Mɑtʉ̈ɔ 7 - Kɑɑ Fí

Kɔɔ pʉʉ tɔ́ mɛlɔ́Ꞌ-pʉɔ, kɔɔ pʉʉ fʉ̈ɔ́nɛ

¹ Kɔɔ pʉʉ nɑ́ŋ ńtɔ́ mɛlɔ́Ꞌ-pʉɔ, ḿbɔ́k Sɛ́ nɛtɔ́ yʉ́ʉ lɔ́Ꞌ.

² Ɛ́ ɡʉ ɛ́fú pɔ nǔu ntɛ́ yi pʉʉ lɔknɛ ńtɔ́ lɔ́Ꞌ pɛcɔ́ pʉɔ, lɑ Sɛ́ pɛ́ɛ fʉꞋ nɛtɔ́ yʉ́ʉ lɔ́Ꞌ ɡúu. Pʉʉ jí ŋɡɔ: Sɛ́ ɡʉ ńtɑ́ɑ ńníꞋ pɑɑ yʉ́ʉ pɔ pɑ́Ꞌ pʉʉ zɛɛnɛ ńníꞋ yɛ́ pɛcɔ́ pʉɔ.

³ Ɛ́ pɛn ŋ́ɡɛ ŋɡɔ́ku ɔ pɔ́ ńjʉ́ɔ mɔ́ ŋɡʉɔ-píi yi ɛ́ vunɛ lík-mɔ́ɔmɑ́ wu, lɑ́ kɛm-ntsẅíi nɔɔ lík ɡu, ɔ pɛn ŋ́kɛ́ ḿbɔɔ ḿbɔ́ ńjʉ́ɔ pɔ́ ɔɔ?

⁴ Mbɔ ɔ ɡɛ ŋɡɔ́ku, lɑ́ ńcú mbɔ̌ mɔ́ɔmɑ́ wu ŋɡɔ: «Mɔ́ɔmɑ́, tsʉ́Ꞌ n cẅɛɛtɛ ŋɡʉɔ-píi yɑ́ yi ɛ́ lík ɡu lɑɑ, ŋ́ɡɔ́ ńcú, ḿbɔɔ ḿbɔ́ ńjʉ́ɔ kɛm-ntsẅíi mi ɛ́ nɔɔnɛ tsɛt yú pɔ́ ɔɔ?» Lɑ́ ɛ́ zɛɛ ḿbɔŋ nɛɡẅɛɛ jínu.

⁵ Ŋkɔŋmík! Piitɛ ńcẅɛɛtɛ kɛm-yúu mi ɛ́ lík ɡu, tɛ ḿbɔ́ ńtsuŋ ńjʉ́ɔ zʉꞋ lɑ́ ŋ́kuꞋ nɛcẅɛɛtɛ ŋɡʉɔ-píi tsɛt lík-mɔ́ɔmɑ́ wu.

⁶ Kɔɔ pʉʉ ɡɑ́ yúu mi ɛ́ yɛ́ Sɛ́, mbɔ̌ mvú mbɔ pɔ́p ḿbɛn ɛ́shɔtnɛ ńnɛ́mtɛ wʉ́ʉ. Kɔɔ pʉʉ mɑꞋ túkcí yʉ́ʉ mbi mɛnjínɑɑ. Mbɔ Pɔ́p ɡʉ ńnʉŋtɛ nɛ́ mɛku.

Ɛ́ pɔŋ nɛsɑ́Ꞌ tʉʉ ŋ́ɡɛ yúu

⁷ Pʉʉ lɔ́ɔ, Sɛ́ ɡʉ ŋ́ɡɑ́ mbɔ̌ pʉʉ. Pʉʉ lɔɔ, Sɛ́ ɡʉ ŋ́ɡɛ pʉʉ jʉ́ɔ. Pʉʉ púꞋtɛ ntsundɑ́, ɑ ɡʉ ńtsɔ́Ꞌ ŋ́ɡɑ́ mbɔ̌ pʉʉ.

⁸ Jínɛ ŋɡɔ ŋu lɑɑ ńdɔ́ɔ yúu, mbɔ pɛ́ ɡʉ ŋ́ɡɑ́ mbɔ̌ wɛ́, ńdɔɔ, mbɔ ɑ ɡʉ ńjʉ́ɔ, ḿbɛn ḿbúꞋtɛ ntsundɑ́, mbɔ pɛ́ ɡʉ ńtsɔ́Ꞌ ŋ́ɡɑ́ mbɔ̌ wɛ́.

⁹ Pʉʉ pʉ́ɔlɑ́ ḿbɔ́ pɛtɑ́t mbɔ́ŋkʉ̈ɔ́, mɔ́ɔ wɔ̌ tsɛtsɛt pʉʉ lɑɑ ńdɔ́ɔ mbɛlɛ̂ɛt, mbɔ ɑ ɡʉ ŋ́ɡɑ́ ŋɡɔꞋ mbɔ̌ wɛ́?

