1 Akup. 11 - Yus Papí: Shuarja̱i̱ Yus Yamaram Chicham Najanamu

Saramúṉ Úunt Yusai̱ya̱ kanakmia

¹ Tura úunt akupin Saramúṉ Parauṉka nawantri̱n nuatkaitiat nú arant chíkich nuṉkanmaya̱ nuwa̱ Muap, Amun, Etum, Setun tura Jet nuṉkanmaya̱ nuwa̱ncha nuatramiayi.

² Warí Uunt Yus Israer shuaran chicharuk “Nu nuṉkanmaya̱ núwa̱ka nuatkairap. Tura nisha atumí nawantri̱ncha nuatkacharti. Túrakrumni̱ṉkia ní yusri̱ni̱ enentáimtikramprartatui” tímiaitiat Saramúṉ nuyá̱ nuwa̱n nuatramiayi.

³ Tura siatisiántuka nekas nuwe̱yayi nuyá̱ traisiantuka nua̱ri̱ya núnis ármiayi. Kame nu nuwa̱sha ni ántar yusri̱n tikishmátainiakui Saramúṉkan aushá enentáimtikrarmiayi.

⁴ Tuma asa Saramúṉ tí uuntach ajasmatai ni nua̱rí̱ ántar yus enentáimtustinian enentáimtikrarmiayi. Túram Uunt Yusan nekas enentái̱ji̱a̱i̱ enentáimtustinian iniaisámiayi. Saramúṉsha ni aparí̱ Tawit Uunt Yusan umirniuya tímiatrus umirkachmiayi.

⁵ Kame Saramúṉka Setunnumia̱ ántar yusan Astarten nuyá̱ Amunnumia̱ ántar yusan mui̱jmiai̱ ti yajauch nakumkar najanamun Murukan tikishmátmiayi.

⁶ Nuna túrak Saramúṉsha Uunt Yusja̱i̱ íismaka yajauchin túramiayi. Tuma asa ni aparí̱ Tawit Uunt Yusan nekas enentáimtusmia tímiatruska enentáimtuschamiayi.

⁷ Nuya̱ṉka Muápnumia̱ yus Kímius tura Amunnumia̱ yus Muruk mui̱jmiai̱ ti yajauch ainia nu enentáimtutai̱n Jerusaréṉnum íṉkiuasmak nainnium Saramúṉ najatkamiayi.

⁸ Nútiksaṉ chíkich nuṉkanmaya̱ nuwe̱ armia nunasha ni yusri̱ enentáimtutai̱n ashí najatkamiayi. Túram ni yusri̱n enentáimtuiniak taṉkuncha tura kuṉkuinniasha nui̱ áestiarmiayi.

⁹ Kame Israer shuara Yusri̱ Uunt Yusai̱ya̱ṉka Saramúṉ kanakmiayi. Tuma asamtai Uunt Yus ti kajerkámiayi. Warí jimiará wantintiuk

¹⁰ chichareak “Chíkich yuska peṉké enentáimtusaip” tímiayi. Túrasha Uunt Yus timia nuna umikchamiayi.

¹¹ Tuma asamtai Uunt Yus Saramúṉkan chicharuk “Ame tu enentáimiu asam tura Wi chícham najanamu tura akupkámusha umirtukcha asakmin ame akupeamurmin atankíttiajme túran ame takartámniun susattajai.

¹² Túrasha ame apan Tawitian anea asan ame iwiaakmena ju̱i̱ṉkia túrashtatjai. Antsu ame uchirmin núnaka túrattajai.

¹³ Túrasha Winia takartin Tawitniaka aneakun ántsaṉ Jerusaréṉkan Wi aneakun anaikia asan ame uchiram pujus akupkáttana nui̱ṉkia ashí atankishtatjai. Antsu chikichkí weanmaya̱nak susattajai” tímiayi Uunt Yus.

Atat Resunja̱i̱ Saramúṉka nemasri̱ ajasárma

¹⁴ Nuyá̱ Jiuwá Atat Etumnum pujumia nuna Saramúṉka nemasri̱ awajsamiayi. Etumnumia̱ akupniu aentsri̱yayi.

