Mɑ́lɛ́kúshi 12 - Kɑɑ Fí

Sɑknɛkɛt nǔu ŋu ẅí ɑ kɑ níꞋnɛ ŋkɑꞋ wɛ́ mbɔ̌ pʉɔ

¹ Yɛ́su tsɔ́Ꞌ pɔ́Ꞌɔ, ńzɛ nɛlɔk sɑknɛkɛt ńcú mbɔ̌ pɔ́p ŋɡɔ: «Wɛcɔ́ ndʉ́m kɑ ɡẅɛɛ ŋkɑꞋ wɛ́, ŋ́ɡʉ tsɛtú, ḿbi mɛtʉ́ mi pɛ́ kíɛ mɛntɑ́ɑ mɛ́ ńdɔk ńniitɛ mɛluꞋ, ḿbɔ́ɔ tɑ́ɑŋkɑ́Ꞌ ńdɔk ŋ́kíitɛ, ŋ́ɡʉ tsɛt ŋkɑꞋ, ḿbuꞋ ɡʉ́ɔ nǔu ŋɡɔꞋ zʉꞋ yí pɛ́ ɡʉ kíɛ mɛntɑ́ɑ zúꞋu, ḿbɛn ḿbɔ́ɔ tɑꞋ sɛsɑ ndɑ́ ẅi pɛ́ ɡʉ ŋ́kɔ́Ꞌ ńtʉ́ʉ tsɛtú lɑ́ ḿbyɛ́p ŋkɑ́Ꞌ, ŋ́ɡɛ pɔ́Ꞌɔ, ńníꞋ ŋkɑ́Ꞌ mbɔ̌ pɑniitɛ mɛluꞋ ŋ́ɡɔ́ɔ ŋ́ɡʉ nɛ́ nɛnɛn.

² Ŋkɑ́ nɛkɑ́p ntɑ́ɑ kuꞋ, ɑ túu tɑꞋ ŋɡɑŋfɑꞋ wɛ mbɔ̌ pʉɔ pi pɔ́p ŋkɑꞋ ŋɡɔ ɑ ɡʉ ńcẅɛ́ɛ mɛ́ mɛntɑ́ɑ-tʉ́ ńdɔk ńtɔ́.

³ Pɔ́p kúu zúꞋu, ŋ́ɡẅɛɛ ŋɡɑŋfɑꞋ wɑ́, ńtswɑ́ɑ wɛ́, ńzuŋ wɛ́, ɑ pɛn mbɔ́ fɛ̌ɛ.

⁴ ŊɡɑŋkɑꞋ pɛn ńtúu wɛcɔ́ ŋɡɑŋfɑꞋ wɛ mbɔ̌ pɔ́p. A kúu zúꞋu, pɔ́p zɔɔtɛ wɛ́, ńtswɑ́ɑ wɛ́ tú yɛ́.

⁵ A pɛn ńtúu wɛcɔ́ tɑꞋ. Ẅîwɑ́ ŋu tɔ́ ŋkɑ́ yîyɑ́, pɔ́p jẅí wɛ́. A pɛn ńtúu pɛcɔ́ tɛ pɔ́p zɑ́ɑ. Pɛ́ ɡẅɛɛ pɛcɔ́ ńjẅítɛ, ńtswɑ́ɑ pɛcɔ́.

⁶ Ŋu ẅí ɑ kɑ pɛ́tnɛ mbɔ̌ wɛ́, kɑ tsʉꞋ ḿbɔ́ pɔ ndɑꞋ mɔ́ɔ nɛ ẅí ɑ kɑ pɔ́ ŋ́kɔŋ wɛ́ tɛꞋ. A ɡɔ́ ńdẅiklɛ, ńtúu ẅîwɑ́ mɔ́ɔ mbɔ̌ pɔ́p, ḿbɔ́ ŋ́kwɑŋɛ ŋɡɔ, ɛ́ ɡʉ ŋ́ɡɛ pɑꞋɑ lɑ́, pɔ́p ɡɛ mɛkuꞋ mɔ́ɔ wɑɑ.

