SHAKAWN KUNGDAWN 67 - Jinghpaw Hanson Version Bible

Sumhpyi dum ai agyi a matu; tingse hte mai dum ai mahkawn mangoi ga langai mi.

¹ Karai Kasang e, anhte hpe matsan dum nna shaman ya mi: dinghta ga hta e na a lam,

² Amyu shagu na a hkye hkrang la ai lam, chye na lu mu ga, na a myi man a nhtoi anhte hpe jahtoi ya mi. [Selah.]

³ Karai Kasang e, masha amyu ni nang hpe shakawn mu ga, Rai sa, amyu shagu nang hpe kungdawn mu ga.

⁴ Nang gaw masha amyu ni hpe dingman ai hku tara dara nna, Ga ntsa amyu baw ni hpe lakawn la mu ai majaw, Shanhte awng wa nna, kabu gara let jahtau nga mu ga. [Selah.]

⁵ Karai Kasang e, masha amyu ni nang hpe shakawn mu ga, Rai sa, amyu shagu nang hpe kungdawn mu ga.

⁶ Aga gaw shi a nsi naisi dik hkra shapraw ya sai, Karai Kasang, anhte a Karai Kasang, anhte hpe shaman ya mi ai.

⁷ Karai Kasang anhte hpe shaman ya nna, Aga ting htum hkra shi hpe hkrit hkungga na mu ai.