Mɑtʉ̈ɔ 25 - Kɑɑ Fí

Sɑknɛkɛt pɔ́ɔŋɡɔɔ nɛɡɛ́m

¹ Yɛ́su pɛn ńcú ŋɡɔ: «Pɔ́Ꞌɔ lɑ́, nu-nɛfɔɔ-Sɛ́ ɡʉ ńdɑ́Ꞌ ɛ́fí nu-pɔ́ɔŋɡɔɔ nɛɡɛ́m pi pɔ́p kɑ tíinɛ mɛkyɛꞋ mɔ́p, ŋ́ɡʉ nɛzɑ́Ꞌ ŋu mbɛ́ɛnɛ ẅí ɑ ɡʉ ńzɔ́Ꞌ.

² Pɛ́ pɛ́tɑɑ pɔ́ tsɛtsɛt pɔ́p ḿbɔɔ jínu ɡẅɛɛ, pɛ́ pɛ́tɑɑ ɡẅɛɛ jínu.

³ Pi pɔ́p ŋkɑɑ jínu ɡẅɛɛ kɑ ɡɔ́ ńtíi mɛkyɛꞋ mɔ́p, mbɔɔ ɡẅɛɛ mɛcɔ́ mɛɡwɛ́t tsɛt yɛcɔ́ yúu ndɛꞋ pɔ́.

⁴ Pi pɔ́p kɑ ɡẅɛɛnɛ jínu kɑ ɡɔ́ ńtíi mɛkyɛꞋ mɔ́p, ḿbɛn ńníꞋ mɛcɔ́ mɛɡwɛ́t tsɛt yɛcɔ́ yúu ndɛꞋ ŋ́ɡẅɛɛ.

⁵ Ŋu ẅí ɑ ɡʉ ńzɔ́Ꞌ, pɔɔ fɛ́Ꞌnɛ ńtɔ́ pɔ́, pɔ́p nɑ́ŋ tɛ fɛlɔ́k ɡẅɛɛ wɔ́p pɔ́p lɛ́tɛ.»

⁶ TʉʉtúꞋ ɡɛ kuꞋ, pɛ́ zúꞋ ŋu lɔk ŋɡi tɛnnɛ ŋɡɔ: «Ŋu ẅí ɑ ɡʉ ńzɔ́Ꞌ pʉ́ɔ ɑ tɔ́nɛ lɑɑ, pʉʉ cẅɛt ŋ́ɡʉ ńzɑ́Ꞌ wɛ́.»

⁷ Pɔ́ɔŋɡɔɔ pɑ́ pɛtsʉʉ ɡɔ́ɔ ńjʉɔmɛ, mbɑ wɔ̌ lɑ́ kɑꞋ ŋkʉ-lɑ̂m yɛ́.

⁸ Pi pɔ́p kɑ́ ɡẅɛɛ jínu pɔ́ lɑ́, cú mbɔ̌ pi pɔ́p ɡẅɛɛnɛ jínu ŋɡɔ: «Mɛ́k mɛkyɛꞋ sɛ́ ḿbɛ́, pʉʉ ɡɑ́ wɛ́k nɛ mɔ́zʉꞋ nǔu mɛɡwɛ́t mʉ́ʉ lɑ́.»

⁹ Pi pɔ́p ɡẅɛɛnɛ jínu pʉ̈ɔt ŋɡɔ: «Pɛk kɛ́ ɡɑ́ pɔ́, pɛk lɑɑ ŋ́ɡɑ́, mbɔ mɛ́k ɡʉ ńjɑ́k. Pʉʉ ɡʉ pɔ ndɑ́-mɛtɑ́ɑ ńzúu mʉ́ʉ.»