⁷ Lɑ́ ɑ ŋ́kúu zúꞋu, pʉɔ pɑ́ cú tsɛtsɛt pɔ́p ŋɡɔ: Njʉ́ndɑ́ wɛ pʉ́ɔlɑ́ ẅi ɑ tɔ́nɛ lɑ́, pɛkŋɛ jẅí wɛ́, ńjʉ́ ŋkɑ́Ꞌ,

⁸ ńcú pɔ́Ꞌɔ, ḿvu nǔu wɛ́, ŋ́ɡẅɛɛ wɛ́ ńjẅí, ɛ́shuŋ pfú yɛ́, ńdɔk ɛ́fú ŋkɑ́Ꞌ ŋ́ɡʉ ḿmɛꞋ.»

⁹ Yɛ́su píkŋɛ ŋɡɔ: «Pʉʉ jʉ́ɔ yʉ́ʉ ŋɡɔ ŋɡɑŋkɑ́Ꞌ ɡʉ ŋ́ɡɛ ŋɡɔ́ku nǔu pɔ́p? A ɡʉ ńtɔ́ ŋ́ɡɛ pɛ́ jẅítɛ pɔnɛ pɑniitɛ mɛluꞋ, ɑ níꞋ ŋkɑ́Ꞌ mbɔ̌ pɛndɛꞋ.»

¹⁰ Ɛ́ lɑɑ mbɔɔ kʉ̈ɔ́ pɔ́, mbɔ pʉʉ kɑ fúŋ mɔ́ zʉꞋ-ŋwɑꞋnɛ-Sɛ́ yi ɛ́ cúnɛ ŋɡɔ: «ŊɡɔꞋ yí pɑpɔ́ɔndɑ́ kɑ mɛꞋnɛ kɑ tsʉ́Ꞌnɛ ŋɡɔꞋ yí ɛ́ piꞋnɛ ndɑ́.»

¹¹ Tsɑpʉɔ kɑ ɡɛnɛ pɔ́Ꞌɔ. Ɛ́ pɔ́ mɑ́mɑ́ nu sʉ́Ꞌnɛ mík pɛkŋɛ.

¹² Pɑsɑ́Ꞌlɑ́Ꞌ zúꞋ pɑꞋ Yɛ́su cúnɛ yɔ sɑknɛkɛt, ńdii ŋɡɔ ɑ cú mbɔ̌ pɔ́p, ńdɔɔ shʉ́ nɛɡẅɛɛ wɛ́ lɑ́ ḿbɔ́k mík-lɑ́Ꞌ, ɛ́sɔ́ɔ, ńnɑ́ wɛ́ zúꞋu, ŋ́ɡʉtɛ.

Nu nǔu nɛmɑꞋ ntsup ŋ́ɡɑ́ mbɔ̌ Kɑ́sɑ

¹³ Pɔ́p ɡɛ ńtúu pʉɔ nǔu. Nɔɔ-pɑfɑlísɑy, pɔ́p nɔɔ-Ɛlɔ̂dɛ ŋɡɔ pɔ́p ɡʉ ńdɔɔ pɑꞋ ɛ́ lɑɑ ḿbɔ́ pɔ́p fú nǔu nu yí Yɛ́su cúnɛ ŋ́ɡẅɛɛ wɛ́.

¹⁴ Píipɑ́ pʉɔ tɔ́ ńcú mbɔ̌ wɛ́ ŋɡɔ: «Cícɑ, pɛk sɛ́ ńjí ŋɡɔ ɔ cú nu, ɛ́ pɔ́ nɛ́nẅín, ḿbɛn ńcú kɛ́ pɔ́k ŋu, ɔ kɑ́ líŋɛ ŋumɛsɔŋ pɔ nǔu shʉ́ pɔ́, ńdɛꞋlɛ nu nɛ́nẅín pɔ pɑꞋ Sɛ́ píkŋɛnɛ ŋɡɔ pɛ́ ɡɛ pɔ́Ꞌɔ, sẅíi wɛ́k, tɛ ɛ́ pɛꞋnɛ nɛpʉ́ʉ-lɑ́Ꞌ nɛkŋɛ pɛ́m ŋɡɔ pɛkŋɛ mɑꞋ ntsup ŋ́ɡɑ́ mbɔ̌ Kɑ́sɑ-Pɑlɔ́mɑ kɛ ŋɡɑ́ŋ?»

