EZEKELA 25 - Jinghpaw Hanson Version Bible

Ammon A Matu Myihtoi Ga

¹ Bai Yehowa mungga ngai kaw du nna,

² “Masha kasha e, Ammon a kashu kasha ni hpang maga myi man yawng let, shanhte hpe lakap nna myihtoi htoi u:

³ Ammon a kashu kasha ni hpe ning ngu u; ‘Madu Yehowa a ga madat mara mu; Madu Yehowa ning nga ai: Nang gaw, awu asin hkrum ai, nye a chyoi pra ai shara hpe mung, masha shingran katsi mat ai, Israela mungdan hpe mung, bawng dung hkrum ai Yuda amyu hpe mung, ‘Aha,’ nga nna tsun ndai majaw,

⁴ yu u, sinpraw mung masha ni a lata de ngai nang hpe ap kau na nngai: shanhte gaw na a mung kata e dap jung nna, dai yang e shanu nga na mara ai; na a namsi hpe sha nna, nga chyu hpe lu na mara ai.

⁵ Raba mare hpe gawla-uk ulawng, Ammon kashu kasha ni a mung hpe, sagu hpung ni a hpum shara ngai shatai nna, ngai Yehowa rai nga ai hpe, nanhte chye lu na marin dai.

⁶ Kaning rai nme law, Madu Yehowa ning nga ai: Nang gaw Israela mung hpe grai wa n dawng let, lahpawk dum nna, lagaw shingdit ai hte, kabu gara nga ai majaw,

⁷ yu u, ngai na a ntsa e nye a lata ladawn nna, maigan amyu ni a lanep, nang hpe shatai na nngai; masha amyu ni hta na ngai nang hpe jahtum kau nna, mungdan ni hta na shamyit kau na nngai: ngai nang hpe shaza kau nna, ngai Yehowa rai nga ai hpe, nang chye lu na rin dai.”

Moba A Matu Myihtoi Ga

⁸ “Madu Yehowa ning nga ai: ‘Moba mung hte Seira bum gaw, Yu u, Yuda amyu gaw maigan amyu kaga mahkra hte maren tai wa sai,’ nga nna tsun ai majaw,

⁹ yu u, Moba lamu ga jarit makau e rai nga nna, mungdan a arawng sadang ngu ai, Bet-jeshimot, Bala-meon, Kiriahtim mare maga hku, Moba mung hpe ngai hpaw nna,

¹⁰ Ammon kashu kasha ni hte hpawn, sinpraw mung masha ni a lata hta ap kau na nngai: shanhte gaw dai mung hpe up nga nna, Ammon kashu kasha ni gaw htawm hpang de masha amyu ni hta hti lawm na n rai:

¹¹ shing rai Moba mung hpe ngai dawdan nna, ngai Yehowa rai nga ai hpe shanhte chye lu na mara ai.”

Edom A Matu Myihtoi Ga

¹² “Bai, Edom mung gaw Yuda amyu hpe matai htang ai hte, n dawng n yawt myit madun let, gumshem ai hku di kau mu ai majaw,

¹³ Madu Yehowa ning nga ai: Edom mung ntsa e nye a lata hpe ngai ladawn nna, masha hte yamnga hpe jahtum kau na nngai; Teman shara kaw nna, dai hpe shingran katsi kau na nngai; shanhte gaw Dedan mare du hkra, nhtu hte htum mat na mara ai.

¹⁴ Ngai gaw, nye a amyu Israela lata hte, Edom amyu hpe ari jaw na nngai; shanhte gaw, ngai pawt bu nna, myit kahtet ai hte maren, Edom mung hpe shari na mara ai: shing rai shanhte gaw nye a matai htang ai lam hpe chye lu na mara ai, “nga nna Madu Yehowa tsun ai.

Hpilisti A Matu Myihtoi Ga

¹⁵ Bai, Hpilisti masha ni gaw, matai htang ai hte, gumshem ai hku di kau nna, htani htana n dawng n yawt ai myit hte shaza kau mu ai majaw,

¹⁶ Madu Yehowa ning nga ai: Yu u, Hpilisti masha ni a ntsa e nye a lata hpe ngai ladawn nhtawm, Hkerehti amyu hpe ngai jahtum kau nna, nammukdara makau e naw ngam nga ai ni hpe, shaza kau na nngai:

¹⁷ ja la ai sharin achyin ai hte, ngai shanhte hpe grai matai htang na nngai; shing rai, ngai shanhte hpe matai htang yang, ngai Yehowa rai nga ai hpe shanhte chye lu na mara ai,” nga nna Madu Yehowa tsun ai.