1 Akup. 16 - Yus Papí: Shuarja̱i̱ Yus Yamaram Chicham Najanamu

Paasa Israernumia̱ úunt akupin

¹ Nuyá̱ Paasa asutniátin Anani uchirí̱ Jeúwai̱ni̱ Úunt Yusai̱ya̱ chícham jú̱nis támiayi

² “Wi péejchach aentsnumia̱ Israer shuara uuntri̱ atá tusan apujsamjame. Túramaitiatam ámeka Jirupuámja̱i̱ métek Israer shuar Winia ainia nu tunáa túrumtikiawarume. Túram ame yajauch túramurmiji̱a̱i̱ṉᵏ akajtukume.

³ Tuma asamtai Páasanka yamaikia shuári̱ntiuk amuktatjai. Túran Nawata uchirí̱ Jirupuáman itiurkamaj nútikiattajai” tímiayi.

⁴ Paasa aents péprunam jákarmatai̱ṉkia ya̱wá̱ yuáwartatui tura kampunniunam jákarmatai̱ṉkia chuaṉ yuáwartatui.

⁵ Paasa chíkich túramuri̱sha tura kakarmari̱ji̱a̱i̱ túrukmasha ¿Israernumia̱ Úunt Akupin Túrunawarma Aatai̱ Papinium aakma áiniatsuk?

⁶ Tura Paasa jakamtai Tírsanam iwiarsarmiayi. Tura ni uchirí̱ Íraj akintiak úunt akupin ajasmiayi.

⁷ Páasanka shuari̱ntiuk warí itiurkartatjai Jiuwá timia nuna Yúsnan etserin Anani uchirí̱ Jeuini̱ etserkamiayi. Ni túramuri̱sha Jiuwá íismaka peṉké yajauchiyayi. Warí Jirupuáman shuari̱ntiuk amukmia nu túrimia núnisan Páasasha túrak Jiuwá akajkamiayi.

Israernum Ira akupeamu

⁸ Asa Jutá akupniuri̱ 26 uwitin Íraj Paasa uchirí̱ Tírsanam jimiará uwí Israera akupniuri̱ ajasmiayi.

⁹ Túrasha ni takarniuri̱ karu iruntraru jímiapetek nakaakaru úuntri̱ Sempri kajerak nakitramiayi. Tura Íraka Tírsanam Arsa je̱e̱n ú̱mak nampek pujumiayi. Ársaka Tirsa pepru ni úuntri̱yayi.

¹⁰ Simpri tarí Íran ijiú mámiayi. Kame Asa Jutanmaya̱ úunt akupin 27 uwí akupuk mantamnamiayi. Nuyá̱ íksan Israernum Sempri úunt akupin ajasmiayi.

¹¹ Úunt akupin ajas akuptáiri̱n ekemas Páasaka áishmaṉnaka chikichkinkisha iwiaakuka ikiutsuk tura ni shuarnasha nuyá̱ amikrí̱ncha ashí kajeṉmiayi.

¹² Nuna tura Yúsnan etserin Jeuini̱ Páasaka túrunattawai Jiuwá timia tímiatrusaṉ Paasa shuarnaka Sempri amú amú awajsamiayi.

¹³ Ju̱ka Paasa tura ni uchirí̱ Íraj ashí tunaan túruiniak Israer shuarnasha yajauch túrumtikiawarmanum nuka túrunamiayi. Warí, najantkamu yusan tikishmátainiak Israera Yusri̱ Jiuwan akajkarmiayi.

¹⁴ Íraj túramuri̱sha tura ashí najantkarma ainia nusha Israernumia̱ Úunt Akupin Túrawarma Aatai̱ papinium ¿áakchamuk ainia?

Sempri Israernum akupeamu

¹⁵ Asa úunt akupin Jutanam ajasmaka 27 uwí ámanum Sémprikia Tírsanam 7 tsawant akupin ajasmiayi. Nu tsawantin Israera suntari̱ Jipitiúnja̱i̱ mániatai tusar matsamtúkarmia nu Jiristíu aents ármiayi.

¹⁶ Mániatai tusar matsamkarmia nu Sempri úunt akupniun kajerak maayi táman antukarmiayi. Tura nu tsawantini̱ṉ ashí Israernumia̱ matsamak pujuarmia nuka suntara uuntri̱ Úmprin Israera úunt akupniuri̱ awajsarmiayi.

¹⁷ Nuyá̱ Úmprikia Jipitiúnnumia̱ ashí Israer shuarja̱i̱ Tírsan tenta eṉkekarmiayi.

¹⁸ Nuyá̱ Tirsa péprunka Israera suntari̱ tenta eṉkeawarun wainiak Sémprikia úunt akupniu je̱e̱n wayá̱ je̱a̱n ekemákmiayi. Tura je̱a̱ keakui nisha esáa jakamiayi.