¹⁰ Pɔ́p ɡʉ nɛzúu, ŋu ẅí ɑ zɔ́Ꞌnɛ tsʉ́Ꞌ ńtɔ́, pɔ́p pɛ́ pɔ́ɔŋɡɔɔ pínɛ yɛcɔ́ yúu ŋkɑɑ ḿbɔ́ ńjɑ́k wɔ́p pɔ́ kúu ndɑ́-ndínɑ-lɑ́ɑndɑ́, pɛ́ jʉ́ɔꞋ ntsundɑ́.

¹¹ Pɛ́ nɑ́ŋ tɛ ńzúꞋ pɑ́Ꞌ pɛcɔ́ pɔ́ɔŋɡɔɔ pí pɔ́p lɑ́Ꞌnɛ ŋ́ɡʉ zúu mɛɡwɛ́t lɑ́ púꞋtɛnɛ ntsundɑ́, ḿbɔ́ ńcú ŋɡɔ: «Ndɛ, Ndɛ, pɛ́ tsɔ́Ꞌ ntsundɑ́ ŋ́ɡɑ́ mbɔ̌ pɛk.»

¹² Lɑ́ ɑ cú mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, ŋ kɑ́ pɔ́ ńjí wʉ́ʉ pɔ́.»

¹³ Yɛ́su mikŋɛ ŋɡɔ: «Ɛ́ yɛ́tɛ́ lɑ́ pʉʉ pɑ́ɑ nɛmɛꞋ mbʉʉ yʉʉ, mbíꞌŋɡɔ pʉʉ kɑ́ pɔ́ ńjí lɛ́Ꞌ pɔ́, ŋ́kɛ́ ḿbɔɔ ḿbɔ́ ńjí ŋkɑ́ yi Mɔ́ɔ-Ŋu ɡʉ ńdɑ́Ꞌ ńtɔ́ pɔ́.»

Sɑknɛkɛt nǔu ɡɑŋfɑꞋ pɛ́tɑ́t

¹⁴ Ɛ́ ɡʉ ńdɑ́Ꞌ ḿbɔ́ pɔ pɑ́Ꞌ nu-ŋu ẅí ɑ kɑ tsʉ́Ꞌ nɛɡʉ nɛnɛn, ɛ́fúŋ ɡɑŋfɑꞋ pɛ́, ńnɑ́ ŋkɑ́p yɛ mbɔ̌ pɔ́p,

¹⁵ ńdʉŋtɛ yɛ́ mbɑ wɔ̌ lɑ́ pɔ nǔu wɛ́, ńnɑ́ ŋkɑ́p pɑk ŋkʉ yɛ́tɑ́ɑ mbɔ̌ nduŋmbi, ńnɑ́ ŋkɑ́p pɑk ŋkʉ yɛ́pɑ́ mbɔ̌ mbɑ́ɑtɛ, ńnɑ́ pɑk ŋkʉ mbɔ̌ mbɑ́ɑtɛ yɛ́tɑ́t, ŋ́ɡɔ́ɔ ŋ́kɛ́ ŋ́ɡʉ.

¹⁶ ŊɡɑŋfɑꞋ ẅí pɛ́ kɑ nɑ́nɛ ŋkɑ́p pɑk ŋkʉ yɛ́tɑ́ɑ mbɔ̌ wɛ́, tsʉ́Ꞌ ŋ́ɡɔ́ɔ fɛ́ꞌnɛ ńtɑ́ŋ yɛ́, tɛ ńjʉ́ yɛcɔ́ pɑk ŋkʉ yɛ́tɑ́ɑ.

¹⁷ Ŋu ẅí pɛ́ kɑ nɑ́nɛ yɛ́ pɑk ŋkʉ yɛ́pɑ́, pɛn ńjʉ́ yɛ́ yɛcɔ́ pɑk ŋkʉ yɛ́pɑ́.

¹⁸ Lɑ́, ŋu ẅí pɛ́ kɑ nɑ́nɛ pɑk ŋkʉ mbɔ̌ wɛ́ lɑ́, ɡʉ ńtúŋ ɡɛm tsɛt tsɛ́tsɑ́Ꞌ, ńdẅɛꞋ ŋkɑ́p tɑ́t wɛ tsɛtú.

