YOBA 27 - Jinghpaw Hanson Version Bible

¹ Bai Yoba shi a ga shagawp sharawt nna, kahtap tsun ai gaw,

² nye amu hpe shabyak kau ya ai, hkrung nga ai Karai Wa hte, Nye a wenyi hpe sharu ai, n-gun chyalai rawng ai wa hpe, gang let,

³ ngai hta nsoi nsa naw rawng nga ninglen, Karai Wa ndaw nsa nye ladi hta naw rawng nga dingsa,

⁴ nye n-gup n teng n man ai ga n tsun ai hte, nye shinglet hkalem hkalau ai ga n shapraw nga ai.

⁵ Nanhte hpe awlaw ai ga ngai hte tsan u ga; ngai si ai du hkra nye myit tsup ai hpe ngai nyet kau na n rai.

⁶ Nye dinghpring ai hta ngai dakan nga nna, n yen nngai; ngai hkrung nga dingsa nye myit ngai hpe mara shagun lu ai, n rai.

⁷ Ngai hpe hpyen ai wa gaw, tara n lang ai wa zawn, ngai hte nhtan shai ai wa gaw, n ding n man ai wa zawn, rai u ga.

⁸ N shawp ai wa gaw amyat lusha timung, Karai Wa shi a wenyi dawm la yang, shi a myit mada shara hpa rai ta?

⁹ Shi ru tsang ai hkrum yang Karai Wa gaw, Shi jahtau shaga ai hpe madat na rai kun?

¹⁰ N-gun chyalai rawng ai wa hta shi pyaw nga nna, Karai Wa hpe tutnawng e hpyi manoi nga lu na nni?

¹¹ Ngai nanhte hpe Karai Wa amu madun dan na nngai; n-gun chyalai rawng ai wa maw ai lam ngai makoi da na, n rai.

¹² Nanhte nan lala dai lam mu myit htawm, ya hpa majaw kaman lila sha tsun nga myit ta?

¹³ Da ndai gaw, tara n lang ai wa hpe Karai Wa karan jaw ai hkambum, adip arip re ai wa gaw n-gun chyalai rawng ai wa kaw na lu la ai sali wunli rai nga ai.

¹⁴ Shi kashu kasha law htam wa timung, shanhte nhtu a shat tai na ma ai; shi a aru arat ni gaw kawsi hpang kara hkrum na mara ai.

¹⁵ Shi kaw naw ngam nga ai ni hpe si du makoi na ra ai: shi a gaida ni hkrap ngu hkrap ngoi lu na, n rai.

¹⁶ Shi gaw gumhpraw hpe ga nhpu zawn mahkawng da nna, hpun palawng hpe ga kagam zawn mazing da timung,

¹⁷ shi mazing da ai hpun palawng dinghpring ai ni bu hpun nna, mara n kap ai ni shi a gumhpraw hpe karan la na mara ai.

¹⁸ Shi galaw ai nta gaw shingtai tsip hte, sun sin ai ni gap ai sum zawn, rai nga ai.

¹⁹ Sut su let shi si wa timung, jat na gade sha lu ai, n rai; myi grip mi sha rai yang shi n nga sai.

²⁰ Hkrit kajawng ai gaw, hka hpungtun zawn, shi hpe hkan dep nna, shana e rai yang nbung laru shi hpe ahpawt kau nga ai.

²¹ Sinpraw nbung shi hpe shapoi kau nna, shi n nga ai; dai gaw shi a shara kaw na shi hpe yeng kau wu ai.

²² Karai Wa gaw matsan n dum ai hte shi hpe jinghkyen nga ai; shi a lata na shi hprawng gale mayu na ra ai.

²³ Masha ni shi a lam lahpawk dum nna, jahpoi asawng let shi hpe shachyut kau na mara ai.