ROMA 15 - Jinghpaw Hanson Version Bible

¹ Dai rai nna anhte n-gun ja ai ni gaw, tinang pyaw ai lam n hkan ai sha, n-gun kya ai ni a magrau n grang ai hpe hkam sharang na, sut nga ai.

² Anhte langai hte langai tinang a manang wa a ngamu ngamai na lam tau yu nna, shadaw shangang rai hkra shi hpe shapyaw nga ga.

³ Shing rai Hkristu mung shi hkum dai n shapyaw la ai sha, Nang hpe shatan ai ni a shatan nhkan ga, nye a ntsa e du ra ai, nga nna ka da nga ai hte maren, rai nga sai.

⁴ Kaning rai nme law, anhte shakut sharang nga lu nna, Chyum laika ni a shangwi shapyaw ai ga a majaw myit mada shara nga lu u ga, shawng e ka da ai lam shagu gaw, anhte hpe sharin achyin ya na matu, ka da nga sai.

⁵ Ya, anhte a Madu Yesu Hkristu a Kawa rai nga ai, Karai Kasang hpe, myit mang langai sha hte n-gup ga langai sha e shakawn kungdawn nga lu myit ga,

⁶ Hkristu Yesu a jaw e nanhte shada da myit mang ara sha rai nga lu u ga, shakut sharang ya ai hte shangwi shapyaw ya ai a Karai Kasang gaw, nanhte hpe awn nga u ga law.

⁷ Dai rai nna Karai Kasang a hpung shingkang a matu mara, Hkristu gaw anhte hpe hkap hkalum la mani ai hte maren, nanhte shada da hkap hkalum la mu.

⁸ Kaning rai nme law, ngai tsun nngai gaw, ji wa ni kaw jaw da ai ga ndat hpe shagrin lu na hte, maigan amyu ni mung chyeju majaw Karai Kasang hpe shakawn kungdawn lu mu ga,

⁹ Karai Kasang a tengman ai lam a matu mara, Hkristu gaw matu gadoi hkam ai ni a ali ama tai wa sai. Shing rai, “Dai re ai majaw maigan amyu ni hta ngai nang hpe shakawn na nngai, Na amying nsang hpe mahkawn mangoi na nngai,” nga nna ka da ai hte maren rai nga ai.

¹⁰ Bai shi gaw, “Maigan amyu ni e, shi a amyu hte rau kabu gara nga mu,” nga nna tsun ai.

¹¹ Bai, “Maigan amyu nlang hte e, dai Madu hpe shakawn mu; Amyu baw nlang hte gaw shi hpe kungdawn u ga, nga ai.

¹² Bai Esaia gaw, Yese kaw nna kying ai ru npawt hte, Maigan amyu ni hpe up na paw pru ai wa rai na ra ai: Dai wa hpe maigan amyu ni myit mada na mara ai,” nga ai.

¹³ Ya, Chyoi pra ai Wenyi a n-gun atsam hte myit mada ai lam hta nanhte gumring gumrat rai wa myit ga, myit mada npawt rai nga ai Karai Kasang gaw, kamsham ai lam hta e, chyeju hte ngwipyaw ai amyu myu nanhte hpe jahpring shatsup ya myit ga law.

Maigan Amyu Ni Hpang De Pawlu Sasana Galaw Ai Lam

¹⁴ Nye a hpunau ni e, nanhte nan lala kaja htum ai hte hpring tsup nga nna, chye chyang ai amyu myu htak rai nga ai hte, nanhte shada da sharin jep lu myit dai hpe, nanhte a lam ngai hkum nan kam da made ai.

¹⁵ Rai timung, Chyoi pra ai Wenyi e shachyoi shapra ai a majaw, maigan amyu ni gaw sharawng awng ai hkungga tai lu mu ga, Karai Kasang a kabu gara shiga hta hkungga jaw let, maigan amyu ni a matu Hkristu Yesu a shangun ma ngai tai wa n ga;

¹⁶ Karai Kasang e ngai hpe jaw da ai chyeju majaw, nanhte hpe bai shadum jahprang na zawn, ngai nanhte hpe nden ja ai myit hte kau chyen ka dat made ai.