¹⁹ Ntí nɑꞋ ɛ́sɑk, tɑ́t pɛ́ ɡɑŋfɑꞋ pɔnɛ pɛ́tɑ́t pɛn nzʉʉ, ɛ́fúŋ wɔ́p ḿbíkŋɛ pɑ́Ꞌ pɔ́p kɑ tsʉ́Ꞌnɛ ŋ́ɡɛ nǔu ŋkɑ́p pɔ́Ꞌɔ.

²⁰ Ŋu ẅí ɑ kɑ nɑ́nɛ ŋkɑ́p pɑk ŋkʉ yɛ́tɑ́ɑ mbɔ̌ wɛ́ tɔ́, ńnyɛt yɛ́ yɛcɔ́ pɑk ŋkʉ yɛ́tɑ́ɑ, ńcú ŋɡɔ: «Ndɛ ɔ kɑ nɑ́ ŋkɑ́p pɑk ŋkʉ yɛ́tɑ́ɑ mbɔ̌ mɔ, ŋ ɡɛ pɑk ŋkʉ yɛ́tɑ́ɑ zɑ́pmɛ nǔu.»

²¹ Tɑ́t wɛ cú mbɔ̌ wɛ́ ŋɡɔ: «Ɛ́ pɔŋ, ɔ ŋɡɑŋfɑꞋ sʉ́Ꞌnɛ, ɔ kɑ ɡɛ yúu mi ŋ kɑ pɔ́ ńzẅíꞋlɛ mbɔ̌ ɡu, pɑ́Ꞌ ɔ kɑ pɑ́ɑnɛ mɔ́ɔ mɔ́yúu sʉ́Ꞌnɛ lɑ́, ŋ ɡʉ ńníꞋ yúu mbɔ̌ ɡu tɛꞋ. Tɔ́ pûu tsɑ́ɑtɛ.»

²² Ŋu ẅí ɑ kɑ nɑ́nɛ ŋkɑ́p pɑk ŋkʉ yɛ́pɑ́ mbɔ̌ wɛ́ lɑ́ tɔ́ yɛ́, ńcú ŋɡɔ: «Ndɛ, ɔ kɑ nɑ́ ŋkɑ́p mbɔ̌ mɔ pɑk ŋkʉ yɛ́pɑ́, jʉ́ɔ yɛcɔ́ pɑk ŋkʉ yɛ́pɑ́ yi ɛ́ zɑ́pmɛ́nɛ nǔu.»

²³ Tɑ́t wɛ cú mbɔ̌ wɛ́ ŋɡɔ: «Ɛ́ pɔŋ, ɔ ŋɡɑŋfɑꞋ sʉ́Ꞌnɛ, ɔ kɑ ɡɛ yúu mi ŋ kɑ pɔ́ ńzẅíꞋlɛ mbɔ̌ ɡu, pɑ́Ꞌ ɔ kɑ pɑ́ɑnɛ mɔ́ɔ mɔ́yúu sʉ́Ꞌnɛ lɑ́, ŋ ɡʉ ńníꞋ yúu mbɔ̌ ɡu tɛꞋ. Tɔ́ pûu tsɑ́ɑtɛ.»

²⁴ Lɑ́ ŋu ẅí ɑ kɑ nɑ́nɛ ŋkɑ́p pɑk ŋkʉ mbɔ̌ wɛ́ lɑ́ tɔ́ yɛ́, ńcú ŋɡɔ: «Ndɛ, ŋ kɑ pɔ́ ńjí ŋɡɔ ɔ ŋu ńtɛn tɛꞋ, ŋ́kɑ́p yúu zʉꞋ yí ɔ ŋ́kɑɑ zúꞋu mɑꞋ, ḿbʉ̈ɔ́Ꞌ yúu zʉꞋ yí ɔ ŋ́kɑɑ zúꞋu pi.