¹⁰ Mɔ́ɔ wɔ̌ lɔ́ɔ mbɑp shú, mbɔ ɑ ɡʉ ŋ́ɡẅɛɛ nɔ́ ŋ́ɡɑ́ mbɔ̌ wɛ́?

¹¹ Pʉʉ ẅí pʉʉ fʉꞋnɛ́nɛ nu tɛꞋ jí nɛɡɑ́ yúu sʉ́Ꞌnɛ mbɔ̌ mbɔ́ŋkʉ̈ɔ́ pʉ́ʉ, tɛ ŋkɑ́ yɛsʉ́Ꞌʉ́ nǔu Tɑ̌ɑ wʉʉ ẅí ɑ tʉ́nɛ́pú? A ɡʉ ŋ́ɡɑ́ yúu sʉ́Ꞌnɛ mbɔ̌ pʉɔ pi pɔ́p lɔ́ɔnɛ mbɔ̌ wɛ́.

¹² Yúu mi pʉʉ sɛ́ ńtsɑ́ɑ ŋɡɔ pɛ́ ɡɛ nǔu pʉʉ lɑ́, pʉʉ ɡɛ kwɑꞋ yɛ́tɛ́ ɡúu nǔu pɛcɔ́ pʉɔ. Pʉʉ lɑɑ ŋ́ɡɛ pɔ́Ꞌɔ, mbɔ ɛ́ ɡʉ ḿbɔ́ yúu mi nɛpʉ́ʉ-Mɔ̌sɛ̂ɛ mbɑ mɛŋwɑꞋnɛ pɛŋɡɛ́mndʉ̈ɔ́Ꞌ-Sɛ́ píkŋɛnɛ.

Mɛsɛ̂ndúŋ mɛ́mbɑ́

¹³ Pʉʉ tsʉ́Ꞌ nɛlɔɔ sɛ̂ndúŋ-tʉ́nɛ́pú, ńdɛɛ pɔ nǔu ntsuŋkɑ́Ꞌ ẅi ɛ́ kʉ́ʉpɛ kʉ́ʉpɛ́nɛ. Ntsuŋkɑ́Ꞌ ẅi ɛ́ ɡúꞋnɛ tɛꞋ, ɡʉ pɔ nɛ́ lɑ́Ꞌ-nɛvú. Sɛ̂ndúŋ ẅi ɛ́ ɡʉnɛ lɑ́Ꞌ-nɛvú ɡúꞋ tɛꞋ, nɛzɑ́ɑ pʉɔ sɛ́ ńdɛɛ pɔ ẅîwɑ́.

¹⁴ Lɑ́ ntsuŋkɑ́Ꞌ ẅi ɛ́ ɡʉnɛ lɑ́Ꞌ-luk kɛ́mɛ kɑ́ ɡúꞋ. Sɛ̂ndúŋ pɛn ŋ́kʉ́ʉpɛ, pɑlɛɛ ẅîwɑ́ kɑ́ zɑ́ɑ.

Pɛ́ jí tʉ́ nǔu mɛntɑ́ɑ mɛ́

¹⁵ Pʉʉ lɑk tú yʉ́ʉ nǔu pʉɔ pí pɔ́p cɔtnɛ nu ŋɡɔ pɔ́p pɛŋɡɛ́mndʉ̈ɔ́Ꞌ-Sɛ́. Pɔ́p júk ńtɔ́ nɛjɔ́ŋ pʉʉ ŋɡɔ pɔ́p mɛnjinjɔ, lɑ́ kwɑŋɛ yɔ́p pɔ́ pɔ yɛ́ mɛnɑɑŋɡwɛ.

¹⁶ Pʉʉ ɡʉ ńjí wɔ́p nǔu ŋɡɛnɛ mɛnu mɔ́p. Pɛ́ lɔɔ ŋ́kɑ́p nyɛt nǔu tʉ́-ndẅindẅi pɔ́, ndʉ́ŋndʉŋ pɑ́Ꞌ ɛ́ lɑɑ ḿbɔ́ pɛ́ pɔɔ kɑ́p nɛpi nǔu tʉ́-nɛŋɡɑ̌m pɔ́.

¹⁷ Tʉ́ sʉ́Ꞌnɛ zɛ́m pɔ ntɑ́ɑ sʉ́Ꞌnɛ, lɑ́ tʉ́ kɛpɔŋ zɛ́m pɔ ntɑ́ɑ kɛpɔŋ,

¹⁸ mbɔ tʉ́ sʉ́Ꞌnɛ pɔɔ zɛ́m ntɑ́ɑ kɛpɔŋ pɔ́, tʉ́ kɛpɔŋ kɛ́ mbɔɔ zɛ́m ntɑ́ɑ sʉ́Ꞌnɛ pɔ́.

¹⁹ Tʉ́ tsʉʉ yi ɛ́ kɑ́ pɔ́ ńzɛ́m ntɑ́ɑ sʉ́Ꞌnɛ pɔ́, pɛ́ kʉ́ɔꞋ ńtɔɔ múk.

