1 Akup. 1 - Yus Papí: Shuarja̱i̱ Yus Yamaram Chicham Najanamu

Awisák akupniun wainma

¹ Úunt akupin Tawit úuntach ajas ti weamsaṉka pushí aentsramash tsue̱r ajachmiayi.

² Túmakui̱ ni takarniúri̱ chichainiak “Nuwa̱ natsach áishmaṉja̱i̱ tsaniṉcha e̱a̱tkatai winia úuntrun úunt akupniun ayamas kának winia úunt akupniurun tsué̱tsue̱t awajit” tiármiayi.

³ Nuyá̱ ashí Israer nuṉkanmaya̱n nuwa̱ shíirmachin e̱a̱tkarmiayi. Túrawar Súnemnumia̱ nuwa̱ Awisákan wáinkiar úunt akupniun itiariármiayi.

⁴ Nú nuwa̱chikia ti shíirmachiyayi. Nisha úunt akupniun ayamtus teperas tsue̱r awajmiayi tura péṉker wáinmiayi. Túrasha úunt akupniuka nu nuwa̱ja̱i̱ṉkia tsaniṉchamiayi.

Atunías akupin ajastaj tama

⁵ Nuyá̱ Atunías Akitia uchirí̱ waantu enentáimtumak “Wi úunt akupin ajastatjai” tímiayi. Tinia karu tura kawainium ekemtan unuimiátra núnisaṉ ni wéamunam eem tseke wéartinniasha seṉkuintia áishmaṉkan júukmiayi.

⁶ Kame ni aparí̱sha warinkish túramtaisha ¿Ju̱sha urukamtai áitkiam? peṉké tíchauyayi. Nu arant Atuníaska shíirmauyayi. Apsarún akiiniamia nuyá̱ niṉkia uku akiiniauyayi.

⁷ Yúsnan pujurin Awiatárja̱i̱ṉkia Sarwia uchirí̱ Juap áujmattsar Atuníasnaka yaya̱rmiayi.

⁸ Túrasha Yúsnan pujurin Satukka tura Juyata uchirí̱ Piniayássha nuyá̱ Yúsnan etserin Natansha núnisaṉ Semái, Rei nuyá̱ Tawitian aentsri̱ sapijtichu kakaram armia nuka Atuníasnaka nemarcharmiayi.

⁹ Nu tsawantinkia Atuníaska Rujir ashintsanam tíjiu̱ch Sujirit muchiṉnum ayam tí peṉker iwiarkamu yutai̱ namperan najanamiayi. Murikniasha waakancha yamatskaman nuérman kajen ni yachi̱nkia takamtsuk tura akupniu uchirí̱ncha núnisan ashí Jutanmaya̱ aents úunt akupniu yaintri̱ pujuarmia nunasha ashí ipiaawarmiayi.

¹⁰ Túrasha Yúsnan etserin Natannaka, Piniayásnasha, ni yachi̱ Saramúṉnasha tura kakaram armia nunasha ashí ipiacharmiayi.

Tawit Saramúṉkan akupin awajsamu

¹¹ Nuya̱ṉka Saramúṉka nukurí̱ Pitsawín Natan áujuk chichaak “¿Ii uuntri̱ Tawitkia nékachmanum Akitia uchirí̱ Atunías úunt akupin ¿ajasái tamaaka antukchamek?

¹² Wats yamaikia winitiá túram winia chichamur antukta tura ame iwiaakmarum tura ame uchirmi Saramúṉka iwiaakmari̱ uwemtikramnium.

¹³ Wetá tura úunt akupin Tawit pujamunam waya̱a̱m chicharkum ‘Úunt akupin winia uuntru nekas umiktatjai tusam ame takartámin chicharkum “Ame uchiram Saramúṉ winia úkuruinkia akupkáttawai tura winia akupkur pujutairuiṉkia ni ekeemsattawai” ¿turutchamkum? Túrasha tuma ai̱sha ¿urukamtai Atuníassha akupin ajasá?’

¹⁴ Nuyá̱ ámeka úunt akupniuja̱i̱ chicháa pujamin wikia ame úkurmini̱ waya̱ttajai túran ame enentáimmiarmin ashí paant awajsattajai.”

¹⁵ Nuyá̱ akupniu Tawitia kanutairi̱n Pitsawí waya̱mai. Tura úunt akupniuka ti weamsamiayi. Tuma asamtai Súnemnumia̱ Awisák wáinmiayi.

¹⁶ Tura Pitsawí úunt akupin pujamunam tsuntsumá tikishmátramiayi. Túram akupin aníak “¿Warí wakeram?” tímiayi.

¹⁷ Tura nisha aya̱k “Winia uuntru ame Yusrum Jiuwá pachisam ame takartámin nekas umiktatjai tusam chichaakum ‘ame uchiram Saramúṉ winia úkuruinkua akupkáttawai tura wi akupkur pujutáiruinkia ni ekeemsattawai ame tímiame.’

¹⁸ Tura yamaikia Atunías úunt akupin ajasuíti nu ámeka winia uuntru úunt akupniuru nuka tuke nékatsme.

¹⁹ Turuncha tura taṉku nuérmancha núnisaṉ muriknasha ti untsurín kajeṉkuiti. Tura akupniu uchirí̱nkia ashí nuyá̱ Yúsnan pujurin Awiatárnasha núnisaṉ suntara úuntri̱n Juápnasha ipiaawaruit túrayat amin takartámin Saramúṉnaka ipiachuiti.

²⁰ Tura úunt akupin winia uuntru yamaikia ashí Israerka ni úunt akupniuri chichaak ni ekemtairi̱ncha ya akintruktata nuna titi tusa nákainiawai.

²¹ Nuí̱chuka winia úunt akupniusha winia uuntru ni aparí̱ aya̱muwarmia nui̱ṉᵏⁱ ayamprattsa wémataikia winia uchir Saramúṉja̱i̱ nuyá̱ wi makuntiatji.”

²² Nú nuwa̱ akupniun tuke auju pujurai̱ṉ Yúsnan etserin Natan támiayi.

²³ Nuyá̱ úunt akupniun ujainiak “Yúsnan etserin Natan taa a̱a̱ wajaawai” tiármiayi. Nuya̱ṉka Yúsnan etserin úunt akupin pujamunam wayá̱ tikishmar nijia̱i̱ji̱a̱i̱ nuṉká antimiam nin tsuntsumpruamiayi.

²⁴ Nuya̱ṉka Natan chicharuk “Úunt akupin winia uuntru ¿ame chichaakum ‘Winia ukurui̱nkia Atunías akupkatniuiti tura winia akuptai̱run akintiak ni ekemsatniuiti’ tíniukaitiam?

²⁵ Iisiá yamái nisha untsurí waakan nuyá̱ taṉku jaeram áinian muriknasha kajeṉkarai. Nuna tura ashí úunt akupniu uchirí̱ncha nuyá̱ suntara uuntri̱ ainia nunasha núnisaṉ Awiatár Yúsnan pujurniuya nunasha ashí ipiaawarai. Wats ju̱ nekaata, ni pujamunam yurumuk ú̱mak matsatainia nui̱ ‘¡Akupin Atuníasa tuke iwiaaku atá!’ tuíniawai.

²⁶ Antsu ame takartamniuncha nuyá̱ Satuk Yúsnan pujurniuncha Piniayás Juyata uchirí̱ncha tura ame takartámniuncha Saramúṉnasha ipiaacharmai.

²⁷ Nui̱ṉkia winia úuntur úunt akupniu ¿ju̱ túraitmena ju̱ka ame takartámin ainia nuka ujatskek tura chíkich akupin yaki ati nékatskek ju̱ka áitkiainiam?”

²⁸ Tutai úunt akupin Tawit chichaak “Pitsawí untsurtuktarum” timiai. Takui̱ untsukam úunt akupin pujamunam waya̱mai tura akupin pujamunam naka wajasmai.

²⁹ Tura akupin núnaka nekas umiktatjai tusa chichaak “Winia ashí nemasrui̱ya̱ uwemtikrurmia nú Yusak nekas iwiaakui.

³⁰ Kame nekas tajai tákun Israer shuara Uunt Yusri̱ náari̱ji̱a̱i̱ tímiajmena núnaka tímiatrusnak yamái umiktatjai. Kame chicharkun ‘Ame uchiram Saramúṉ wini̱ya̱ṉka úunt akupin ajastatui. Tura winia pujutái̱run akintiak úunt akupin ajas pujustatui’ tímiajme” tímiayi.

³¹ Tutai Pitsawí tikishmátar nuṉká tsuntsumá chicharuk “Winia úuntur akupin Tawitiá, tuke iwiaaku pujúu atá” tímiayi.

³² Nuyá̱ úunt akupin Tawit chichaak “Yúsnan pujurin Satuk nuyá̱ Yúsnan etserin Natan tura Juyata uchirí̱n Piniayássha untsurtuktarum” tutai untsukam tariarmiayi.

³³ Nui̱ úunt akupin chicharainiak “Winia takartin ainia nuja̱i̱ winia umpururui̱ Saramúṉ ekenkarum Kijiunumaani̱ akaktiarum.

³⁴ Nui̱ Yúsnan etserin Natan tura Yúsnan pujurin Satuk asuitiji̱a̱i̱ muuknum nakitiá Israer shuara úunt akupniuri̱ awajsattawai. Túramtai kachu umpuakrum ‘¡Yamaikia úunt akupniuka Saramúṉkaiti!’ titiarum.

³⁵ Tura iruntrarum umikrum wáketkuram nemarkirum wi akupku pujutái̱rui̱ awayá̱tarum. Tura wini̱ya̱ṉka ni akiniak pujus Israernum tura Jutanam akupin átinian anaikiaitjiai” tímiayi.