²⁵ Ŋ kɑ pɔ́ ḿbɔ́k wú, ŋ́ɡʉ ńdẅɛꞋ mɛpɑk-ŋkɑ́p mú tsɛt tsɛ́tsɑ́Ꞌ, ɛ́ pʉ́ɔlɑɑnɛ! Ŋkɑ́p yu pʉ́ɔ.»

²⁶ Lɑ́, tɑ́t wɛ pʉ̈ɔt mbɔ̌ wɛ́ ŋɡɔ: «Ɔ ŋɡɑŋfɑꞋ kɛpɔŋ, ḿbɔ́ ndɔ́ŋ, ɔ kɑ pɔ́ ńjí ŋɡɔ n dɔ ŋ́kɑ́p yúu zʉꞋ yí mɔ ŋ́kɑɑ zúꞋu mɑꞋ, ḿbʉ̈ɔ́Ꞌ yúu zʉꞋ yí mɔ ŋ́kɑɑ zúꞋu pi.

²⁷ Ɔ kɑ pɔ́ ńjí pɔ́Ꞌɔ, kʉ̈ɔ́ ɡɛ, ɔ pɔɔ ɡʉ ŋ́ɡɑ́ ŋkɑ́p yɑɑ mbɔ̌ pɑtɑ́ŋ ŋkɑ́p pɑ́Ꞌ ŋ ɡʉ ŋ́ɡɛ ŋ́ɡɔ ńtɔ́ ńcẅɛ́ɛ, pii zɑ́pmɛ nǔu pɔ́ ɔɔ?

²⁸ Pʉʉ cẅɛ́ɛ ŋkɑ́p ɛ̂yɑ́ pɑk ŋkʉ mbɔ̌ wɛ́, ŋ́ɡɑ́ mbɔ̌ ŋu ẅí ɑ ɡẅɛɛnɛ ntsɑ́Ꞌ mbʉʉ,

²⁹ mbíꞋŋɡɔ ŋu lɑɑ ɛ́sɑ́Ꞌ tʉʉ lɑ́ ŋ́ɡẅɛɛ yúu, mbɔ pɛ́ ɡʉ ŋ́kẅiꞋ, ɑ ɡẅɛɛ ɛ́ zɑ́ɑ, lɑ́ ŋu kɛ́ mbɔɔ sɑ́Ꞌ tʉʉ pɔ́, mbɔ pɛ́ ɡʉ ɛ́fú mbɔ̌ wɛ́ cẅɛ́ɛ mbɑ mɔ́zʉꞋ yí ɑ ɡẅɛɛnɛ.

³⁰ Pʉʉ ɡẅɛɛ ŋɡɑŋfɑꞋ kɛ́ kuꞋ nǔu yɛcɔ́ nu wɑ́, ḿmɑꞋ wɛ́ píi tsɛt fɛ́m nzɛ́nzʉ́ʉ. A nɑ́ŋ zúꞋu ńdɑɑ, ḿbɔ́ ŋ́kwɛ́t mɛsɔŋ.»

Mɔ́ɔ-Ŋu ɡʉ ŋ́ɡɛ ńtɔ́ ŋ́ŋɑk pʉɔ ndǔ mbí

³¹ Mɔ́ɔ-Ŋu ɡʉ ḿbɔ́ tɛ ńtɔ́ tsɛt nɛɡúꞋ wɛ, tɛ pɔ́p pɛcʉ̈ɔ́Ꞌ pɛ́ pɔ́nɛ, ɑ nɑ́ŋ ndǔ kɔꞋ yɛ́, ḿbɔ́ fɔɔ ẅí yɛcɔ́ yúu kɑ́ tsɑ wɛ́ pɔ́.

