Mɑ́lɛ́kúshi 8 - Kɑɑ FíYɛ́su sɛ́ ńzẅík pʉɔ ntsɑꞋ yɛ́nɛ́kwɑ ( Mɑtʉ̈ɔ 15.32-39 ) 1 Ɛ́ pɛn ḿbɔ́ pɔ nǔu mɛlɛ́Ꞌ ɛ̂mɑ́, pʉɔ tɔ́, ńzɑ́ɑ tɛꞋ, ḿbɛn ńcúꞋlɛ nɛjɔ́ŋ Yɛ́su. PɑꞋ pɔ́p kɑ pɛn ŋ́kɛ́ mbɔɔ yúu kwɛ́tnɛ ɡẅɛɛ lɑ́, Yɛ́su fúŋ ɡɑŋku pɛ́, ńcú mbɔ̌ pɔ́p ŋɡɔ: 2 «Mɛjʉ́ŋ lɑ́Ꞌ yɔ kɔ́ wɑ́ɑ tɛꞋ, mbíꞌŋɡɔ ɛ́ ŋkɔ̂ɔnɛ ḿbɔ́ lɛ́Ꞌ pɛtɑ́t pɑꞋ pɔ́p kɛ́ ḿbɔ́ pɔ nɛjɔ́ŋ mɔ, ŋ́kɛ́ ḿbɔɔ ḿbɛ́t ŋ́ɡẅɛɛ yɛcɔ́ yúu mi ɛ́ lɑɑ ḿbɔ́ pɔ́p kwɛ́t pɔ́, 3 ḿbɔ́ yi n dɑɑ ńnɑ́ wɔ́p njí, pɔ́p pɛn nzʉʉ nɛ́ mɛnjɛ́Ꞌ mɔ́p, mbɔ pɔ́p ŋ́ɡʉ ŋ́ɡẅɛɛ mɛtʉʉ nɛlɔk ŋ́ɡʉ tɛ ŋ́kúu pɔ́. Pɛcɔ́ pʉɔ tsɛtsɛt pɔ́p wɔ ɛ́fú tɛ ŋɡɑ sɛsɑ.» 4 Gɑŋku pɛ́ tsɔ́Ꞌ mbɔ̌ wɛ́ ŋɡɔ: «Ɛ́ lɑɑ ḿbɔ́ pɛ́ lɔk yúu pɛjʉ́ ɡɔ́ kɔ̂ŋtɛt zɑ́Ꞌɑ, tɛ pɔ́p kwɛ́t tɛ ńzwɛ́t?» 5 Yɛ́su píkŋɛ wɔ́p ŋɡɔ: «Pʉʉ zɛɛ ŋ́ɡẅɛɛ mbɛlɛ̂ɛt ntɑ́Ꞌ yɛ́sʉ́Ꞌʉ́?» Pɔ́p pʉ̈ɔt ŋɡɔ pɔ́p ɡẅɛɛ mbɛlɛ̂ɛt ntɑ́Ꞌ sɑɑmbɑ́. 6 Yɛ́su cú ŋɡɔ lɑ́Ꞌ nɑ́ŋ sɛ́, ɑ cẅɛ́ɛ mbɛlɛ̂ɛt ɛ̂yɑ́ ntɑ́Ꞌ sɑɑmbɑ́, ŋ́ɡɑ́ pɑꞋlɑ́ mbɔ̌ Sɛ́, ḿbʉ̈ɔ́Ꞌtɛ ŋ́ɡɑ́ mbɔ̌ ɡɑŋku pɛ́, pɔ́p ŋ́ɡɑptɛ mbɔ̌ lɑ́Ꞌ. 7 Ɛ́ ɡɔ́ ḿbɔ́ pɔ́p pɛn ŋ́ɡẅɛɛ mɛcɔ́ mbɔ pɔ́ɔ-mɛshú, lɑ́ ɛ́ pɔɔ zɑ́ɑ. Yɛ́su pɛn cẅɛ́ɛ ŋ́ɡɑ́ pɑꞋlɑ́ mbɔ̌ Sɛ́ nǔu, ŋ́ɡɑ́ ŋɡɔ pɔ́p ɡɑp mbɔ̌ lɑ́Ꞌ. 8 LɑꞋ kwɛ́t yúu tɛ ńzwɛ́t. Pɛ́ pɛn ńdɑk mɛkɛm mi ɛ́ vuꞋnɛ, ɛ́ lúu pɛtúŋ sɑɑmbɑ́. 