Pʉɔ-Lɔ́mɑ 14 - Kɑɑ Fí

¹ Pɔ́ɔpɛ́mɑ́ pɑ́ɑ, pʉʉ sɛ́ ńjí ŋɡɔ ɛ́ tsɛtsɛt pɛkŋɛ, pɛcɔ́ pʉɔ lɔk pɑ́Ꞌ pɔ́p sɛ́ ńzúꞋ yɔ́p nu-Sɛ́, ḿbɔ́ ńdʉ́ɔꞋtɛ yɛcɔ́ yúu, pʉʉ kúꞋlɛ wɔ́p kúꞋlɛ́nɛ kɔɔ pʉʉ pɛpɔ́p zɔŋ nu nǔu yɔ́p yúu mi pɔ́p sɛ́ ŋ́kwɑŋɛ.

² Wɛcɔ́ ŋu lɔk nu-Sɛ́ ńjí ŋɡɔ ɑ jʉ́ɔ mbɑ kʉ̈ɔ́ lɑ́, ŋ́kwɛ́t yɛ́ kwɛ́tnɛ. Wɛcɔ́ ŋu ẅí ɑ sɛ́ ńdɔk nu-Sɛ́ ńdʉ́ɔꞋtɛ yɛcɔ́ yúu ńjí ŋɡɔ ɑ ɡʉ ŋ́kwɛ́t pɔ ndɑꞋ nzɑp.

³ Ŋu ẅí ɑ jʉ́ɔ mbɑ kʉ̈ɔ́ lɑ́ ŋ́kwɛ́t yɛ́ kwɛ́tnɛ, pɑ́ɑ nɛkʉ́ʉnɛ ŋu ẅí ɑ kɑ́ pɔ́ ŋ́kwɛ́t yúu tsʉʉ pɔ́. Ŋu ẅí ɑ kɑ́ kwɛ́t yúu tsʉʉ pɔ́ pɑ́ɑ nɛtɔ́ lɔ́Ꞌ ŋu ẅí ɑ jʉ́ɔ yɛ́ mbɑ kʉ̈ɔ́ lɑ́ ŋ́kwɛ́t yɛ́ kwɛ́tnɛ mbíꞋŋɡɔ Sɛ́ kúkŋɛ wɛ́ ɡúu.

⁴ Ɔ wɔ̌ tɛ ńtɔ́ lɔ́Ꞌ ŋɡɑŋfɑꞋ-ŋu ndɛꞋ? A lɑɑ ɛ́fɑɑnɛ nu, kɛ mbɔɔ fɑɑnɛ ɔɔ, mbɔ tɑ́t-fɑꞋ wɛ ɡẅɛɛnɛ nɛcú. Jʉ́ Tsɑpʉɔ zɛɛnɛ ŋ́kuꞋ nɛcú ŋɡɔ ŋɡɑŋ kɑ́ fɑɑnɛ nu pɔ́.

⁵ Ɛ́ mbɔ̌ wɛcɔ́ ŋu, ɑ jí ŋɡɔ mɛcɔ́ mɛlɛ́Ꞌlɑ́Ꞌ lɛɛ mɛcɔ́, ḿbɔ́ mbɔ̌ wɛcɔ́ ŋu, ɑ jí yɛ́ ŋɡɔ mɛlɛ́Ꞌlɑ́Ꞌ pɔ́ pɔ ndʉ́ŋndʉŋ. Ɛ́ píkŋɛ ŋɡɔ mbɑ wɔ̌ lɑ́ tsuŋ ńniitɛ ńjí yúu mi ɑ tsɛt tʉ́m yɛ́ ḿbɔ́ ńjí.