¹⁵ Tawitkia Etumnum pujái̱ kaji̱ṉkiárun iwiarsattsa Israernumia̱ suntara uuntri̱ Juap wea kaji̱ṉkiáruncha iwiarsar Etumnumia̱ áishmaṉ armia nunasha ashí kajeṉ amukármiayi.

¹⁶ (Juapsha sais nantu ashí Israerja̱i̱ ashí Etumnumia̱ áishmaṉkan maa amumam pujusmiayi.)

¹⁷ Atatka pisarmiayi tura ni aparí̱ takarniuri̱ Etum shuar armia nu wárumchik niji̱a̱i̱ pisarármiayi. Túrunawar Ejiptunam wéarmiayi tura Atatka úchiyayi.

¹⁸ Tura Matiannumia̱ junairar Parannum wéarmiayi. Parannumia̱ aentsun achik Ejiptunam jeawarmiayi. Ejiptunam jeamtai nuyá̱ akupin Parauṉ je̱a̱ncha tura yurumkancha núnisaṉ nuṉkancha susa nui̱ṉ apujsarmiayi.

¹⁹ Parauṉsha Atatnaka ti shiir enentáimtimiayi tuma asa ni nua̱rí̱ úunt akupin nuwa̱ Tajpinísa kai̱n nuatkat tusa susamiayi.

²⁰ Tajpinísa kai̱ Jiniupátan takusmiayi. Parauṉka je̱e̱n pujus Tajpinísa uchin utsurkámiayi. Jiniupátka Parauṉka je̱e̱n Parauṉka uchirí̱ji̱a̱i̱ métekrak pujumiayi.

²¹ Atat Ejiptunam pujus Tawitcha tura Juapsha jákaruiti táman antukmiayi. Tura Parauṉkan chicharuk “Yamaikia nuṉkarui̱ waketkitiaj tsaṉkatrukta” tímiayi.

²² Tutai Parauṉsha chicharuk “¿Urukamtai? ¿Warí tátramsa amincha? Nuṉkemín waketkitiaj tusan seatme” tutai “Táatruschai áyatik nuṉkarui̱ waketkitin iniaitiusta” tímiayi.

²³ Núnisaṉ Iriata uchirí̱ Resunnasha Yus Saramúṉkan nemasri̱ awajsamiayi. Nisha ni uuntri̱ Atatesér Súupanmaya̱ úunt akupniuya pisarúyayi.

²⁴ Tawit Súupanmaya̱ aentsun kaje̱nakui Resun aentsun irur nuna uuntri̱ ajas Tamasku wear nui̱ matsamás úunt akupin Tamaskunu awajsarmiayi.

²⁵ Tura Saramúṉ pujumia nui̱ṉkia tuke Resunka Israera nemasri̱niuyayi. Atat yajauch túramia nuja̱i̱ métek Resun Israer shuaran muí̱jiak ti itiurchat awajiármiayi. Tura Siria nuṉkanam akupniuyayi.

Jirupuám umirkatniun nakitiak Saramúṉkan kajeramu

²⁶ Núnisaṉ Saramúṉka takarniúri̱ Seretanmaya̱ Éprata shuar Nawata uchirí̱ Jirupuám úunt akupniun umirkatniun nakitiak kajerkámiayi. Nisha wajé̱ Serúa náartinia uchirí̱yayi.

²⁷ Kame Jirupuámka ju̱ja̱i̱ kajekmiayi. Saramúṉ ni aparí̱ Tawit péprunam Mírun nájaneak pepru wenuke̱n wa̱a̱ aan akiramtai úunt akupniunka kajerkámiayi.

²⁸ Kame Jirupuámka kakaram áishmaṉkauyayi. Tura Saramúṉsha nu áishmaṉkan sétumcha warii asamtai iis Jusé shuari̱ kakaram takamtiktai armia nuna wáinkiarti tusa anaitiukmiayi.

