HOSEA 1 - Jinghpaw Hanson Version Bible

¹ Yuda hkawhkam ni Uzia, Yohtam, Ahaza, Hezekia hte Israela hkawhkam, Yosha a kasha Yeroboam a lakhtak e, Beri a kasha Hosea kaw du ai, Yehowa a mungga gaw, da ndai rai nga ai.

Hosea A Madu Jan Hte Kasha Ni

² Yehowa gaw Hosea hpe ga tsun hpang yang, “Nang sa su; shawa num hte hpawn, shi shaprat ai liknga ma ni hpe woi la u; kaning rai nme law, dai mungdan gaw Yehowa kaw na yit mat wa nna, grai shut hpyit nga ai,” ngu nna shi hpe tsun wu ai.

³ Shing rai shi sa nna, Dibla a shayi sha Gome hpe la wu ai; shi gaw na-um nasin rai wa nna, shadang sha shangai wu ai.

⁴ Shaloi Yehowa gaw, “Dai ma hpe, Yezrela, shamying u; kaning rai nme law, gade n na yang, Yezrela shara e jahkaw kau ai asai hpe, Yehu a nta ntsa e ngai matai dawp nna, Israela mungdan hpe jahtum kau na we ai.

⁵ Dai shani jang, ngai gaw, Yezrela kadit e, Israela ndan hpe agrawp kau na nngai,” ngu nna shi hpe tsun wu ai.

⁶ Bai, shi gaw, na-um nasin rai nna, shayi sha shangai wu ai: shaloi Yehowa gaw, “Shi a amying hpe, Lo-ruhama, shamying u: kaning rai nme law, Israela amyu a yubak hpe raw dat kau hkra, ngai htawm hpang e shanhte hpe hpa matsan dum na, n rai.

⁷ Yuda nta hpe chyawm gaw, matsan naw dum na nngai; shanhte hpe hkye la yang, ndan, ri nhtu, hpyen majan, hpyen leng, gumra jawn ai ni hte, hkye la na n rai; shanhte a Karai Kasang Yehowa a magam hte hkye la na nme ai,” ngu nna shi hpe tsun wu ai.

⁸ Ya shi gaw, Lo-ruhama hpe chyu jahka ngut jang, na-um nasin bai rai nna, shadang sha shangai wu ai.

⁹ Shaloi Yehowa gaw “Shi hpe Lo-ami, shamying u; kaning rai nme law, nanhte gaw nye a amyu n rai; ngai mung nanhte a Karai Kasang n rai na nngai,” ngu wu ai.