¹⁵ Yɛ́su jʉ́ɔ pɑꞋ pɔ́p pɔ́ pɔ pɑŋkɔŋmík, ńtsɔ́Ꞌ mbɔ̌ pɔ́p ŋɡɔ: «Pʉʉ ŋ́kwɑꞋlɛ wɑ́ɑ mɛlɑ́Ꞌ kʉ̈ɔ́? Pʉʉ lɔk pɑk-ŋkɑ́p ńtɔ́ ńnyɛt wɑ́ɑ.»

¹⁶ Pɔ́p lɔk pɑk-ŋkɑ́p ńtɔ́, ɑ píkŋɛ wɔ́p ŋɡɔ: «Yɔ shʉ́ wɔ̌ ẅi ɛ́ nǔu ŋkɑ́p? Yɔ lík wɔ̌ yi ɛ́ nǔu?» Pɔ́p tsɔ́Ꞌ mbɔ̌ wɛ́ ŋɡɔ: «Ɛ́ yɛ́ Kɑ́sɑ, lík pɛn ḿbɔ́ pɔ yɛ́.»

¹⁷ A cú mbɔ̌ pɔ́p ŋɡɔ: «Ɛ́ lɑɑ ḿbɔ́ pɔ́Ꞌɔ, pʉʉ ɡɑ́ yúu-Kɑ́sɑ mbɔ̌ Kɑ́sɑ, ŋ́ɡɑ́ yɛ́ Sɛ́ mbɔ̌ Sɛ́.» Pɔ́p zúꞋ ntɛ́ yi ɑ lɔknɛ ḿbʉ̈ɔt, ɛ́ kʉꞋnɛ wɔ́p tɛꞋ. Ntsu wɔ́p zúu.

Nu nǔu nɛzẅíimɛ nǔu nɛvú

¹⁸ Pɑsɑdukɑy tɔ́ nɛjɔ́ŋ Yɛ́su. Pɑsɑdukɑy pʉɔ pinɛ pɔ́p kɑ́ pɛ́m ŋɡɔ pɛpfú ɡʉ ŋ́ɡɛ ńzẅíimɛ nǔu nɛvú pɔ́. Pɔ́p píkŋɛ mbɔ̌ Yɛ́su ŋɡɔ:

¹⁹ «Ndɛ, Mɔ̌sɛ̂ɛ kɑ ŋwɑꞋnɛ tsɛt nɛpʉ́ʉ nɛkŋɛ ŋɡɔ: Ŋu lɑɑ ńzɔ́Ꞌ mɑŋɡɛ́, ḿpfú kɛ́ nɑ́ yúu, mbɔ mɔ́ɔmɑ́ wɛ ɡẅɛɛ nɛsuk mpfúk ńdɔk ńnɔŋ njẅɛt-mɔ́ɔmɑ́ wɛ ɛ̂wɑ́.»

²⁰ Pɔ́Ꞌɔ, pɛcɔ́ pɔ́ɔpɛ́mɑ́ ḿbɔ́ ɡú, ḿbɔ́ mbɛ́ɛnɛ sɑɑmbɑ́, nduŋmbi zɔ́Ꞌ, ŋ́ɡɛ ḿpfú kɛ́ nɑ́ yúu.

²¹ Mbɑ́ɑtɛ suk mpfúk, ḿbɛn ḿpfú yɛ́ pɔ kɛ́ nɑ́ yúu. Mbɑ́ɑtɛ ẅîwɑ́ tɔ́ ḿbɛn ɛ́suk yɛ́ mpfúk, ńdɑ́Ꞌ ḿpfú pɔ kɛ́ nɑ́ yúu.

²² Pɔ́p sɑɑmbɑ́ lɑ́Ꞌ ńzɔ́Ꞌ mɑŋɡɛ́ ɛ̂wɑ́, ńdɑ́Ꞌ ḿpfú pɔ kɛ́ nɑ́ yúu. Ɛ́ ɡɔ́ ńdẅiklɛ mɑŋɡɛ́ pfú yɛ́.

²³ Pɑ́Ꞌ pɔ́p sɑɑmbɑ́ kɑ zɔ́Ꞌnɛ mɑŋɡɛ́ wɔ lɑɑ, pɛ́ ɡʉ ńdɑ́Ꞌ ńzẅíimɛ nǔu nɛvú ɑ pɔ́ wɛ wɔ̌?

