1 Akup. 4 - Yus Papí: Shuarja̱i̱ Yus Yamaram Chicham Najanamu

Akupin Saramúṉka yaintri̱

¹ Úunt akupin Saramúṉkak ashí Israernumka akupmiayi.

² Tura aentsu úuntri̱nkia ju̱ ármiayi: Satuka Yúsnan pujurniu uchirí̱ Asaríasyauyi.

³ Sesa uchirí̱ Irijiurépka Ajíasjai, papí ai̱ṉ ármiayi tura Ajiriúta uchirí̱ Jusapátka nu nuṉkanam naṉkamasaru áujmatman papinium áainiuyayi.

⁴ Piniayás Juyata uchirí̱nkia suntara úuntri̱yayi. Satuk nuyá̱ Awiatárka Yúsnan pujurin ármiayi.

⁵ Natanka uchirí̱ Asaríaska pepru uuntri̱ armia nuna úuntri̱yayi. Núnisaṉ Natanka uchirí̱ Sawutka Yúsnan pujurniuyayi núnisaṉ úunt akupniu amikri̱yayi.

⁶ Ajisárka akupin pujutai̱ je̱a̱n íisat tusa apujsamuyayi. Tura Atuníramka Apta uchirí̱nkia kuit jutai̱niam apujsamuyayi.

Nuṉka tesarmánum Saramúṉka yaintri̱ anaikiamu

⁷ Tuse uuntri̱ armia nuna Saramúṉ ashí Israernum takakuyayi. Nu akupin armia nuka úunt akupniusha tura ni shuari̱ ainia nuna yurumkan súsarat tusar anaitiuk apujsarmiayi. Nuyá̱ aṉkant aṉkant ashí uwitin chikichik nantu ashí súsatin ármiayi.

⁸ Nuyá̱ tuse uuntri̱ armia nuna náari̱nkia ju̱ ármiayi: náintiar naintiar Eprain nuṉkanmaṉka Jiura uchirí̱,

⁹ Makasnumka ántsan Sarpimnumsha tura Pitsimísnumsha nuyá̱ Irunnumsha núnisan Pitjanánnumsha Tekara uchirí,

¹⁰ Arupútnumka Jiseta uchirí̱. Núnisaṉ Sukusha núnisaṉ Jepir nuṉkaka ni nuṉken ashí énketkauyi.

¹¹ Ashí Túrnumia̱ nuṉka armia nuiṉkia Apiniatápa uchirí̱. Ju̱ka Saramúṉka nawantri̱n Tajatan nua̱tkauyayi.

¹² Paana Ajiriúta uchirí̱ Tánaknumia̱, Mikitiu tura ashí Pitseannumia̱ nusha Saretánnum tíjiu̱chiti núnisaṉ Jisriir nuṉkanmaiti. Tura Pitseannumia̱ juarki̱ Apirmiúrama ímianainti tura Jukmiam amainia̱ ímianainti.

¹³ Karaatnumia̱ Ramutnumka Jipira uchirí̱ tura Karatnum uchich pépruch Manasésa uchirí̱ Jairna armia nunasha takaruyayi. Núnisaṉ Arkup nuṉkan Pasannumsha uunt pepru sasaintia a̱a̱ya̱ tanishri̱ iwiartukman tura epentairi̱sha yaṉkú jíruja̱i̱ najatkamun takaruyayi.

¹⁴ Itiu uchirí̱ Ajiniatápka Majanáimniumiaiti.

¹⁵ Ajimiáska Neptarínmaya̱ ámiayi. Ju̱sha núnisaṉ Pasemátan Saramúṉka nawantri̱n nuatkamiayi.

¹⁶ Asernumka̱ núnisaṉ Arutnumsha Usái uchirí̱ Paana.

¹⁷ Parúa uchirí̱ Jusapátka Isakárnumia̱ ámiayi.

¹⁸ Erá uchirí̱ Semaikia Piṉjiamínniumia̱ ámiayi.

¹⁹ Urí uchirí̱ Keperka Karaat nuṉkanmaya̱ ámiayi Sejunka nuṉke̱nka Amur shuar úunt akupniuri̱ ámiayi nuyá̱ Uk úunt akupin Pasannumia̱ ámiayi. Nu nuṉkanmaṉka niṉki úunt akupniuka ámiayi.

Saramúṉ naṉkamantu ajasma

²⁰ Israer shuar ti untsurí ásar nayantsa náikmiri̱ja̱i̱ métek nekapmarchamnia ármiayi. Ántsaṉ taramkaru ásar yurumáiniak úmuiniak ti shiir warasar matsamármiayi.

