1 Akup. 15 - Yus Papí: Shuarja̱i̱ Yus Yamaram Chicham Najanamu

Jutanmaya̱ akupin Apías

¹ Jirupuám Nawata uchirí̱ tiasiúchu uwí úunt akupin ajas pujamunam Apíaska Jutanam úunt akupin ajasmiayi.

² Túruna menaintiú uwí Jerusaréṉnum akupkámiayi. Tura ni nukurí̱ṉkia Apisharúna nawantri̱ Maaka náartiniuyayi.

³ Kame Apíaska yaunchu ni aparí̱ yajauchin túramia nuja̱i̱ métek nisha túramiayi. Túmak Uunt Yus iismasha ni uuntri̱ Tawit péṉker wekasamia ímiatrus túrachmiayi.

⁴ Tuma asamtai shiripik keak tsáapin ajana núnis Jerusaréṉnum tsáapin atí tusa Uunt Yus ni Yusri̱ Tawitian anea asa susamiayi. Tura asa ni jakamtaisha ni uchirí̱n akupin awajtúsmiayi tura Jerusaréṉka tuke kakaram atí tusa túramiayi.

⁵ Tawitkia iwiaaku pujumia nui̱ṉkia Uunt Yus íimmianumsha tí peṉker túramiayi. Tuma asa Uunt Yus timia nuya̱ṉka peṉké kanakchamiayi. Antsu Jet aents Uríasan túramia núja̱i̱ṉ yajauchiṉkia túramiayi. 2 Sam. 11:1-27

⁶ Kame Apíaska iwiaaku pujumia nui̱ṉkia Jirupuámja̱i̱ṉkia tuke mesetja̱i̱ṉ pujú ármiayi.

⁷ Nuyá̱ Apíasa chíkich túramuri̱ṉkia núnisaṉ warinia itiurkamia nusha Jutanmaya̱ Akupin Túrawarma Aatai̱ papinium ¿áarchamukait? Tura Apíaska mésetnumaṉ Jirupuámja̱i̱ṉkia pujuarmiayi.

⁸ Nuyá̱ Apías jakamtai Tawit péprunam iwiarsarmiayi. Túrunamtai ni uchirí̱ Asa akupin ajasmiayi.

Jutanmaya̱ úunt akupin Asa

⁹ Jirupuám painti uwí Israernum úunt akupin ajas pujamunam Ásaka Jutanam úunt akupin ajasmiayi.

¹⁰ Túruna kuaraintiúnu uwí Jerusaréṉnum akupkámiayi. Tura ni nukuchri̱ṉkia Apisharúna nawantri̱ Maaka náartiniuyayi.

¹¹ Antsu Ásaka Uunt Yus iisam ni uuntri̱ Tawit túramia ímiatrusaṉ túramiayi.

¹² Tura asa aya̱shi̱n kuitji̱a̱i̱ tsaṉkama armia nú áishmaṉnaka úunt akupin Ásaka nú nuṉkanmaya̱ṉka ji̱i̱r ishiakmiayi. Tura ántar yusan yaunchu ni uuntri̱ najankamu armia núnaka utsaṉkarmiayi.

¹³ Núnisaṉ ni nukuchri̱ Máakanka najanamu yus Aseran nakumak mui̱jmiainian najana asamtai nuwa̱ úunt akupniuya̱ nuya̱ṉka jí̱i̱kmiayi. Tura Ásaka mui̱jmiai̱ nakumkar najanamuya̱ núnaka emesak Kitrun ashintsanam áesamiayi.

¹⁴ Tura najanamu yus tikishmatai̱ armia nuna emeskachuitiat antsu Asa iwiaaku pujumia nui̱ṉkia Úunt Yusnaka nekas péṉker enentáimtimiayi.

¹⁵ Núnisaṉ Yúsnaiti tusa ni aparí̱ tura nisha akantúkmia núnaka kuít jirun núnisaṉ kurincha nuyá̱ Yusa Je̱e̱n takatai̱ncha Uunt Yusa Je̱e̱n ikiusmiayi.

¹⁶ Israer shuara úunt akupniuri̱ Asaja̱i̱ Paasa akupin armia nuiṉkia tuke mánaisaṉ pujú ármiayi.

¹⁷ Israernumia̱ akupin Páasaka Jutanmaya̱ja̱i̱ mesetnum iṉkiuniattsa warukmiayi. Nuya̱ṉka yaaksha Jutanmaya̱ úunt akupin Ásan yáiṉtaj tusa ni akupeamuri̱n waya̱wara̱i̱ṉ tura jintiancha jíintki̱a̱i̱ṉ tusa Ramá pepru a̱a̱ya̱ tanishri̱ iwiartuktinian akupkámiayi.

