YAWHAN 8 - Jinghpaw Hanson Version Bible

¹ Yesu chyawm gaw Tsanlun bum de pru mat wa ai.

² Bai jahpawt jau jau e nawku Htingnu de shi sa wa ai rai nna, masha nlang hte shi kaw sa ma ai; shi dung let shanhte hpe sharin shaga nga ai.

³ Shaloi laika ka ai sara ni hte Hparishe ni gaw, shut hpyit nga ai masha num langai mi hpe dun sa nna, ka-ang e shatsap tawn da nhtawm,

⁴ “Sara e, ndai numsha hpe shut hpyit nga yang, mu hkrup sagaw ai:

⁵ ndai zawn re ai numsha hpe, nlung hte kabai sat kau lu na re ai, nga nna Mawshe gaw jep ai tara hta anhte hpe matsun jaw da ma ni ai: ya nang gaw kaning ngu na wu ta?” ngu nna shi hpe san mu ai.

⁶ Shing nga san ai gaw, shi hta mara shagun na lam mu lu hkra, shi hpe chyam dinglik yu ai rai nga ai. Yesu chyawm gaw ga de gum nna, ga hta layung hte ka nna nga nga ai.

⁷ Shanhte shing nga bai kahtap san san rai ma ai majaw, shi rawt mada yu nna, “Nanhte hta na mara n lu ai wa, shi hpe shawng nlung hte kabai mu,” ngu nna shanhte hpe tsun mu ai.

⁸ Shing nga ngut jang shi bai gum nna, ga hta ka nga ai.

⁹ Shanhte dai ga na jang, agyi salang ni shawng pru wa ai kaw nna, langai hte langai pru mat wa ma ai: shing rai Yesu hkrai sha hti nga ai hte, dai numsha mung myi na shara e anga nga ai.

¹⁰ Shaloi Yesu bai rawt mada yu nna, “Numsha e, ya shanhte kanang rai wa ma sata? nang hpe gade e muk n jeyang a ni?” ngu nna shi hpe san wu yang,

¹¹ numsha gaw, “Madu e, gade e muk n jeyang nngai,” ngu nna htan wu ai. Shaloi Yesu gaw, Ngai mung nang hpe n jeyang na nngai: wa nu; ya kaw nna yubak hkum galaw nit, ngu nna tsun dat wu ai.]

Yesu A Sakse Grin Ai Lam

¹² Dai re ai majaw Yesu shanhte hpe bai tsun mu ai gaw, “Ngai gaw mungkan ga a nhtoi rai nga nngai: nye a hpang hkan nang ai wa gaw, nsin hta n hkawm n sa lu na rai nna, asak a nhtoi lu la na ra ai,” ngu mu ai.

¹³ Dai rai nna Hparishe ni gaw, “Nang dai na a lam sakse hkam ndai rai nna, na a sakse gaw n teng nga lit dai,” ngu nna shi hpe tsun mu ai.

¹⁴ Shaloi Yesu gaw, “Ngai dai nye a lam sakse hkam yang pyi, nye a sakse teng nga li ai: ngai kanang na pru sa nna, gade rai wa na mung, ngai chye nngai: nanhte chyawm gaw, ngai kanang na pru sa nna, gade rai wa na mung n chye myit dai.

¹⁵ Nanhte gaw hkum shan lam hku sha dawdan myit dai; ngai gaw kadai hpe mung n dawdan nngai.

¹⁶ Gaja wa dawdan nngai rai yang mung, ngai dawdan ai hku tengman li ai: kaning rai nme law, ngai gaw langai sha rai nga nngai n rai; ngai mung, ngai hpe shangun dat ai, nye Wa mung, rai nga ga ai.

¹⁷ Rai sa, sakse lahkawng a ga gaw tengman nga ai, nga nna nanhte a tara hta ka da nga ai.

¹⁸ Ngai gaw tinang dai sakse hkam ya ai wa rai nga nngai: ngai hpe shangun dat ai, nye a Wa mung, nye a lam sakse hkam ya ai wa rai nga ai,” ngu nna shanhte hpe htan mu ai.

¹⁹ Dai rai nna shanhte gaw, “Na Nwa gaw kanang nga lit ta?” ngu nna shi hpe san mu ai. Yesu gaw, “Nanhte ngai hpe mung, nye Wa hpe mung, n chye myit dai: ngai hpe chye myit taw gaw, nye Wa hpe mung, chye na manit dai,” ngu nna bai htan mu ai.

²⁰ Ga ndai gaw nawku Htingnu e sharin shaga nga yang, alu gawk e tsun ai ga rai nga ai: shi a ahkying garai n du lu ai majaw, shi hpe gade e muk n rim lu mu ai.

²¹ Dai re ai majaw shi shanhte hpe bai tsun mu ai gaw, “Ngai wa mat na nngai, shaloi nanhte ngai hpe tam na marin dai; tinang a yubak hta mung, nanhte si na myit dai: ngai wa ai shara de mung, nanhte n du lu na myit dai,” ngu mu ai.

