Ɛ́bɛlʉʉ 9 - Kɑɑ Fí

NɛnɔŋpɔꞋ wɛ ndwɛn kɑɑ

¹ Nduŋmbi kɑɑ kɑ ɡẅɛɛ yɛ́ ntɛ́ mɛndɛndɑ́k yi pɛ́ kɑ pɔ́ ńnɛn nǔu lɑ ńnɔŋ pɔꞋ. Pɛ́ kɑ pɛn ŋ́ɡẅɛɛ zʉꞋ yi pɛ́ nɔŋnɛ pɔꞋ-Sɛ́ zúꞋu, ɛ́ pɔ́ pɔ ndǔ tsɛ́tsɑ́Ꞌ.

² Mbɔ pɛ́ kɑ zuŋɛ mɑ́mɑ́ ntɑp, ńdɔk yúu ndẅí ńzɑ́Ꞌ nji yɛpɑ́, ɛ́fúŋ lûm wɛ píi ŋɡɔ tsɛt zʉꞋ yi Sɛ́ zúꞋu, wɛcɔ́ ntɛ́ mɑ́mɑ́ túlkɑ́ŋ pɔ́ zúꞋu, ŋ́ɡẅɛɛ mɛntyɑk sɑɑmbɑ́, tɑ́pɛlɛ pɛn ḿbɔ́ zúꞋu, mbɛlɛ̂ɛt yi pɛ́ ɡɑ́nɛ mbɔ̌ Sɛ́ pɔ́ ndǔ.

³ Lûm wɛ tsɛtú ẅi ɑ nzʉʉ yúu ndẅí ɛ̂yɑ́ pɔ́ kwɑꞋ zʉꞋ-Sɛ́.

⁴ Ɛ́ pɔ́ tsɛt ẅîwɑ́ lûm, nɛkɛlɛmúk tʉ́ʉ tsɛtú, mbɔ pɛ́ kɑ lɔk tʉ́n-ŋɡɔ̂l ńniitɛ, pɛ́ tɔɔ lǐi-pɔꞋ ndǔ, ŋkɔp-kɑɑ yi Sɛ́ pɔ́p pʉɔ kɑ ɡwɑtnɛ tʉ́ʉ yɛ́ tsɛtú, mbɔ pɛ́ kɑ lɔk pɔ tʉ́n-ŋɡɔ̂l ńdɔk shʉŋ mɛnzɛm tsʉʉ, wɛcɔ́ mɔ́yúu tsɛ́Ꞌ yi pɛ́ kɑ pɛn ńdɔk pɔ tʉ́n-ŋɡɔ̂l ńniitɛ tʉ́ʉ tsɛt yîyɑ́ ŋkɔp nɛ́ mɑ̂ɑnɛ tsɛtú, ntẅí-Alɔŋ yi pɛtɔ̌ɔtɔ̌ɔ kɑ lɑ́Ꞌ ńcẅɛɛtɛ nǔu pɛn ńnɔɔ tsɛtú, pɛtɑ̌ɑfɛlɛ́-ŋɡɔꞋ pi pɛ́ kɑ ŋwɑꞋnɛ nu-kɑɑ yi Sɛ́ pɔ́p pʉɔ pɛ́ kɑ ɡwɑtnɛ pɛn ḿbɔ́ tsɛtú.

⁵ Ɛ́ pɔ́ ndǔ ŋkɔp-kɑɑ, mbɔ pɛ́ kɑ tík pɛtɛ́tɔ́k-pɛcʉ̈ɔ́Ꞌ-Sɛ́, ɛ́ pɔ́ ńnyɛt ŋɡɔ Sɛ́ zúꞋu, jʉ́jʉ́ŋ-mɛpɑp mɔ́p ŋ́kẅíipɛ zʉꞋ yi pɛ́ tswɛtnɛ mɛci mɛyúumɛku zúꞋu, ńtsẅɛt nɛpɔ́ yi Sɛ́ ɡʉ ńdikŋɛ mɛnu kɛpɔŋ-pʉɔmɛsɔŋ. Lɑ́, yɔ kɑ́ pɔ́ ŋkɑ́ yi pɛkŋɛ ɡʉ ńcú nu nǔu mɛnu mɔnɛ tsʉʉ tɛ ńtsuŋ ŋ́kyɛ́Ꞌtɛ pɔ́.

⁶ Pɛ́ niitɛ pɑ́Ꞌ, pɑnɔŋpɔꞋ ŋ́kúu tsɛt lûm wɛ píi lɛ́Ꞌ tsʉʉ ɛ́fɑ́Ꞌ fɑꞋ yɔ́p.

