PRU MAT 30 - Jinghpaw Hanson Version Bible

Manam Pyaw Ai Baw Nat Na Hkungri

¹ Bai, “manam pyaw ai baw nat na matu, hkungri langai mi mung, marau hpun hte nang galaw na rai ndai.

² De a galu de dawng mi, nda de dawng mi di nna, mali maga maren rai na rai nga ai; de a tsaw de dawng lahkawng ra na rai nga ai: de a nrung ni mung dai hte langai sha rai na rai nga ai.

³ Dai hpe ntsa maga de mung, nhkrem grup grup mung, nrung ni hta mung, ja jet hte nang kayap nna, de a matu grup e ja htinggawt dat da na rai ndai.

⁴ De matu mung shanghkawng lahkawng nang galaw nna, dai ja htinggawt a lawu hkawt, hkungri a maga mi hte maga mi de na jut yan hta shatut da na rai wu ai rai nna, dai gaw hpai na matu kandang dinghkrawn na shara rai na rai nga ai.

⁵ De a kandang yan hpe marau hpun hte nang galaw nna, ja hte sup na rai wu ai.

⁶ Ngai nang hte jahkrum na shara ngu ai, dai sakse sumpu a ntsa na chyeju magap a man ang, dai sakse a man e grang ai nba shinggang a shinggan e, nang dai hpe tawn da na rai wu ai.

⁷ Shing rai Arun gaw, jahpawt shagu dai pyengdin lajang ai shaloi, dai hkungri hta manam pyaw ai baw nat na rai wu ai.

⁸ Shana de mung Arun dai pyengdin shatu ai shaloi dai hta manam pyaw ai baw nat na rai wu ai: dai gaw nanhte a shu mashi shu masha prat dingsa Yehowa a man e tutnawng jau nga na manam pyaw nat lam rai na rai nga ai.

⁹ Manam pyaw ai rai kaga dai hkungri hta nanhte nat lu na n rai; wan nat hkungga rai timung, shahpa hkungga rai timung, ru hkaw ai kumhpa hkungga rai timung, dai hta nat jau lu na n rai.

¹⁰ Laning mi hta lang me de a nrung ni hta Arun htingrat lu na rai wu ai: nanhte a shu mashi shu masha prat dingsa, laning mi hta lang lang dai yubak khungga asai hte dai hpe Arun htingrat lu na rai wu ai: dai gaw Yehowa a matu chyoi pra htum ai hkungri rai na rai nga ai,” ngu wu ai.

Asak Hkye Na Gumhpraw

¹¹ Bai Yehowa gaw Mawshe hpe shaga la nna,

¹² “Israela kashu kasha ni hpe nang hti nna shanhte hpe jahpan la yang, shanhte ana ahkya n hkrum mu ga, shanhte hpe jahpan la mu ai shaloi langai hte langai tinang a myit masin a matu, Yehowa hpe galai la na jahpu jaw lu na rai mu ai.

¹³ Da ndai gaw, shanhte hpe hti yu yang, jahpan hta lawm ai ni nlang hte gaw, chyoi pra ai sum a shekela hkan nna shekela chyen chyen jaw lu na rai ma ai: (shekela langai mi gaw gera hkun rai nga ai): shekela chyen chyen Yehowa a matu kumhpa rai na rai nga ai.

¹⁴ Jahpan hta lawm ai, hkun ning kaw nna dai hta jan ai ni nlang hte gaw, Yehowa hpe dai kumhpa jaw lu na rai ma ai.

¹⁵ Nanhte a myit masin a matu mara htingtat nna Yehowa hpe dai kumhpa jaw myit yang, dai shekela chyen mi hta sut lu ai ni shajan lu na n rai, matsan mayan ni mung shayawm lu na n rai.

¹⁶ Shing rai dai htingrat ai gumhpraw Israela kashu kasha ni kaw na nang la nna, shawa sum a daw jau ai amu matu tawn da na rai wu ai: dai gaw, nanhte a myit masin a matu htingrai htingrat ya na, Israela kashu kasha ni a matu mara Yehowa a an e masat dingsat rai na rai nga ai,” ngu wu ai.

Magri Ntsin Htung

¹⁷ Bai Yehowa gaw Mawshe hpe shaga la nna,

¹⁸ “Kashin kamun rai na matu magri hte ntsin htung mung, magri hte dai shadun na ku mung nang galaw nna, dai shawa sum hte tawn hkungri lapran e dai hpe tawn da na rai wu ai; dai hta ntsin mung nang ja bang na rai wu ai.

