1 Yoana 1 - Indagano Inyaaya mu-Chijita

Yeesu ni Musango gwa obhuwanga

¹ Echibharaasisya inguru ya Musango wa obhuwanga, unu ꞉aabheeye‑wo chichaari okubha‑wo echiinu choonechoone. Eswe ꞉chaamutegeresiisye, ꞉chaamurore na ameeso geeswe abheene, ꞉chaamuringiiye na okumukuunʼya‑ko na amabhoko geeswe.

² Oyo niwe obhuwanga, ꞉aabhonekeene kw‑iswe na eswe nichimurora. Woori chibhabhwira na okubharaasisya echimari inguru ya obhuwanga bhwa akajaanende, bhunu bhwariga bhuri ku‑Raata Nyamuwanga, ˆnaabhuswerura kw‑iswe.

³ Echibharaasisya emisango inguru ya Yeesu unu ꞉chaarorere na okumutegeresya, korereki mubhe na obhumwi na eswe mu‑riikirisya. Obhumwi obhwo, chiri nabhwo na Raata Nyamuwanga na Omwana waaye Yeesu Kirisito.

⁴ Echibhakaamira inyarubha inu, korereki bhoone chikondererwe aamwi.

Okwikara mu‑bhweru

⁵ Mbe, omusango gunu ꞉choonguuwe ku‑Yeesu Kirisito, nigwo echibharaasisya ati, Nyamuwanga ari rwa obhweru, echisuute choonechoone chitari mu‑nda yaaye sirisiri.

⁶ Araabha echaayika ati chiri na obhumwi na Nyamuwanga, keenu nichigenderera okwikara mu‑chisuute, mbe echaayika orubheeyi. Ka wone echibha chitakukora ja echimari.

⁷ Tari, araabha chiramire mu‑bhweru rwa kutyo Nyamuwanga ari mu‑bhweru, awo niwo echibha na obhumwi eswe abheene kwa abheene. Ka wone isagama ya Yeesu, Omwana waaye, eyicheesya ebhibhiibhi bhyeswe bhyone.

⁸ Araabha echaayika ati eswe chitari na ebhibhiibhi, echiijiga abheene, wone echimari chitari‑mo mu‑myoyo jeeswe.

⁹ Tari, araabha chikata ebhibhiibhi bhyeswe, Nyamuwanga kaachifwira echigongo ebhibhiibhi bhyeswe na okucheesya obhujabhi bhwone, kwa okubha omwene ni mwiyikanyibhwa ka wone ni murengeresi.

¹⁰ Araabha echaayika ati chichaari okukora ebhibhiibhi, echibha nichikora Nyamuwanga okubha omubheeyi. Omusango gwaye wone, ogubha gutari‑mo mu‑myoyo jeeswe.