²² Dai majaw Yuda masha ni gaw, “Ngai wa ai shara de nanhte n du lu na myit dai, nga nna shi tsun ai gaw, shi hkum dai sat na wu ai kun?” nga ma ai.

²³ Shaloi shi gaw, “Nanhte lawu tsang na rai nga myit dai; ngai chyawm gaw lahta tang na rai nga nngai: nanhte gaw ndai mungkan ga na rai myit dai; ngai chyawm gaw ndai mungkan ga na n rai nngai.

²⁴ Dai majaw, nanhte gaw tinang a yubak hta si na marin dai, ngu nna ngai nanhte hpe tsun ni ai: kaning rai nme law, ngai dai wa rai nga nngai hpe, nanhte n kam myit yang gaw, nanhte tinang a yubak hta si na myit dai,” ngu mu ai.

²⁵ Dai nga ai majaw shanhte gaw, “Nang kadai rai nga n ta?” ngu nna shi hpe san mu ai. Yesu gaw, “Shawng shawng de nna ngai nanhte hpe a tsun nga nngai hte maren, ngai wa rai nga nngai.

²⁶ Ngai hta nanhte a lam tsun hparan shara hte jeyang shara law law nga ai: rai timung, ngai hpe shangun dat ai wa gaw, tengman nga ai rai nna, shi kaw na ngai na la mala hpe mungkan ga hpe ngai tsun dan we ai,” ngu mu ai.

²⁷ Kawa a lam sha-ang nna shi shanhte hpe tsun nga ai gaw, shanhte n chye na ma ai.

²⁸ Dai majaw Yesu gaw, “Dai Masha Kasha hpe nanhte sharawt da ai shaloi she, ngai gaw dai wa rai nga nngai mung, ngai gaw nye myit hte hpa mung n galaw ai sha, nye Wa ngai hpe sharin nngai hte maren, dai ga ngai tsun nga nngai mung, nanhte chye na marin dai.

²⁹ Ngai hpe shangun dat ai wa gaw ngai hte rau anga nga ai; ngai hkrai sha nga u ga, nga nna shi ngai hpe n jahti kau nngai: kaning rai nme law, shi sharawng awng ai amu hpe, ngai tutnawng e a galaw nga nngai,” ngu mu ai.

³⁰ Dai ga tsun nga yang, masha law law wa shi hpe kamsham ma ai.

Abraham A Kasha Ni

³¹ Dai re ai majaw Yesu gaw shi hpe kamsham ai Yuda masha ni hpe, “Nanhte nye a ga hta agrin nga myit yang gaw, nye a sape teng teng nanhte rai nga myit dai:

³² tengman ai lam mung nanhte chye lu na marin dai rai nna, dai tengman ai gaw, nanhte hpe shalawt dat na ra ai,” ngu nna tsun mu ai.

³³ Shaloi shanhte gaw, “Anhte Abraham a amyu rai ga ai rai nna, kadai kaw lang mi muk n yam yu ga ai: dai she rai yang, Shalawt dat na myit dai, nga nna nang kaning rai tsun lu n ta?” ngu nna san mu ai.

³⁴ Yesu gaw, “Ngai nanhte hpe gaja wa teng teng tsun made ga, Yubak galaw ai wa kadai mung, yubak a mayam rai nga ai.

³⁵ Mayam ngu ai gaw, nta e tutnawng anga nga lu ai n rai: kasha chyawm gaw tutnawng anga nga lu ai.

³⁶ Dai re ai majaw Kasha wa e nanhte hpe shalawt dat myit yang gaw, nanhte gaja wa teng teng lawt lu na myit dai.

³⁷ Nanhte Abraham a amyu rai myit dai gaw, ngai chye nga nngai: rai timung, nye a ga nanhte hta n rawng nga malit dai majaw, ngai hpe sat kau na nanhte tam nga myit dai.

³⁸ Ngai gaw nye Wa kaw na mu la ai hte maren, tsun nga nngai: nanhte mung nanhte a kawa kaw na, na la ai hte maren, galaw nga myit dai,” ngu nna shanhte hpe htan mu ai.

³⁹ Shaloi shanhte mung, “Abraham gaw anhte a Wa rai nga mali ai,” ngu nna shi hpe htan mu ai. Yesu gaw, “Nanhte Abraham a kasha rai myit yang gaw, Abraham a lailen hku nanhte hkan galaw na myit dai.

⁴⁰ Ya gaw, nanhte hpe Karai Kasang kaw na, na la ai tengman ai lam tsun dan ai wa, ngu ai ngai hpe, nanhte sat kau na tam myit dai: Abraham gaw dai zawn re ai n rai.

⁴¹ Nanhte gaw nanhte a kawa a lailen hku hkan galaw myit dai,” ngu nna tsun mu ai. Shanhte gaw, “Anhte n-gyi amyu n rai ga ai. Karai Kasang ngu ai anhte a Wa langai sha rai mali ai,” ngu nna, shi hpe tsun mu ai.

