GALATI 3 - Jinghpaw Hanson Version Bible

Tara Shing Nrai Makam Masham

¹ Angawk angak re ai Galati masha ni e, wudang hta jen da ai Yesu Hkristu hpe nanhte a myi man e dem shakap dan sai mi, nanhte hpe gade e hkalau kau myit ta?

² Dai Wenyi hpe gaw jep ai tara a magam bungli hte nanhte lu la myit dai rai kun? shing n rai, dai makam masham a lam na la ai majaw rai kun? dai lam langai sha nanhte a n-gup na ngai chye la ma yu nngai.

³ Nanhte ndai hte wa angawk angak nga myit ni? Dai Wenyi hta hpa nna galaw hpang myit htawm e, hkum shan hta hpa nna ya shangut na myit ni?

⁴ Ning san ai nni nkri hpe nanhte kaman sha hkam kau manu ni? gaja wa, dai gaw kaman lila mahkoi rai nga ai kun.

⁵ Dai hta n-ga, nanhte hpe dai Wenyi shun di ya nna, nanhte a ka-ang e lamik kumla galaw ai wa gaw, jep ai tara a magam bungli hte, shing n rai, dai makam masham a lam na la ai majaw, shabyin lu ai rai kun?

⁶ Dai hte maren, Abraham gaw Karai Kasang hpe kamsham wu ai rai nna, dai hpe dinghpring ai rai nga ai, shi a matu ngu ya wu ai.

⁷ Dai re ai majaw, makam masham hte seng ai ni gaw Abraham a kashu kasha ni rai nga ma ai, chye nga mu.

⁸ Karai Kasang gaw makam masham hte sha maigan masha ni hpe dinghpring shangun na maru ai, nga ai Chyum laika gaw chye da hkrup sai majaw, Abraham hpe ning nga ai kabu gara shiga gaw, Amyu baw shagu gaw na a gawp e gumring gumrat hkrum na mara ai, nga nna shawng e tsun magang nu ai.

⁹ Dai rai nna, makam masham hte seng ai ni gaw, kamsham ai myit rawng ai Abraham hte rau gumring gumrat hkrum lu na mara ai.

¹⁰ Dai hta kaga, jep ai tara a magam bungli hta hpa ai ni kadai rai timung, dagam dala a npu e rai nga ma ai: kaning rai nme law, Tara laika hta ka da mada hte maren galaw na n shatup nga ai wa kadai rai timung, dagam dala hkrum na mara ai, nga nna ka da nga sai.

¹¹ Dai hta n-ga, Dinghpring ai wa gaw kamsham ai hte hkrung nga lu na ra ai, nga nna ka da nga ai majaw, jep ai tara hte Karai Kasang a man e kadai mung dinghpring lu na n re ai gaw, dan dan leng leng rai nga ai.

¹² Dai jep ai tara mahtang gaw, makam masham hte n seng ai rai nna, De a lam hte hpe hkan shatup ai wa gaw, dai hta e hkrung nga lu na ra ai, nga ai.

¹³ Hpun hta e jen da hkrum ai wa kadai rai timung dagam dala hkrum ai wa rai nga ai, nga nna ka da nga ai hte maren, Hkristu gaw anhte a matu mara dagam dala hkrum ai wa tai wa ai majaw jep ai tara a dagam dala kaw na anhte hpe hkrang shaw la mi ai:

¹⁴ shing rai Yesu Hkristu a marang e, Abraham a gumring gumrat chyeju gaw maigan masha ni hta byin wa lu na hte, anhte mung dai Wenyi a ga ndat hpe makam masham hte lu la na rai nga ga ai.

Tara Hte Ga Sadi

¹⁵ Hpunau ni e, masha myit ai hku hkan nna ngai tsun n ga: Masha e gaw da ngut sai ga ndat jahpan hpe pyi, kadai mung lai kau lu ai n rai, kadai mung dai hta set jat lu ai n rai.

¹⁶ Ya, dai ga ndat ni gaw Abraham hte shi a aru arat hpe tsun da nu ai. Aru arat ni nga ai gaw, law law wa hpe sha-ang ai zawn, shi tsun nga ai n rai: Na a aru arat ngu ai langai wa hpe sha shi tsun nga ai rai nna, dai gaw Hkristu rai nga ai.

¹⁷ Dai rai nna ngai tsun nngai gaw, Karai Kasang gaw da ngut sai ga shaka a hpang, mali tsa sumshi ning e du ai jep ai tara gaw, dai ga shaka hpe n shabai lu ai hte, dai ga ndat hpe mung lai kau lu ai, n rai.

¹⁸ Kaning rai nme law, dai sali wunli gaw jep ai tara hte seng a yang gaw, ga ndat hte seng nga ai n rai; Karai Kasang chyawm gaw, dai hpe ga ndat hte Abraham hpe jaw da nu ai.

¹⁹ Dai rai yang gaw, dai jep ai tara gaw hpa akyu nga a ta? dai ga ndat hta ang ai aru arat du ai du hkra, dai gaw shut hpyit nga ai a majaw set kahtap da nga ai: dai gaw htinglu ya ai wa a lata hte lamu kasa hta na san tawn da ai rai nga ai.

²⁰ Htinglu ya ai wa mahtang gaw, langai sha hte n seng ai sha, Karai Kasang chyawm gaw langai sha rai nga ai.

²¹ Dai rai nna jep ai tara gaw Karai Kasang a ga ndat hte nhtan shai nga a ni? Shing n rai law; kaning rai nme law, hkrung ai asak jaw lu ai jep ai tara jaw da sai rai yang gaw, dinghpring ai gaw, gaja wa, jep ai tara hta e rai na ra ai.

²² Ya chyawm gaw, Yesu Hkristu hta e rai nga ai makam masham hte seng ai ga ndat gaw, kamsham ai ni hpe jaw ya lu mu ga, Chyum laika gaw yawng mayawng hte hpe yubak a npu e rawng da nu ai.

²³ Dai makam masham garai n du yang, anhte jep ai tara a npu e sharen da ai hkrum ga ai rai nna, htawm hpang de paw pru na ra ai makam masham a matu mara, rawng da mi ai.

²⁴ Dai rai nna, anhte gaw makam masham hte dinghpring wa u ga, anhte hpe Hkristu hpang de shangun dat na, jep ai tara gaw anhte a sharin ai sara tai wa sai.

²⁵ Dai makam masham ya du sai majaw, sharin ai sara a npu e anhte naw rai nga ga ai n rai.

Karai Kasang A Kasha Ni

²⁶ Kaning rai nme law, Hkristu Yesu hta e kamsham nga myit dai majaw, nanhte nlang hte gaw, Karai Kasang a kashu kasha ni rai nga myit dai.

²⁷ Hkristu hta e baptisma hkam ai ni yawng hte gaw, Hkristu hpe bu hpun sumraw nga myit dai.

²⁸ Nanhte yawng mayawng gaw Hkristu hta e langai sha rai nga myit dai majaw, Yuda wa ngu na mi n nga, Heleni wa ngu na mi n nga; mayam ngu na mung n nga, shanglawt ngu na mung n nga; lasha, numsha ngu na mi mung n nga lu ai.

²⁹ Ya nanhte Hkristu hte seng nga myit yang gaw, nanhte Abraham a aru arat rai nga myit dai hte, dai ga ndat nga ai hte maren, sali wunli hkam la ai ni rai nga myit dai.