SHAKAWN KUNGDAWN 108 - Jinghpaw Hanson Version Bible

Dawi a mahkawn ga langai mi.

¹ Karai Kasang e, nye a myit ngang kang nga ai: ngai mahkawn mangoi nna, tingse dum na nngai; Rai sa, nye a arawng dai galaw na ra ai.

² Tingse hte sumpyi ni e, dum hprang mu, jahpawt manap hpe mung, ngai jasu na we ai.

³ Yehowa e, masha amyu ni hta, ngai nang hpe shakawn na nngai; Amyu baw ni hta, ngai nang hpe tingse dum na nngai.

⁴ Kaning rai nme law, na a chyeju lamu du hkra, Na a sadi sahka sumwi kaw du hkra, lep nga ai.

⁵ Karai Kasang e, sumsing lamu hta nang grau tsaw nga u ga; Aga ting hta e, na a hpung shingkang dan hkung nga u ga;

⁶ Na a tsawra ai ni lawt lu mu ga, Na a hkra lata hte hkye la nna, anhte hpe htan ya mi.

⁷ Karai Kasang shi a chyoi pra ai hte tsun dan ai gaw, “Ngai kabu na nngai; Shehkem hpe ngai karan na we ai; Suhkot kadit hpe ngai shadawn na we ai.

⁸ Geliad hte Manashe nye a rai nga ma ai; Ehprim gaw nye a baw magap, Yuda, nye a hkawhkam sumdoi rai nga ma ai.

⁹ Moba nye a lagaw kashin ai di rai nga ai; Edom hta nye a kyepdin ngai kabai tawn na we ai: Hpilisti mung a matu, ngai garu nga nngai.”

¹⁰ Dai ngang ai mare hta e, ngai hpe kadai jashawn na rai nga a ta? Edom de ngai hpe kadai woi shang na rai nga a ta? nga ai.

¹¹ Karai Kasang e, nang anhte hpe kau da nit dai, n rai ni? Karai Kasang e, anhte a luksuk ni hte rau, nang n pru sa ndai.

¹² Ru tsang ai hta na anhte hpe karum la mi, Masha karum ai lam kaman sha rai nga ai.

¹³ Karai Kasang hte anhte nlaw lu na ga ai; Shi anhte a hpyen ni hpe kabye kau na mu ai.