HOSEA 5 - Jinghpaw Hanson Version Bible

Israela Ni Hpe Tara Jeyang Ai Lam

¹ “Hkinjawng ni e, ndai lam na la mu; Israela dap e, madat mara nga mu; hkawhkam wa htingnu na ni e, matsing mu: nanhte gaw dawdan ai hkrum na myit dai; kaning rai nme law, nanhte gaw, Mizpa shara e mahkam, Tabora bum ntsa e hpyan tawn ai sumgawn, tai manit dai.

² Htak mat ai ni gaw, sat kau ai amu hte, tinang a yubak shalaw dat mu ai: ngai chyawm gaw, nlang hte hpe daru sharin na nngai.

³ Ehprim hpe ngai chye nngai: Israela gaw, nye a man na makoi mat lu ai, n rai; Ehprim e, ya pyi nang shawa num tai nna, Israela gaw awu asin hkrum nga ai.

⁴ Shanhte a kraw kata e shawa num myit rawng nna, shanhte Yehowa hpe n chye ma ai majaw, tinang a Karai Kasang hpang de nhtang wa na, shanhte a arawn alai hkum da nga ai.

⁵ Israela a gumrawng gumtawng ai gaw, tinang a man e dawdan ai sakse tai wa ai; dai re ai majaw, Israela hte Ehprim gaw, tinang a n hkru n hkra ai hta ahtu kataw na mara ai; Yuda amyu mung, shan hte rau ahtu kataw na ra ai.

⁶ Shanhte gaw tinang a sagu yamnga hpung ni hpe gawt let, Yehowa hpe sa tam timung, shi hpe n mu ma ai: shi shanhte hte tsan gang mat sai.

⁷ Shanhte gaw tsasam kasha shaprat manu ai majaw, Yehowa hpe myit magaw ai hku di kau manu ai: ya chyawm gaw, shata praw shani gaw, shanhte hte shanhte a yi hkauna ni hpe, shamyit kau na ra ai.

⁸ Gibea mare hta pahke, Rama mare hta pahtau, dum mu; Bet-awen shara e jahtau garu mu; Ben-yamin e, hpang de mada yu u.

⁹ Daru sharin hkrum ai shani e, Ehprim gaw katsi katsang shara tai na ra ai: teng teng byin magang ra ai lam, Israela amyu ni hpe, ngai chye shangun nngai.

¹⁰ Yuda du ni gaw, lamu ga jarit hpundung ni hpe sit kau ai ni zawn, rai nga ma ai: ngai gaw shanhte a ntsa de, nye a pawt sindawng ai hpe ntsin zawn, ru dat na nngai.

¹¹ Ehprim gaw masha ni a hkang ai ga hpe hkan hkraw ai majaw, shi gaw zingri zingrat hkrum nna, dawdan ai hte htum mat sai.

¹² Dai re ai majaw ngai gaw, Ehprim a matu manut, Yuda nta a matu bya wa ai ana zawn, rai nga nngai.

¹³ Ya Ehprim gaw tinang a ana ahkya hpe, Yuda gaw tinang a nma hpe mu jang, Ehprim gaw Asuri mung de sa nna, Yuda gaw hkawhkam Yarib hpe shaga wu ai: shi chyawm gaw, nan hpe shamai ya lu ai, n rai, nan a nma hpe kapa ya lu ai, n rai.

¹⁴ Kaning rai nme law, ngai gaw Ehprim hta hkanghkyi zawn, Yuda nta hta hkanghkyi uram zawn, rai na nngai; ngai nan amya kawa kau da na nngai; makrang hpai kau yang, kadai mung mawai la lu na, n rai.

¹⁵ Shanhte gaw tinang a yubak hpe yin la nna, nye a myi man hpe hkan tam ai du hkra, ngai pru nna, nye a shara de bai wa na nngai: ru tsang hkrum yang, shanhte ngai hpe tsam mari hkan tam na mara ai.