HAGI 1 - Jinghpaw Hanson Version Bible

Yehowa A Nta Hpe Gap Na Matu Shaga Ai Lam

¹ Dari hkawhkam hkaw dung ai, ni ning na shata kru a shawng shani e, myihtoi Hagi a n-gup hte, Yehowa mungga gaw, Yuda munggyi Shelatila kasha Zerubabela hte Yehozadak a kasha, hkinjawng agyi Yoshua hpang de du nna,

² Zaw nawng zaw wa up ai Yehowa ning nga ai, Ndai amyu masha ni gaw, Aten garai n du ai, Yehowa a Nta hpe galaw na aten garai n du ai, nga nna tsun shajang ma ai, nga ai.

³ Dai shaloi e Yehowa a mungga gaw, myihtoi Hagi a n-gup hte du nna,

⁴ Ataw, Yehowa Nta gaw shingran naw katsi nga yang me, nanhte hkum nan, hpunpyen maka ka ai nta hta, rawng na aten du sa ni?

⁵ Dai re ai majaw, Zaw nawng zaw wa up ai Yehowa ning nga ai: Tinang lam sumru yu mu.

⁶ Nanhte law law gat hkai timung, kaji sha shu la lu myit dai; sha timung, n hkru kat myit dai; lu timung, hkru lu ai, n rai; bu hpun timung, lum ai n rai; shabrai sha ai wa gaw, tinang a shabrai hpe, waw ai tingsan hta bang da wu ai.

⁷ Zaw nawng zaw wa up ai Yehowa ning nga ai: Tinang lam sumru yu mu.

⁸ Bum de lung nna, ngau shaw nhtawm, ndai Nta hpe galaw mu: dai hta ngai sharawng awng nna, de a majaw nye a hpung shingkang dan hkung na ra ai, nga nna Yehowa tsun ai.

⁹ Nanhte gaw law law lu na, myit mada timung, kaji sha lu myit dai; dai hpe dum hta bang yang, ngai kawut kau nngai. Hpa majaw rai ta? nga nna Zaw nawng zaw wa up ai Yehowa san nga ai. Nye a Nta gaw shingran naw katsi nga ninglen, nanhte langai hte langai, tinang a nta hpe sha tsang ai majaw, rai nga ai.

¹⁰ Dai rai nna, nanhte a jaw e lamu na mari n hkrat ai hte, lamu ga gaw nsi naisi n shatut nga ai.

¹¹ Dai hta n-ga ngai gaw, ga ntsa e mung, bum lang ntsa e mung, nai mam ntsa e mung, tsabyi ru ntsa e mung, sau hpun ntsa e mung, mam nhpan ntsa e mung, masha ntsa e mung, yamnga ntsa e mung, makan mahkra ntsa e mung, jan gri na hkang da nngai.

¹² Shaloi Shelatila kasha Zerubabela hte, Yehozadak a kasha, hkinjawng agyi Yoshua gaw, naw ngam nga ai mung masha ni mahkra hte rau, tinang a Karai Kasang a Yehowa ga hpe mung, tinang a Karai Kasang Yehowa shangun dat ai, myihtoi Hagi a ga hpe mung, madat mara nga nna, mung masha ni gaw Yehowa man e hkrit gari nga ma ai.

¹³ Dai rai nna Yehowa a kasa Hagi gaw, Yehowa tsun ai: Ngai nanhte hte rau rai nga nngai, ngu nna mung masha ni hpe Yehowa a mungga htawn tsun mu ai.

¹⁴ Shing rai Yehowa gaw, Yuda munggyi, Shelatila kasha, Zerubabela a wenyi hpe mung, Yehozadak a kasha, hkinjawng agyi Yoshua wenyi hpe mung, naw ngam nga ai mung masha ni mahkra a wenyi hpe mung, jasu nna, shanhte gaw,

¹⁵ Dari hkawhkam hkaw dung ai ni ning na shata kru a hkun mali ya e, tinang a Karai Kasang, Zaw nawng zaw wa up ai Yehowa a Nta hta amu galaw nga ma ai.