Mɑ́lɛ́kúshi 5 - Kɑɑ FíYɛ́su ɡɛ ŋu ẅí mɛzẅikŋɛ kɛpɔŋ kɑ pɔ́ ḿbúunɛ wɛ́ fíitɛ ( Mɑtʉ̈ɔ 8.28-34 ; Lúkɑ́shi 8.26-39 ) 1 Yɛ́su pɔ́p ɡɑŋku pɛ́ túu ŋki tɛ ŋ́kúu nǔu yɛcɔ́ njʉ́n, ɛ́ pɔ́ ŋɡɔŋ-pʉɔ-Ŋɡɑlɑzɑnî, 2 ḿbɔ́ ɛ́fú tsɛt kɑnúꞋ ńcẅɛt, wɛcɔ́ ŋu ɡɔ́ɔ ńcẅɛt ńtɔ́ mbi yɛ́, ɛ́fú mvuꞋ-mɛŋɡɔꞋ, ɛ́ pɔ́ zʉꞋ yi pɛ́ tẅíinɛ pɛpfú zúꞋu, ḿbɔ́ ŋu, mbɔ zẅikŋɛ kɛpɔŋ kɑ ɡẅɛɛ wɛ́, ḿbɔ́ ḿbúunɛ wɛ́. 3 A kɑ pɔ́ ńtswɛ́ pɔ mvuꞋ-mɛŋɡɔꞋ ɛ̂mɑ́, ŋu pɛn ḿbɔɔ ɡú ẅi ɛ́ lɑɑ ḿbɔ́ ɑ pɛn ŋ́kuꞋ nɛkút wɛ́ pɔ́, tɛ mbɑ nɛ́ cɛ̂n pɔ́. 4 A pɔ́, mbɔ pɛ́ kɑ zɛɛ ńníꞋ kɔꞋ mɛku yɛ́, ńdɔk cɛ̂n ŋ́kút mbɔ́ mɛ́, ɑ ḿbʉ̈ɔ́Ꞌtɛ kɔꞋ, ńzɑ́Ꞌtɛ mɛcɛ̂n tɛ wɛcɔ́ ŋu pɔɔ pɛn ŋ́kuꞋ nǔu wɛ́ pɔ́. 5 A pɔ́ nɛnɛm, kɛ nɛtúꞋ ɔɔ, ḿbɔ́, ɛ́fú mvuꞋ-mɛŋɡɔꞋ ŋ́ɡʉ ndǔ nɛŋkɔ́Ꞌ ŋ́ɡíɛt, ḿbɔ́ ńdɔk mɛpɑk-mɛŋɡɔꞋ ŋ́ɡwɑt mbʉʉ yɛ. 6 A tʉ́ʉ ŋɡɑ sɛsɑ, ńjʉ́ɔ Yɛ́su pɔ́Ꞌɔ, ńnɑ́ɑtɛ wɛ́ ńtɔ́ ńnɔɔ mɛku wɛ́, 7 ńdɔk ŋɡi tɛnnɛ ŋ́ɡíɛt ŋɡɔ: «Yɛ́su mɔ́ɔ-Sɛ́ ẅi ɑ piꞋnɛ mbɑ kʉ̈ɔ́ lɑ́, ɔ cẅɛ́ɛ kʉ̈ɔ́ mbɔ̌ mɔ? Sɛ́sẅíi, n dɔk lík-Sɛ́ ḿbuꞋ mbɔ́ mbɔ̌ wu ŋɡɔ, ɔ pɑ́ɑ nɛníꞋ wɑ́ɑ tsɛt ŋɡʉ̈ɔ́Ꞌ?» 8 Ŋu ɛ̂wɑ́ kɑ ɡɔ́ ńcú pɔ́Ꞌɔ, ɛ́ pɔ́, mbɔ Yɛ́su cú mbɔ̌ mɛzẅikŋɛ kɛpɔŋ ŋɡɔ pɔ́p fú nǔu wɛ́ ńcẅɛt. 