Shawlumon A Mahkawn Ga 3 - Jinghpaw Hanson Version Bible

¹ Shana aten e, nye yup ra ntsa e, Nye myit masin tsawra ai wa hpe, ngai tam nngai: Ngai tam timung n mu nngai.

² Shaloi ngai gaw, Ngai rawt nna mare hkan e kahkrang hkawm na nngai; Nye myit masin tsawra ai wa hpe, Nmaw lam hkan e mung, mare htingwang hkan a mung, tam na nngai, Nga nna tsun let tam timung, n mu nga nngai.

³ Mare sin ai ni ngai hpe mu hkrup nna, ngai gaw, Ataw, nye myit masin tsawra ai wa hpe, n mu ya myit ni? Ngu nna san nngai.

⁴ Shanhte hte loi mi lai yang, Nye myit masin tsawra ai wa hpe ngai mu hkrup nngai: Ngai shi hpe jum shadang nna, nye nu a nta hte, Ngai hpe shangai chyinghkai ai gawk de, Garai n jashawn yang, n dat hkraw nngai.

⁵ Yerusalem a shayi chyinghkawn ni e, Tsawra ai myit, shi hkrai n pru yang, Dai hpe hkum jasu, hkum jahprang mu yaw, Ngu nna, nam na ashu ashan ni hte chyahkyi ni hpe dum let, Ngai nanhte hpe htet da nngai law.

⁶ Mura, lawban hte, hpaga ga ai ni dut ya ai, Manam pyaw ai baw amyu myu chya shamut nna, Wan hkut zawn mawng let, Zaibru jang de na lung wa ai wa gaw, kadai wa rai ta?

⁷ Yu mu, dai gaw Shawlumon a krau rai nga ai; Israela share ninghkrin ni hta na, Share kru shi, de a grup yin e, sin nga ma ai.

⁸ Shanhte yawng nhtu lang nna, hpyen amu chye galaw ma ai. Shana na hkrithpa makran ai majaw, Langai hte langai tinang a nhtu hpye ma ai.

⁹ Hkawhkam Shawlumon gaw Lebanon a hpun hte Shi a matu reng ai hpaichyau shachyaw wu ai.

¹⁰ De a shadaw ni gumhpraw, nep ai gaw aja, Dung ai shara hpe hkyeng mang ai nba hte shangut wu ai. De a kata de gaw, Yerusalem shayi sha ni, Tsawra ai myit hte ka shamawn da mu ai.

¹¹ Ziun shayi chyinghkawn ni e, pru marit: Hkungran nna, myit masin kabu gara ai nhtoi hta, Kanu shagup ya ai, janmau gup nga ai, Hkawhkam Shawlumon hpe mada yu mu law.