⁶ Ŋu ẅí ɑ ɡẅɛɛnɛ tɔŋ nǔu mɛlɛ́Ꞌlɑ́Ꞌ, ɑ ɡɛ tɔŋ pɔ́Ꞌɔ, pɔ nɛlɔk ŋ́ɡúꞋlɛ Tsɑpʉɔ. Ŋu ẅí ɑ jʉ́ɔnɛ mbɑ kʉ̈ɔ́ lɑ́ ŋ́kwɛ́t yɛ́ kwɛ́tnɛ, pɔ́Ꞌɔ, pɔ nɛlɔk ŋ́ɡúꞋlɛ Tsɑpʉɔ, mbíꞋŋɡɔ ɑ sɛ́ ŋ́ɡɑ́ pɑ́Ꞌlɑ́ mbɔ̌ Sɛ́ nǔu. Ŋu ẅí ɑ pɛn ŋ́kɛ́ mbɔɔ jʉ́ɔ mbɑ kʉ̈ɔ́ lɑ́ ŋ́kwɛ́t kwɛ́tnɛ pɔ́, ɑ kɑ́ kwɛ́t pɔ́Ꞌɔ pɔ́, ɛ́ pɔ́ pɔ nɛlɔk ŋ́ɡúꞋlɛ Tsɑpʉɔ. A pɛn ḿbɔ́ ŋ́ɡɑ́ yɛ́ pɑ́Ꞌlɑ́ mbɔ̌ Sɛ́.

⁷ Ɛ́ zɛɛ ŋ́ɡɔ́ ḿbɔ́, wɛcɔ́ ŋu wɛkŋɛ kɑ́ ɡɔ́ ḿbɔ́ ɡú ɛ́ pɔ́ nɛɡɛ yúu mi ɛ́ pɔŋnɛ wɛ́ pɔ́, wɛcɔ́ ŋu pɛn ŋ́kɛ́ ḿbɔɔ ɡɔ́ ḿpfú ɛ́ pɔ́ nɛɡɛ yúu mi ɛ́ pɔŋnɛ wɛ́ pɔ́.

⁸ Pɛkŋɛ ɡɔ́ ḿbɔ́ ɡú ɛ́ pɔ́ pɔ ŋɡɔ pɛkŋɛ yúu-Tsɑpʉɔ, ŋ́ɡɔ ḿpfú ɛ́ pɔ́ pɔ ŋɡɔ pɛkŋɛ ɡʉ ḿbɔ́ yúu-Tsɑpʉɔ. Pɔ́Ꞌɔ lɑ́, pɛkŋɛ lɑɑ ḿbɔ́ pɔ ntʉʉ ɔɔ, mbɔ pɛkŋɛ pɔ́ pɔ pʉɔ-Tsɑpʉɔ, kɛ ḿpfú pfúnɛ ɔɔ, mbɔ pɛkŋɛ pɔ́ pɔ pʉɔ-Tsɑpʉɔ.

⁹ Kɛlístɔ kɑ zɛɛ ḿpfú ḿbɛn ńzẅíimɛ nɛpɔ́ yi ɑ ɡʉ ḿbɔ́ Tsɑpʉɔ pɛpfú mbɑ wɛ pʉɔ pi pɔ́p ntʉʉ.

¹⁰ Pɑ́Ꞌ ɛ́ pɑ́Ꞌɑ lɑ́, ɡu, mɛlɑ́Ꞌ kʉ̈ɔ́ ɔ pɛn ńtɔ́ lɔ́Ꞌ mɔ́ɔmɑ́ wú? Gu yú mɛlɑ́Ꞌ kʉ̈ɔ́ ɔ pɛn ŋ́kʉ́ʉnɛ mɔ́ɔmɑ́ wú? Pɛkŋɛ pɛtsʉʉ zɛɛ ŋ́ɡẅɛɛ nɛlɑ́Ꞌ ńdɛɛ mbi Sɛ́ ɑ ŋɑk wɛkŋɛ.

