JAW JAU 14 - Jinghpaw Hanson Version Bible

Manggang Ana Mai Tsai Wa Ai Lam

¹ Bai Yehowa Mawshe hpe tsun wu ai gaw,

² Manggang kap ai wa jasan jaseng ai shani e hkan shatsup lu na tara gaw ndai rai nga ai: dai wa hpe hkinjawng wa hpang de woi sa nna,

³ hkinjawng wa gaw dap shinggan de pru nhtawm, yu yu wu yang, dai wa a manggang mai sai rai yang gaw,

⁴ jasan jaseng hkam la na wa a matu, hkinjawng wa gaw san seng ai u hkrung lahkawng, marau hpun, hkyeng mang ai sumri hte kungla pu htet la nna,

⁵ lwi ai hka na ja la ai ntsin dibu hta u langai mi sat na rai wu ai.

⁶ Shing rai dai u sai rawng ai ntsin dibu hta, marau hpun, hkyeng mang ai sumri, kungla pu hte u hkrung re ai ni hpe kapruk la nhtawm,

⁷ manggang jasan jaseng hkam la ai wa hpe sanit lang lapri bun nna, dai wa hpe san seng ai ngu na rai wu ai: u hkrung hpe gaw dat kau na rai wu ai.

⁸ Jasan jaseng la ai wa gaw tinang a hpun palawng hkrut nna, shi a kara akrin atsai shangun kau nhtawm, hka shin na rai wu ai: shaloi shi san seng na ra ai: dai hpang dap de shang lu na ra ai, rai timung shi a sum shinggan e sanit ya tup naw nga nga na rai wu ai.

⁹ Dai sanit ya du ai shani e shi a kara hte nhka mun, myi kaw mun re ai hkum na mun yawng shangun kau nhtawm, shi a hpun palawng hkrut kau nna, hkum shin ai hte san seng na ra ai.

¹⁰ Ya matsat ya ngu na shani e dai wa gaw ra n rawng ai hte ladu hkrum ai sagu ala lahkawng, ayi langai mi hte shadung kumhpa matu sau hte kayau ai shadung uma masum, namman loga mi la sa na rai nna,

¹¹ jasan jaseng ya ai, hkinjawng wa gaw, jasan jaseng na wa hpe shawa sum a chyinghka lam e Yehowa a man e dai kumhpa ni hte rau sak na rai wu ai.

¹² Shaloi hkinjawng wa gaw sagu la langai mi la nhtawm, mara raw hkungga nawng nna, Yehowa a man e nwat kumhpa di na matu, namman loga mi hte rau nwat na rai wu ai;

¹³ sagu la dai hpe htingrai hkungga hte wan nat hkungga sat ai chyoi pra ai shara e sat na rai wu ai: kaning rai nme law, htingrai hkungga shan hpe hkinjawng wa la lu ai zawn, mara raw hkungga shan mung la lu nga ai: dai gaw chyoi pra htum ai rai nga ai:

¹⁴ hkinjawng wa gaw dai mara raw hkungga a asai la nna, jasan jaseng na wa a hkra na lapyen hta mung, hkra lata yung nu hta mung, hkra lagaw yung nu hta mung chya ya na rai wu ai.

¹⁵ Bai hkinjawng wa namman kau mi la nna shi a pai lata a lahpan hta bang nhtawm,

¹⁶ dai hpe shi a hkra layung hte ahtawk la nna, Yehowa a man e sanit lang lapri na rai wu ai:

¹⁷ shi a lata hta ngam ai namman dai hpe jasan jaseng na wa a hkra na lapyen, hkra lata yung nu, hkra lagaw yung nu ni hta kap ai mara raw hkungga sai a ntsa e chya kahtap na rai wu ai:

¹⁸ shi a lata hta naw ngam ai namman hpe gaw jasan jaseng na wa a baw hta ru jaw nna dai wa a matu Yehowa a man e htingrai htingrat ya na rai wu ai.

¹⁹ Shing rai hkinjawng wa gaw jasan jaseng na wa a n san n seng ai a matu htingrai hkungga nawng ya nna, htingrai htingrat ya na rai wu ai: dai hpang wan nat hkungga sat nawng ya na rai wu ai:

²⁰ hkinjawng wa gaw dai tawn hkungri ntsa e wan nat hkungga hte shadung kumhpa nat nawng ya nna, dai wa a matu htingrai htingrat na rai wu ai; shaloi shi san seng na ra ai.

Manggang Kap Ai Hpun Nba Hpe Jasan Jaseng Ai Lam

²¹ Dai wa matsan la nna, dai hte n dang di yang gaw, shi a matu htingrai htingrat ya na, mara raw hkungga nwat na matu, sagu la kasha langai mi, sau hte kayau ai mani ai muk shadung uma mi, namman loga mi hte

²² hkrudu lahkawng, shing n rai lu la ai made u ra kasha lahkawng shi la sa nna, langai mi htingrai hkungga matu, langai mi wan nat hkungga matu rai na rai wu ai.

²³ Shing rai, shi a hkum jasan jaseng na matu, matsat ya shani e, Yehowa a man, dai shawa sum chyinghka de hkinjawng wa kaw dai kumhpa ni hpe la sa nna,

²⁴ hkinjawng wa gaw mara raw sagu hte namman la nhtawm, Yehowa a matu nwat hkungga di nna nwat na rai wu ai.

²⁵ Shaloi dai mara raw hkungga sagu shi sat nna, hkinjawng wa gaw de a sai la nhtawm, jasan jaseng na wa a hkra na lapyen hta mung, hkra lata yung nu hta mung, hkra lagaw yung nu hta mung, chya ya na rai wu ai.