9 Yɛ́su píkŋɛ ŋu ɛ̂wɑ́ ŋɡɔ: «Lík yú ŋɡɔ wɔ̌?» A pʉ̈ɔt mbɔ̌ wɛ́ ŋɡɔ: «Lík yɑ́ɑ ŋɡɔ mɛnu, mbíꞌŋɡɔ pɛk mɛzẅikŋɛ kɛpɔŋ ńzɑ́ɑ zɑ́ɑnɛ,» 10 ńniitɛ ḿbuꞋ mbɔ́ mbɔ̌ Yɛ́su ŋɡɔ: «Sɛ́sẅíi, kɔɔ ɑ zuŋ mɛsɛ́ ɛ̂mɑ́ tɛ pɔ́p fú lɑ́Ꞌ ɛ̂yɑ́ ŋ́ɡʉ.» 11 Ɛ́ kɑ ɡɔ́ ḿbɔ́, yɛcɔ́ kɑt-mɛnjínɑɑ pɔ́ zúꞋu, ndǔ nɛŋkɔ́Ꞌ ḿbɔ́ ŋ́kɑ́t ńdɔɔ yúu ŋ́kwɛ́t. 12 Mɛzẅikŋɛ kɛpɔŋ puꞋ mbɔ́ mbɔ̌ Yɛ́su ńcú ŋɡɔ: «Gɛ pɛk kúu pɔ nǔu mɛnjínɑɑ mɔ.» 13 Yɛ́su pɛ́m, mɛzẅikŋɛ kɛpɔŋ ɡɔ́ɔ ŋ́kɛ́ ɛ́fú nǔu ŋu ɛ̂wɑ́, ńcẅɛt ŋ́kúu nǔu mɛnjínɑɑ. Kɑt-mɛnjínɑɑ tɑ́kŋɛ ɛ́fú ndǔ nɛŋkɔ́Ꞌ ḿbʉ̈ɔtnɛ ŋki, ńnɔ́ ŋki ḿpfútɛ. Pɔ́p kɑ pɔ́ yúu ntsɑ́Ꞌ yɛ́pɑ́. 14 Pʉɔ pi pɔ́p kɑ pɔ́ ńtsiinɛ mɛnjínɑɑ jʉ́ɔ pɔ́Ꞌɔ, ŋ́kʉɔ, ŋ́ɡʉ ńdɔk nu yi pɔ́p jʉ́ɔnɛ, ɛ́sɑt tʉ́sɔŋ, tɛ mbɑ lɑ́Ꞌ. LɑꞋ kɔꞋ, ńtɔ́ ńjʉ́ɔ yúu mi ɛ́ ɡɛnɛ, 15 ŋ́ɡʉ tɛ ŋ́kúu nɛjɔ́ŋ Yɛ́su, ńjʉ́ɔ ŋu ẅí mɛzẅikŋɛ kɛpɔŋ kɑ pɔ́ nǔu wɛ́ tɛ ńzɑ́ɑ zɑ́ɑnɛ lɑ́, ɑ nɑ́ŋ ḿmɑꞋ mɛndẅí, mbɔ jínu yɛ́ pɛn, pɔ́p pɔ́k tɛꞋ. 16 Pɛcɔ́ pʉɔ pɔ́ zúꞋu, mbɔ pɔ́p lɑ́Ꞌ ńjʉ́ɔ yúu mi ɛ́ ɡɛnɛ ŋu ɛ̂wɑ́ mbɑ mɛnjínɑɑ. Pɔ́p pɔ́ ḿbɛ́ɛtɛ ɛ́sẅíi pʉɔ pinɛ pɔ́p tɔ́nɛ nzʉʉ. 17 Pɛ́ zúꞋ, ńzɛ puꞋ mbɔ́ mbɔ̌ Yɛ́su ŋɡɔ ɑ fú lɑ́Ꞌ pɔ́p ŋ́ɡʉ. 18 Yɛ́su sɛ́ ŋ́kúu tsɛt kɑnúꞋ pɑꞋ ɑ ɡʉ ńtsʉ́ꞌ ŋ́ɡʉ yɛ́ ɡʉnɛ, ŋu wɑ́ ẅi ɑ fíitɛ́nɛ lɑ́, puꞋ mbɔ́ mbɔ̌ wɛ́ ŋɡɔ ɑ pɛ́m, pɔ́p mɛ́ ɡʉ. 19 Yɛ́su lʉꞋ, ńcú mbɔ̌ wɛ́ ŋɡɔ: «Pɛn nɛ́ njɛ́Ꞌ wu, ŋ́kẅɛ́ɛtɛ pʉɔ pú, ɛ́sẅíi wɔ́p nɛ́ mɑ́ nu sʉ́Ꞌnɛ yí Tsɑpʉɔ ɡɛnɛ nǔu ɡu, ɛ́sẅíi wɔ́p pɑꞋ ɑ tsɑ́ɑnɛ mɛjʉ́ŋ mú.» 20 Ŋu ɛ̂wɑ́ ɡɔ́ɔ ŋ́kɛ́ ŋ́ɡʉ, ŋ́ɡɔ́ ńnɛn tsɛt mɛlɑ́Ꞌ ɛ̂mɑ́ tsʉʉ, ḿbɔ́ ɛ́sẅíi nu yi Yɛ́su lɑ́Ꞌnɛ ŋ́ɡɛ nǔu wɛ́. Pʉɔ tsʉʉ zúꞋ ɛ́ kʉꞋnɛ wɔ́p tɛꞋ. Pɛ́ fúŋ yîyɑ́ pɑk-lɑ́Ꞌ ŋɡɔ Mɛtʉ́sɔŋ-Nɛɡɛ́m. Nu mɔ́ɔ-Yɑyɛlɔ pɔ́p mɑŋɡɛ́ ẅi ɑ kɑ ɡẅɛɛnɛ ndẅí-Yɛ́su ( Mɑtʉ̈ɔ 9.18-26 ; Lúkɑ́shi 8.40-56 ) 21 Yɛ́su lɔk kɑnúꞋ ńtúu ŋki tɛ ŋ́kúu nǔu yɛcɔ́ njʉ́n. Mɑ́mɑ́ nɔɔ-lɑ́Ꞌ cúꞋlɛ nɛjɔ́ŋ yɛ́. A pɛ́t ḿbɔ́ pɔ mbʉʉ-ŋki, 22 wɛcɔ́ ŋu tɔ́, lík yɛ́ pɔ́ ŋɡɔ Yɑyɛ́lɔ, ɑ pɔ́ wɛcɔ́ tɑꞋ nǔu pɛlʉ́m tsɛt ndɑ́-cúꞌlɛ-pɑyúdɑ, ḿbɔ́ tɛ ńjʉ́ɔ Yɛ́su, ŋ́ɡɔ́ɔ ńnɔɔ mɛku yɛ́, 23 ḿbúꞋ mbɔ́ ŋɡɔ: «Sɛ́sẅíi mɔ́ɔ wɑɑ wɛ mɑŋɡɛ́ tsʉꞋ ḿbɔ́ pɔ ntsu-nɛvú, tɔ́, ńzɑ́p mbɔ́ mú nǔu wɛ́, ɑ fíitɛ ńduk.» 24 Yɛ́su pɛ́m, pɔ́pmɛ́ cʉ́ɔ sɛ̂ndúŋ ḿbɔ́ ŋ́ɡʉ, lɑ́Ꞌ pɔ́ sɛ̂ndúŋ tɛꞋ, ḿbɔ́ ɛ́fyɛ́t