1 Akup. 2 - Yus Papí: Shuarja̱i̱ Yus Yamaram Chicham Najanamu

Tawit jaak Saramúṉkan akatrámu

¹ Tawit jákatin ishichik ajas ni uchirí̱n Saramúṉkan akateak,

² “Ashí aents ni uuntri̱ ayamuwearmanumaṉ ayamutin ainia núnisnak wisha ju̱ nuṉkan ikiuakuisha áishmaṉ asam kakaram ajasam pujutá.

³ Ame Úunt Yusrum ashí akupkámu umiktin chicham ni wakerana nuja̱i̱ métek tuke enentáimji̱a̱i̱ umirkata. Túrakum ashí akupkámun Muisaisan áamtikramia nuja̱i̱ métek túrata. Nu túrakmeka émkattame. Nuyá̱ ame takatrumsha núnisaṉ tuí̱ṉkish wekaittiam nui̱sha ashí péṉker arutrámtiatui.

⁴ Kame Uunt Yus yaunchu nekas umiktatjai tusa chichartak ‘Yamaisha tura ukunmasha ame uchiram nekas enentáiji̱a̱i̱ tura wakaní̱ji̱a̱i̱ Winia umirtukar péṉker wekainiakuiṉkia amé weanak Israer nuṉkanam akupin ártí tusan tsaṉkatkartatjai’ turutmia nuja̱i̱ métek umiṉki̱ wetí tusam túrata.

⁵ Núnisaṉ Sarwia uchirí̱ Juap warí itiurtukma nu amesha nékame. Nui̱ jimiará Israer shuar suntara úuntri̱n Nera uchirí̱ Ápneran tura Jetera uchirí̱ Amasan mesetka atsamunam máiniak mesetnum túrutai̱ya núnis numpen ukatainiak tura emenmamkari̱ncha nuyá̱ sapatri̱ncha númpak ajaschamkia.

⁶ Tuma asamtai ámeka nekatairmiji̱a̱i̱ itiurkamnia nekapeam núnismek túrata. Peṉké weamas jakati tusam iniaisaip.

⁷ Antsu Karaatnumia̱ Parsirái uchirí̱ ainia nuka waitnentrarta túram ame yurummena nui̱ ekentram ayurawarta. Warí ame yatsumíya̱ Apsarúnai̱ya̱ pisara weai̱ niṉkia ayamprutkarmai.

⁸ Antsu Piṉjiamín shuar Pajurímniumia̱ Jera uchirí̱ Semaikia Majanáimnium weai̱ wáitsar jákatniunam wíniaka yumiṉkrurmai. Túrasha ámiji̱a̱i̱ pujawai. Tura yumiṉkrú ajakiat Jurtan entsanam iṉkiuṉkamtai nekas tajai tákun Uunt Yus íimmianum ‘puya̱ja̱i̱ṉkia máshtatjame’ tímiajai.

⁹ Tura yamaikia tsaṉkuraip. Ámeka neka áishmaṉkaitme. Niji̱a̱i̱ warí itiurkatniua wakeram ame Iistá. Peṉké weamsamtaisha niṉki jakati tusam iniaisaip antsu maatá” tímiayi.

Tawit jakamtai ikiusma

¹⁰ Tura úunt akupin Tawit jaka ni uuntri̱ ayamprarmia núnis nisha ayamumiayi. Túrunamtai Tawit Péprunam iwiarsarmiayi.

¹¹ Kame Tawit Israer shuarnum akupin ajas pujumia nui̱ Eprunnumka siati uwí tura Jerusaréṉnumka traintitráis uwí akupin ajasmiayi. Tura ashí irurmaka kuaraintia uwí úunt akupin ajas pujusmiayi.

¹² Tura ni aparí̱ Tawit akupku pujutái̱ri̱n Saramúṉsha pujusmiayi. Nui̱ṉkia nisha nekas ímiatrus akupin ajasmiayi.

Saramúṉ Atuníasan maamu

¹³ Nuya̱ṉka Akitia uchirí̱ Atunías Saramúṉka nukurí̱n Pitsawítian tarimiayi. Tarim chichareak “¿Péṉker enentái̱ji̱a̱i̱ṉ taum?” tutai nisha chichaak “Ee péṉker enentái̱ji̱a̱i̱ tajai” tímiayi.

¹⁴ Tura wárikmas chicharuk “Jú̱chiniak títiatjame” tímiayi. Takui̱ “Chichakta” tímiayi.

¹⁵ Tutai ni chichaak “Ame nékame akupeamuka wíniauyi tura ashí Israer aents arma nuka winia akupin ati tusa nákariarmai. Túrasha akupeamuka yapajniá yatsurui naṉkaamaknia ju̱ka Jiuwá wakeramuka níniuyi.

