Mɑtʉ̈ɔ 17 - Kɑɑ Fí

Yɛ́su sɛ́ ńnyɛt nɛŋwɑ́ŋɛ wɛ mbɔ̌ pɛcɔ́ ɡɑŋku pɛ́

¹ Ɛ́ lɛɛ lɛ́Ꞌ pɛ́nɛ́ntúkú, Yɛ́su fɑk Pyɛ̂, ŋ́ɡɛ Jɑ̂k, nɛ́ Jɑ̂ŋ ɑ pɔ́ mɔ́ɔmɑ́ pɛ́ Jɑ̂k, ńdɔk wɔ́p ŋ́ɡʉ ŋ́kɔ́Ꞌ ndǔ nɛcɔ́ mɑ́mɑ́ nɛŋkɔ́Ꞌ. Pɔ́p pɛ́pɔ́p pɔ́ zúꞋu zɛnɛ pɔ́p.

² Pɔ́p jʉ́ɔ lii-Yɛ́su shɔtnɛ mbi pɔ́p, shʉ́ wɛ́ ŋwɑŋɛ pɑ́Ꞌ mɔ́nɛm lɑ́. Mɛndẅí mɛ́ fúk tɛ ŋ́kyɛꞋ zʉꞋ.

³ Pɔ́p jʉ́ɔ, mbɔ Mɔ̌sɛ̂ɛ pɔ́p Ɛlíyɑ vukŋɛ vukŋɛnɛ ńcẅɛt, pɔ́p pɛ́ Yɛ́su pɔ́ ɛ́sẅíŋɛ.

⁴ Pyɛ̂ ɡɔ́ɔ ḿvukŋɛ vukŋɛnɛ, ńcú mbɔ̌ Yɛ́su ŋɡɔ: «Tsɑpʉɔ, ɛ́ pɔŋ pɑ́Ꞌ pɛkŋɛ zɑꞋnɛ lɑɑ. Pɛ́m n nʉk mɛtɑp mɛ́ntɑ́t, tɑ́Ꞌ pɔ́ yú, tɑ́Ꞌ pɔ́ yɛ́ Mɔ̌sɛ̂ɛ, yɛcɔ́ pɔ́ yɛ́ Ɛlíyɑ.»

⁵ A pɛ́t ńcú cúnɛ, yɛcɔ́ lɑ́ɑ, yi ɛ́ ŋwɑŋɛ ŋwɑŋɛ́nɛ ńcúŋ ŋ́kẅíipɛ wɔ́p, ŋɡi-ŋu fú tsɛtú ńcú ŋɡɔ: «Yɔ Mɔ́ɔ wɑɑ, ŋ kɔŋ wɛ́ tɛꞋ, ɑ yɑ́ɑ tsɑ́ɑtɛ, pʉʉ zúꞋ ntsu wɛ́.»

⁶ Gɑŋku-Yɛ́su ɡɔ́ɔ ńzúꞋ yɔ nu, ḿvu sɛ́, ɛ́sɔp shʉ́ wɔ́p sɛ́, ḿbɔ́ ḿbɔ́k tɛꞋ.

⁷ Yɛ́su tɔ́, ńzɑ́p pɔ́ nǔu pɔ́p, ńcú ŋɡɔ: «Pʉʉ lɔ sɛ́, kɔɔ pʉʉ pɛn ḿbɔ́k.»

⁸ Pɔ́p pʉꞋ tú yɔ́p ḿbɑ́tɛ, ńtsʉ́Ꞌ ńjʉ́ɔ pɔ Yɛ́su zɛnɛjʉ́.

⁹ Pɔ́p pɛ́pɔ́p ɡɛ ḿbɔ́ ɛ́fú ndǔ nɛŋkɔ́Ꞌ ńcúŋ, ɑ kwɛn wɔ́p ŋɡɔ, kɔɔ pɔ́p kẅíi tɛ ŋu ndɛꞋ fɛ́ꞌnɛ ńjí yúu mi pɔ́p jʉ́ɔnɛ, tɛ ńdɑ́Ꞌ ŋ́kúu ŋkɑ́ yi Mɔ́ɔ-Ŋu ńzẅíimɛ nǔu nɛvú.

¹⁰ Pɔ́p zúꞋ pɔ́Ꞌɔ, ḿbíkŋɛ Yɛ́su ŋɡɔ: «Tɛ mɛlɑ́Ꞌ kʉ̈ɔ́ pɑkyɛ́ꞌtɛ nɛpʉ́ʉ-Mɔ̌sɛ̂ɛ cú ŋɡɔ Ɛlíyɑ ɡʉ ńdɑ́Ꞌ ḿbiitɛ ńtɔ́?»