9 LɑꞋ yi ɛ́ pɛnnɛ ŋ́kwɛ́t pɔ́ pʉɔmɛsɔŋ yúu ntsɑ́Ꞌ yɛ́nɛ́kwɑ. Yɛ́su ɡɛ pɔ́Ꞌɔ ńcú pɔ́p ɡʉ. 10 A ɡɔ́ɔ ŋ́kúu tsɛt kɑnúꞋ, pɔ́p ɡɑŋku pɛ́ ɡʉ nɛ́ pɑk-ŋɡɔŋ-Ndɑlmɑnútɑ. Yɛ́su lʉꞋ nɛɡɛ ŋkʉꞋnɛ nu ( Mɑtʉ̈ɔ 16.1-4 ) 11 Pʉɔ tsɛt nɔɔ-pɑfɑlísɑy tɔ́ nɛjɔ́ŋ yɛ́ ḿbɔ́ ńdɔɔ nu nǔu yɛ́, ńtsʉ́ʉnɛ wɛ́ ŋɡɔ ɑ ɡɛ ŋkʉꞋnɛ nu ŋɡɔ ɑ nyɛt ŋɡɔ Sɛ́ kɑ túunɛ wɛ́, ŋɡɔ ɑ nyɛt wɔ́p nɛ́ ntɛ́ yi ɛ́ nyɛtnɛ ŋɡɔ Sɛ́ túunɛ wɛ́. 12 Yɛ́su zúꞋ tɛ ńjẅi, ḿbɛn ńcú mbɔ̌ pɔ́p ŋɡɔ: «pʉɔ pi pɔ́p tsɛt njí ŋkɔ̂ɔnɛ sɛ́ ḿbíkŋɛ ŋɡɔ ŋ ɡɛ ŋkʉꞋnɛ nu, ńdɔɔ nɛɡɛ pɑꞋɑ? Lɑ́, pʉʉ tsʉꞋ ɛ sẅíi wʉ́ʉ kwɑꞋ nu nɛ́nẅín, pɛ́ kɑ́ pɔ́ ŋ́ɡʉ ńnyɛt wʉ́ʉ nɛ́ yɛcɔ́ yúu pɔ́.» 13 Yɛ́su cú pɔ́Ꞌɔ, ŋ́ɡɔ́ɔ ńnɑ́ pʉɔ-fɑlísɑy zúꞋu, ŋ́kúu tsɛt kɑnúꞋ, ńtúu ŋki ŋ́ɡʉ nɛ́ yɛcɔ́ njʉ́n. Yɛ́su cú zɑ́Ꞌɑ ŋɡɔ pʉʉ pɑ́ɑ mɑt pɑŋkɔŋ-mík ( Mɑtʉ̈ɔ 16.5-12 ) 14 Yɛ́su pɔ́p ɡɑŋku pɛ́ kɑ ɡɔ́ ńtúu ŋki ŋ́ɡʉ nɛ́ yɛcɔ́ njʉ́n, pɔ́p pɔ́ tsɛt kɑnúꞋ, ŋ́ɡẅɛɛ pɔ ndɑꞋ tɑꞋ mbɛlɛ̂ɛt wɛ́mɔ́Ꞌ, mbɔ pɔ́p lɑ́Ꞌ ńdikŋɛ kɛ́ pɛ́ɛ yɛcɔ́ tɛ ɛ́ zɑ́ɑ. 15 Pɔ́p pɛpɔ́p pɔ́ ŋ́ɡʉ pɔ́Ꞌɔ, Yɛ́su cú mbɔ̌ pɔ́p ŋɡɔ: «Pʉʉ lɑk tú yʉ́ʉ, ḿbɑ́ɑ fɛntɛ-pɑfɑlísɑy mbɑ yɛ fɔɔ Ɛlɔ̂dɛ.» 16 Pɔ́p zúꞋ pɑꞋ ɑ kẅíinɛ fɛntɛ pɔ́Ꞌɔ, ŋ́ɡɔ́ɔ ŋ́kɛ́ ńzɛ nɛcú tsɛtsɛt