Lúkɑ́shi 18 - Kɑɑ FíSɑknɛkɛt nǔu mpfúk mɑŋɡɛ́ pɔ́p ŋɑkntsɑŋ kɛpɔŋ 1 Yɛ́su sɑk nɛcɔ́ nɛkɛt, ńdɔk ńdɛꞋlɛ mbɔ̌ ɡɑŋku pɛ́ pɑꞋ ɛ́ pɔ́ŋnɛ nɛcɛꞋlɛ Sɛ́ ŋkɑ́ tsʉʉ kɛ́ kɑ́ɑ. 2 Ńcú ŋɡɔ: «Wɛcɔ́ ŋɑkmɛntsɑŋ ḿbɔ́ tsɛt yɛcɔ́ tʉ́sɔŋ, ḿbɔɔ Sɛ́ pɔ́k, ḿbɛn ḿbɔɔ ńdíŋɛ ŋumɛsɔŋ pɑꞋ yɛcɔ́ yúu pɔ́. 3 Wɛcɔ́ mpfúk mɑŋɡɛ́ pɛn ḿbɔ́ yɛ́ ɡú, ńnɑ́ŋ ńtɔ́ ŋkɑ́ tsʉʉ, ńcú mbɔ̌ wɛ́ ŋɡɔ: Ŋɑk yɑ́ɑ ntsɑŋ, ɛ́fɑk wɛk ŋɡɑŋmbuu wɑɑ.» 4 Ŋ́kɛ́ ńdɑ́Ꞌ ḿbɔ́ ńtɔ́ tɔ́nɛ ɑ pɔɔ ńdíŋɛ wɛ́ pɔ́, tɛ ńdɑ́Ꞌ yɛcɔ́ lɛ́Ꞌ ŋ́kwɑŋɛ tʉ́m yɛ ŋɡɔ: «Mɔ, ŋ kɑ́ pɔ́k Sɛ́ pɔ́, ḿbɛn ŋ́kɛ́ ḿbɔɔ líŋɛ wɛcɔ́ ŋumɛsɔŋ pɑꞋ yɛcɔ́ yúu pɔ́. 5 Lɑ́, mɑŋɡɛ́ wɔ kɑ lɑ́Ꞌ mɔ́ ńzɛ nɛpɑ́klɛ wɑ́ɑ tɛ ŋ́kúu lɔ́Ꞌnɛ, mɔ, ŋ ɡɛ ńzɑ́Ꞌ ntsɑŋ yɛ, ɑ pɔɔ pɛn ḿbɔ́ ńtɔ́, ńtsúꞋ tú yɑ́ɑ pɔ́.» 6 Yɛ́su fú nǔu ŋɡɔ: «Pʉʉ tsúŋ ńzúꞋ yi nu yi ŋɑkntsɑŋ wɔ cúnɛ, lɑ́ ḿbɔ́ kɛ́ pɔ́k Sɛ́. 7 Tɛ ŋkɑ́ yɛ́sʉ́Ꞌ nǔu Sɛ́? A ɡʉ ŋ́ɡɛ pɑ́Ꞌ lɑ́ ḿbɔɔ fɛ́Ꞌnɛ ńtɔ́ ńcẅɛ́lɛ́ pʉɔ pinɛ ɑ kɑ tsɔ́Ꞌnɛ wɔ́p ńdɔk ŋ́ɡɛ pɛ́ pɔ? Lɑ́ pɔ́p pɔ́ ŋ́kíi ɛ́fúŋ wɛ́ nɛnɛm pɔ́p nɛtúꞋ? 8 Tsʉ́Ꞌnɛ ŋ kɛ sẅíi wʉ́ʉ, ɑ kɛ́ lɑ́ɑtɛ nɛtɔ́ ńcẅɛ́lɛ́ wɔ́p pɔ́. Lɑ́, tɛ ɛ́ pɑꞋɑ, Mɔ́ɔ-ŋu ŋ́ɡɛ ŋ́ɡɔ ńtɔ́ ndǔ tsɛ́tsɑ́Ꞌ, ńjʉ́ɔ pʉɔmɛsɔŋ pɔ́ ńzɑ́p tʉ́m nǔu Sɛ́?» Nu-ŋu-Fɑlísɑy pɔ́p ńcẅɛ́ɛ ntsup 9 Yɛ́su pɛn sɑk nɛcɔ́ nɛkɛt ńcú nu nǔu pʉɔ pinɛ pɔ́p kwɑŋɛ ŋɡɔ ndɑꞋ pɔ́p ɡɛnɛ yúu mi Sɛ́ sɛ́ ŋ́kɔŋ, ḿbɛn ńtsʉ́Ꞌ ŋ́ɡwɑ́k pɛcɔ́ pʉɔ ɡwɑ́knɛ, 10 ńcú ŋɡɔ: «Pɛcɔ́ pʉɔ pɛ́pɑ́ kɑ lɑ́Ꞌ ḿbʉʉ ndɑ́-nɛnɔŋpɔꞋ nɛcɛꞋlɛ Sɛ́. Tɑ́Ꞌ pɔ́ ŋu nǔu nɔɔ-Pɑfɑlísɑy, wɛcɔ́ pɔ́ ncẅɛɛntsup-Pɑlɔ́mɑ. 11 Ŋu Fɑlísɑy ŋ́kúu zúꞋu, ńtʉ́ʉ mɑ́ntɑ́ɑ ḿbɔ́ ŋ́ɡúꞋlɛ Sɛ́ ŋɡɔ: Ɔ́ɔ! Sɛ́, ŋ ɡɑ́ pɑ́Ꞌlɑ́ mbɔ̌ ɡu tɛꞋ, ntɛ́ pɑꞋ ɔ kɑ ɡɛ m bɔɔ pɔ́ pɑꞋ pɛcɔ́ pʉɔmɛsɔŋ pɔ́. Pɔ́p pɛtsɔ́ŋ, pɔ́p kɑ́ pɔ́ ŋ́ɡɛ yúu mi ɔ sɛ́ ŋ́kɔŋ pɔ́, ɛ́fúklɛ pɛzwɛ́ pɔ́p. Ŋ ɡɑ́ pɑ́Ꞌlɑ́ mbɔ̌ ɡu, mbíꞋŋɡɔ ŋ kɑ́ pɔ́ pɑꞋ ńcẅɛ́ɛ ntsup-Pɑlɔ́mɑ wɑ́ pɔ́. 12 Mɔ, n dɔ ŋ́kɔŋ kɔŋnɛ ńjúk nji ŋkɑ́ yɛpɑ́ nǔu ŋɡɑplɑ́Ꞌ, ḿbɛn ŋ́ɡɑp yúu pɑ́ɑ nji nɛɡɛ́m, ŋ́ɡɑ́ tɑ́Ꞌ nji mbɔ̌ ɡu. 13 Ncẅɛ́ɛ ntsup ɛ̂wɑ́ tʉ́ʉ yɛ́ pɔ tɛ nzʉʉ, ḿbɔɔ kuꞋ nɛpʉꞋ tú yɛ́ ńdíŋɛ tʉ́ pɔ́, ɛ́sɔp tú yɛ́ sɛ́ ńcú ŋɡɔ: “Ɔ́ɔ! Sɛ́, tsɑ́ɑ mɛjʉ́ŋ mɑ́ɑ, mɔ yɑ́ɑ pɔ ŋu kɛpɔŋ!”» 14 Yɛ́su mɑꞋ tú yɔ nu ŋɡɔ: «Tsʉ́nɛ ŋ kɛ sẅíi wʉ́ʉ, wɔ ńcẅɛ́ɛ ntsup kɑ ɡɔ́ ḿbɛn nɛ ndɑ́ yɛ, Sɛ́ pɔɔ pɛ́t ḿbɔ́ ńdɑ́Ꞌ wɛ́ pɔ́. Lɑ́, ŋ́ɡʉ nǔu ŋu-Pɑfɑlísɑy ɛ̂wɑ́, Sɛ́ kɛ ḿbɔ́ ńdɑ́Ꞌ wɛ́ lɑ́Ꞌnɛ. Ɛ́ pɔ́Ꞌɔ, lɑ́ ḿbɔ́ yi ŋu lɑɑ ŋ́ŋɑ́Ꞌ mbʉʉ yɛ, mbɔ pɛ́ ɡʉ ŋ́kɔk wɛ́, ŋ́kɔk mbʉʉ yɛ, mbɔ Sɛ́ ɡʉ ŋ́ŋɑ́Ꞌ wɛ́.» Yɛ́su kɔŋ ɡɛ́ɡɛ́ mbɔ́ŋkʉ̈ɔ́ ( Mɑtʉ̈ɔ 19.13-15 ; Mɑ́lɛ́kúshi 10.13-16 ) 15 Pɛcɔ́ pʉɔ ɡɛ ńdɔk mbɑ pɔ́ɔmbɔ́t, ńtɔ́ mbi Yɛ́su ŋɡɔ ɑ zɑ́p mbɔ̌ tú pɔ́p, ɡɑŋku