Pʉɔ-Lɔ́mɑ 10 - Kɑɑ Fí

¹ Pɔ́ɔpɛ́mɑ́ pɑ́ɑ, yúu mi mɔ sɛ́ ńtsɑ́ɑ nɛ́ ŋɡɔŋ tʉ́m yɑ́ɑ tsʉʉ, ḿbɛn ḿbɔ́ ńdɔ́ɔ mbɔ̌ Sɛ́ mbíꞋ pɑyúdɑ, ɛ́ pɔ́ ŋɡɔ ɑ ɡɛ pɔ́p luk.

² N tsuŋ ḿbɔ́ ńjí ŋɡɔ, pɔ́p tsuŋ ḿbɔ́ ŋ́kɔŋ nɛfɑꞋ fɑꞋ-Sɛ́ pɔ nɛ́ zɑŋɛ mbʉʉ, lɑ́ pɔ́p kɑ́ pɔ́ ńzúꞋ kwɑꞋ sɛ̂ndúŋ pɔ́.

³ Ɛ́ pɔ́ mbíꞋŋɡɔ pɔ́p kɑ́ pɔ́ ŋ́kɔŋ nɛpɛ́m ntɛ́ yi Sɛ́ lɔknɛ ŋ́ɡɛ pʉɔ pɔ́ ndʉ́ŋndʉŋ mbi yɛ́ pɔ́ mbɑ mbíꞋŋɡɔ pɔ́p lɔɔ pɔ wɔp sɛ̂ndúŋ. Pɔ́p kɑ́ pɛ́m sɛ̂ndúŋ ẅi Sɛ́ fúnɛ nǔu ŋɡɔ pʉɔ pɔ́ ndʉ́ŋndʉŋ mbi yɛ́ pɔ́.

⁴ Kɛlístɔ kɑ zɛɛ ńtɔ́, ncẅɛtnɛ-ndɑ́ nɛpʉ́ʉ lɔk ḿbuutɛ. Pɔ́Ꞌɔ, ŋu zɑ́p tʉ́m nǔu Kɛlístɔ lɑ Sɛ́ tsʉ́Ꞌ ńdíŋɛ wɛ́ ɑ pɔ́ pɔ ndʉ́ŋndʉŋ mbi yɛ́.

Sɛ̂ndúŋ ɡú, ɛ́ mbɔ̌ mbɑ wɛ́tɛ́ ŋu lɑ́ nɛluk

⁵ Pʉʉ zúꞋ yúu mi Mɔ̌sɛ̂ɛ kɑ ŋwɑꞋnɛ́nɛ nǔu nu-sɛ̂ndúŋ ẅi ŋu ɛ́fú nǔu pɑ́Ꞌ ɑ ɡẅɛɛnɛ nɛpʉ́ʉ, ḿbɔ́ ndʉ́ŋndʉŋ mbi Sɛ́. «A kɑ cú ŋɡɔ: Ŋu lɑɑ ŋ́kúꞋlɛ nu tsʉʉ yi nɛpʉ́ʉ kɑ cúnɛ, lɑ́ mbɔ ɑ ɡʉ ńdúꞋnɛ nɛpʉ́ʉ lúꞋnɛ́nɛ»

⁶ Lɑ́ nu nǔu sɛ̂ndúŋ ẅi ɛ́ nɛzɑ́p tʉ́m nǔu Kɛlístɔ lɑ ḿbɔ́ ndʉ́ŋndʉŋ mbi Sɛ́ ndɛꞋ. Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Kɔɔ pɛn ńcú tsɛt tʉ́m yú ŋɡɔ: «Wɔ̌ ɡʉ ŋ́kɔ́Ꞌ tʉ́nɛ́pú»? Ɛ́ nɛlɔk ńcú ŋɡɔ wɔ̌ ɡʉ ŋ́ɡɛ ɛ́fú zúꞋu ŋ́kɔk Kɛlístɔ.

⁷ Kɔɔ kɛ́ ḿbɛn ńcú mbɑ ŋɡɔ: «Wɔ̌ ŋ́ɡʉnɛ lɑ́Ꞌ-pɛpfúsɛ́ ḿbɔ́ zúꞋu»? Yɑ́ nɛlɔk ńcú ŋɡɔ wɔ̌ ɡʉnɛ ɛ́fú zúꞋu ńcẅɛɛtɛ Kɛlístɔ.

⁸ ŊwɑꞋnɛ-Sɛ́ ɡʉ ńcú pɔ ŋɡɔ sẅiŋɛ-sɛ́ nɛjɔ́ŋ ɡu, ɛ́ ntsu ɡu, ḿbɔ́ tʉ́m ɡu. Yîyɑ́ sẅiŋɛ ɛ́ nu yi pɛk sɑ́Ꞌnɛ mbɔ̌ pʉɔ ŋɡɔ pɛ́ zɑ́p tʉ́m nǔu Kɛlístɔ.

⁹ Ɛ́ lɔk ḿbɔ́ ŋɡɔ ɔ lɑɑ ńtʉ́ʉ mbi lɑ́Ꞌ, sɑ́ɑnɛ sɑ́ɑnɛ́nɛ ńtsɔ́Ꞌ ntsu wú ńcú ŋɡɔ Yɛ́su Tsɑpʉɔ, ḿbɔ́ tsɛt tʉ́m yú ḿbɔ́ ḿbɛ́m ŋɡɔ Sɛ́ kɑ ɡɛ ɑ zẅíimɛ nǔu nɛvú, mbɔ Sɛ́ ɡʉ ŋ́ɡɛ ɔ luk.

¹⁰ MbíꞋŋɡɔ ŋu zɑ́p tʉ́m yɛ́ nǔu Kɛlístɔ, Sɛ́ tsʉ́Ꞌ ńdíŋɛ ŋɡɑŋ ɑ pɔ́ pɔ ndʉ́ŋndʉŋ mbi yɛ́. Ŋu pɛn ńtʉ́ʉ tsɛtsɛt lɑ́Ꞌ ńtsɔ́Ꞌ ntsu wɛ́, sɑ́ɑnɛ sɑ́ɑnɛ́nɛ ńcú ŋɡɔ ɑ ŋu-Yɛ́su, mbɔ Sɛ́ ŋ́ɡɛ ɑ luk.

¹¹ Ɛ́ lɔk ńzɛɛ ḿbuutɛ nǔu pɑ́Ꞌ ŋwɑꞋnɛ-Sɛ́ kɑ cúnɛ ŋɡɔ: «Ŋu lɑɑ ńzɑ́p tʉ́m nǔu wɛ́, mbɔ sʉ́ʉ kɛ́ ɡɛ ŋ́kɔ́ ŋɡɑŋ pɔ́».

¹² Pɔ́Ꞌɔ lɑ́, yɛcɔ́ tɔŋ kɑ́ pɛn ḿbɔ́ tsɛtsɛt ŋu-Pɑyúdɑ pɔ́p ŋu ẅí ɑ kɑ́ pɔ́ ŋu-Pɑyúdɑ pɔ́ pɔ́. Pɔ́p pɛ́tsʉʉ tɛmtɛ ŋ́ɡẅɛɛ pɔ tɑ́Ꞌ Tsɑpʉɔ wɛ́mɔ́Ꞌ ẅí ɑ ɡɛnɛ mɛnu sʉ́Ꞌnɛ mɛ́ nǔu pʉɔ tsʉʉ pi pɔ́p lɑɑnɛ ɛ́fúŋ wɛ́.

¹³ Ɛ́ lɔk ḿbuutɛ nǔu pɑ́Ꞌ ŋwɑꞋnɛ-Sɛ́ cúnɛ ŋɡɔ: «Ŋu lɑɑ ńdɑ́Ꞌ ńdɑɑ ɛ́fúŋ Tsɑpʉɔ Sɛ́, mbɔ ŋɡɑŋ ɡʉ ńduk».

¹⁴ Lɑ́ mbɔ pʉɔ pɔɔ zɑ́p tʉ́m nǔu Tsɑpʉɔ pɔ́, ŋ́ɡɛ ŋɡɔ́ku lɑ ńdɑɑ ɛ́fúŋ wɛ́? Mbɔ pʉɔ pɛn ŋ́ɡɛ ŋɡɔ́ku ńzɑ́p tʉ́m nǔu Tsɑpʉɔ kɛ́ pɔ́ yi pɔ́p zúꞋ pɑ́Ꞌ ŋu sẅíinɛ nu-Tsɑpʉɔ mbɔ̌ pʉɔ? Mbɔ pʉɔ pɛn ńzúꞋ pɑ́Ꞌ pɛ́ sẅíinɛ nu-Tsɑpʉɔ ŋɡɔ́ku, kɛ́ pɔ́ yi ŋu ẅí ɑ ɡʉ ɛ́sẅíi nu-Tsɑpʉɔ ɡú?