²⁴ Yɛ́su tsɔ́Ꞌ mbɔ̌ pɔ́p ŋɡɔ: «Kɔɔ jínu yʉ́ʉ pɔ́ fʉ́klɛ wʉ́ʉ pɑ́Ꞌɑ, tɛ ɛ́ kɑ́ pɔ́ pɔ nu yí pʉʉ kɑ́ jí yúu ɛ́ tsɛt ŋwɑꞋnɛ-Sɛ́ pɔ́, ḿbɛn ŋ́kɛ́ mbɔɔ jí pɑꞋ mɛtʉʉ-Sɛ́ pɔ́nɛ pɔ́ ɔɔ?»

²⁵ Pʉʉ jí ŋɡɔ pɛ́ ɡʉ ńdɑ́Ꞌ ńzẅíimɛ nǔu nɛvú, mbɛ́ɛnɛ mbɑ pɑŋɡɛ́ pɔɔ pɛn ńzɔ́Ꞌ pɔ́. Pɔ́p tsʉꞋ ḿbɔ́ pɔ pɑꞋ pɛcʉ̈ɔ́Ꞌ-Sɛ́ pi pɔ́p tʉ́nɛ́pú.

²⁶ Ɛ́ ɡʉ nǔu pɛpfú pi pɔ́p ńzẅíimɛ nǔu nɛvú, mbɔ pʉʉ ŋkɑɑ mɔ́ ɛ́fúŋ yúu mi Mɔ̌sɛ̂ɛ kɑ ŋwɑꞋnɛ́nɛ, ńdɛꞋlɛ yúu mi Sɛ́ kɑ cúnɛ mbɔ̌ wɛ́, zʉꞋ yí yɛcɔ́ mɔ́yúu tʉ́ kɑ pɔ́nɛ zúꞋu, múk pɔ́ nǔu pɔ́ kɛ? Sɛ́ kɑ pɔ́ ńcú ŋɡɔ: «Mɔ, Sɛ́-Ábɛlɛhɑ̂m, ḿbɔ́ Sɛ́-Ɛ́sɑk, ḿbɔ́ Sɛ́-Yɑkɔ̂p.»

²⁷ Yɛ́su pɛn ńcú ŋɡɔ: «Sɛ́ kɑ́ pɔ́ Sɛ́-pɛpfú-pʉɔ pɔ́, ɑ Sɛ́-pʉɔntʉʉ. Pʉʉ lɑɑ ŋ́kwɑŋɛ pɑꞋ pʉʉ kwɑŋɛ́nɛ lɑɑ, mbɔ pʉʉ fɑɑnɛ tɛꞋ.»

Nɛpʉ́ʉ ni ɛ́ tsɑnɛ mɛcɔ́

²⁸ Yɛ́su pɔ́p pɔnɛ pʉɔ pɔ́ ńzɔŋ pɑ́Ꞌnɛ, wɛcɔ́ ŋu tsɛtsɛt pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ yɛ́ zúꞋu, ḿbɔ́ tɛ ńzúꞋ pɑꞋ Yɛ́su pʉ̈ɔtnɛ sʉ́Ꞌnɛ, ŋ́ɡɔ́ɔ ńtɔ́ nɛ́ nɛjɔ́ŋ wɛ́, ḿbíkŋɛ wɛ́ ŋɡɔ: «Nɛpʉ́ʉ-SƐ́ ni ɛ́ piꞋnɛ mɛcɔ́ tsʉʉ, ɛ́ nɛ́tɛ́?»

²⁹ Yɛ́su pʉ̈ɔt ŋɡɔ: «Nɛpʉ́ʉ ni ɛ́ piꞋnɛ mɛcɔ́, pʉ́ɔ: Pɑíslɑyɛ̂l, pʉʉ zúꞋ, Tsɑpʉɔ Sɛ́ wɛkŋɛ, jʉ́ zɛ́nɛjʉ́ pɔ́nɛ Tsɑpʉɔ.»

³⁰ Kɔŋ Tsɑpʉɔ Sɛ́ wu nɛ́ ŋɡɔŋ tʉ́m yú tsʉʉ, nɛ́ kwɑŋɛ yú tsʉʉ, nɛ́ mɛtʉʉ mú tsʉʉ.