¹⁸ Nuya̱ṉka Ásaka Jiuwá Je̱e̱n tura akupniu je̱e̱ncha kuít jirun núnisaṉ kurisha juákaru irunmia núnaka ashí yaruak ni yaintri̱ armia nuna súsarmiayi. Tura Sírianmaya̱ úunt akupin Jisiuna tiraṉki̱ tura Taprimúna uchirí̱ Piniatátai̱ Tamaskunam pujá asamtai nui̱ akupénak jú̱nisrum titiarum tusa akupkarmiayi. Tura chichaak

¹⁹ “Yaunchu ii aparí̱ itiurin armia núnisrik yamaikia wi ámiji̱a̱i̱ chícham najanatai. Pai ju̱á nekaata, kuit jirun kurija̱i̱ ántran akuptajme. Tura Israernumia̱ akupin Páasaja̱i̱ chícham najanaitrumna nuka tsuriṉta winia aṉkant iniaitiusat.”

²⁰ Nuya̱ṉka Piniatátka Ásan umiruk ni suntari̱ uuntri̱ peṉkeri̱ armia nuna akupkar Israer shuaran mesetan najatamiayi. Tura Ijiunan Tánancha nuyá̱ Apirpitmákan núnisan Kinirítnaka ashí Neptarí aentsun nuṉke̱miak takamtsuk nupetkarmiayi.

²¹ Páasaka nuna antuk Ramá je̱a̱mkattsa pujurmanka ikiukí̱ Tirsa nuṉkanam pujuumiayi.

²² Nuiṉkia úunt akupin Ásaka ashí Jutanmaya̱n chikichkinkisha táamtsuk ipiaawarmiayi. Tura Ramanmaya̱n kayancha numincha yaruakarmiayi. Paasa nuja̱i̱ takakmamia nuna tura nuja̱i̱ akupin Asa Piṉjiamínniumia̱ Képan nuyá̱ Míspan ataksha je̱a̱mkarmiayi.

²³ Tura Asa chíkich túramuri̱nkia tura ni ashí kakarmari̱sha tura ashí ni túramuri̱sha tura uunt pepru je̱a̱mkarmari̱sha Jutanmaya̱ Úunt Akupin Túrunawarma Aatai̱ papinium ¿áakchamuk ainia? Tura weamar nawenam suṉkuran achimiákmiayi.

²⁴ Ásaka ni aparí̱ ayamumia nui̱ṉ nisha ayamumai túrunamtai Tawitia pépruri̱n ni aparí̱ iwiarsamunmaṉ nui̱ṉ iwiarsarmiayi. Tura Ásasha jakamtai ni uchirí̱ Jusapát úunt akupin ajasmiayi.

Israernumia̱ Natap akupeamu

²⁵ Ásaka Jutanam úunt akupin ajas jimiará uwí pujamunam Jirupuáma uchirí̱ Natap Israernum akupin ajasmiayi tura jimiarchik uwik akupin ajas pujusmiayi.

²⁶ Ni aparí̱ Jirupuám tunaan túrak Israer shuaran tunaan túrumtikiawarmia núnisaṉ Natapsha nú yajauchiniak túrak Uunt Yus íimmianumsha tunaan túramiayi.

²⁷ Natapka ashí Israer shuarja̱i̱ Jiristía nuṉkanam Jipitiúnkan tentá eṉkekar matsamtuiniai akupniun nakitiak kajerak Isakár shuarnumia̱ Ajíasa uchirí̱ Paasa puya̱ja̱i̱ mámiayi.

²⁸ Jutanmaya̱ úunt akupin Ásaka akupin ajas menaintiú uwí ejemunam Páasaka Natapnaka mámiayi tura nuna akintiak úunt akupin ajasmiayi.

²⁹ Tura Páasaka úunt akupin ajas Jiuwá ni takarniúri̱ Sírujnumia̱ Ajíasai̱ni̱ timia tímiatrusaṉ Jirupuám shuarnaka chikichkinkisha iwiaakuka ikiutsuk antsu amú amú awajsamiayi.

³⁰ Ju̱ka Jirupuám tunaan túrak Israer shuarnasha tunaan túrumtikiak Israera Yusri̱n Jiuwan akajkam núnaka túramiayi.

³¹ Natapa chíkich túrukarmaka Úunt Akupin Túrunawarma Aatai̱ Papinium aakma áiniawai.

³² Asa Páasaja̱i̱ Israera úunt akupniuri̱ mai̱ tuke tsawant mánisaṉ matsamin ármiayi.

Israernumia̱ Paasa akupeamu

³³ Ásaka Jutanam akupin ajas menaintiú uwí pujamunam Ajíasa uchirí̱ Páasaka Tírsanam pujus ashí Israernum akupin ajas 24 uwí pujusmiayi.

³⁴ Nisha Jirupuám túramia núnisaṉ túrak Jiuwá iismasha tí yajauchin túramiayi. Núnisaṉ Israernasha tunaan túrumtikiamiayi.