²¹ Tura Saramúṉka Yúpratis entsanmaya̱ juarki̱ Jiristíu aentsu nuṉke̱n Ejiptuja̱i̱ nakarnáiya tímianai ashí úunt akupin pujuarmia nuna akupmiayi. Tura uunt akiktin kuítian ikiaatkar suármiayi. Kame Saramúṉ iwiaaku pujumia nui̱ṉkia tuke turu wéarmiayi.

²² Nuyá̱ Saramúṉ ashí tsawant ni iniatairi̱ji̱a̱i̱ yuarmia nuka jú̱ ármiayi. Trikiu peṉkeri̱ ti péṉker nekeṉma sais mir saisiantu ritru nekapmamu nuyá̱ peṉké trikiu nekeṉma traise mir tusiantu ritru ármiayi.

²³ Nu arant japanka nuyá̱ su japancha tura nanamtin yutai̱ nuéram armia nu yúamunka nekapmatsuk antsu tí peṉker waaka turu unueramun tiásan tura sa̱a̱kji̱a̱i̱ tsakatmainiamu painti waakan tura sian murikiun péṉker iwiarkamun yurumiarmiayi.

²⁴ Warí Saramúṉka etsa̱ akatainmaani̱ Yúpratis entsanmaya̱ juarki̱ Típsanmaya̱ Kaasa nuṉká tímianai ashí úunt akupin armia núja̱i̱sha naṉkamantu ajasmiayi. Tuma asamtai niin ayaam matsamármia nu nuṉkanmaṉka ashí aṉkant ámiayi.

²⁵ Tura Saramúṉ iwiaaku pujumia nui̱ṉkia Israer nuṉkasha núnisaṉ Jutá nuṉkanmasha áintsaṉ Tan nuṉkanmaya̱ juarki̱ Pirshiwia nuṉka tímianaiya̱ aentssha aṉkant pujuarmiayi. Tuma asamtai uwa ajancha tura ikiu numi arakma ajancha aṉkant aṉkant takaku ármiayi.

²⁶ Nuna naṉkaamas ni káruri̱n japin kawái matsamtairi̱ṉkia kuatru míran takaruyayi. Nuyá̱ kawainium ekemkatniun unuimiátka armia nunasha tuse míran takaruyayi.

²⁷ Tura Saramúṉnaka nuyá̱ niji̱a̱i̱ métek yurumiarmia nunasha ishichiksha táttsashti tusa uuntri̱ armia nu chikichkimsar ashí nantutin yurumkan táamtiktsuk suármiayi.

²⁸ Núnisaṉ ni kawairi̱ncha ántsaṉ umpururi̱ kijin aentstai̱ armia nunasha tsawant tesamunam súsartin anairamu armia tímiatrusaṉ nu taṉku matsamármia nui̱ weriar sewata nuyá̱ sa̱a̱kniasha ikiatkar ayurtiarmiayi.

Saramúṉ tí neka asa naṉkamantu ajasma

²⁹ Tura Yus Saramúṉnaka tí neka tura ti péṉker enentáimkia awajsámiayi. Tuma asa nayantsa náikmiri̱ írunna ímiatrus nisha tí neka ajasmiayi.

³⁰ Tura Ejiptunmaya̱ núnisaṉ etsa̱ tatainmaya̱ áentsja̱i̱sha naṉkaamas tí nekauyayi.

³¹ Nu arant Istra shuar Etan núnisaṉ Majura uchirí̱ Iman, Kárkur, Tartasha kame ashí neka aents armia núja̱i̱sha naṉkaamas nékauyayi. Tuma asamtai ashí nuṉkanmaya̱ niin ayaam pujuarmia nuka Saramúṉkan nekaawarmiayi.

³² Núnisaṉ Saramúṉ nekatai̱ jintinkratma chichaman menaintiú mir aar tura kantanka mir seṉku áarmiayi.

³³ Núnisaṉ ashí nuṉká tsapáu írunna nunasha unuimiátramiayi. Kame Ríwianunmaya̱ sétrun unuimiáttan juarki̱ tura niṉki ántar tsapáu ainia ímianai̱ ejekamiayi. Núnisaṉ yajasmancha nanamtinniasha japinias wekain ainia nunasha tura namaknasha mash unuimiátramiayi.

³⁴ Tura Saramúṉ ti nékawai táman antukar ashí aents núnisaṉ chíkich nuṉkanmaya̱ úunt akupin armia nusha imiá péṉker neka asamtai anturkatai tusar káutiarmiayi.