²⁹ Tura nu tsawantai̱ Jirupuámsha Jerusaréṉnumia̱ wesa Sírunmaya̱ Ajías, Yúsnan etserin, awaṉkéma yamarman awaṉkeaku winian iṉkiuṉmiayi. Tura nui̱ kampunniunam jímiarchik iṉkiukarmiayi.

³⁰ Nuyá̱ Ajías awaṉkém yamarman awaṉkeakuya nuna ja̱a̱r tuse awajsámiayi.

³¹ Tura Ajías Jirupuáman chicharuk “Ámeka tias ja̱a̱rma achirmákta. Warí Israera Uunt Yusri̱ chichartamuk ‘Ju̱ nekaata, yamaikia Saramúṉka akupeamuri̱ya̱ atankin Israer weanmaya̱n tias wéan amastatjai.

³² Kame Winia takartin Tawitian aneakun núnisnak ashí Israer weanmaya̱n Jerusaréṉ pépruncha Wi aneakun anaikia asamtai Saramúṉka chikichik weaja̱i̱ṉ juáktiniaiti.

³³ Warí ni aparí̱ Tawit Winia akupkámu chichamprun umirtuk Wi iismasha péṉkeran túramia núnis túrutsuk Wíniaka iniaitiusar Setun aentsu yusri̱ Astarten tura Muapa yusri̱ Kimiusan núnisaṉ Amun aentsu yusri̱ Muruknasha tikishmátraru áiniawai.

³⁴ Túmaitkiuisha Winia takartin Tawitian Wi anaikia asan tura Wi akupkámu chichamnasha umirtuku asamtai nin aneakun Saramúṉ akupeamuri̱nkia ashikia atankishtatjai. Warí iwiaaku pujuttana nui̱ṉkia tuke akupin atí tusan anaikiaitjiai.

³⁵ Túrasha ni uchirí̱ akupin ajasmatai ni akupeamunmaya̱ atankin tias wean áminkia amastatjai.

³⁶ Kame Winia Naar atí tusan Jerusaréṉ péprun Wi anaikiamiaj nui̱ Wi iismasha shirikip keana núnis Winia takartin Tawitian tuke arittí tusan Saramúṉka uchirí̱nkia chikichik weanak susattajai.

³⁷ Wi áminkia anaikiattajme. Tura Israernum akupin ajasam ashí ame wakeramna núnisam akupkáttame.

³⁸ Nuyá̱ Wi tama ashí antukam umikiam péṉker wekaakmeka tura Wi iisam péṉker túrakum núnisaṉ Wi akupkámu umiktin chicham aarma nu enentáimtusam Tawit umikmia nútiksam umíakmiṉkia wi áminiu ainia nuja̱i̱ shiir awajsattajai. Warí, Winia takartin Tawitia shuari̱n itiurkarmiaj áitkiasnak áminiuncha tuke akupin ártatui. Túran Israer shuarnaka ámin amasártatjai.

³⁹ Nuna túrakun Tawit aentsnaka wáitkiasartatjai. Túrasha túkeka wáitkiaschartatjai’ Uunt Yus jú̱nis túramui” tímiayi Ajías Jirupuáman.

⁴⁰ Tuma asamtai Saramúṉsha Jirupuáman maattsa e̱a̱miayi. Túram Jirupuámka Ejiptu nuṉkanam akupin Sesak pujamunam pisar wémiayi. Tura Saramúṉ jáamam nui̱ṉ pujusmiayi.

Saramúṉ jakamu

⁴¹ Nuyá̱ Saramúṉka chíkich túramuri̱ṉkia tura ashí ni najankamuri̱sha núnisaṉ nekatairi̱sha ni túramu papiniumka ¿áakchamuk ainia?

⁴² Tura Saramúṉ kuaraintia uwí ashí Israernum úunt akupin ajas Jerusaréṉnum pujusmiayi.

⁴³ Nuyá̱ Saramúṉ jakamtai ni aparí̱ Tawitia Pépruri̱n iwiarsarmiayi. Túrunamtai ni uchirí̱ Rupuam úunt akupin ajasmiayi.