Yɛ́su. 25 Wɛcɔ́ mɑŋɡɛ́ pɔ́ yɛ́ tsɛtsɛt, ḿbɔ́ ŋ́ɡɔɔ, ŋ́ɡẅɛɛ ɡɔɔ mɑ́sɔ́ɔ, mbɔ ɛ́ ɡɑ́nɛ wɛ́ ɡɑ́nɛnɛ ŋɡuꞋ ntsɔ̌ppɑ́ nɛ́ nɛɡɛ́m. 26 Mbɔ ɑ kɑ nɛn mɔ́ njɛ́Ꞌ-ɡɑŋfu tɛ ŋ́kɑ́ɑ, ḿbʉ́ʉpɛ yɛ ŋkɑ́p tɛ ɛ́ mɛ, ŋ́kɛ́ ḿbɔɔ fíitɛ, tɛ ńtsʉꞋ pɔ́Ꞌɔ, ɡɔɔ kẅiꞋ kẅiꞋnɛ. 27 A kɑ zúꞋ pɑꞋ pɛ́ cúnɛ ŋɡɔ Yɛ́su sɛ́ ŋ́ɡɛ pʉɔ fíitɛ, ɑ nɑꞋtɛ ɛ́fú nzʉʉ ńtɔ́ ŋ́ɡẅɛɛ ndẅí-Yɛ́su, 28 ḿbɔ́ ńcú tʉ́m yɛ́ ŋɡɔ: «N dɑɑ ŋ́ɡẅɛɛ pɔ ndɑꞋ ndẅí-Yɛ́su, mbɔ ŋ ɡʉ fíitɛ,» 29 ŋ́ɡɔ́ɔ ŋ́ɡẅɛɛ, ɡɔɔ yɛ́ ɡɔ́ɔ ńzɑ́Ꞌnɛ, ɑ pɛn ńzúꞋ, mbɔ ɑ fíitɛ. 30 Yɛ́su ɡɔ́ɔ ńzúꞋ pɑꞋ mɛcɔ́ mɛtʉʉ cẅɛtnɛ mbʉʉ yɛ́, ɛ́shɔtnɛ ńdíŋɛ lɑ́Ꞌ, ḿbíkŋɛ ŋɡɔ: «Wɔ̌ kuunɛ ndẅí yɑɑ?» 31 Gɑŋku pɛ́ pʉ̈ɔt ŋɡɔ: «Ɔ jʉ́ɔ lɑ́Ꞌ pɔ́ ɛ́fyɛ́t wú ndɛn wɔ, ɔ pɛn ḿbíkŋɛ ŋɡɔ wɔ̌ kuunɛ ndẅí yu ɔɔ?» 32 Yɛ́su shɔtnɛ mbʉʉ yɛ ḿbɔ́ ḿbɑ́tɛ, ńdɔɔ nɛjí ŋu ẅí ɑ kuunɛ wɛ́. 33 Mɑŋɡɛ́ ɛ̂wɑ́ tsʉꞋ ŋ́ɡwɛt ɡwɛtnɛ, mbíꞌŋɡɔ ɑ kɑ jí yúu mi ɛ́ lɛɛnɛ nǔu wɛ́, ŋ́ɡɔ́ɔ ŋ́kɛ́ ńtɔ́, ńnɔɔ mɛku-Yɛ́su, ɛ́sẅíi wɛ́ kwɑꞋ nu yí ɛ́ lɛɛnɛ tsʉʉ. 34 Yɛ́su cú mbɔ̌ wɛ́ ŋɡɔ: «Mɔ́ɔ wɑɑ, pɑꞋ ɔ zɑ́pnɛ tʉ́m yú nǔu mɔ lɑ́, ɔ fíitɛ, ɡʉ nɛ́ mbɔ́tnɛ, ɡɔɔ yú mɛ.» 35 Yɛ́su pɛ́t ńcú nu mbɔ̌ mɑŋɡɛ́ ɛ̂wɑ́ cúnɛ, pɛcɔ́ ntɑ́Ꞌ-pʉɔ fú njɛ́Ꞌ-Yɑyɛ́lɔ, ńtɔ́ ɛ́sẅíi wɛ́ ŋɡɔ mɔ́ɔ nɛ ńdɑ́Ꞌmɔ́ ḿpfú, ŋɡɔ kɔɔ ɑ pɛn ḿbɑ́klɛ Ndɛ. 36 Yɛ́su zúꞋ pɑꞋ ŋkɑ́ yi ɑ kɑ́ zúꞋ lɑ́, ńcú mbɔ̌ Yɑyɛ́lɔ ŋɡɔ: «Kɔɔ pɔ́k, zɑ́p pɔ tʉ́m yú nǔu mɔ.» 37 Yɛ́su pɔ́p Yɑyɛ́lɔ pɔ́ ŋ́ɡʉ, Yɛ́su pɔɔ pɛ́m ŋɡɔ wɛcɔ́ ŋu cʉ́ɔ nzʉʉ pɔ́p pɔ́, ndɑꞋ Pyɛ̂ ŋ́ɡɛ Jɑ̂k pɔ́p mɔ́ɔmɑ́ wɛ Jɑ̂ŋ. 38 Pɔ́p ɡʉ tɛ ŋ́kúu ndɑ́-Yɑyɛlɔ, Yɛ́su jʉ́ɔ pɛ́ pɔ́ zúꞋu ḿbɔ́ ḿbɑ́klɛ zʉꞋ, pʉɔ pɔ́ ńdɑɑ, pɛcɔ́ pɔ́ ŋ́ɡíɛt. 39 Yɛ́su kúu ndɑ́ ńcú mbɔ̌ pɔ́p ŋɡɔ: «Pʉʉ pɑ́klɛ zʉꞋ, ńdɑɑ ndɛn wɑ́ mɛlɑ́Ꞌ kʉ̈ɔ́? Mɔ́ɔ kɑ́ pfú, ɑ lɛ́ lɛ́nɛ.» 40 Pɔ́p zúꞋ, ŋ́ɡwɛ wɛ́ ɡwɛnɛ. A ɡɛ pʉɔ tsʉʉ fú ndɑ́ ńcẅɛt, tɛ ɛ́ tsʉꞋ ndɑꞋ Tɑ́-mɔ́ɔ pɔ́p mɑ́mɔ́ɔ, ŋ́ɡɛ ɡɑŋku pɛ́ ɛ̂pɑ́. Pɔ́p pɛpɔ́p kúu tsɛt lûmndɑ́, zʉꞋ yi mɔ́ɔ nɔɔnɛ zúꞋu. 41 Yɛ́su ɡẅɛɛ pɔ́-mɔ́ɔ, ńcú mbɔ̌ wɛ́ ŋɡɔ: «Tɑlítɑ kum,» ńdɔk ńcú ŋɡɔ: «Mɔ́ɔ mɑŋɡɛ́, lɔ sɛ́.» 42 Mɔ́ɔ ɡɔ́ɔ ḿbʉꞋ mbʉʉ yɛ, ńdɔ sɛ́ ńzɛ nɛnɛn. Pɔ́p jʉ́ɔ ɛ́ kʉꞋnɛ wɔ́p tɛꞋ. Mɔ́ɔ kɑ pɔ́ mɔ́ɔ ŋɡuꞋ ntsɔ̌ppɑ́ nɛ́ nɛɡɛ́m. 43 Yɛ́su tɔꞋ wɔ́p ŋɡɔ pɔ́p pɑ́ɑ nɛɡɛ tɛ wɛcɔ́ ŋu ndɛꞋ jí yúu mi ɛ́ ɡɛnɛ, ḿbɛn ńcú ŋɡɔ pɛ́ ɡɑ́ yúu ɑ jʉ́. |
CABTAL, 2017