Filemoni 1 - Indagano Inyaaya mu-Chijita

Obhukeesya bhwa Pawuro ku‑Firemooni

¹ Inyarubha inu, niikaamire anye Pawuro, omubhoywa inguru ya okuraasya Emisango ja Ekisi inguru ya Kirisito Yeesu. Enikaamira awe Firemooni. Anye na omuyiri weeswe Timoteewo, echikukeesya awe omwendwa weeswe, omukosi weejaasu.

² Echikeesya na Afiya, omuyara waasu mu‑riikirisya na Arikipo, omurwani weejaasu wa riremo rya echinyamwoyo, aamwi na abheekirisya bhanu abheekumanyaga mu‑nju yaawo.

³ Obhwitiriranya na omurembe okusooka ku‑Nyamuwanga Raata weeswe na ku‑Raatabhugenyi Yeesu Kirisito, bhibhe aamwi na emwe.

Eryenda na eriikirisya rya Firemooni

⁴ Omwanya gwone gunu enikusabhirwa, enisiima Nyamuwanga,

⁵ kwa okubha enuungwa ati owugenderera okwikirisya Raatabhugenyi Yeesu na okwenda abheekirisya abheejaanyu bhoone.

⁶ Enisabhwa Nyamuwanga ati, eriikirisya rinu owusangira aamwi na eswe, rikusakire okumenya muno bhuri echiinu cha ekisi chinu echikenwa okukora inguru ya Kirisito.

⁷ Omuyiri waani, waankondisya na okunsiiriisya muno, kwa okubha eryenda ryawo, ryakora emyoyo ja abheekirisya abheejaanyu jisandabhe.

Pawuro kaasabhwa Firemooni afwire echigongo Oneesimo

⁸ Mbe woori, okuruubhana na obhuturo bhunu niyaaywe na Kirisito, naakaturire okukuragirira okukora chinu owendwa okukora. Nawe nitarikora kutyo.

⁹ Inguru ya eryenda ryawo kw‑anye, naarora ati, ni kisi muno nikusabhwe. Anye Pawuro, omukaruka na omubhoywa inguru ya okuraasya Emisango ja Ekisi ja Kirisito Yeesu,

¹⁰ niri na risabhwa rimwi kw‑awe inguru ya Oneesimo. Omwene ari rwa omwana waani, na anye niri rwa eswemwene, kwa okubha nimusakiiye niri mw‑ibhoyero anu ˆneekirisya Yeesu Kirisito.

¹¹ Ku‑mwanya gwa inyuma awo, omwene aariga atakwiyire, nawe woori akwiyire awe na anye wone.

¹² Woori enimusubhya kw‑awe, noorwo kutyo nimwendere kwa omwoyo gwani gwone.

¹³ Ka wone, naakeendere agenderere okwikara na anye anu, korereki abhone omwanya gwa okunsakira rwa kutyo awe wakansakiiye ku‑bhunu niri mw‑ibhoyero inguru ya Emisango ja Ekisi.

¹⁴ Nawe woori naarora ati, itari kisi okukora gwonegwone awe utanyikirisiisye. Nitakwenda okukusinyiirisya ati unsakire, tari eneenda ukore ja ekisi mu‑kwenda kwawo omwene.

¹⁵ Amwi, Oneesimo ꞉eemukire kw‑awe kwa omwanya era, korereki ubhe nage rindi akajaanende.

¹⁶ Okwambira woori, omwene atari rwa omugaya era kw‑awe, tari omwene ari na ingʼoryo muno okukira omugaya, ari rwa omuyiri omwendwa. Anye enimwenda muno, awe urimwenda okukira anye, rwa omugaya mu‑nju yaawo, ka wone rwa omuyiri mu‑Raatabhugenyi Yeesu.

¹⁷ Mbe woori, araabha owumenya ati anye niri na obhumwi na awe, nuumuramire rwa kutyo wakandamiiye anye.

¹⁸ Araabha Oneesimo ꞉aakukayiiye omusango gwonegwone, amwi owumutonga echiinu choonechoone, utonge anye.

¹⁹ Anye Pawuro, naakaama kwa okubhoko kwani omwene ati, nirikuriya. Nitakukena okukwichukya ati enikutonga, kwa okubha okuruubhana na okuraasya kwani, awe ꞉waachungukire.

²⁰ Woori, omuyiri waani, nuunkorere omusango ogwo rwa wuti owukorera Raatabhugenyi Yeesu. Kondisya omwoyo gwani rwa kutyo abhayiri mu‑Kirisito abhakora.

²¹ Enikukaamira jinu, kwa okubha enimenya ati owuja okukora jinu naakusabhwa, ka wone owuja okukora okukira ejo.

²² Aamwi na ejo, unyiraabhire orubhaara orwa okwikara, kwa okubha eniiyikanya ati, mu‑kusabhwa kwemwe, Nyamuwanga arinsakira niije kw‑imwe.

Emisango ja okuragana

²³ Epaafura, unu abhoyerwe aamwi na anye inguru ya Kirisito Yeesu, kaakukeesya.

²⁴ Ka wone, abhakosi bheejaasu Maariko, Arisitaariko, Deema na Ruuka, abhakukeesya.

²⁵ Obhwitiriranya bhwa Raatabhugenyi Yeesu Kirisito bhubhe aamwi na emwe bhoone.