pɔ́p ŋɡɔ: «Lɑ́ ɑ kɑ́ cú pɔ pɑꞋ pɛkŋɛ kɑ́ ɡẅɛɛ mbɛlɛ̂ɛt pɔ́ ɔɔ?» 17 Yɛ́su jí pɑꞋ pɔ́p sɛ́ ŋ́kwɑŋɛ pɔ́Ꞌɔ, ḿbíkŋɛ wɔ́p ŋɡɔ: «Pʉʉ kɛ ŋ́kwɑŋɛ nu pɔ nǔu mbɛlɛ̂ɛt yí pʉʉ kɑ́ ɡẅɛɛ mɛlɑ́Ꞌ kʉ̈ɔ́? Pʉʉ lɔk ńtɛmtɛ ḿbɛ́t pɔ kɛ́ jí nu pɔ́ ɔɔ? Pʉʉ fɑ́ɑ ḿbɛ́t pɔ kɛ́ zúꞋ tɛ ńzúꞋ kɛ kʉ̈ɔ́? Jínu yúu ɡɛ pɑꞋɑ ńjɔꞋnɛ pɑꞋɑ? 18 Pʉʉ ɡẅɛɛ mík, ḿbɛn ŋ́kɛ́ mbɔɔ jí nɛlɔk ńjʉ́ɔ zʉꞋ pɔ́ kɛkʉ̈ɔ́? Ŋ́ɡẅɛɛ mɛtúutɛ́ ḿbɛn mbɔɔ nu zúꞋ pɔ́ kɛkʉ̈ɔ́? Ńjí ŋɡɔ pʉʉ kɑ́ kẅíitɛ nu pʉ́ɔ? 19 Mɔ, ŋ kɑ pʉ̈ɔꞋtɛ mbɛlɛ̂ɛt yîyɑ́ ntɑ́Ꞌ yɛ́tɑɑ pʉʉ lɔk ńzẅík pʉɔ ntsɑꞋ yɛ́tɑ́ɑ, ḿbɛn ńdɑklɛ mɛkɛm mɛ́ ɛ́ lúu pɛtúŋ pɛsʉꞋʉ pʉʉ tíi?» Pɔ́p pʉ̈ɔt ŋɡɔ: «PfuꞋ kɑ lúu pɛtúŋ ntsɔ̌ppɑ́ nɛ́ nɛɡɛ́m.» 20 Yɛ́su pɛn ŋɡɔ: «M bɛn ḿbʉ̈ɔ́Ꞌtɛ yɛcɔ́ ntɑ́Ꞌ sɑɑmbɑ́, pɛ́ lɔk ńzẅík pʉɔ ntsɑꞋ yɛ́nɛ́kwɑ, pfuꞋ lúu pɛtúŋ pɛsʉꞋʉ?» Pɔ́p cú ŋɡɔ: «Ɛ́ kɑ lúu pɛtúŋ sɑɑmbɑ́.» 21 A píkŋɛ wɔ́p ŋɡɔ: «Tɛ pʉʉ pɛn ḿbɛ́t pɔ kɛ́ zúꞋ?» Yɛ́su ɡɛ fʉmík jʉ́ɔ zʉꞋ 22 Yɛ́su pɔ́p ɡɑŋku pɛ́ kɑ kúu Mbɛtsɑyídɑ, pɛ́ lɔk wɛcɔ́ fʉmík ńtɔ́, ḿbuꞋ mbɔ́ mbɔ̌ wɛ́ ŋɡɔ ɑ zɑ́p mbɔ́ mɛ́ nǔu wɛ́ ɑ fíitɛ. 23 A ɡẅɛɛ pɔ́-fʉmík, ńdɔk wɛ́ ɛ́fú tsɛt lɑ́Ꞌ ńcẅɛt, ńdɔk mɛ́tɛ́ ńtsɛp mík mɛ́, ńzɑ́p mbɔ́ mɛ́ nǔu wɛ́, ḿbíkŋɛ wɛ́ ŋɡɔ: «Tɛ ɔ sɛ́ ńjʉ́ɔ yúu?» 24 A líŋɛ zʉꞋ, ḿbɔ́ ńcú ŋɡɔ: «Mɔ sɛ́ ńjʉ́ɔ pʉɔmɛsɔŋ, pɔ́p sɛ́ ńnɛn, lɑ́ ŋ́kɛ́ ḿbɔ́ pɔ pɑꞋ mɛtʉ́ lɑ́.» 