²⁶ Bai hkinjawng wa gaw namman nkau mi mung shi pai lata lahpan hta ru bang la nhtawm,

²⁷ dai hpe shi a hkra lata layung hte Yehowa a man e sanit lang lapri na rai wu ai:

²⁸ hkinjawng wa a lata hta ngam ai namman hpe gaw jasan jaseng na wa a hkra na lapyen, hkra lata yung nu, hkra lagaw yung nu ni hta kap ai mara raw hkungga sai hta chya kahtap na rai wu ai:

²⁹ hkinjawng wa a lata hta naw ngam ai namman dai hpe, dai wa a baw hta ru jaw nna Yehowa man e shi a matu htingrai htingrat ya na rai wu ai.

³⁰ Bai dai wa gaw, shi dang lu ai made, hkrudu, shing n rai u ra lahkawng hpe,

³¹ shadung kumhpa hte hpawn, htingrai hkungga matu langai mi, shi la sa nna, hkinjawng wa gaw jasan jaseng hkam ai wa a matu, Yehowa a man e htingrai htingrat ya na rai wu ai.

³² Dai hte gaw, manggang kap nna tinang hkum jasan jaseng na matu, n dang lu ai matsan mayan wa hte seng ai tara rai nga ai.

³³ Bai Yehowa Mawshe yan Arun hpe tsun wu ai gaw,

³⁴ Nanhte wa madu la na matu ngai jaw ai Hkanan mung de nanhte du ai shaloi, dai nanhte madu ai mung hta nta langai ngai kaw manggang ana ngai shakap we yang,

³⁵ nta madu gaw hkinjawng wa hpang de sa nna, Nye nta hta manggang kap sam ai, ngu nna tsun shana na rai wu ai:

³⁶ Shaloi dai nta hta rawng marawng awu asin n rai mat na matu, hkinjawng wa gaw dai manggang hpe garai n sa yu yang, dai nta hta rawng marawng htawk kau shangun na rai wu ai: dai hpang hkinjawng wa dai nta hta shang yu nna,

³⁷ ana dai hpe yu yu yang, nlung shakum hkan e hkyawk ai zawn re ai hta, tsit tsit hkyeng hkyeng re ai yan yan rai kap yang gaw,

³⁸ hkinjawng wa pru wa nna, dai nta hpe sanit ya tup la da na rai wu ai.

³⁹ Sanit ya du ai shani e hkinjawng wa bai sa yu nna, nlung shakum hkan e ana maden jat wa yang gaw,

⁴⁰ dai ana kap ai nlung hpe malawk nna mare shinggan, n san n seng ai shara de kabai kau shangun na rai wu ai.

⁴¹ nta kata maga grup e mung ahkyen kau shangun na rai wu ai: dai ahkyen kau ai shing-yun hpe mung mare shinggan n san n seng ai shara de htawm kau shangun na rai wu ai:

⁴² dai la kau ai nlung ni a hkang hta nlung bai bang nna, engade nnan hte chya na rai wu ai.

⁴³ Shing rai nlung shaw kau ai hte ahkyen kau ai di nna, engade nnan chya ngut ai hpang, ana dai bai kap ai rai yang,

⁴⁴ hkinjawng wa bai sa yu nna, dai nta hta ana maden jat wa ai rai yang gaw, dai gaw tsam wa ai ana rai nga ai rai nna, nta dai n san n seng rai nga ai.

⁴⁵ Dai re ai majaw dai nta nlung ni, ngau ni, engade hte mahkra run kau nna, mare shinggan n san n seng ai shara de htawm kau na rai wu ai.

⁴⁶ Dai hta kaga, nta naw la da ai hte yang, kata de shang ai wa gaw, shana de du hkra n san n seng rai nga ai.

⁴⁷ Dai nta hta shang yup ai wa hpun nba hkrut kau na rai wu ai; shang sha ai wa mung hpun palawng hkrut kau na rai wu ai.

⁴⁸ Bai dai nta hpe engade nnan chya ngut ai hpang, hkinjawng wa shang yu yang, ana n maden wa yang gaw, ana mai ai re ai majaw, nta dai hpe san seng ai ngu na rai wu ai.

⁴⁹ Nta dai hpe jasan jaseng na matu, u lahkawng, marau hpun, hkyeng mang ai sumri, kungla pu re ai ni la nhtawm,

⁵⁰ lwi ai hka na ja la ai ntsin dibu hta u langai mi sat nna,

⁵¹ dai marau hpun, kungla pu, hkyeng mang ai sumri hte u hkrung hpe, u sai rawng ai ntsin hta kapruk la nhtawm, dai nta hpe sanit lang lapri na rai wu ai.

⁵² Shing rai dai u sai hte lwi ai ntsin, u hkrung, marau hpun, kungla pu hte hkyeng mang ai sumri re ai ni hte dai nta hpe jasan jaseng nna,

⁵³ u hkrung hpe gaw mare shinggan de dat kau na rai wu ai: shing di, dai nta a matu shi htingrai htingrat ya na rai nna, dai gaw san seng na rai nga ai.

⁵⁴ Dai gaw san seng ai hte n san n seng ai lam, shanhte chye ginhka na matu, manggang amyu myu hte pungsaw ana,

⁵⁵ hpun nba hte nta hta kap ai manggang

^56-57 hpyi shan akawng ai, gyigu gu ai hte pang rai hpraw hkyeng ai ana hte seng ai tara rai nga ai: dai gaw manggang kap ai hte seng ai tara rai nga ai, ngu wu ai.