¹¹ MbíꞋŋɡɔ ɛ́ tsɛt ŋwɑꞋnɛ-Sɛ́, ḿbɔ́ ŋɡɔ: «Mɔ Tsɑpʉɔ ẅí ɑ ntʉʉ cúnɛ ŋɡɔ: Pʉɔmɛ́sɔŋ tɛ ḿmɛ ɡʉ ńdɑ́Ꞌ ŋ́kẅíꞋlɛ mbi mɔ. Mbɑ wɔ̌ lɑ́ tsɔ́Ꞌ ntsu wɛ́, ɛ́sɑ́ɑnɛ sɑ́ɑnɛ́nɛ ḿbɛ́m ŋɡɔ mɔ Sɛ́.»

¹² Pɛkŋɛ lɔk pɑ́Ꞌɑ ńjʉ́ɔ ŋɡɔ mbɑ wɔ̌ lɑ́ tsɛtsɛt pɛkŋɛ ɡʉ ńdɑ́Ꞌ tʉ́ʉ mbi Sɛ́, kwɑꞋ jʉ́ pɛ́ɛtɛ́nɛ ntsu wɛ́ nǔu pɑ́Ꞌ ɑ kɑ ɡɛnɛ.

Kɔɔ ŋu ɡɛ mɔ́ɔmɑ́ wɛ vu sɛ́

¹³ Pɔ́Ꞌɔ, kɔɔ pɛkŋɛ pɛn ŋ́ŋɑk mɛmbʉʉ mɛkŋɛ. Yúu mi pʉʉ ɡẅɛɛnɛ nɛɡɛ ɛ́ pɔ pɑ́Ꞌ pʉʉ ɡʉ ḿbɑ́ɑ nɛɡɛ yɛcɔ́ yúu mi mɔ́ɔmɑ́ wʉ́ʉ ɡʉ ŋ́kɔɔtɛ nǔu ɛ́ tsʉ́ʉnɛ wɛ́ ɑ ɡɛ nu kɛpɔŋ.

¹⁴ Mɔ sɛ́ ńjí, lɑ́ ńdɔk pɔ pɑ́Ꞌ n dɑtnɛ mbʉʉ yɑɑ nǔu Tsɑpʉɔ Yɛ́su, ńniitɛ ńjí ŋɡɔ yɛcɔ́ yúu kɑ́ pɔ́ ɡú yi ɛ́ ɡẅɛɛnɛ lɔ́Ꞌ pɔ́. Lɑ́ ŋ́kɛ́ ḿbɔ́ yi ŋu lɑɑ ḿbɔ́ ŋ́kwɑŋɛ ŋɡɔ lɔ́Ꞌ nǔu yɛcɔ́ yúu, mbɔ ɛ́ ɡʉ ḿbɔ́ nǔu yɛ́ tú lɔ́Ꞌ pɔ́ nǔu yîyɑ́ yúu.

¹⁵ Pɔ́Ꞌɔ, ɛ́ lɑɑ ḿbɔ́ yi ḿbɔ́ ɔ lɛɛ nǔu nu-yúu mi ɔ kwɛ́tnɛ, ŋ́ɡɛ mbʉʉ-mɔ́ɔmɑ́ wu kʉ̈ɔ́, mbɔ ɔ kɑ́ pɔ́ ḿbɛn ŋ́ɡɛ nǔu ntɛ́ yi ɔ lɔk ŋ́kɔŋ mɔ́ɔmɑ́ ɡu pɔ́. Kɔɔ lɔk nu yúupɛjʉ́ ŋ́ɡɛ mɔ́ɔmɑ́ wu ẅí Kɛlístɔ kɑ pfúnɛ nǔu tú yɛ́ kúu pɛ́,

¹⁶ mbɑ nɛɡɛ yúu mi pɛ́ ɡʉ ńdɛɛ nǔu, ɛ́sẅíitɛ nǔu ɡu, tɛ mbɑ pɑ́Ꞌ ɔ lɑɑ ńjí yú pɔ ŋɡɔ yîyɑ́ yúu pɔŋ.