³² Mɛlɑ́Ꞌ tsʉʉ cúꞋlɛ mbi yɛ́, ɑ tíitɛ pʉɔ, ɛ́fɑk pɑ́Ꞌ mbyɛ́p mbí fɑk mɛnjinjɔ nǔu mbí ntʉʉ lɑ́,

³³ ńtík mɛnjinjɔ nǔu ɡúŋ-pɔ́ yɛ́ yi tʉʉ, ńtík mbí ntʉʉ nǔu ɡúŋ-pɔ́ yɛ́ yi ŋkẅɛpmɛ.

³⁴ Fɔɔ ɡɔ́ɔ ŋ́kɛ́ ńcú mbɔ̌ pʉɔ pí pɔ́p nǔu ɡúŋ-pɔ́ yɛ́ yi tʉʉ ŋɡɔ: «Pʉʉ ẅínɛ tɑ̌ɑ mɔ kɑ níꞋnɛ mbɔ́tnɛ nǔu pʉʉ, pʉʉ tɔ́ ŋ́kúu tsɛt nɛfɔɔ ní Sɛ́ kɑ lɑ́Ꞌ ńniitɛ ńdɔk ńzẅíꞋlɛ wʉ́ʉ tɛ ɛ́fú nɛnɔŋ ŋɡɔŋ.

³⁵ MbíꞋŋɡɔ, njí kɑ pɔ́ ńzɑ́ŋ wɑ́ɑ, pʉʉ ɡɑ́ yúu ŋ kwɛ́t, ɡɑ́k yɑ́ɑ pɔ́ shí, pʉʉ ɡɑ́ ŋki n nɔ́, ŋ kɑ pɔ́ ŋɡʉʉ pʉʉ kúkŋɛ wɑ́ɑ.

³⁶ Mɔ ŋ́kɑɑ ndẅí mɑꞋ pʉʉ ɡɑ́ ndẅí, m mɑꞋ. Ŋ kɑ pɔ́ ŋ́ɡɔɔ, pʉʉ tɔ́ ńtsɑꞋ ɡɔɔ yɑ́ɑ. Ŋ kɑ pɔ́ ndɑ́tsɑ́ŋ, pʉʉ tɔ́ ńdíŋɛ wɑ́ɑ.»

³⁷ Pʉɔ ɛ̂pɑ́ pi pɔ́p kɑ ɡɛnɛ yúu mi Sɛ́ sɛ́ ŋ́kɔŋ zúꞋ pɔ́Ꞌɔ, ḿbíkŋɛ ŋɡɔ: «Tsɑpʉɔ, njí kɑ zɑ́ŋ wú shʉ́n, tɛ pɛk jʉ́ɔ wú ŋ́ɡɑ́ yúu ɔ kwɛ́t? Gɑ́k yú shí shʉ́n, tɛ pɛk jʉ́ɔ wú ŋ́ɡɑ́ ŋki, ɔ ńnɔ́?

³⁸ Ɔ kɑ pɔ́ ŋɡʉʉ pɑ́Ꞌɑ shʉ́n, tɛ pɛk kúkŋɛ wú? Ɔ ŋ́kɑɑ ndẅí shʉ́n mɑꞋ lɑ pɛk ɡɑ́ ndẅí ɔ mɑꞋ?

³⁹ Ɔ kɑ pɔ́ shʉ́n ḿbɔ́ ŋ́ɡɔɔ, ḿbɔ́ ndɑ́tsɑ́ŋ shʉ́n tɛ pɛk tɔ́ ńdíŋɛ wú?»

⁴⁰ Fɔɔ pʉ̈ɔt mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, mbɑ yɛ́tɛ́ ŋkɑ́ ɔɔ yi pʉʉ kɑ ɡɛnɛ mɔnɛ mɛnu, nǔu wɛ́t mɔ́ɔ mɔ́ŋu ẅí ɑ mɔ́ɔmɑ́ mɔ lɑ́, mbɔ pʉʉ kɑ pɔ́ ŋ́ɡɛ pɔ nǔu mɔ.»