pɛ́ jʉ́ɔ ḿbɔ́ ńtɔ́Ꞌ pîpɑ́ pʉɔ. 16 Lɑ́ Yɛ́su cú pɛ́ lɔk wɔ́p ńtɔ́ tɔ́nɛ. A cú ŋɡɔ: «Pʉʉ nɑ́ ɡɛ́ɡɛ́ mbɔ́ŋkʉ̈ɔ́ pɔ́p tɔ́ ŋ́kẅɛ́ɛtɛ wɑ́ɑ, kɔɔ pʉʉ tɑ́k wɔ́p! Pʉɔ pinɛ pɔ́p pɑꞋ mbɔ́ŋkʉ̈ɔ́ lɑ́, ɡẅɛɛnɛ nu nǔu nɛfɔɔ-Sɛ́. 17 Ɛ sẅíi wʉ́ʉ, kwɑꞋ nɛ́nẅín, ŋu lɑɑ ḿbɔɔ tsʉ́Ꞌ pɑꞋ mɔ́ɔ mɔ́yúu mɔ́ɔ, ḿbɛ́m ŋ́ɡɔ Sɛ́ tsʉ́Ꞌnɛ ɛ́sɑ́Ꞌ wɛ́ pɔ́, mbɔ ɑ kɛ́ ɡẅɛɛ nu nǔu nɛfɔɔ-Sɛ́ pɔ́.» Nu-ŋɡɑŋyúu pɔ́p Yɛ́su ( Mɑtʉ̈ɔ 19.16-30 ; Mɑ́lɛ́kúshi 10.17-31 ) 18 Wɛcɔ́ ŋkɛ́m-Pɑyúdɑ tɔ́ ḿbíkŋɛ Yɛ́su ŋɡɔ: «Cícɑ wɛ sʉ́Ꞌnɛ, ɛ́ lɑɑ ḿbɔ́ ŋ ɡɛ ŋ́ɡɔ ku lɑ́ ŋ́ɡẅɛɛ luk kɛ́mɛ?» 19 Yɛ́su tsɔ́Ꞌ ḿbíkŋɛ wɛ́ ŋɡɔ: «Ɔ fúŋ wɑ́ɑ ŋɡɔ ŋu sʉ́Ꞌnɛ mɛlɑ́Ꞌkʉ̈ɔ́? Ɛ́ kɑ́ Pɔ́ ndɑꞋ Sɛ́ pɔ́, mbɔ wɛcɔ́ ŋu sʉ́Ꞌnɛ kɑ́ pɔ́ ɡú pɔ́. 20 Ɔ kɑ́ pɔ́ ḿmuŋɛ nɛpʉ́ʉ-Sɛ́ pɔ́, Sɛ́ kɑ zɑ́p ŋɡɔ: Kɔɔ ɡɛ ɡɑp, kɔɔ jẅí ŋu, kɔɔ jʉ̈ɔ, kɔɔ tík sɔ́ɔ tú ŋu, ɡɑ́ mɛkuꞋ tɑ́t wu pɔ́p mɑ́ wu.» 21 Ŋu ɛ̂wɑ́ tsɔ́Ꞌ ŋɡɔ: «Tɛ ɛ́fú pɑꞋ ŋ kɑ pɛ́tnɛ mɔ́ɔsuu, n dɔ ŋ́kɛ́ ńtswɛ́ ŋ́ɡẅɛɛ nɛpʉ́ʉ ɛ̂nɑ́ ɡẅɛɛnɛ tsʉʉ.» 22 Yɛ́su zẅíꞋlɛ lɑ́ ńtsɔ́Ꞌ mbɔ̌ wɛ́ ŋɡɔ: «Tɑ́Ꞌ yúu yɛmɔ́Ꞌ kɛ́ ḿbɛ́t ńjɑ́k mbɔ̌ wu. Gʉ ɛ́fɛn yúu pú tsʉʉ, ŋ́ɡɑp ŋkɑ́p mbɔ̌ pɛkɛyúu, ŋ́ɡɛ ńdɑ́Ꞌ ŋ́ɡẅɛɛ yúu tʉʉ ndɛn tʉ́nɛ́pú. Gʉ ŋ́ɡɛ pɔ́Ꞌɔ, ḿbɛn ńtɔ́ ńcʉ́ɔ nzʉʉ mɔ.» 23 A zúꞋ, shʉ́ wɛ́ pfúu, mbíꞋŋɡɔ ɑ kɑ ɡẅɛɛ yúu-ŋkɑ́p tɛꞋ. 24 Yɛ́su jʉ́ɔ ntɛ́ yi shʉ́ wɛ́ lɔknɛ ḿpfúu, ńcú ŋɡɔ: «Ɛ́ tɛn pɑꞋ ɛ́ lɑɑ ḿbɔ́ ŋɡɑŋyúu pɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́. 