25 Yɛ́su pɛn ńzɑ́p mbɔ́ nǔu mík-ŋu ɛ̂wɑ́, ɑ tsuŋ ńdíŋɛ zʉꞋ, mbɔ ɑ fíitɛ, tɛ ḿbɔ́ ńcʉ nút ńjʉ́ɔ mbɑ kʉ̈ɔ́ lɑ́. 26 Yɛ́su cú ŋɡɔ ɑ pɛn nɛ́ njɛ́Ꞌ yɛ́, lɑ́, kɔɔ ɑ kɛ́ ńdɛɛ wɛ tsɛt lɑ́Ꞌ ɛ̂yɑ́. Pyɛ̂ jí ŋɡɔ Yɛ́su Nzɑ́Ꞌŋkʉ ( Mɑtʉ̈ɔ 16.13-23 ; Lúkɑ́shi 9.18-22 ) 27 Yɛ́su fú zúꞋu ńcẅɛt, pɔ́p ɡɑŋku pɛ́ pɔ́ ŋ́ɡʉ nɛ́ mɛlɑ́Ꞌ mi ɛ́ shʉ́ tʉ́sɔŋ-Sɛ́zɑlɛ̂ wɛ Filîp, pɔ́p pɛ́pɔ́p pɔ́ ŋ́ɡʉ, ɑ píkŋɛ wɔ́p ŋɡɔ: «Pʉɔ pɑꞋɑ ḿbɔ́ ńcú ŋɡɔ mɔ wɔ̌?» 28 Pɔ́p pʉ̈ɔt ŋɡɔ: «Pɛcɔ́ pʉɔ sɛ́ ńcú ŋɡɔ ɔ Jɑ̂ŋ Mbɑptíshi, Pɛcɔ́ pɔ́ ńcú ŋɡɔ ɔ Ɛlíyɑ, pɛcɔ́ pʉɔ pɔ́ ńcú yɔ́p ŋɡɔ ɔ wɛcɔ́ tɑꞋ nǔu pɛŋɡɛ́mndʉ̈ɔꞋ-Sɛ́ pɛ́ ŋkɑ́mbi ɑ zẅíimɛ́nɛ.» 29 A píkŋɛ wɔ́p ŋɡɔ: «KwɑꞋ pʉʉ yʉ́ʉ cú ŋɡɔ mɔ wɔ̌?» Pyɛ̂ tsɔ́Ꞌ ŋɡɔ: «Ɔ Nzɑ́Ꞌŋkʉ ẅí Sɛ́ kɑ kɑꞋnɛ.» 30 Yɛ́su tɔꞋ wɔ́p tɛꞋ, ńcú ŋɡɔ kɔɔ pɔ́p ŋ́kẅíi tɛ ŋu ndɛꞋ jí ŋu ẅí ɑ jʉ́. Yɛ́su sɛ́ ńcú ntɛ́ nɛvú yi ɑ ɡʉ ŋ́ɡɛ mpfú 31 Ɛ́fú nǔu, ńzɛ nɛzíꞋ wɔ́p nɛ́ yúu, ńcú ŋɡɔ: «Ɛ́ sɛ́ ḿbíkŋɛ ŋɡɔ Mɔ́ɔ-Ŋu jʉ́ɔ ŋɡʉ̈ɔ́Ꞌ tɛꞋ, pɛkɛ́m-lɑ́Ꞌ mɛꞋ wɛ́, mbɑ pɛtɑ́tndɑ́-pɑnɔŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ, ɛ́ ɡɛ pɔ́Ꞌɔ, pɛ́ jẅí wɛ́. A pɛn ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛtɑ́t.» 32 Yɛ́su lɛɛlɛɛnɛ ńcú mɔnɛ mɛnu pɑꞋɑ, Pyɛ̂ ɡɔ́ɔ ńnɑꞋ ɛ́fúŋ wɛ́ ntsɛm, ńzɛ nɛkɑkŋɛ wɛ́. 