¹⁶ Tuma asamtai wi seattajmena nu nakitrutraip” tímiayi. Tutai nuwa̱ chicharuk “Wats titiá” tímiayi.

¹⁷ “Waitneasam akupin Saramúṉ áujtursai Súnemnumia̱ Awisákan surusat wi nuatkataj seatritia. Warí áminkia suritrámkashtatui” tímiayi.

¹⁸ Tutai Pitsawí chichareak “Wátsek nui̱ṉkia wi akupniun áujtustajme” tímiayi.

¹⁹ Nuya̱ṉka Atuníasan chichampruktaj tusa Pitsawíkia akupin Saramúṉkan werimiayi. Tura úunt akupniuka iṉkiuṉtaj tusa wajakmiayi núnisaṉ ni tsuntsumpruá ataksha waketki̱ akupkur pujutari̱n pujusmiayi. Nuya̱ṉka ni nukurí̱ pujustinian akupkur pujutai̱ chíkich itiatárum tusa akupkámiayi tura úunt akupniu untsuuri̱ni̱ ninkia pujusmiayi.

²⁰ Nuya̱ṉka ni chichaak “Chikichkiniak peṉké uchichin seatniun ámin wakerajme túrasha atsá turutip” tímiayi. Tutai úunt akupin chichaak “Nukuru páchitsuk seattiá peṉké atsá tíchattajme” tímiayi.

²¹ Tutai ni chicharuk “Súnemnumia̱ nuwa̱ Awisák susata ame yátsum Atunías nuatkat” tímiayi.

²² Tutai úunt akupin Saramúṉ aya̱k ni nukurí̱n chicharuk “¿Urukamtai Súnemnumia̱ Awisáksha Atunías susata túruteam? Nui̱ṉkia wi akupeamusha seatkia. Warí niṉkia wíji̱a̱i̱ṉkia úuntchakait tura Yúsnan pujurin Awiatársha núnisaṉ Sarwia uchirí̱ Juapsha ¿níji̱a̱i̱ṉchak pujuinia?” tímiayi.

²³ Nuya̱ṉka uunt akupin Saramúṉ Jiuwan pachis nekas túrattajai tusa chichaak “Nuna tu chichaku asamtai Atuníasan ni iwiaakmari̱ji̱a̱i̱ akikmamtikchakuinkia Jiuwá waitnentrutsuk asuttiuati” tímiayi.

²⁴ Jiuwá winia ju̱i̱ apujtusuana tura winia aparu Tawitian akupkur pujutariri̱n ekeetas paantin awajtusuana núnisan yaunchu timia nuna umíak ukunam námkartinian winia surusua nuna náari̱n nekas tajai Atuníaska yamaik jakattawai.

²⁵ Nuya̱ṉka úunt akupin Saramúṉ Juyata uchirí̱n Piniayása akupkámiayi Atunías maa ikiuta tusa túram werí mámiayi.

Saramúṉ Awiatáran Juapja̱i̱ ji̱i̱kiarma

²⁶ Nuya̱ṉka úunt akupin Yúsnan pujurin Awiatáran chicharuk “Anatútnum ame apanu nérentin ajasaruitmena nui̱ wetá. Warí amesha mantamnamniaitme túrasha winia apar Tawit iwiaakai̱ Jiuwana Eṉketai̱ júkin asaakmin yamaikia máshtatjame. Núnismek winia apar ti nukap waitsamia nuja̱i̱ métek amesha waittsaitme.”

²⁷ Jú̱nis Saramúṉ Jiuwá pujurniun Awiatáran jí̱i̱kmiayi. Jiuwá Irí aentsun timia nu uminkiamiayi Sírujnam. 1 Sam. 2:27-36

²⁸ Juapsha nu chichaman antuk Apsarúnka nemarsachuitiat antsu Atuníasai̱ nemaku asa pisar Jiuwá Yusa Je̱e̱n Juapka u̱mkamiayi tura aestutai̱ kachuri̱n achimkiámiayi.

²⁹ Juap pisar Jiuwá jutai̱ je̱e̱n tura Yus aestutai̱ ápatnik pujawai tusar úunt akupin Saramúṉkan ujakármiayi. Nuyá̱ Juyata uchirí̱n Piniayásan akuptuk chicharuk “Werim maa ikiuta” tímiayi.

³⁰ Nuya̱ṉka Piniayás Juápan Jiuwá jutai̱ je̱e̱n jearí chichareak “Akupin jíinkiti túramui” tímiayi. Tutai Juap chichaak “Jíinkishtatjai antsu ju̱i̱ṉ jakattajai” tímiayi. Takui̱ akupniun waketruki̱ “Juapka ju̱i̱ṉ jakattajai tawai” tímiayi.

