰ Núnisaṉ mai̱ paunam ekentin najantkamu armia nuiṉkia tenteri̱n yakiini̱ 200 kranatu neré nakumkar najantkamu jimiará pekakma mái̱ ekentinniun neka yaṉkú jiruja̱i̱ najanamu métek téntak ámiayi.

²¹ Jiramka paun najantkamia núnaka Yusa Je̱e̱n wá̱i̱ti̱a̱i̱niam awajainiarmiayi. Tura paun untsuurnumaani̱ awajai núnaka Jakin anaikiamiayi. Antsu menanmaani̱ awaja̱i̱ṉkia núnaka Puas anaikiarmiayi.

²² Núnisaṉ nuna ekeni̱ umíak páunam yakiini̱ ririu kuku̱j najantkamun ikiursarmiayi. Nuna tura pauri̱ntkia umikmiayi.

Entsa yaratai̱ uunt najanamu

²³ Nuya̱ṉka entsa yaratai̱ úuntan tenten yaṉkú jiru unuikmaja̱i̱ wa̱a̱ri̱ waṉkantí̱ṉkia 5 mitru tura yakiri̱ṉkia 2 mitru nuyá̱ 5 pataku tura tentakmari̱ṉkia 15 mitru jean najanamiayi.

²⁴ Entsa yaratai̱ uunta wene̱n, 5tkia nuṉkaani̱ chikichik mítruka jeatsuk ájapeniṉ 10 yumi nakumkar jimiará pekakma téntakar entsa yaratai̱ akachumtikiamuyi. Nuka unuikiar entsa yaratai̱ nájankur mái̱ metek najanamu asa chikichkiyi.

²⁵ Nuka tuse waaka áishmaṉ yaṉkú jiruja̱i̱ nakumprar najantkamunam ekemiayi. Nú waakaka menaint nuṉkaani̱ tura menaint arakaani̱ nuyá̱ menaint etsa̱ tatainmaani̱ ántsaṉ menaint etsa̱ akatainmaani̱ íimiak ármiayi. Nuna sui̱ji̱ṉkia initiaani̱ ármiayi tura entsa yaratai̱ṉkia nui̱ ekemiayi.

²⁶ Tura nupantí̱ṉkia chikichik uwej jeá tasachia núnin ririu kuku̱j najatkamu armai nuyá̱ éntsaka 44.000 mir ritru piákminian najanawarmiayi.

Entsa yaratai̱ uchich tias najantkamu

²⁷ Núnisaṉ ekentsar téter jutai̱n yaṉkú jiruja̱i̱ tiásan najanamiayi. Nuna waṉkantí̱ṉkia chikichik mitru uchaintia tura esantí̱sha chikichik mitru uchaintia antsu yakiri̱ṉkia 1,35 mitru jean aṉkant aṉkant najankamiayi.

²⁸ Tura ekentsar jútai̱ṉkia nájankur jú̱nisar najanamuyi. Ekentari̱ṉkia numi wáṉkaram najatar a̱a̱ri̱ najatamunam tuja eṉkekmauyi.

²⁹ Nuyá̱ ekentai̱ri̱nkia riún ya̱wá̱ tura waaka áishmaṉ nuyá̱ kirupín najankamu armai. Antsu yantamenka riúnum tura waakanam yakiini̱sha núnisaṉ nuṉkaani̱sha kuku̱j najantkamuyi.

³⁰ Tura ekentsar téter jútai̱ṉkia kuatru nawe̱ yaṉkú jiruja̱i̱ aṉkant aṉkant najatkamu armai núnisrik nawe ikiursatniusha yaṉkú jiruja̱i̱ṉ najatkamuyi. Núnisaṉ kuatru yantamencha ekentai̱ jiru unuikmaja̱i̱ najantkamu ji̱i̱tra armai túrasha nuka ikijmiatai eketmanum nuṉkaani̱ armai.

³¹ Entsa pajamtai̱ weneṉka éṉkekma amai tura nuka yaki̱i̱ni̱ 45 sentimitru jí̱i̱tkiauyi. Wene̱sha tenteyi tura eketmari̱ yakiiri̱ṉkia 68 sentimitru armai. Núnisaṉ wene̱ncha nakumprar najantkamu irunmiai tura áchitramuri̱ṉkia tentechuyayi antsu ashí yantame̱ métekrak armai.

³² Tura kuatru nawe arma nuka numi wáṉkaram ikiursamua nui̱ wakenmaani̱ ikiusma armai núnisaraṉ nawe áchitramuri̱sha ekentsar jutai̱nmaṉ áchitrauyi. Nuyá̱ nawé yakiiri̱ṉkia aṉkant aṉkant 67 sentimitru armai

³³ tura karu náwe̱ya̱ núniniak armai. Wájakmari̱sha jirurí̱sha áchitramuri̱sha nuyá̱ jirurí̱ iṉkiuntikramuri̱sha jiru unuikmaja̱i̱ ashí najantkamu armai.

³⁴ Núnisaṉ 4 nawe̱ áchitramuri̱ṉkia ekentsa jutai̱ kuatru yantamen áchitra armai tuma asa chikichkiyi.

³⁵ Tura ekentsa jutai̱niam yakiini̱ jiru tenté yakiri̱n 22 sentimitru jea amai. Nuyá̱ áchitramuri̱sha tura numi waṉkarmari̱sha ekentsa jutai̱ yakiri̱ja̱i̱ṉkia chikichkiyi.