¹¹ Yɛ́su pʉ̈ɔt ŋɡɔ: «Ɛ́ nɛ́nẅín, Ŋɡɛ́mndʉ̈ɔ́Ꞌ-Sɛ́ Ɛlíyɑ ḿbɔ́ ŋ́ɡʉ ńtɔ́, nɛzɑ́p mbɑ kʉ̈ɔ́ lɑ́ nǔu yɛ́ zʉꞋ.

¹² Ɛ sẅíi wʉ́ʉ ŋɡɔ Ɛlíyɑ kɑ tɔ́ mɔ́ lɑ́, pʉɔ pɔɔ wɛ́ pɛ́m, ńnyɛt wɛ́ nɛ́ ŋɡʉ̈ɔ́Ꞌ pɑ́Ꞌ pɔ́p kɔŋnɛ, pɔ́p ɡʉ ŋ́ɡɛ ḿbɛn ńnyɛt Mɔ́ɔ-Ŋu nɛ́ ŋɡʉ̈ɔ́Ꞌ pɔ pɔ́Ꞌɔ.»

¹³ Yɛ́su cú pɔ́Ꞌɔ, ɡɑŋku pɛ́ ɡɔ́ɔ ŋ́kɛ́ ńzúꞋ ŋɡɔ ɑ lɑ́Ꞌ pɑꞋɑ pɔ Jɑ̂ŋ Mbɑptíshi.

Yɛ́su ɡɛ wɛcɔ́ mɔ́ɔ ẅi ɑ mvuɡwɑ́Ꞌ fíitɛ

¹⁴ Pɔ́p ɡʉ tɛ ŋ́kúu zʉꞋ yí lɑ́Ꞌ kɑ pɔ́nɛ zúꞋu, wɛcɔ́ ŋu tɔ́ ŋ́kẅíꞋlɛ mbi Yɛ́su,

¹⁵ ńcú mbɔ̌ wɛ́ ŋɡɔ: «Ndɛ, sɛ́sẅíi, tsɑ́ɑ mɛjʉ́ŋ mɔ́ɔ wɑɑ wɔ, ɑ mvuɡwɑ́Ꞌ. A jʉ́ɔ ŋɡʉ̈ɔ́Ꞌ tɛꞋ, ɑ zɑ́ɑ ḿvu tsɛt múk, tɛ mbɑ tsɛt ŋki.

¹⁶ Mɔ m̄bɔ́ ńdɔk wɛ́ ńtɔ́ mbi ɡɑŋku pú, lɑ́ pɔ́p pɔɔ kuꞋ nɛɡɛ ɑ fíitɛ pɔ́.»

¹⁷ Yɛ́su zúꞋ pɔ́Ꞌɔ, ŋɡɔ: «Yɛ̌ɛ! Pʉʉ pʉɔ-ŋɡuꞋ yɔ, pʉʉ pɛkɛ́tú. Pʉʉ kɑ́ zɑ́p tʉ́m nǔu Sɛ́ pɔ́, ɛ́ pɑ́Ꞌɑ pɛkŋɛ ńdɑ́Ꞌ ńnɑ́ŋ tɛ ŋ́kúu pɔ shʉ́n? Ŋ ɡʉ ńdɑ́Ꞌ ɛ́sʉk nǔu mɛnu mʉ́ʉ tɛ ŋ́kúu pɔ shʉ́n? Pʉʉ lɔk mɔ́ɔ ɛ̂wɑ́ ńtɔ́ zɑꞋnɛ ŋ́ɡɑ́ mbɔ̌ mɔ.»

¹⁸ Pɔ́p lɔk wɛ́ ńtɔ́, Yɛ́su cʉ́ɔk zẅikŋɛ kɛpɔŋ ɛ̂yɑ́, ɑ cẅɛt nǔu mɔ́ɔ ɛ̂wɑ́, ɑ ɡɔ́ɔ ɛ́fíitɛ pɔ ŋkɑ́ yîyɑ́.

¹⁹ Pɔ́p ɡɑŋku pɛ́ ɡɛ ḿbɔ́ zɛnɛ pɔ́p, pɔ́p píkŋɛ wɛ́ ŋɡɔ: «Kʉ̈ɔ́ lɑ́Ꞌnɛ ŋ́ɡɛ ŋɡɔ, pɛk pɔɔ kuꞋ nɛzuŋ zẅikŋɛ kɛpɔŋ ɛ̂yɑ́ pɔ́ ɔɔ?»

