YOELA 1 - Jinghpaw Hanson Version Bible

Dinggam-yaw Hpe Shaga Ai Lam

¹ Da ndai gaw Pehtuela a kasha Yoela kaw du ai, Yehowa a mungga rai nga ai.

² Dingla ni e, ndai ga madat mara mu; mungdan hta shanu ai ni nlang hte gaw, na la mu. Ndai zawn re amu nanhte a aprat e, shing n rai, nji nwa ni a aprat e, byin yu a ni?

³ Dai lam nanhte a nshu nsha ni hpe hkai dan mu; shanhte gaw tinang a kashu kasha ni hpe, hkai dan mu ga; bai shanhte gaw shu mashi shu masha prat na ni hpe hkai dan mu ga.

⁴ Shingtai ngam da ai gaw, dinggam-yaw sha kau sai; dinggam-yaw ngam da ai gaw, hkakrit sha kau sai; hkakrit ngam da ai gaw, shingchyut sha kau sai.

⁵ Ru kru ni e, yup hprang nna, hkrap ngu hkrap ngoi mu; tsabyi lu lai ai ni e, nanhte lu na matu, dwi ai tsabyi jahku htum mai sai majaw, sharung shayawt nga mu.

⁶ Kaning rai nme law, hti n dang law ai, n-gun ja ai amyu, nye a mungdan ntsa de lung wa sai: de a awa gaw hkanghkyi a awa zawn, de a kawng gaw hkanghkyi yi a kawng zawn, rai nga ai.

⁷ Shi gaw nye a tsabyi ru hpe shaza kau nna, nye a lakum hpun hpe agrawp kau nu ai: shi dai hpe atsai awai hpyi gaw kau nna, kabai kau nu ai; de a lakung lakying ni hpraw nga ai.

⁸ Hkawn ram prat e si mat ai madu wa matu, lachyit nba bu hpun nna sharung shayawt ai hkawnsek zawn, sharung shayawt nga u.

⁹ Yehowa a nta kata e, lusha kumhpa hte dumhpung hkungga, htum mat sai: Yehowa a amu gun hpai ai hkinjawng ni gaw, yawn hkyen nga ma ai.

¹⁰ Yi hkauna ni hkam nga ai; mungdan gaw yawn nga ai: kaning rai nme law, nai mam san mat sai, tsabyi jahku ningnan ma mat sai, asau hkyet mat sai.

¹¹ Yi hkauna galaw ai ni e, mak mat mu; tsabyi sun lajang ai ni e, hkrap shabam mu: hkaulan mam, muk-yaw mam hte pa ga na hkai nmai hten mat sai.

¹² Tsabyi ru gaw nyui mat sai, lakum hpun gaw hkraw mat sai; hkainu si hpun, ma-un hpun, magaw si hpun hte pa ga na hpun mahkra nyip nyui mat sai: gaja wa, shinggyim masha ni hta kabu gara ai lam wai mat sai.

Myit Malai Ai De Shaga Ai Lam

¹³ Hkinjawng ni e, lachyit nba bu hpun nna, hkrap shabam mu; tawn hkungri a amu gun hpai ai ni e, sharung shayawt mu: nye a Karai Kasang a man e daw jau ai ni e, sa marit; lachyit nba bu hpun let, shana tup taw nga mu: kaning rai nme law, lusha hkungga hte dumhpung hkungga hpe, nanhte a Karai Kasang a nta e, n nawng ya nga myit hka.

¹⁴ Lusha gam ai aten san da mu; shawa hpawng zuphpawng mu; dingla ni hte mung masha ni mahkra hpe, nanhte a Karai Kasang Yehowa a nta hta jahpawng nna, Yehowa hpe hpyi jahtau mu.

¹⁵ Ala, dai nhtoi du ra ai; Yehowa a nhtoi ni magang wa nna, dai gaw hten byak ai shani zawn, Chyahtum Chyalai N-gun rawng ai wa kaw na, du na ra ai.

¹⁶ Anhte a man e lusha shahpa mung anhte a Karai Kasang a nta na kabu gara ai hte sharawng awng hpa mung, htum mat sai, n rai ni?

¹⁷ Nli ni gaw ga kata e krau mat sai; nai mam ni kan mat ai majaw, mamdum ni man mat nna, ulawng ni daw mat ma ai.

¹⁸ Yamnga ni grai nbaw nga ma ai; dumsu hpung ni udat shara n nga ai majaw, myit htum ma ai; gaja wa, sagu hpung ni htum mat ma ai.

¹⁹ Yehowa e, ngai nang hpe shaga nngai; gaja wa, awan gaw nam mali na udat shara ni hkru kau nu ai; wan shinglet gaw, pa ga na hpun ni mahkra hpe hkru kau nu ai.

²⁰ Pa ga na yamnga ni pyi, ba galawp let nang hpe marit nga ma ai; kaning rai nme law, hka shi hka gai ni hkyet mat nna, nam mali na udat shara ni, hkru mat sai.