¹⁹ Arun hte shi a shadang sha ni dai hta e lagaw lata shin na rai mu ai.

²⁰ Shanhte si ai n hkrum na matu, shawa sum hta shang na rai yang mung, Yehowa a matu wan hte hkungga nat na nga, tawn hkungri de daw jau na sit sa wa ai rai yang mung, shanhte ntsin hte shin na rai mu ai:

²¹ shing rai shanhte si ai n hkrum u ga, shanhte tinang a lagaw lata shin na rai mu ai: dai gaw, shi a matu mung, shi a kashu kasha ni a prat dingsa na matu mung, htani htan ga matsun rai na rai nga ai,” ngu wu ai.

Namman Sau

²² Bai Yehowa gaw Mawshe hpe shaga la nna,

²³ “Kaja htum ai manan pyaw ai baw, mura sau shekela manga tsa, hpun maza hpyi ni tsa manga shi, hkalamu ni tsa manga shi;

²⁴ chyoi pra sum a shekela hkan nna hkasia manga tsa hte tsanlun sau hin langai mi la nna,

²⁵ dai hte chya na matu, chyoi pra ai namman di na manam pyaw hpaw chye ai wa hpaw ai hku, manam pyaw ai sau nang hpaw na rai ndai: dai gaw chya na matu chyoi pra ai namman rai na rai nga ai.

²⁶ Dai namman hte, shawa sum hpe mung, sakse sumpu hpe mung;

²⁷ muk ku hte de a rai nlang hpe mung, pyengdin hte de a rai nlang hpe mung, manam pyaw ai baw nat ai hkungri hpe mung;

²⁸ wan nat hkungga a tawn hkungri hte de a arai nlang hpe mung, ntsin htung hte de a shadun ku hpe mung, nang chya nna,

²⁹ dai hte chyoi pra htum nga na matu shing di shachyoi shapra na rai ndai: dai rai ni hpe hkra ai hpa mung chyoi pra ai rai tai na ra ai.

³⁰ Arun hte shi a shadang sha ni hpe mung nang chya nna, nye a man e shanhte hkinjawng amu gun hpai nga lu na matu, shanhte hpe shing di shachyoi shapra na rai ndai.

³¹ Israela kashu kasha ni hpe mung nang ning ngu tsun na rai ndai: “Ndai gaw nanhte a shu mashi shu masha prat dingsa hta, nye a matu chya na chyoi pra ai namman tai nga na rai nga ai:

³² dai hpe masha hkum hta nanhte ru bun lu na n rai; dai hpaw ai hku kaga mung nanhte hpaw lu na n rai; dai gaw chyoi pra nga ai rai nna, chyoi pra ai ngu nna nanhte dum nga na rai myi dai.

³³ Dai hte shabung nna hpaw ai wa hte, dai hpe yu maya hta chya ai wa kadai rai timung, tinang amyu hta na sumri gadoi kau ai hkrum lu na rai nga ai,” ngu wu ai.

Manam Pyaw Ai Sau

³⁴ Bai Yehowa Mawshe hpe tsun wu ai gaw, “Manam pyaw ai baw ngu ai, natap naw, unuhka, galaban naw; manam pyaw ai baw hte jet ai lawban amyu, dai hte hpe maren ren di shen la nna,

³⁵ manam pyaw hpaw chye ai wa hpaw ai hku, jum hte kayau nna, nat na matu jet ai hte chyoi pra ai manam pyaw ai baw nang hpaw lu na rai ndai.

³⁶ Dai hta na nkau mi hpe mani hkra nhtu nhtawm, ngai nang hte jahkrum ai shara, dai shawa sum kata na sakse a man e nang tawn da na rai ndai: dai gaw nanhte hta chyoi pra htum ai rai na rai nga ai.

³⁷ Dai manam pyaw hpaw ai hku tinang a matu kaga nanhte hpaw lu na myit dai n rai: dai gaw nang hta Yehowa a matu chyoi pra ai rai na rai nga ai.

³⁸ Tinang manam na matu dai hte shabung nna hpaw ai wa gaw, tinang amyu hta na sumri gadoi kau ai hkrum lu na rai nga ai,” ngu wu ai.