²⁰ A pʉ̈ɔt mbɔ̌ pɔ́p ŋɡɔ: «Ɛ́ pɔ́Ꞌɔ, mbíꞋŋɡɔ pʉʉ zɑ́p tʉ́m nǔu Sɛ́ pɔ mɔ́zʉꞋ ŋɡɔ pítɛ. Pʉʉ lɑɑ sǐi ńzɑ́p tʉ́m yʉ́ʉ nǔu Sɛ́ ɛ́ kʉ̈ɔ́k pɔ mɔ́zʉꞋ pɑ́Ꞌ nɛsɑɑ-sɛ́súk, mbɔ ɛ́ lɑɑ ḿbɔ́ pʉʉ cú mbɔ̌ nɛŋkɔ́Ꞌ nɔ ŋɡɔ: “Tsɔ́Ꞌnɛ ŋ́ɡʉ ńtʉ́ʉ zíꞋnɛ, ɛ́ ɡʉ ńtʉ́ʉ zúꞋu. Mbɔ ɛ́ lɑɑ ḿbɔ́ yɛcɔ́ nu pɔɔ lɑ́Ꞌ ńtsɑ wʉ́ʉ pɔ́.”» [

²¹ Ɛ́ ɡʉ nǔu yîyɑ́ ntɛ́ zẅikŋɛ kɛpɔŋ, mbɔ ŋu pɔɔ zuŋ yîyɑ́ ntɛ́ zẅikŋɛ kɛpɔŋ tɛ ɑ cẅɛt kɛ́ júk nji ńcɛꞋlɛ Sɛ́ pɔ́.]

Yɛ́su pɛn ḿbɔ́ ḿbʉ́ ŋɡɔ ɑ ɡʉ ŋ́ɡɛ mpfú ḿbɛn ńzẅíimɛ

²² Ɛ́ pɔ́ yɛcɔ́ lɛ́Ꞌ, ɡɑŋku-Yɛ́su tɛmtɛ ńcúꞋlɛ Ŋɡɑlilɛɛ, Yɛ́su cú mbɔ̌ pɔ́p ŋɡɔ: «Pɛ́ ɡʉ ɛ́fɛn Mɔ́ɔ-Ŋu mbɔ̌ pʉɔmɛsɔŋ.

²³ Pɔ́p ɡɛ ɑ pfú, ɛ́ ɡɛ ḿbɔ́ mbɑ́ɑtɛ lɛ́Ꞌ pɛtɑ́t ɑ zẅíimɛ nǔu nɛvú.» Gɑŋku pɛ́ zúꞋ, ńtɛmtɛ ḿmʉk tɛꞋ.

NɛzẅíꞋ ntsu-Yɛ́su nǔu ntsup-zʉꞋ-nɔŋpɔꞋ

²⁴ Yɛ́su pɔ́p ɡɑŋku pɛ́ ɡʉ tɛ ŋ́kúu Kɑpɛɛnɑwûm, pɑcẅɛ́ɛ ntsup-zʉꞋ-nɔŋpɔꞋ tɔ́ ḿbíkŋɛ Pyɛ̂ ŋɡɔ: «Tɑ̌ɑ wʉʉ ŋ́ɡɑ́ yɛ́ ntsup-zʉꞋ-nɔŋpɔꞋ pɔ́ kɛ?»

²⁵ Pyɛ̂ tsɔ́Ꞌ ŋɡɔ: A ɡɑ́ ɡɑ́nɛ, ńcú pɔ́Ꞌɔ, ŋ́kúu ndɑ́, ḿbɛ́t pɔ kɛ́ ŋɑ́Ꞌ ntsu wɛ́, Yɛ́su cú mbɔ̌ wɛ́ ŋɡɔ: «Símɔ, ɔ kwɑŋɛ yú ŋɡɔ kʉ̈ɔ́. Ɛ́ ndǔ mbí yɔ pɛ́Ꞌɛ, pɛ́ wɔ̌ mɑꞋnɛ ntsup-ntʉ̈ɔꞋ pɔ́p mɛcɔ́ mɛntsup, mbɔ̌ pɛfɔɔ? Pɑlɑ́Ꞌ pɛ́ kɛ pɑlɑ́Ꞌ-ntʉɔꞋ?»

²⁶ Pyɛ̂ pʉ̈ɔt ŋɡɔ: «Pʉɔ-lɑ́Ꞌ-ntʉɔꞋ ɡɑ́nɛ. Yɛ́su cú mbɔ̌ wɛ́ ŋɡɔ: Pʉɔ-lɑ́Ꞌ kɑ́ lɔk ŋ́ɡẅɛɛ nɛɡɑ́ yɛcɔ́ yúu pɔ́, ɛ́ pɔ́Ꞌɔ pɔ́ kɛ?»

²⁷ Lɑ́ kɔɔ pûu ɡɛ nu pʉ́k pɑcẅɛ́ɛ ntsup. Gʉ ŋki ḿmɑꞋ mbɑꞋ. Ɔ ɡʉ ŋ́ɡẅɛɛ nduŋmbi mbɑŋ shú, ŋíɛꞋ ntsu wɛ́, ńjʉ́ɔ pɑk-ŋkɑ́p, ńcẅɛɛtɛ ńdɔk ŋ́ɡʉ ḿmɑꞋ yúu ntsup.