³⁶ Núnisaṉ ekeemtai̱ najatamunmasha kirupín tura riún ya̱wá̱ nuyá̱ kuṉkukin núnisaṉ chíkich kuku̱jín najantkarmiayi.

³⁷ Ekentsa jutai̱ 10 armia núnaka jú̱tikias najantkamiayi. Jiru unuikmaja̱i̱ nú yakiini̱sha núnisaṉ nú nekapkanak ántsaṉ nakumkar najatkamuri̱sha núniniak armai.

³⁸ Nuya̱ṉka entsa yaratai̱n tiásan yaṉkú jiruja̱i̱ najantkamiayi. Nuka aṉkant aṉkant 1,80 mitru jeá núnisaṉ 1.600 ritru jeá armai tura núnaka ekentsar jutai̱ tias armia nui̱ aṉkant aṉkant ekentrarmiayi.

³⁹ Nuya̱ṉka je̱a̱ untsurnumaani̱ ekentsar jutai̱nkia seṉkun apujsamiayi tura chíkich séṉkuka menanmaani̱ apujsarmiayi. Núnisaṉ entsa yaratai̱n najanamia núnaka untsurnumaani̱ tsukin Yusa Je̱e̱n etsa̱ tatainmaani̱ apujsamiayi.

Uunt Yusa Je̱e̱n takatai̱ yaṉkú jiruja̱i̱ najankatin

⁴⁰ Núnisaṉ Jiramsha ichiṉnan shikikiá ajaptai̱n nuyá̱ amamkun najankamai. Núnaka úunt akupin Saramúṉnan tura Uunt Yusa Je̱e̱n takakmastin armia nuna Jiram ashí najanak umikmai.

⁴¹ Nuyá̱ jimiará páunam yakiini̱ ákantsaṉ pau náṉkatkamuri̱n jimiará tenten najana tura neka núninian najata éṉkekmai.

⁴² Kame munchí kuatrusiántun wear najankamia núnaka chikichik pauri̱n yakiini̱ tenté nekaja̱i̱ eṉkekmauya nui̱ emka tusiantuja̱i̱ téntak nuyá̱ ataksha tusiantuja̱i̱ téntakmai. Tura chíkich pauri̱ncha nútiksaṉ túramai.

⁴³ Tura tias awa̱tai̱ kaṉketái̱rtinian nuyá̱ entsa yaraktinniasha tiásan yaṉkú jiruja̱i̱ṉ najankamai.

⁴⁴ Núnisaṉ tuse waaka nakumak najanak nuna tuntupén ekeni̱ entsa pajamtai tí uuntan najanamai.

⁴⁵ Nuyá̱ Jiram ichiṉnancha shikikiar ajaptai̱ncha amamkuncha najankamai. Tura Uunt Yusa Je̱e̱n Saramúṉnan najankama nuka yaṉkú jiru péṉkeri̱ji̱a̱i̱ najankamai.

⁴⁶ Tura úunt akupin Jurtanka pakarí̱n nai náikmirmatauya nui̱ Sukut tura Saretán yantam yaṉkú jirunka unuik iminiak péṉker iwiartukarmai.

⁴⁷ Yaṉkú jiruja̱i̱ Yusa Uunt Je̱e̱n takakmastinian najankama núnaka nekapmachmin asamtai Saramúṉka yaṉkú jiru kijintri̱nkia nekapmachmai.

Nékatka Shiir Tesamunam takatai̱ kuriji̱a̱i̱ najankamu

⁴⁸ Nuiṉkia Saramúṉsha Yusa Je̱e̱n init Yúsnan takarkur takatai̱n najankamai. Yus áestutai̱n tura paṉ najankar awa̱tai̱ncha kúriji̱a̱i̱ṉ najankamai.

⁴⁹ Nútiksaṉ asuiti yarar ekemákar ekentai̱n untsuurnumaani̱ seṉku tura menanmaani̱sha seṉku aya kúriji̱a̱i̱ṉ najankamai. Nuyá̱ Imiá Shiir Tesamu nákari̱n ekemátaincha kuku̱jrar najanamun tura áesir jutai̱ncha ashí aya kúriji̱a̱i̱ṉ najankamai.

⁵⁰ Nu arantcha piniṉnasha tura ekemátai̱ri̱ncha, amamkuncha, uṉkushpincha kuṉkuin eṉkea áestutai̱ncha aya kúriji̱a̱i̱ṉ najankamai. Núnisaṉ Yusa Je̱e̱n nékatka wáitiri̱ nuyá̱ Shiir Tesamu tura Imiá Shiir Tesamu wáitiri̱ armia nunasha urantái̱ri̱ perkamuri̱ncha kuriji̱a̱i̱ najankamai.

⁵¹ Nuní̱ Saramúṉ Yusa Je̱e̱n Yúsnan takarkur takakmatai̱n najanak umirmai. Tura úunt akupin Saramúṉsha ni aparí̱ Tawit Yus súsatniun akantúkuya nuna kurincha kuítniasha ántsaṉ ashí Yúsnan takarkur takakmatai̱n ikianak Uunt Yusna kuít eṉketai̱niam ikiusmai.