1 Akup. 20 - Yus Papí: Shuarja̱i̱ Yus Yamaram Chicham Najanamu

Piniatát Samaria tenta eṉkekma

¹ Nuya̱ṉka Sírianmaya̱ úunt akupin Piniatát ni suntari̱n ashí tura niji̱a̱i̱ 32 akupniun irur kawaiji̱a̱i̱ tura káruri̱ji̱a̱i̱ warukmiayi Samarian tura mesetan najatawarmiayi.

² Nuya̱ṉka Israernumia̱ úunt akupin Akaapa pépruri̱n chichaman etserin akupkámu ujainiak

³ “Piniatát chichartameak Israera úunt akupniuri̱ chichaak ‘Maa winia uuntru úunt akupniu ame támena núnisnak wikia ashí takakjana núurtiuk takamtsuk áminiuitjiai’” timiai.

⁴ Nu tutai Israera úunt akupniuri̱ chichaak “Maa winia uuntru úunt akupniuru ame támena núnisnak wikia ashí takakjana núurtiuk takamtsuk áminiuitjiai” timiai.

⁵ Tura ataksha chichaman etserin waketar tariar chichainiak Piniatát chichartamuk “Wikia ame kuítrumsha tura kurirmesha nuwemsha núnisaṉ uchirmesha surusarta tímiajme.

⁶ Núnisnak kashin ju̱ni̱ ai̱ winia takarniúrun wi akuprartatjai. Tura ame je̱e̱min tura ámin takarniúrmi je̱e̱ncha waya̱war péṉker íi ii awajsartatui. Túrawar warí timiá péṉkera takarainiam núnaka achikiar yaruakartatui.”

⁷ Nuya̱ṉka nu nuṉkanam ashí pepru írunmanum uuntri̱ matsamarmiania nuna ashí untsukarat tusa Israernumia̱ úunt akupin akupkámiayi. Tura chicharainiak “Atumsha ju̱ péṉker íisrum nekaatarum. Ju̱ka aya yajauchiniak e̱a̱iniawai. Warí, winia nua̱run núnisaṉ uchirun ántsaṉ kuítrun nuyá̱ kurirun seattiaj tusar akuprámu káuntkacharaik tura wisha suritkiacharjai” tímiayi.

⁸ Tutai uuntri̱ ainia nusha mátsatkainiasha chichainiak “Nuka anturkaip núnismek seatma nusha túrawaip” tiármiayi.

⁹ Nuya̱ṉka Akaap chichama etserniun Piniatát akupkarman chicharainiak “Atumí uuntri̱ akupin ju̱ ujatruktarum ‘Emka seatmia núnaka susattajai. Antsu ju̱na chikichan seateana núnaka túrashtatjai’ tawai titiarum” tímiayi. Nuya̱ṉka chichaman etserin waketkiar úunt akupniun ujakármiayi.

¹⁰ Nuní̱ ujakam Piniatát ataksha chichaman akatar akupénak chichaak “Nú peprun émeseachkuiṉkia ashí najantkamu yus írunna nu winia asuttiuáti. Túrasha Samarian tsai̱ tsai̱ ju̱yu̱ awajsan winia nemartuiniasha atsaksárkisha júkichmin átatui” tímiayi.

¹¹ Nuna antuk Israernumia̱ akupin Akaap chichaak “Meset náṉkamchamunmaṉka nupetmakua tímianuka enentáimtumaschati titiarum” tímiayi.

¹² Tura chichaman ujakármia nuiṉkia Piniatátka áakan áakmakar pujuarmia nui̱ chíkich akupin ainia nuja̱i̱ ú̱mak pujumiayi. Nuya̱ṉka ni suntari̱ úuntri̱n chicharainiak “Meset juárkiartai” tutai péprun utsantuatai tusar mesetan iwiarnakar aya ajattsarmiayi.

Akaap Piniatátan nupetkamu

¹³ Nuna tumai̱ Yúsnan etserin Israernumia̱ úunt akupin Akaapan tarí chichareak “Jiuwá chichaak ‘¿Ju̱ aents tí untsuríya̱ ju̱ wáinmek? Ju̱ yamaikia nekaata Wikia Jiuwaitjiana nu nekarak tusan yamái ju̱ aentsun áme uwejmi̱i̱n íktusan iniaisattajme’ tawai” tímiayi.

¹⁴ Tutai Akaap chichaak “¿Yáininia nunasha túratta?” takui̱ chicharuk “Jiuwá chichaak ‘Núnaka nuṉka tesarmánum pujuiniana nuna uuntri̱ takarniúri̱ni̱ túrattawai’ tawai” tímiayi. Takui̱ ataksha Akaap chichaak “Mesetnasha ¿ya juárkitia?” takui̱ “Mesetka ame naṉkamattame” tímiayi.