25 Ɛ́ zɑŋɛ́ mbɔ̌ shʉ̈ɔ́ nɛsɔ́ tsɛt mbʉ́-sɑ́Ꞌ, ńtsɑ ŋɡɑŋyúu nɛpɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́.» 26 Pʉɔ pinɛ pɔ́p kɑ pɔ́ ńzúꞋ yɔ nu cú ŋɡɔ: «Tɛ ɛ́ lɑɑ ḿbɔ́ pɑ́Ꞌ, mbɔ wɔ̌ ɡʉnɛ ńdɑ́Ꞌ ńduk?» 27 Yɛ́su cú ŋɡɔ: «Nu yi ɛ́ tsɑnɛ pʉɔmɛsɔŋ, ɛ́ kɑ́ tsɑ Sɛ́ pɔ́.» 28 Pyɛ̂ cú mbɔ̌ Yɛ́su ŋɡɔ: «Tɛ pɛk kɑ nɑ́ yɛk mbɑ kʉ̈ɔ́ lɑ́, ńcʉ́ɔ nzʉʉ wu pɑꞋɑ lɑ́?» 29 Yɛ́su tsɔ́Ꞌ ŋɡɔ: «Tsʉ́nɛ ɛ sẅíi wʉ́ʉ, kwɑꞋ nɛ́nẅín, ŋu lɑɑ ńnɑ́ ndɑ́ yɛ, ńnɑ́ nzwɛ́ wɛ, ńnɑ́ pɔ́ɔpɛmɑ́ pɛ́, ńnɑ́ tɑ́t wɛ pɔ́p mɑ́ wɛ, mɛꞋ mbɔ́ŋkʉ̈ɔ́ pɛ́, ntɛ́ nɛfɔɔ-Sɛ́, 30 mbɔ ŋɡɑŋ ŋ́ɡɛ ḿbɛn ŋ́ɡẅɛɛ yîyɑ́ yúu tɛ ńdɛɛ yi ɑ kɑ nɑ́nɛ, ńdɑ́Ꞌ ḿbɔ́ tsɛt ŋɡɔŋ fí, ŋ́ɡẅɛɛ luk kɛ́mɛ.» Yɛ́su pɛn ńcú ntɛ́ nɛvú yi ɑ ɡɛ ńdɑ́Ꞌ ḿpfú yɛ́tɛ́ ( Mɑtʉ̈ɔ 20.17-19 ; Mɑ́lɛ́kúshi 10.32-34 ) 31 Yɛ́su fɑk ɡɑŋku pɛ́ ntsɔ̌ppɑ́ nɛ́ nɛɡɛ́m, pɔ́p pɛpɔ́p tʉ́ʉ, ɑ cú mbɔ̌ pɔ́p ŋɡɔ: «Pʉʉ zúꞋ sʉ́Ꞌnɛ, pɛkŋɛ sɛ̂ndúŋ ḿbɔ́ ḿbʉʉ nɛ́ Yɛlúsɑlɛm pɑꞋnɛ, ŋ́kúu zúꞋu, mbɑ kʉ̈ɔ́ lɑ́ yi pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ ntɛ́ Mɔ́ɔ-ŋu puutɛ zúꞋu. 32 Pɛ́ ɛ́fɛn wɛ́ mbɔ̌ pɑkɛ́jí Sɛ́ pinɛ pɔ́p sɑ́Ꞌnɛ lɑ́Ꞌ yɔ, pɔ́p zɔɔtɛ wɛ́, ńtɛ́m sʉ́ʉ nǔu wɛ́, ńtẅik mɛ́tɛ́ nǔu