Nat A Kasha Ni

⁴² Shaloi Yesu gaw, “Karai Kasang nanhte a Kawa rai malit yang gaw, nanhte ngai hpe tsawra na myit dai: kaning rai nme law, ngai gaw Karai Kasang kaw na pru nna du sa nngai, nye a myit hte ngai du sa nngai n rai, shi gaw ngai hpe shangun dat nngai.

⁴³ Ngai tsun ai lam nanhte hpa rai n chye na myit ta? Nye a ga n madat la lu ai majaw, rai nga myit dai.

⁴⁴ Nanhte gaw, nanhte a kawa ngu ai, gumlau Nat hta na prat wa ai ni rai nga myit dai rai nna, nanhte a kawa a kayut ai hku mung, hkan mayu myit dai: shi gaw shawng npawt kaw nna, masha sat ai wa rai nga ai rai nna, shi hta tengman ai lam n rawng lu ai majaw, tengman ai lam hta n nga lu ai: shi masu magaw ga tsun yang, shi a myit hta na hte maren tsun nga ai: shi gaw masu ai wa rai nga ai hte, masu magaw ai a kawa mung, rai nga ai.

⁴⁵ Ngai tengman ai lam tsun nngai majaw, nanhte n kam n sham myit dai.

⁴⁶ Ngai hta ra rawng ai gaw, nanhte hta na kadai madun lu na myit ta? tengman ai lam she ngai tsun ai rai yang gaw, hpa rai nanhte n kam myit ta?

⁴⁷ Karai Kasang hte seng ai wa gaw, Karai Kasang a ga madat nga ai; nanhte gaw Karai Kasang hte n seng ai majaw, n madat myit dai,” ngu nna shanhte hpe tsun mu ai.

Shi Nan A Lam Yesu Tsun Ai

⁴⁸ Shaloi Yuda masha ni gaw, “Nang Samari masha rai ndai, nat shang ai wa mung rai ndai, ngu nna anhte tsun ai ga gaw, jaw la nga ai n rai ni?” ngu nna shi hpe bai htan mu ai.

⁴⁹ Yesu gaw, “Ngai nat shang ai wa n rai nngai: nye Wa hpe she ngai hkungga nngai, nanhte chyawm gaw ngai e jahpoi myit dai.

⁵⁰ Rai timung ngai gaw nye a arawng sadang n tam nngai; tam ya ai wa hte jeyang ya ai wa langai mi rai nga ai.

⁵¹ Nanhte hpe ngai gaja wa teng teng tsun made ga, Nye ga hku hkan ai wa gaw galoi mung n si na ra ai,” ngu nna bai htan mu ai.

⁵² Bai Yuda masha ni gaw, “Nang nat shang ai wa rai nga ai gaw, ya anhte chye saga ai: Abraham hte myihtoi ni pyi si mat wa masai; nang wa chyawm gaw, Nye ga hku hkan ai wa gaw, galoi mung n si na ra ai, nga nna tsun lu ndai.

⁵³ Nang wa mi, si mat wa sai, anhte a Wa Abraham hta grau kaba nga nni? myihtoi ni mung si mat wa masai; nang gaw kadai wa tai nga n ta?” ngu na shi hpe tsun mu ai.

⁵⁴ Yesu gaw, Nye “hkum hpe ngai shagrau nngai rai yang gaw, nye a arawng hpa n tai li ai; ngai e shagrau ai wa gaw, nye Wa rai nga ai: dai wa hpe nanhte a Karai Kasang re ai, nga nna nanhte tsun myit dai;

⁵⁵ rai timung nanhte shi hpe n chye myit dai, ngai chyawm gaw chye nga nngai. N chye nngai, ngu yang gaw, nanhte zawn masu ai wa ngai rai na ra ai: ngai chyawm gaw shi hpe chye nga nngai rai nna, shi a ga hpe mung hkan nga nngai.

⁵⁶ Nanhte a kawa Abraham gaw nye a nhtoi mu lu na hpe, sharawng awng nga ai rai nna, mu lu ai hte kabu gara nga ai,” ngu nna htan mu ai.

⁵⁷ Dai re ai majaw Yuda masha ni gaw, “Nang gaw asak manga shi ning pyi garai n du ai mi, Abraham hpe mu yu nu ni?” ngu nna shi hpe tsun mu ai.

⁵⁸ Shaloi Yesu gaw, “Nanhte hpe ngai gaja wa teng teng tsun made ga, Abraham garai n nga yang nna ngai nga ni ai,” ngu nna shanhte hpe tsun mu ai.

⁵⁹ Dai rai nna shanhte gaw shi hpe kabai na nga nna, lungdin hta ma ai: Yesu chyawm gaw makoi mat nna, nawku Htingnu na pru mat wa ai.