¹⁵ Mbɔ pɛ́ pɛn ɛ́sẅíi nu-Tsɑpʉɔ ŋɡɔ́ku kɛ́ pɔ́ yi pɛ́ túu pʉɔ pi pɔ́p ɡʉ ɛ́sẅíi? Ɛ́ fí nu yi ɛ́ tsɛt ŋwɑꞋnɛ-Sɛ́, ḿbɔ́ ŋɡɔ: «Mɑ́ntúu pɔ́ tɛ ńtɔ́, ɛ́sẅíi pʉɔ nɛ́ nu sʉ́Ꞌnɛ, tsɑ́ɑtɛ pɔ́ sɛ́ ŋkɑ́ ɛ̂yɑ́.»

¹⁶ Lɑ́ pʉɔ pɛtsʉʉ ŋkɑɑ zúꞋ Ŋkʉʉ Sʉ́Ꞌnɛ ḿbɛ́m pɔ́. Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ zɛɛ ńcú ŋɡɔ: «Tsɑpʉɔ, pɛk kɑ cú nu yú wɔ̌ kɛ́ ḿbɛ́m»?

¹⁷ Pɛkŋɛ lɔk pɑ́Ꞌɑ ńjʉ́ɔ ŋɡɔ, nɛzɑ́p tʉ́m nǔu Kɛlístɔ fú pɔ nǔu Ŋkʉʉ ẅí ŋu zúꞋnɛ. Ŋu ɡɔ́ ńzúꞋ ẅîwɑ́ Ŋkʉʉ, mbɔ ŋu cúnɛ.

¹⁸ Ɛ́ zɛɛ ḿbɔ́ tɛ ḿbɔ́ yi m bɔ́ ḿbíkŋɛ ŋɡɔ tɛ pɑyúdɑ kɑ zɛɛ ńtsuŋ ńzúꞋ wɔ Ŋkʉʉ ɔɔ? N jʉ́ɔ ŋɡɔ pɔ́p kɑ zúꞋ zúꞋnɛ. Ɛ́ pɔ́ pɑ́Ꞌ pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ŋɡɔ: «Pɛ́ zúꞋ ŋɡi yɔp, pɔ́p sɛ́ ɛ́sẅíi nu-Sɛ́ zʉꞋ tsʉʉ ndǔ tsɛ́tsɑ́Ꞌ.» Nu yi pɔ́p cúnɛ pɛn ńnɛn tɛ ŋ́kúu ndẅiklɛ tsɛ́tsɑ́Ꞌ.

¹⁹ Pɔ́Ꞌɔ, m bɛn ḿbíkŋɛ ŋɡɔ: Pɑyúdɑ pɑ́Ꞌɑ, mbɔ pɔ́p kɑ zúꞋ yɔ nu mbɔɔ lii kɛkʉ̈ɔ́? Pɔ́p kɑ lii lɑ́ ńdʉꞋ lʉꞋnɛ. Ɛ́ pɔ́ pɑ́Ꞌ Mɔ̌sɛ̂ɛ kɑ ŋwɑꞋnɛ́nɛ ŋɡɔ Sɛ́ cú mbɔ̌ pɑyúdɑ ŋɡɔ: «Mɔ ŋ́ɡɛ lɔ́ŋ wʉʉ kɔ́Ꞌ MbíꞋ pʉɔ-lɑ́Ꞌ pi ŋ kɑ́ lɔk wɔ́p ɛ́fúŋ yɛcɔ́ yúu pɔ́. Mɔ ńdɑ́Ꞌ ŋ́ɡɛ nu zɑ́ŋ wʉ́ʉ.» MbíꞋ pɑtúu pi pʉʉ cúnɛ ŋɡɔ jínu yɔ́p kɑ́ pɔ́ ɡú pɔ́.

²⁰ Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ sɑ́ɑnɛ sɑ́ɑnɛ́nɛ ḿbɛn ńcú ŋɡɔ Sɛ́ cúnɛ ŋɡɔ: pʉɔ pi pɔ́p kɑ zɛɛ ḿbɔɔ ńdɔɔ wɑ́ɑ pɔ́ jí wɑ́ɑ. Ŋ kɑ pɛn ńnyɛt mbʉʉ yɔ njɛ́Ꞌ-pʉɔ pi pɔ́p kɑ́ kɛ́ ḿbɔ́ ńdɔ́ɔ yɛcɔ́ yúu mbɔ̌ mɔ pɔ́.

²¹ Lɑ́ ŋ́ɡʉ nǔu pɑíslɑyɛ̂l, Sɛ́ cú ŋɡɔ: «N júk lɛ́Ꞌ tsʉʉ pɔ nɛcɑklɛ pɔ́ ńdɔk ɛ́fúŋ wɔ́p, pɔ́p tʉʉ tú tʉʉnɛ, ɛ́shɔt shʉ́-nu yi n cúnɛ shɔtnɛ.»