wɛ́, 33 ńdɔk ŋɡwɑɑ ńtswɑ́ɑ wɛ́, ŋ́ɡɛ pɛ́ jẅí wɛ́, ɑ pɛn ńzẅíimɛ nǔu nɛvú nǔu mbɑ́ɑtɛ lɛ́Ꞌ pɛ́tɑ́t.» 34 Lɑ́, Yɛ́su cú pɑꞋɑ, ɡɑŋku pɛ́ pɔɔ zúꞋ yɛcɔ́ yúu nǔu nu yi ɑ cúnɛ pɔ́, sẅiŋɛ yɛ́ kɛ ńtɛplɛ wɔ́p tɛplɛnɛ, pɔ́p pɔɔ zúꞋ nu yí ɑ lɔknɛ ńcú sʉ́Ꞌnɛ pɔ́. Yɛ́su tɔ́ Yɛ́líkɔ́ ŋ́ɡɛ fumík jʉ́ɔ zʉꞋ ( Mɑtʉ̈ɔ 20.29-34 ; Mɑ́lɛ́kúshi 10.46-52 ) 35 Yɛ́su ɡʉ tɛ ḿbɔ́ ŋ́kúu tʉ́sɔŋ-Yɛlíkɔ, wɛcɔ́ fumík ńnɑ́ŋ mbʉʉ sɛ̂ndúŋ ḿbɔ́ ńdɔ́ɔ ndɔ́ɔ, 36 ńzúꞋ pɑꞋ lɑ́Ꞌ sɛ́ ńzɔtnɛ ɛ́sẅíŋɛ ńdɛɛ, ɑ píkŋɛ pʉɔ ŋɡɔ: «Ɛ́ kʉ̈ɔ́?» 37 Pʉɔ tsɔ́Ꞌ mbɔ̌ wɛ́ ŋɡɔ: «A Yɛ́su mɔ́ɔ-Nɑ̌zɑlɛt ẅí ɑ lɛɛnɛ.» 38 A ɡɔ́ɔ ńzɛ nɛkíi nɛ́ ŋɡi tɛnnɛ ńcú ŋɡɔ: «Yɛ́su ŋu nǔu njẅɛt-fɔɔ Ndɑvît, tsɑ́ɑ mɛjʉ́ŋ mɑ́ɑ.» 39 Pʉɔ pinɛ pɔ́p ḿbɔ́nɛ mbi ńnɛn, pɔ́ ŋ́kɑkŋɛ wɛ́ ŋɡɔ ɑ nɑꞋ. Lɑ́ ɑ mɛkŋɛ ŋ́ɡɑ́ ŋɡi yɛ tʉ́ ŋɡɔ: «Yɛ́su, ŋu nǔu njẅɛt-fɔɔ Ndɑvît tsɑ́ɑ mɛjʉ́ŋ mɑ́ɑ.» 40 Yɛ́su tʉ́ʉ ńcú ŋɡɔ pɛ́ lɔk wɛ́ ńtɔ́ ŋ́ɡɑ́ mbɔ̌ wɛ́, ɑ tɔ́ tɛ ŋ́kúu nɛjɔ́ŋ yɛ́, Yɛ́su píkŋɛ wɛ́ ŋɡɔ: 41 «Ɔ tsɑ́ɑ ŋɡɔ ŋ ɡɛ ŋ́ɡɔ ku nǔu ɡu?» Fumík ɛ̂wɑ́ cú ŋɡɔ: «Tsɑpʉɔ, n tsɑ́ɑ nɛpɛn ńjʉ́ɔ zʉꞋ.» 42 Yɛ́su cú mbɔ̌ wɛ́ ŋɡɔ: «Pɛn ńjʉ́ɔ zʉꞋ! PɑꞋ ɔ zɑ́pnɛ tʉ́m yú nǔu mɔ lɑ́, ɔ fíitɛ!» 43 Fumík ɛ̂wɑ́ ɡɔ́ɔ ḿbɛn ńjʉ́ɔ zʉꞋ, ńcʉ́ɔ nzʉʉ Yɛ́su, ńnɛn ŋ́ɡúꞋlɛ Sɛ́, lɑ́Ꞌ jʉ́ɔ yɔ nu, ŋ́ɡɔ́ɔ ńzɛ nɛ́ puu ŋ́ɡúꞋlɛ Sɛ́. |
CABTAL, 2017