1 Batesalonika 4 - Indagano Inyaaya mu-Chijita

Jitungwa jinu Nyamuwanga keenda

¹ Mbe, abhayiri bheeswe, ꞉chaabheeyigisiisye kutyo ejikenwa murame, korereki mukondisye Nyamuwanga. Chimari omukora kutyo ꞉mweeyigiiye. Woori, echibheerembeeresya ku‑bhuturo bhwa Raatabhugenyi Yeesu ati, mukore kisi muno okukira kutyo mwariga nimukora.

² Echibheerembeeresya mukore kutyo, kwa okubha mumenyere kisi amaragiriro ganu ꞉chaabharagiriiye ku‑bhuturo bhwa Raatabhugenyi Yeesu.

³ Okubha echiinu chinu Nyamuwanga keenda kw‑imwe nicho chinu, mubhe abhaanu abheeru. Kurwa ejo, mwikenge na obhuromesi.

⁴ Bhuri umwi weemwe abhe na obhuturo bhwa okuyiga okurigira kwaye kwa omubhiri, rwa kutyo Nyamuwanga keenda na okwa echibharo.

⁵ Musige okukururwa na okurigira okubhiibhi rwa abhanyamanga, kwa okubha abheene bhatakumenya Nyamuwanga.

⁶ Kurwa ejo, omuunu woonewoone asige okukayira oweejaabho, noorwo okumujiga. Rwa kutyo ꞉chaabhabhwiriiye na okubhagaanya ku‑bhwambiro ati, Raatabhugenyi Yeesu niwe kaasubhya orusiima ku‑bhaanu bhoone bhanu abhakora ebhibhiibhi ebhyo.

⁷ Okubha Nyamuwanga ꞉ataachibhirikiiye korereki chikore obhujabhi, tari ꞉aachibhirikiiye chirame mu‑bhweru.

⁸ Omuunu woonewoone unu kaarema ameeyigisyo ago, atakurema omuunu, nawe, kaarema Nyamuwanga unu kaachiyaana Mwoyo Mweru waaye.

⁹ Mbe, bhutari‑wo obhukene bhwa okubhakaamira inguru ya okwendana, kwa okubha Nyamuwanga omwene ꞉aabheeyigisiisye kutyo jeenderwe mwendane abheene kwa abheene.

¹⁰ Ni chimari, nikwo kutyo omukorera abheejaanyu bhoone bha mu‑mukoowa gwa Makedooniya. Woori, echibheerembeeresya ati mugenderere okwendana muno okukira kutyo mwariga nimwendana.

¹¹ Mwikomeesye okubha na omurembe mu‑myoyo jeemwe. Bhuri muunu agenderere na jifurubhendo jaaye, ka wone akore emirimu jaaye omwene, rwa kutyo ꞉chaabharagiriiye ku‑bhwambiro.

¹² Mukakora kutyo, omubha abhaanu bha jitungwa ja ekisi imbere ya abhaanu bhanu bhatari bheekirisya. Ka wone mutariisiga ebhiinu bhya abhaanu abhandi.

Okusuuruka kwa abheekirisya bhanu bhafuuwe

¹³ Woori, abhayiri bheeswe, echeenda mumenye emisango ja abheekirisya bhanu bharamaamire nyombe, korereki musige okusurumbara rwa bhanu bhatari na obhwiyikanyo bhwa okurama na Nyamuwanga akajaanende koone.

¹⁴ Eswe, echiikirisya ati Yeesu ꞉aamaamire nyombe na okusuuruka. Kutyokutyo, echiikirisya ati, Nyamuwanga arisuurura abhaanu bhoone bhanu ꞉bhaamaamire nyombe bheekirisiisye Yeesu na aribhareeta aamwi nage.

¹⁵ Ameeyigisyo ga Raatabhugenyi Yeesu ganu echibhabhwira nigo ganu, abheekirisya bhanu bharamaamire nyombe, nibho bharitangata okubha aamwi na Raatabhugenyi omwanya gunu arisubha rindi, niwo eswe wone, bhanu chiribhaga chiri abhaanga chirigwatana aamwi nabho.

¹⁶ Okubha Raatabhugenyi omwene ariika okusooka mu‑rwire. Aryamura obhuraka kwa amanaga, maraayika omukuru wone aryamura obhuraka na okubhirikira, na rinyawegoona rya Nyamuwanga riririra. Niwo, abhaanu bhanu ꞉bhaamaamire nyombe bheekirisiisye Kirisito, bharitangata okusuuruka.

¹⁷ Niwo, eswe bhanu chiribhaga chiri abhaanga, chirigegwa aamwi nabho mu‑meere, korereki chiramire Raatabhugenyi inguru. Chiriikara aamwi nage akajaanende koone.

¹⁸ Kurwa ejo, mugenderere okusimbiisyanya abheene kwa abheene kwa emisango ejo.