¹⁵ Nuyá̱ Akaapka tesarmánum uuntri̱ armia nuna takarniuri̱ natsan 232 tura Israera ashí suntari̱ 7.000 áishmaṉ armia nuna émamkes íisarmiayi.

¹⁶ Tura tutupin ai̱ jíinkiarmiayi. Túrasha Piniatátka 32 akupin niin yáiṉtaj tusa káutkarmia nuja̱i̱ áaknum matsamsar úmuiniak nampekar pujuarmiayi.

¹⁷ Péprunmaya̱nka nuṉka tesarmánum uuntri̱ armia nuna suntari̱ya̱ émkaka jíintrarmiayi. Túrasha mamikmá awajsarma nuna wáinkiar tseke tariar Piniatátka chicharainiak “Samarianmaya̱ aents jíintrarai” tiármiayi.

¹⁸ Tutai akupin chichaak “Mesetan winitiáiniachkuisha tura mesetan winitiáiniakuisha íwiaakuk achirtarum” tímiayi.

¹⁹ Tura nuṉka tseramanum uuntri̱ armia nuna takarniúri̱ péprunmaya jíintrarmatai nuna úkuri̱n suntarka ashiniarmiayi.

²⁰ Tura aṉkant aṉkant ni nemasri̱ntkia máwarmiayi túram Sírianmaya̱ aentska pisakármiayi. Túmainiakui Israer shuarka patatukarmiayi. Antsu akupin Piniatátka kawainium ekemak tura kawainium ekemta unuimiátkaru wárumchikji̱a̱i̱ pisarmiayi.

²¹ Nuya̱ṉka Israernumia̱ úunt akupin jiinkí̱ kawaincha tura káruncha tura Asirianmaya̱ aentsnaka ti kajeṉkarmiayi.

Siria Awiknum nupetkamu

²² Nupetmakarmatai Yúsnan etserin Israernumia̱ akupniun chichareak “Áitkiamna nu enentáimsam yamaikia túratniua nu iistá. Kakaram ajasta túrasha chikichik uwí naṉkaamasmatai Siria úunt akupin ataksha jatetmaktatui” tímiayi.

²³ Sírianmaya̱ úunt akupniu yaintri̱ nin chicharainiak “Ní yusri̱ṉkia náintniumia̱ najantkamu yus áiniawai. Tuma asar iiji̱a̱i̱ naṉkaamas ti kakaram asar awaktámkarji. Túrasha pakanam mániakrikia túrasha niji̱a̱i̱ naṉkaamas tí kakaram átatji.

²⁴ Wats, jú̱nisam túrata úunt akupin ainia nuka pujutái̱ri̱ya̱ṉka ashí ji̱i̱ra utsaṉkaram nuna akintrukarat tusam suntara uuntri̱ uunt awajsam apujsarta.

²⁵ Túram yamaikia suntar emeṉkarmamna tímiatrusmek ataksha suntar irurta. Núnismek kárusha tímiatrusmek awajsata. Túrawakmin yamaikia pakanmaani̱ mániatai. Wats awakkachartajiash.” Tutai nisha nuna anturak tímiatrusan túramiayi.

²⁶ Tura chikichik uwí naṉkaamasmanum Piniatátka ni suntari̱n ashí irur émamkes iis Awiknum káunkarmiayi Israer shuarja̱i̱ mániktai tusar.

²⁷ Núnisan Israersha suntari̱n irur nisha émamkes íisarmiayi túrawar yurumkan mashⁱ iwiarkar Sírianmaya̱ aentsja̱i̱ iṉkiukatai tusar ashinkiarmiayi. Sírianmaya̱ aents matsamkarmanum íṉkiuasmatak nisha matsamkarmiayi túrasha ninkia chipiu yamatskam wárumchik jimiará matsamkamua núnis matsamkarmiayi. Antsu Sírianmaya̱ aentska pakan ashí enetkar matsamak pujuarmiayi.

²⁸ Tura Yusan enentáimtin áishmaṉ úunt akupniun tarí chichareak “Jiuwá jú̱nis tawai ‘Sírianmaya̱ aents chichainiak “Jiuwaka pakanmaya̱ Yúschaiti antsu náintniumia̱ Yúsaiti” tiaru ásarmatai Wikia Jiuwaitjiana nu nekaak tusan ju̱ aents ti untsurí wainiainiamna jú̱naka ámin íktusan iniaisartatjai’ tawai” tímiayi.

²⁹ Nuya̱ṉka mái̱ suntar iruntraruka íṉkiuasmak matsamkar aya íiniainiarmiayi. Tumasua 7 tsawant ejeniarmiayi. Tura 7 tsawant jeamtai mánaitian naṉkamawarmiayi. Kame nu tsawantini̱ṉ Israer shuarka 100.000 suntaran Sírianmaya̱n máwarmiayi.