¹⁷ Dai re ai majaw, Karai Kasang hte seng ai lam hte hta, Hkristu Yesu hta e nye a gumrawng shara rai nga li ai.

¹⁸ Kaning rai nme law, maigan amyu ni madat mara lu hkra, Hkristu gaw ngai hta shabyin ai sumtu ga hte amu bungli mung, Chyoi pra ai Wenyi a atsam hte n-gun lagaw re ai lamik kumla hte mauhpa amu hta kaga, ngai hpa n tsun wam nngai.

¹⁹ Shing rai, dai ni hpe tau yu nna, Yerusalem kaw na Ituri mung ginwang grup hkra, Hkristu a kabu gara shiga ngai hkaw jahproi dan ni ai.

²⁰ Rai timung, masha wa e gaw da ai npawt ntsa e n kahtap u ga, Hkristu a amying n na yu ai shara hkan e dai kabu gara shiga hkaw dan na, ngai nan myit makun nga nngai.

²¹ Dai hte maren, “Shi a lam kajai gara ai garai n dep ai ni mu lu nna, Garai n na yu ai ni, chye na lu na mara ai,” nga nna ka da nga ai.

²² Dai rai nna nanhte kaw du na lam hkum shadang kau ai, ngai law law lang hkrum nngai.

Roma De Sa Na Matu Pawlu Hkyen Lajang Ai Lam

²³ Ya chyawm gaw ndai shara hkan e ngai nga na lam n nga sai rai nna, Spani mung de ngai sa wa ai shaloi, nanhte kaw shang na, law law ning wa myit a katu nga nngai.

²⁴ Kaning rai nme law, lai sa wa yang, nanhte hte hkrum mu nna, nanhte hte tawng marang mi kanawn mazum ngut jang she, dai mung de nanhte ngai hpe hkan shakram sa dat mi ga, ngai myit mada nga nngai.

²⁵ Ya chyawm gaw, chyoi pra ai ni hpe galaw daw let, ngai Yerusalem de sa wa nga nngai.

²⁶ Kaning rai nme law, Makedoni hte Ahkaia mung masha ni gaw, Yerusalem na chyoi pra ai ni hta na matsan mayan ai ni a matu, shawang kumhpa langai mi lahkawn na, myit madu nga masai.

²⁷ Shanhte myit madu ma timung, dai gaw chyeju htang ai sha naw rai nga ai: kaning rai nme law, shanhte a wenyi wunli wun-gau hta maigan amyu ni jawm hpawm ma yang gaw, mungkan arai hte shanhte hpe galaw daw na, sut nga ai.

²⁸ Dai re ai majaw, ndai amu hpe galaw ngut nna, ndai shawang si hpe shanhte a man e dazik dawk da ngut jang, nanhte hpang hku hprang rai, Spani mung de ngai lai sa wa na nngai.

²⁹ Nanhte kaw du yang, Hkristu a gumring gumrat ai hte hpring chyat rai nna du na ring ngai, ngai chye nga nngai.

³⁰ Ya, hpunau ni e, Yuda mung na nhtan shai ai ni kaw na ngai lawt lu nna, Yerusalem na ni a matu nye a shawang kumhpa hpajang na lam, chyoi pra ai ni a man e, sharawng awng ai hkrum lu na hte;

³¹ Karai Kasang a myit e, kabu gara ai hte nanhte kaw du lu nna, nanhte hte rau ban sa ai hkam la lu n ga,

³² Karai Kasang kaw nye a matu mara akyu hpyi let, nanhte gaw ngai hte rau shingjawng nga na, anhte a Madu Yesu Hkristu a marang e mung, Wenyi a tsawra ai a marang e mung ngai nanhte hpe shadut shahkat dat made ai.

³³ Ya, ngwipyaw ai a npawt Karai Kasang gaw, nanhte yawng mayawng hte rau anga nga u ga law. Amen