¹⁷ Ɛ́ zɛɛ ŋ́ɡɔ ḿbɔ́, nu-nɛfɔɔ-Sɛ́ kɑ́ pɔ́ nu-yúupɛjʉ́ kɛ pɔ nu-mɛluꞋ pɔ́. Nu-nɛfɔɔ-Sɛ́ pɔ́ pɔ nɛɡɛ mɛnu mi ɛ́ fúnɛ mbɔ̌ Zẅikŋɛ Lɛ́ɛnɛ́nɛ. Ɛ́ pɔ́ pɔ nɛɡɛ mɛnu mi ɛ́ ndʉ́ŋndʉŋ mbi Sɛ́, ḿbɔ́ nɛnɑ́ŋ nɛ́ mɔ́fíitɛ, ḿbɔ́ nɛnɑ́ŋ nɛ́ tsɑ́ɑtɛ.

¹⁸ Ŋu lɑɑ ɛ́fɑꞋ fɑꞋ-Kɛlístɔ nɛ́ yɔ ntɛ́, mbɔ nu yɛ́ ɡʉ ḿbɔŋ Sɛ́, pʉɔmɛsɔŋ pɛn ŋ́ɡɑ́ mɛkuꞋ ŋɡɑŋ.

¹⁹ Pɔ́Ꞌɔ lɑ́, pɛkŋɛ lɔɔ yúu mi ɛ́ ɡʉ ŋ́ɡɛ pɛkŋɛ nɑ́ŋ nɛ́ mɔ́fíitɛ, ḿbɛn ŋ́kẅiꞋ ńtɔ́ɔtɛ mɛmbʉʉ mɛkŋɛ nǔu nɛzɑ́p tʉ́m nǔu Sɛ́.

²⁰ Kɔɔ pʉ́ʉpɛ fɑꞋ-Sɛ́ mbíꞋ nu yúupɛjʉ́. Ɛ́ nɛ́nẅín ŋɡɔ lɔ́Ꞌ kɑ́ pɔ́ nǔu yɛcɔ́ yúupɛjʉ́ pɔ́, lɑ́ ɛ́ pʉ́k nǔu ŋu nɛjʉ́ yɛcɔ́ yúu mi pʉɔ ɡʉ ńjʉ́ɔ ŋ́kɔɔtɛ nǔu ḿvu Sɛ́.

²¹ Yúu mi ɛ́ pɔŋnɛ, ɛ́ nɛlʉꞋ mbɑ kʉ̈ɔ́ lɑ́ yi mbɔ mɔ́ɔmɑ́ wu kɔɔtɛ nǔu ḿvu Sɛ́, kɛ ḿbɔ́ ɛ́ pɔ́ pɔ nɛkwɛ́t mbɑp ɔɔ, kɛ nɛnɔ́ mɛluꞋ ɔɔ.

²² Ɔ lɑɑ ŋ́ɡʉ nǔu pɔ yúu ńjí ŋɡɔ kʉ̈ɔ́ tsɛt tʉ́m yu ɔɔ, pʉʉ Sɛ́ jínɛ. Pɔ́ttú ɑ ŋu ẅí tʉ́m yɛ́ kɑ́ pɔ́ ɛ́sɑ́Ꞌ wɛ́ nǔu yúu mi ɑ ɡʉ ŋ́ɡɛ pɔ́.

²³ Lɑ́ ŋu lɑɑ ḿmʉ́Ꞌlɛ nǔu yúu kɔɔ ɑ jʉ́, ŋ́kɛ́ ńjʉ́, mbɔ ɑ vu ntsɑŋ mbi Sɛ́. MbíꞋŋɡɔ ɑ kɑ́ ɡɛ pɑ́Ꞌ ɑ jínɛ ŋɡɔ nu-Sɛ́ sɛ́ ḿbíkŋɛ pɔ́. Ŋu lɑɑ ŋ́ɡɔ́ ŋ́ɡɛ yúu ḿbɔ́ ḿmʉ́Ꞌlɛ, mbɔ ɑ ɡɛ nu kɛpɔŋ.