Shawlumon A Mahkawn Ga 4 - Jinghpaw Hanson Version Bible

Tsawra Ai Wa

¹ Yu u, nye a nja jan e, nang hpraw tsawm ndai; Gaja wa, tsawm htap nga ndai. Na a myi gaw myi man magap shinggan e, Hkrudu myi hte bung nga ai: Na a kara gaw, Gilead bum lanem e, Hpum nga ai bainam hpung hte bung nga ai.

² Na a wa ni mung, mun rep kau nna Kashin ai kaw na lung wa ai, sagu hpraw hpung hte bung nga ai. Langai hte langai manang lu nna, Langai mi muk yet mat ai, n rai.

³ Na a nten ni, hkyeng tsawm ai sumri hte bung nna, Na a n-gup tsawm htum nga ai: Na a shabyi ni, myi man magap shinggan e, Hkainu si shari hte bung nga ai.

⁴ Na a du gaw, Dawi a langchyi hte bung nga ai: Dai hta e, share ninghkrin ni a ri nhtu hte, N-gang kaji kaba noi da nga ai.

⁵ Na a madoi chyu hpang yan gaw, Hka law pan prang e chyai nga ai, Shan nga hkalung marun hte bung nga ai.

⁶ Shani nhtoi garai n katsi ai hte Shingnip shingna garai n hkoi mat yang, Ngai gaw, nye a mura bum hte lawban kawng de lung wa na nngai.

⁷ Nye a nja nan e, nang hkum ting tsawm htap nga ndai; Hpa htenza ai hkang mung, nang hta n nga ai.

⁸ Nye num ningnan e, Lebanon bum kaw nna, Ngai hte rau, Lebanon bum ga na, pru wa rit. Amana bum pungding, Senira hte Hermon pungding, Hkanghkyi ni shanu nga ai ginlawng hku ni hte, Rawnggawk ni shingbyi nga ai bum ntsa na, hkawm pru u.

⁹ Ngai jan, nye num ningnan e, Nang gaw nye myit masin hpe kashun la nu ai: Na a myi ze du yin rai nna, nang gali ai hkachyi hte Nang nye a myit masin hpe kashun la nu ai.

¹⁰ Ngai jan, nye num ningnan e, Na a tsawra ai gaw, gade pyaw nga a hka! Na a tsawra ai gaw, tsabyi hta grau kaja nga ai: Na a manam pyaw ai sau gaw, lawban amyu mahkra hta, grau kaja nga ai law.

¹¹ Nye num ningnan e, na nten gaw gitbaw zawn yun nga ai; Na shinglet npu e lagat jahku hte nga chyu hpring nga ai: Na a hpun palawng a abat gaw, Lebanon bum na nngawt hte bung nga ai.

¹² Ngai jan, nye a num ningnan gaw, Shakum kum ai sun, pat da ai hka hpawk hte, Dazik kap da ai hka htung rai nga ai.

¹³ Na bawng ni gaw, dwi ai asi si ai amyu myu hte Hkainu si sun rai nga ai: Nardu hte kayau ai hinna hpun,

¹⁴ Nardu hpun, chyamka hpun, Gumshu, maza hpun hte, lawban hpun amyu myu, Mura, achyaw hte grau manam pyaw ai baw yawng, lawm nga ai.

¹⁵ Sun ni hpe ntsin jaw na matu hka hpawk, Hkrung ai ntsin rawng ai hka htung, Lebanon bum na lwi ai hka shi, nang rai nga ndai.

Tsaw

¹⁶ Dingdung nbung e, rawt u; dingda nbung e, wa rit; Nye sun a manam pyaw ai baw mawng wam nga mu ga, De a ntsa e bung sun nga mu. Ngai tsawra ai wa gaw, shi a sun hta shang nna, De a dwi sau ai namsi sha nga u ga.