³¹ Nɛpʉ́ʉ mbɑ́ɑtɛ yɛ́pɑ́ pɔ́ ŋɡɔ: «Ɛ́ sɛ́ ḿbíkŋɛ ŋɡɔ ɔ kɔŋ mɔ́ɔmɑ́ wu ŋumɛsɔŋ pɑꞋ túmbʉʉ yú, nɛcɔ́ nɛpʉ́ʉ kɑ́ pɛn ḿbɔ́ ɡú tɛ ńdɛɛ mɔnɛ mɛmbɑ́ pɔ́.»

³² Ŋkyɛ́Ꞌtɛ nɛpʉ́ʉ-Mɔ̌sɛ̂ɛ cú mbɔ̌ Yɛ́su ŋɡɔ: «Ɛ́ pɔŋ Ndɛ, ɔ lɔk ɛ́sẅíi nu ŋɡɔ Sɛ́ zɛ́nɛjʉ́, wɛcɔ́ tsɑpʉɔ kɑ́ pɛn ḿbɔ́ ɡú pɔ́.

³³ Ɛ́ pɔŋ ŋɡɔ ŋu kɔŋ wɛ́ nɛ́ ŋɡɔŋ tʉ́m yɛ́ tsʉʉ, nɛ́ jínu yɛ́ pɔ́p mɛtʉʉ mɛ́ tsʉʉ, ḿbɛn ŋ́kɔŋ mɔ́ɔmɑ́ wɛ ŋumɛsɔŋ pɑꞋ túmbʉʉ yɛ́. Ŋɡɑŋ ɡɛ pɔ́Ꞌɔ, ɛ́ pɔŋ Sɛ́ ńtsɑ nɛtɔɔ mɛyúumɛku ŋ́ɡɑ́ mbɔ̌ wɛ́, ńtsɑ mbɑ yúu-pɔꞋ yi mbɔ ɑ ɡɑ́ mbɔ̌ wɛ́.»

³⁴ Yɛ́su jʉ́ɔ pɑꞋ ɑ lɔknɛ jínu ḿbʉ̈ɔt, ńcú mbɔ̌ wɛ́ ŋɡɔ: «Wu ŋɡɑ nɛkúu tsɛt Nɛfɔɔ-Sɛ́ kɑ́ pɛ́t ɛ́sɑk pɔ́.» Ɛ́ fú ŋkɑ́ yîyɑ́ ŋu pɔɔ pɛn fʉꞋ nɛpíkŋɛ Yɛ́su nɛ́ yɛcɔ́ nu pɔ́.

Nu-Nzɑ́Ꞌŋkʉ pɔ́p fɔɔ Ndɑvît

³⁵ Yɛ́su pɛ́t zʉꞋ-nɔŋpɔꞋ ḿbɔ́ ńzíꞋ pʉɔ nɛ́ nu-Sɛ́, ńcú ŋɡɔ: «Pʉʉ kwɑŋɛ yʉ́ʉ ŋɡɔ pɑkyɛ́Ꞌtɛ nɛpʉ́ʉ-Mɔ̌sɛ̂ɛ zíꞋ pʉɔ ŋɡɔ: Nzɑ́Ꞌŋkʉ ẅí Sɛ́ kɑ kɑꞋnɛ ɡʉ ńdɑ́Ꞌ ḿbɔ́ ŋu nǔu njẅɛt-fɔɔ Ndɑvît pɛꞋnɛ, ɛ́ lɔk ḿbɔ́ ŋɡɔ́ku?»

³⁶ Mɔ sɛ́ ńjí ŋɡɔ: Zẅikŋɛ-Sɛ́ kɑ tsʉ́ʉnɛ fɔɔ Ndɑvît, kwɑꞋ jʉ́ nɛ́ túmbʉʉ yɛ́ cú ŋɡɔ: «Tsɑpʉɔ Sɛ́ cú mbɔ̌ wɑɑ Tsɑpʉɔ ŋɡɔ: Tɔ́ ńnɑ́ŋ nǔu ɡúŋ-pɔ́ yɑ́ɑ yi tʉʉ, tɛ ńdɑ́Ꞌ ŋ́kúu ŋkɑ́ yi mɔ fɛn ɡɑŋmbuu pú mbɔ̌ wu, tɛ ɔ tík mɛku mú tú pɔ́p.»