³⁰ Tura iwiaaku juákaruka pisarar Awik péprunam ú̱mkarmiayi. Túrasha 27.000 suntar pisararmia núnaka pepru wenuke̱ sa̱a̱naki̱ amukármiayi. Núnisaṉ Piniatátcha pisar péprunam u̱mkamiayi tura uwemprattsa je̱á̱ wayá̱ nui̱ wayá̱ ajá wekaimiayi.

Piniatátja̱i̱ Akaap chícham najanawarma

³¹ Nuya̱ṉka yaintri̱ chicharainiak “Israer shuara akupniuri̱nkia tí waitnenkartin akupin áiniawai tama antukuitji. Tuma asamtai yamaikia yuṉkunim ii tuntupén ukatmamkar nuyá̱ chápik naṉkurarar Israernumia̱ akupin weriartai. Túramka iwiaakman tsaṉkurtampraintiajti” tiármiayi.

³² Nuya̱ṉka tuntupnum yuṉkunmin ukatmamkar tura chapikji̱a̱i̱ kuntujnum jiṉkiamawar úunt akupniun tariar chicharainiak “Ame takartámin Piniatát chichartamuk winia iwiaakmarun tsaṉkurati túramui” tiármiayi. Tutai Akaap chichaak “Tuke iwiaakkuṉka nuikia winia yatsuruiti” tímiayi.

³³ Nuna takui̱ nu aentska péṉker átatui tu enentáimprarmiayi. Nuya̱ṉka wárikmasar chichainiak “Ame yátsum Piniatátka iwiaakui” tiármiayi. Tuíniakui “Werí utitiatarum” tímiayi. Tura Piniatátka úunt akupin Akaap pujamunam támiayi túrunamtai káruri̱n eṉkermiayi.

³⁴ Tura Piniatát chichareak “Winia apar ame apá pépruri̱n atantrarmia núnaka mash awaṉtuktiatjame. Núnismek winia apar Samarianam túramia nútiksamek amesha surutmatai̱ Tamaskunam najatmakta” tímiayi. Tutai Akaap chichaak “Jú̱ chicham najanajnia nuja̱i̱ wikia aṉkant akupkáttajme” tímiayi. Nuya̱ṉka niji̱a̱i̱ chichaman najana wetí tusa aṉkant akupkámiayi.

³⁵ Kame Uunt Yus timia asa Yúsnan etserniu uchirí̱ ni tsaníakmari̱n chicharuk “Waitneasam awatitia” tímiayi. Támaitiat nu áishmaṉ awattinian nakitrámiayi.

³⁶ Túram chicharuk “Uunt Yusa chichame̱ umirkachu asakmin wini̱ya̱ kanakiakmin úunt ya̱wa̱ mantamattawai” tímiayi. Nuyá̱ kanakí̱ wéan úunt ya̱wa̱ iṉkiuṉ esái mámiayi.

³⁷ Núnisaṉ chikichnasha iṉkiuṉ chicharuk “¡Waitneasam ijiuttia!” tímiayi. Tutai ijiú tsupíamiayi.

³⁸ Nuyá̱ Yúsnan etserin ji̱n janchji̱a̱i̱ nukuk nekaachmin ajas úunt akupniun jintiá nákaktaj tusa werimiayi.

³⁹ Tura úunt akupin naṉkaaman wainiak Yúsnan etserin kakantar untsúak “Ámin takartámin mesetnum pujan chíkich áishmaṉ mesetnumia̱ aentsun achik itiarti chichartak ‘Ju̱ áishmaṉ péṉker wáinkiatarum tura meṉkakamtaiṉkia ni iwiaakmari̱ ame iwiaakmarmiji̱a̱i̱ núja̱i̱ṉchuka chikichik tarentu akikmaktatme’ túrutui.

⁴⁰ Tura ame takartámniuka chíkich takatnum itiurchat pujái̱ nu aentska meṉkakayi” tímiayi. Nuiṉkia Israernumia̱ úunt akupin aya̱k “Ame támena nuka tímiatrusan túrunattawai. Ame chichammek makurmayi” tímiayi.

⁴¹ Nuya̱ṉka wárichik ji̱ janchji̱a̱i̱ nukumákman jusamiayi. Tura Israernumia̱ úunt akupin Yusna takarniua nuna nekaamiayi.

⁴² Tura Yúsnan etserin úunt akupniun chicharuk “Uunt Yus chichaak ‘Ju̱ aentska jákatniuiti tímiaj nu akupka asam ni iwiaakmari̱ ame iwiaakmarmiji̱a̱i̱ akikmaktatme. Tura Piniatáta shuari̱ jákartinnium Israer shuarcha jákartatui’ tawai” tímiayi.

⁴³ Kame Israernumia̱ úunt akupniusha kakarmachu ajas kajeku ni je̱e̱n waketki̱ Samarianam jeamiayi.