²⁰ Pɔ́Ꞌɔ, pʉʉ ɡʉ ŋ́ɡɛ ŋ́ɡɔ́ ńjí pʉɔ pínɛ pɔ́p cɔtnɛ nu ŋɡɔ pɔ́p pɛŋɡɛ́mndʉ̈ɔ́Ꞌ-Sɛ́, ɛ́ lɛɛ pɔ nǔu mɑt wɔp.

Nɛcú ḿbɛn ŋ́ɡɛ

²¹ Ɛ́ ɡʉ nǔu pʉɔ pínɛ pɔ́p fúŋnɛ wɑ́ɑ ŋɡɔ: «Tsɑpʉɔ, Tsɑpʉɔ pɔ́p pɛtsʉʉ kɛ́ lɑ́Ꞌ ńjʉ́ pii-nɛfɔɔ-Sɛ́ pɔ́. NdɑꞋ pʉɔ pínɛ pɔ́p ɡɛnɛ yúu mi Tɑ̌ɑ mɔ ẅí ɑ tʉ́nɛ́pú sɛ́ ŋ́kɔŋ ŋɡɔ pɛ́ ɡɛ.»

²² Ɛ́ ɡʉ ńdɑ́Ꞌ ḿbɔ́ lɛ́Ꞌ yi mɔ ŋ́ɡɛ ńzɑ́Ꞌ tsɑŋ, pʉɔ tɛ ńzɑ́ɑ cú ŋɡɔ: «Tsɑpʉɔ! Tsɑpʉɔ! Pɛk ŋkɑɑ ḿbɔ́ ńdɔk pɔ lík yú ɛ́sẅíi nu-Sɛ́ pɔ́ ɔɔ? Pɛk ŋkɑɑ pɔ́ ńdɔk pɔ lík yú ńzuŋ mɛzẅikŋɛ kɛpɔŋ pɔ́ ɔɔ? Pɛk kɑ pɔ́ ńdɔk pɔ lík yú ŋ́ɡɛ ndɑɑkɑ́jʉ́ɔ nu pɔ́ ɔɔ?»

²³ Ŋ ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Mɔ ŋkɑɑ mɔ zɛɛ ńjí wʉ́ʉ pɔ́, pʉʉ pɑfʉꞋ mɛnu kɛpɔŋ, pʉʉ fú nɛjɔ́ŋ mɔ ńtsʉ́ʉtɛ.»

Nɛpɔ́ɔ ndɑ́ ɛ́ ntɛ́ yɛ́pɑ́

²⁴ «Ŋu lɑɑ ńtɔ́ ńtsɛ́t wɑ́ɑ, ńzẅíꞋlɛ sẅiŋɛ yɑ́ɑ, ŋ́ɡɛ pɑ́Ꞌ ɛ́ sɛ́ ḿbíkŋɛ, mbɔ ŋɡɑŋ fí wɛcɔ́ njínu wɑ́ ẅi, ɑ kɑ tsʉ́Ꞌ nɛkút ndɑ́ yɛ́, ńtúŋ zʉꞋ tɛ ńjʉ́ɔ mɑ́mɑ́ ŋɡɔꞋ, ńtík ndɑ́ ndǔ.

²⁵ Mbʉŋ ɡɛ ńdɔ́, ŋ́ɡʉ ŋki tɔ́, fɛfʉ̈ɔt tsʉ́Ꞌnɛ, ńtɛ́mɛ nǔu ndɑ́. Ndɑ́ pɔɔ vu, mbíꞋŋɡɔ pɛ́ kɑ tík ndɑ́ nǔu ŋɡɔꞋ.

²⁶ Lɑ́ ŋu ẅí ɑ zúꞋnɛ sẅiŋɛ yɑ́ɑ, mbɔɔ ɡɛ pɑ́Ꞌ n cúnɛ pɔ́, mbɔ ŋɡɑŋ fí pɔ ɡʉɡʉʉ ŋu ẅí ɑ kɑ kútnɛ ndɑ́ yɛ́ kɛ́ túŋ cʉ́.

²⁷ Mbʉŋ ɡɛ ńdɔ́, kúŋ tɔ́, fɛfʉ̈ɔt tsʉ́Ꞌnɛ ńtɛ́mɛ nǔu ndɑ́ ɛ̂yɑ́, ɛ́ kɛ́mɛ ḿbʉ̈ɔtnɛ sɛ́ pɑ́Ꞌɑ ŋkɑɑ-shʉ̈ɔ́Ꞌ.»

Ntɛ́ yi Yɛ́su lɔknɛ ńzíꞋ pʉɔ nɛ́ yúu

²⁸ Yɛ́su zíꞋ pʉɔ nɛ́ mɔnɛ mɛnu tɛ ḿbɔ́tnɛ ńnɑ́ŋ, lɑ́Ꞌ puu ḿmɑɑ yɛ́ ntɛ́ nɛzíꞋ pʉɔ nɛ́ yúu,

²⁹ mbíꞋŋɡɔ ɑ ŋkɑɑ pɔ́ ŋ́ɡɛ pɑ́Ꞌ pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́. A m̄bɔ́ ńzíꞋ tɛ ńjí yúu mi ɑ ɡɛnɛ.