³⁷ KwɑꞋ fɔɔ Ndɑvît fúŋnɛ Nzɑ́Ꞌŋkʉ ŋɡɔ wɛ Tsɑpʉɔ, lɑ́ ɑ pɛn ḿbɔ́ ŋu nǔu njẅɛt yɛ ŋɡɔ́ku? Lɑ́Ꞌ yi ɛ́ lɑ́Ꞌnɛ ḿbɔ́ zúꞋu, zúꞋ nu yí Yɛ́su cúnɛ, ɛ́ pɔŋ wɔ́p tɛꞋ.

³⁸ Yɛ́su pɛn ńzíꞋ wɔ́p ŋɡɔ: «Pʉʉ lʉ́ɔꞋ pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɑꞋtɛꞋ. Pɔ́p kɔŋ nɛmɑꞋ mɛsɛsɑ mɛndẅí ńdɔk ńjúk ŋ́kɑ́t, ŋ́kɔŋ ŋɡɔ pɛ́ tɔ́ ńcɛꞋlɛ wɔ́p ndǔ zɑ́n,

³⁹ ḿbɛn ŋ́kúu zʉꞋ mɛndínɑɑ, ŋ́kɔŋ nɛnɑ́ŋ pɔ nǔu zʉꞋ pɛlʉ́m, ŋ́kúu mɛndɑ́-cúꞋlɛ, ŋ́kɑŋ yɔ́p zʉꞋ pɔ mbi,

⁴⁰ ḿbɛn ńdɔk jínu ńcẅɛ́ɛ yúu pɛpfúk, ńtsʉ́ꞌ nɛcɛꞋlɛ Sɛ́, ńdɔk nɛcú nu ɛ́ sɑk, ɛ́fú mík-pʉɔ, Sɛ́ ɡʉ ńdɑ́Ꞌ ńzɑ́p yɔp ŋɡʉ̈ɔ́Ꞌ ɛ́ tɛn tɛꞋ.»

Yúu mi mpfúk mɑŋɡɛ́ ɡɑ́nɛ mbɔ̌ Sɛ́

⁴¹ Yɛcɔ́ zʉꞋ pɔ́ zʉꞋ-nɔŋpɔꞋ yí pʉɔ ɡʉnɛ zúꞋu ńníꞋ ntsup-Sɛ́. Yɛ́su ɡɛ ńcúŋ ńnɑ́ŋ sɛ́ ḿbɔ́ ńdíŋɛ pɑꞋ pɛ́ níꞋnɛ, nɛzɑ́ɑ ɡɑŋyúu pɔ́ ńníꞋ ŋkɑ́p zɑ́ɑnɛ.

⁴² Wɛcɔ́ mpfúk mɑŋɡɛ́ tɔ́ yɛ́, ḿbɔ́ mbúŋ, ńníꞋ pɑk-ŋkɑ́p yɛ́pɑ́, yi ɛ́ kɑ́ kuꞋ yɛcɔ́ yúu pɔ́.

⁴³ Yɛ́su jʉ́ɔ, ɛ́fúŋ ɡɑŋku pɛ́, ńcú mbɔ̌ pɔ́p ŋɡɔ: «Ɛ sẅíi wʉ́ʉ, kwɑꞋ nɛ́nẅín, mpfúk mɑŋɡɛ́ wɔ, ḿbɔ́ mbúŋ níꞋ ŋkɑ́p zɑ́Ꞌnɛ, ńtsɑ pʉɔ tsʉʉ.»

⁴⁴ MbíꞋŋɡɔ pɛcɔ́ pʉɔ zɛɛ ńtɔ́ yɔ́p, ńníꞋ pɔ mɛtú-ŋkɑ́p mɔ́p, lɑ́ ŋ́ɡʉ nǔu mpfúk mɑŋɡɛ́ wɑ́, ɑ zɛɛ ḿbɔ́ pɔ mbúŋ lɑ́, ɑ níꞋ yɛ́ ndɑꞋ yúu mi ɑ ɡẅɛɛnɛ nɛlɔk ńzúu yɛ́ yúu.