33 Lɑ́ Yɛ́su shɔtnɛ, ńdíŋɛ ɡɑŋku pɛ́, ńcʉ̈ɔ́k Pyɛ̂, ńcú nɛ́ jʉ́ ŋɡɔ: «Fú nzʉʉ mɔ ńtsʉ́ʉtɛ mbɑ̌ɑ Sɑ́ttɑ, ɔ kɑ́ kwɑŋɛ pɑꞋɑ, ɛ́ pɔ́ pɑꞋ Sɛ́ sɛ́ ŋ́kwɑŋɛ pɔ́, yɑ́ pɔ́ pɔ kwɑŋɛ-pʉɔmɛsɔŋ.» 34 Ŋ́ɡɔ́ɔ ŋ́kɛ́ ɛ́fúŋ lɑ́Ꞌ mbɑ ɡɑŋku pɛ́, ńcú mbɔ̌ pɔ́p ŋɡɔ: «Ŋu lɑɑ ŋ́ɡʉ ḿbɔ́ wɑɑ ŋu, ɑ ɡwɑ́k túmbʉʉ yɛ́, ńtíi yɛ́ tʉ́ mbɑ́ŋtɛ pɑ́ŋtɛ́nɛ ńdɔk ḿbɛ́m nɛpfú, lɑ́ ńcʉ́ɔ nzʉʉ mɔ.» 35 Ŋu ẅi ɑ ɡʉ zɛɛ ńdɔɔ nɛpɑ́ɑ yɛ́ luk pɔ́nɛ ŋu ẅi ɑ ɡʉ ḿbɛ́ yɛ́ luk ɛ̂yɑ́. Lɑ́ ŋu ẅí ɑ ḿbɛ́ yɛ́ luk mɛlɑ́Ꞌ wɑ́ɑ mbɑ mɛlɑ́Ꞌ Ŋkʉʉ Sʉ́Ꞌnɛ yi ɑ ɡʉ nɛcẅi, mbɔ ɑ ɡʉ ńdɑ́Ꞌ ḿbɔ́ ɡú. 36 Pɛ́ lɑɑ ńzɛɛ ńtíi píimbí yɔ tsʉʉ ŋ́ɡɑ́ mbɔ̌ ŋu, lɑ́ ɛ́ pɔɔ pɔ́ yi ɛ́ ɡʉ ńdɔk pɔ tú yɛ́ pɔ́, mbɔ ɛ́ ɡʉ cẅɛ́lɛ́ wɛ́ nǔu kʉ̈ɔ́? 37 Ɛ́ lɑɑ ḿbɔ́ ŋu lɔk kwɑꞋ kʉ̈ɔ́ ńdɔk ŋ́kúp tú yɛ́? 38 Ŋu lɑɑ ŋ́kɔ́ sʉ́ʉ nɛpɔ́ wɑɑ ŋu, mbɑ nɛsẅíi nu yɑ́ɑ mbɔ̌ pʉɔ pɔnɛ pí pɔ́p ndǔ mbí ŋkɔ̂ɔnɛ, ḿbɔ́ njẅɛt-pʉɔ kɛpɔŋ lɑɑ, ḿbɔ́ pɑkɛ́jí Sɛ́, mbɔ Mɔ́ɔ-Ŋu ɡʉ ńdɑ́Ꞌ ḿbɛn ŋ́kɔ́ yɛ́ sʉ́ʉ nɛlɔk wɛ́ ŋ́ɡɛ wɛ ŋu, ŋkɑ́ yi ɑ ɡʉ ńdɑ́Ꞌ ḿbɛn nzʉʉ tsɛt nɛɡúꞋ-Tɑ́t wɛ, pɔ́p pɛcʉ̈ɔ́Ꞌ-Sɛ́ pɔ́nɛ. |
CABTAL, 2017