³⁶ Nuna takui̱ Juyata uchirí̱ Piniayás úunt akupniun aya̱k “Ame támena núnisaṉ atí tura ame Uunt Yusrum núnis akupkati.

³⁷ Tura winia úuntrun Tawitian Yus wainkiamia núnisaṉ Uunt Yus Saramúṉnasha pujursati. Túrak nuna páantin awajsati” tímiayi.

³⁸ Nuyá̱ Uunt Yúsnan pujurin Satuk tura Yúsnan etserin Natan núnisaṉ Juyata uchirí̱ Piniayás nuyá̱ Seret tura Pirit shuaraim iruntrar weriar Saramúṉkan Tawitia umpururi̱n ekenkar Kijiun púkuniniam júkiarmiayi.

³⁹ Tura Yus Shiir Awajtai̱ Je̱a̱nmaya̱n asuiti kachunam yaramun jukí̱ Uunt Yúsnan pujurin Satuk Saramúṉkan muuknum nakitiámiayi. Túramtai kachun umpuiniakui ashí shuar warainiak kakantar charaatum ajainiak “Yamaikia úunt akupniuka Saramúṉkaiti” tiármiayi.

⁴⁰ Nuyá̱ ashí shuar nin nemariarmiayi. Tura ti warasar piṉkiuin umpuiniai̱ kantamáiniak charaatum ajarmiayi. Tímiatmainiak úreawatska tumai̱ awajiármiayi.

Atunías mantamnatniun Saramúṉ tsaṉkuramu

⁴¹ Tura yurumá amukar Atuníassha nuyá̱ ipiaamu armia nusha charaatum ajamun antukarmiayi. Tura Juapka kachu umpuamun antuk chichaak “¿Urukamtai péprunmasha charaatum ajainia?” tímiayi.

⁴² Tura nisha chicháa pujai̱ṉ Yúsnan pujurniu Awiatára uchirí̱ Junatán támiayi. Túrunamtai Atunías chicharuk “Kakaram áishmaṉka waya̱ta péṉker chicham inimtsumeash” tímiayi.

^43-48 Tutai Junatán Atuníasan chicharuk “Péṉker chichamnaka inimtsujai antsu ii uuntri̱ Tawit Saramúṉkan akupin awajsáyi. Tura Yúsnan pujurniun Satukan nuyá̱ Yúsnan etserniun Natanan núnisaṉ Juyata uchirí̱ Piniayásnasha tura Seret shuarja̱i̱ nuyá̱ Pirit shuarja̱i̱sha akupin Tawit akupraram Saramúṉkan akupin ekemtai̱ umpurunam ekenkarai. Nuya̱ṉka Kijiunnum Satuk Natanja̱i̱ asuitin muuknum ukatar akupin awajsarai. Nuyá̱ wininiak charaatum ajainiana nu antukurme. Núnisaṉ Saramúṉka akupin pujutai̱niam ekemsayi. Tura takarin ainia nusha ii úuntri̱n akupin Tawitian weriar chicharainiak ‘Ame Yúsrum Saramúṉka náari̱nkia ame náarmiji̱a̱i̱ naṉkaaka awajsati. Tura akupeamuri̱ncha ame akupeamurmiji̱a̱i̱ naṉkaamas uunt awajtusti’ tuíniawai. Ímia akupniusha tepesam shiir enentáimtusai. Tura chichaak ‘Winia pujutái̱rui̱ pujustinian núnisaṉ wáinkiatniuncha tsaṉkatruku asa Uunt Yus Israera Yusri̱ shiir awajnásti’ tawai” tímiayi.

^49-50 Nuya̱ṉka Atunías ipiaamu armia nuka sapijmiakar tsakiṉmakar aṉkant aṉkant wéarmiayi. Túrasha Atuníaska Saramúṉkan ashamak Yus áestutai̱ kachuri̱n achimkiáttsa wémiayi.

⁵¹ Nuya̱ṉka Saramúṉkan ujainiak “Atuníaska akupin Saramúṉkan ashamak Yus áestutai̱ kachuri̱n achimkiáyi tura chichaak ‘Akupin Saramúṉ nekas umiktatjai taku “inia takarniúrnaka puya̱ja̱i̱ṉkia máshtatjai” turúttí’ tawai” tiármiayi.

⁵² Tutai Saramúṉ chichaak “Nekas péṉker áishmaṉkaitkiuṉka ni intiashí̱ṉsha antinnakchattawai antsu ju̱yá̱ netse túrutai̱n túrakka mantamnattawai” tímiayi.

⁵³ Nuya̱ṉka Yus áestutai̱nmaya̱ṉka ji̱i̱ktiarum tusa akupin Saramúṉ akupkámiayi. Túram akupin Saramúṉkan tarí tikishmátramiayi. Túram Saramúṉ chicharuk “Je̱e̱min wetá” tímiayi.