¹⁹ Jiuwá íimmianum tunáa túramunam tura yajauch túrukmanum tura Jirupuám túramia núnis túramunam Israeran yajauch túrumtikia asa túrunamiayi.

²⁰ Kame Sempri chíkich túrawarmari̱ṉkia núnisaṉ nakitiak kajerak túramia nusha Úunt Akupin Túrawarma Aatai̱ papiniumka ¿áakchamuk ainia?

Umpri Israernumia̱ úunt akupin

²¹ Nuyá̱ Israernumia̱ jímiar nakaakarmiayi. Tura emka nakaakamuka Jiniata uchirí̱ Típnin úunt akupin awajsatai tiármiayi. Tura chíkich nakaakaruka Úmprin úunt akupin awajsatai tusar wakeriarmiayi.

²² Túrasha Umpri nemariarmia nu aents Jiniata uchirí̱ Típnin nemariarmia núnaka nupetmakarmiayi. Típnikia jakamtai nuya̱ṉka Umpri úunt akupin ajasmiayi.

²³ Tura úunt akupin Asa Jutanam akupin ajas traintiúnu uwí pujái̱ Umpri Israernum akupin ajasmiayi. Nuyá̱ Tírsanmasha sais uwí akupkámiayi. Tura ashí irurmaka tuse uwí akupin ajas pujusmiayi.

²⁴ Tura Úmprikia kuit jimiará tarentuja̱i̱ náintian Semeran sumarkamiayi. Tura nú nainnium uunt pepru awajsámiayi. Tura náintniaka Semeran sumarka asa nú peprunka Samaria anaikiamiayi.

²⁵ Kame Úmprikia Uunt Yus iismasha yajauchin túrak yaunchu akupin armia núja̱i̱sha naṉkaamas ti yajauchin túramiayi.

²⁶ Jirupuám Nawata uchirí̱ túramia núnisaṉ nisha nu yajauchiniak túrak Israer shuarnasha tunaan túrumtikiawarmiayi. Kame ántar yusan tikishmátainiak nuja̱i̱ Israer shuara Yusri̱n Uunt Yusan akajiarmiayi.

²⁷ Kame Umpri túramuri̱ ainia nusha tura ni takatrí̱sha núnisaṉ ni kakarmari̱ji̱a̱i̱ túramu ainia nuka Úunt Akupin Túrawarma Aatai̱ papinium ¿áakchamuk ainia?

²⁸ Tura Úmprisha ni aparí̱ ayamprarmia nui̱ṉ ayamumiayi. Túrunamtai Samaria nuṉkanam iwiarsarmiayi. Nuya̱ṉka ni uchirí̱ Akaap akupin ajasmiayi.

Israernum Akaap akupeamu

²⁹ Asa 38 uwí Jutanam akupin ajas pujái̱ Umpri uchirí̱ Akaap Israernum akupin ajasmiayi.

³⁰ Kame Umpri uchirí̱ Akaap Israernum akupin ajas Samaria péprunam 22 uwí pujusmiayi. Túrasha Jiuwá iisam yaunchu akupin pujuarmia núja̱i̱sha naṉkaamas Umpri uchirí̱ Akaap ti yajauchin túramiayi.

³¹ Tura Nawata uchirí̱ Jirupuám túramun túraksha yajauchichua núnis enentáimta asa Úmprikia nu arant Setunnumia̱ úunt akupniu Itpaara nawantri̱n Jisawíran nuatkamiayi. Túruna Páaran enentáimtak tikishmátmiayi.

³² Tuma asa Samaria nuṉkanam Paar enentáimtutai̱ je̱a̱n je̱a̱mmia nui̱ aestutai̱ncha najatamiayi.

³³ Kame Akaapsha enentáimtakur tikishmátai̱ atí tusa numiji̱a̱i̱ ántar yus Asera enentáimtutai̱n najanamiayi. Nuna túrak Akaap yaunchu akupin Israernum pujusár túrawarmia nuna naṉkaamas yajauchin túrak Jiuwan Israer shuara Yusri̱n akajkamiayi.

³⁴ Tura Pitirnumia̱ Jiar pujumia nú tsawantin nisha Jirikiún ataksha je̱a̱mkamiayi. Kame Jiuwá Nuuna uchirí̱ Jusuiji̱a̱i̱ tímiania tímiatrusaṉ ni uchirí̱ iwiá̱i̱ Apiráman iwiaakmari̱n akikmak tépakmari̱nkia aeprurmiayi. Núnisaṉ amúamu uchirí̱ Sekupa iwiaakmari̱n akikmak wáitiri̱nkia ikiusármiayi. Jus. 6:26