⁴¹ Ŋ́ɡɔ́ɔ ŋ́kɛ́ ḿbɛn ńcú mbɔ̌ pʉɔ pí pɔ́p nǔu ɡúŋ-pɔ́ yɛ́ yi ŋkẅɛpmɛ, ɛ́ yɛ́tɛ́: «Pʉʉ ɡɑŋndɔɔ, pʉʉ fú nɛjɔ́ŋ mɔ ŋ́ɡʉ tɛ ŋɡɑ sɑk, ŋ́kúu tsɛt múk ẅi ɛ́ kɛ́ lɑ́Ꞌ ḿbɛ́ pɔ́, ẅi pɛ́ kɑ niitɛ́nɛ ntɛ́ Sɑ́ttɑ pɔ́p pɛcʉ̈ɔ́Ꞌ pɛ́.

⁴² MbíꞋŋɡɔ njí kɑ zɑ́ŋ wɑ́ɑ, pʉʉ pɔɔ ɡɑ́ yúu ŋ kwɛ́t pɔ́, ɡɑ́k yɑ́ɑ shí, pʉʉ pɔɔ ɡɑ́ ŋki n nɔ́ pɔ́.

⁴³ Ŋ kɑ pɔ́ ŋɡʉʉ, pʉʉ pɔɔ wɑ́ɑ kúkŋɛ. Mɔ ŋ́kɑɑ ndẅí mɑꞋ, pʉʉ pɔɔ ɡɑ́ ndẅí m mɑꞋ pɔ́. Ŋ kɑ pɔ́ ŋ́ɡɔɔ, ḿbɛn ŋ́ɡɛ ḿbɔ́ ndɑ́tsɑ́ŋ, pʉʉ pɔɔ wɑ́ɑ líŋɛ.»

⁴⁴ Pɔ́p ɡúu pɛn ńcú ŋɡɔ: «Tsɑpʉɔ, pɛk kɑ jʉ́ɔ wú shʉ́n, njí pɔ́ zɑ́ŋ wú, ńjʉ́ɔ wú shʉ́n, ɡɑ́k yú pɔ́ shí, ńjʉ́ɔ wú shʉ́n, ɔ pɔ́ ŋɡʉʉ, ńjʉ́ɔ wú shʉ́n ɔ pɔ́ kɛ́ mɑꞋ ndẅí, ńjʉ́ɔ wú shʉ́n, ɔ pɔ́ ŋ́ɡɔɔ, ńzúꞋ shʉ́n ɔ pɔ́ ndɑ́tsɑ́ŋ, pɛk pɔɔ wú cẅɛ́lɛ́?»

⁴⁵ Fɔɔ tsɔ́Ꞌ mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, mbɑ yɛ́tɛ́ ŋkɑ́ lɑ́ yi pʉʉ ŋ́kɑɑ ɡɛ mɔnɛ mɛnu nǔu wɛ́t mɔ́ɔ mɔ́ŋu ẅí ɑ mɔ́ɔmɑ́ mɔ pɔ́, mbɔ pʉʉ ŋ́kɑɑ pɛn ŋ́ɡɛ yúu nǔu mɔ pɔ́.»

⁴⁶ Pɔnɛ pʉɔ ɡɔ́ɔ ŋ́kɛ́ ŋ́ɡʉ nɛ́ zʉꞋ yí pɔ́p ɡʉ ńdɑ́Ꞌ ńtswɛ́ zúꞋu, ńjʉ́ɔ pɔ ŋɡʉ̈ɔ́Ꞌ kɛ́ mɛ. Pʉɔ pí pɔ́p kɑ ɡɛnɛ yúu mi Sɛ́ sɛ́ ŋ́kɔŋ, pɔ́p kúu tsɛt luk kɛ́ mɛ.