³¹ Nuya̱ṉka úunt akupin chichaak “Ni tana nuka tímiatrusmek túrata, maam iwiarsata. Túram Juap peṉké ántar numpa upurarma wini̱i̱ya̱sha tura winia aparu shuari̱ya̱sha emeṉkakta.

³² Warí jímiara áishmaṉkan tí peṉker niji̱a̱i̱ naṉkaamas péṉker armia nuna winia apar Tawitkia nekachmanum puya̱ja̱i̱ máwarmiayi. Ápner Nera uchirí̱n nusha Israer shuara suntari̱ úuntri̱yayi nuyá̱ Amasasha Jetera uchirí̱yayi nuka Jutanmaya̱ suntara úuntri̱yayi núnaka Jiuwá yapajmiátkartatui.

³³ Tura ni jakamunmaṉka Juapak nuyá̱ ni shuari̱ṉ tuke makurma ártí. Antsu Tawitniaka núnisaṉ ni shuari̱ncha tura akupniu uchirí̱ncha ántsaṉ ni akupkur pujutairi̱ncha shiir aṉkant pujustinniaka Jiuwak susattawai.”

³⁴ Nuya̱ṉka Juyata uchirí̱ Piniayáska wakamiayi tura utuá Juápnaka mámiayi. Túrawar kampuntin atsunum ní je̱e̱ni̱ṉᵏ iwiarsamiayi.

³⁵ Nuyá̱ Juyata uchirí̱ Piniayásan suntara uuntri̱ awajsámiayi. Núnisaṉ Awiatárai̱ya̱ṉka Satukan Yúsnan pujurin awajsámiayi.

Semái maamu

³⁶ Úunt akupin ukunam Semain untsuktarum tusa akuptúkmiayi nuyá̱ chicharuk “Jerusaréṉnum je̱a̱ je̱a̱mta túram nui̱ pujusta tuí̱ṉkish wéakum peṉké jiinkip.

³⁷ Ju̱ péṉker nekaata jiinkim Kitrun ashints wéakum katitkiumka tsaṉkurnatsuk jakattame. Nuyá̱ ame númpemka áminiak waketkittiawai” tímiayi.

³⁸ Nuyá̱ Semái úunt akupniun chicharuk “Támena nuka péṉkeraiti. Ámin takartámniuka támena nuja̱i̱ métek túrattawai.” Kame Semaikia núkap tsawant Jerusaréṉnum pujusmiayi.

³⁹ Túrasha menaintiú uwí naṉkaamasmanum Semái takarniúri̱ jimiar pisarar Káatnumia̱ úunt akupin Maaka uchirí̱ Ákis pujamunam wéarmiayi. Nuya̱ṉka Semáin ujáiniak “ámin takartámniuka Káatnum pujuiniawai” tiármiayi.

⁴⁰ Nuyá̱ Semái wajaki̱ umpururi̱n iwiar ekemak ni takarniuri̱n e̱a̱k Káatnum Ákisai̱ wemai. Tura Semaikia ni takarniuri̱n Káatnumia̱n yaruaki̱ winian wainiak

⁴¹ Jerusaréṉnumia̱ṉka jiintki̱ Semaikia Káatnum we waketki̱ winian Saramúṉka nekaamiayi.

⁴² Nuya̱ṉka Semái untsuktarum tusa úunt akupin akupkámiayi nuyá̱ támatai chicharuk “Jiuwá íirmanum nekas tajai tímiajme ame pujamunmaya̱ jiinkim náṉkamsamek weep túmakmeka ti nekas tsaṉkurmatsuk jakattame tú tusan akupkachmakjam. Tutai ame chichartakum ‘péṉkeraiti túrutmena nunasha umiktatjai tíchamkum’ tímiayi.

⁴³ ¿Ausha urukamtai Jiuwá íirmanum nekas tajai tímiajna nusha umikchamkum núnisaṉ wi akupkámursha umikta tímiajmena nusha umikcham?”

⁴⁴ Úunt akupin Semain chicharuk “Amek nekaamame núnismek amek nékame ashí yajauch ame winia apar Tawitiai̱ imitmákmamna nu nékame. Jiuwái̱ ame nu yajauch túramamna nú yajauchiniak ámin itiartámai.

⁴⁵ Úunt akupin Saramúṉka shiir awajsamu átatui núnisaṉ Tawitia akupkur pujutái̱ri̱sha Jiuwá íismasha peṉké umuchkiachmin tuke atí.”

⁴⁶ Nuyá̱ úunt akupniuka Juyata uchirí̱ Piniayásan akupkámiayi túram ninkia jiinkí̱ iṉkiuá Semain mámiayi. Nu túrunamtai Saramúṉ ni akupmarinkia nuna kakaram ajasmiayi.