⁷ Lɑ́ ŋ́ɡʉ nǔu lûm wɛ tsɛtú, nɔŋpɔꞋ wɛ ɡwɛ́ zɛ́nɛ jʉ́ kúunɛ zúꞋu tɑ́Ꞌ ŋkɑ́ nǔu ŋɡuꞋlɑ́Ꞌ, ŋ́kɛ́ ḿbɔɔ ŋ́kúu zúꞋu kɛ́ ɡẅɛɛ mɛci mi ɑ lɔknɛ ńtɔ́ mbi Sɛ́ nɛnyɛt ntɛ́ mɛnu kɛpɔŋ mɛ́ ɡúu, mbɑ mɛ́ pɛcɔ́ pʉɔ pɔ́.

⁸ Zẅikŋɛ Lɛ́ɛnɛ́nɛ kɑ pɔ́ ńdɔk pɔ́Ꞌɔ, nyɛt ŋɡɔ wɔ nduŋmbi ntɑp lɑɑ ŋ́kɛ́ ńdɑ́Ꞌ ḿbɛ́t ḿbɔ́ pɔ ɡú, mbɔ sɛ̂ndúŋ nɛtɔ́k tɛ ŋ́kúu nǔu kwɑꞋ zʉꞋ yi Sɛ́ zúꞋu, kɛ́ tsɔ́Ꞌnɛ pɔ́.

⁹ Ɛ́ mbɔ̌ pɛkŋɛ nǔu ŋkɔ̂ɔnɛ ḿbɔ́ lii yi pɛ́ lɔknɛ nyɛt wɛkŋɛ nɛ nu. Yîyɑ́ nu pɔ́ ŋɡɔ: Yúu mi pɛ́ ɡɑ́nɛ mbɔ̌ Sɛ́ pɔ́p pɔꞋ ẅi pɛ́ nɔŋnɛ mbi yɛ́, ḿbɔ́ ɛ́ pɔɔ ɡɛ tɛ tʉ́m-ŋu ẅí ɑ ɡúꞋlɛ́nɛ Sɛ́ nǔu yîyɑ́ ntɛ́, kɛ́ ḿbɛ́t ḿbɔ́ ŋ́ŋɑk wɛ́ ŋɑknɛ pɔ́.

¹⁰ Yîyɑ́ ntɛ́ nɛɡúꞋlɛ Sɛ́ ntɛ́ yi ɛ́ líŋɛ́nɛ pɔ mbʉʉ-ŋu, ɛ́ pɔ́ nu ńdíŋɛ yúupɛjʉ́, ńdíŋɛ mɛluꞋ, ńdíŋɛ nɛsuk mɛlɔ́Ꞌ. Mɛtʉʉ mîmɑ́ mbʉ́ʉ kɑ ɡẅɛɛ nɛpɔ́ ɡú tɛ ńdɑ́Ꞌ ŋ́kúu pɔ ŋkɑ́ yi Sɛ́ kɑ pɔ́ ŋ́ɡʉ ḿbɛn ŋ́ɡɛ mbɑ kʉ̈ɔ́ lɑ́ pɔ fí fí.

¹¹ Ɛ́ kɛ́ ḿbɔ́ nǔu ŋkɔ̂ɔnɛ, mbɔ Kɛlístɔ kɑ tɔ́ ḿbɔ́ nɔŋpɔꞋ wɛ ɡwɛ́ nǔu yúu sʉ́Ꞌnɛ yi ɛ́ sɛ́ ńtɔ́. A kɑ ɡɔ́ ńtɔ́, ńjɛ́Ꞌ tsɛt yɛcɔ́ ntɑp, ɛ́ pɔ́ ẅi ɛ́ tsuŋ ŋ́ɡúꞋ ńdɛɛ wɛcɔ́ wɑ́, yɛcɔ́ yúu pɛn ŋ́kɛ́ ḿbɔɔ ńjɑ́k nǔu pɔ́, ɛ́ ŋ́kɑɑ pɔ́ ẅi pʉɔ kɑ lɔknɛ mbɔ́ mɔ́p ńniitɛ pɔ́, ɛ́ lɔk ḿbɔ́ ŋɡɔ ẅîwɑ́ ntɑp kɑ́ pɔ́ tsɛt yɔ mbí yi pɛ́ kɑ niitɛ niitɛ́nɛ pɔ́.

¹² Kɛlístɔ kɑ kúu kwɑꞋ tsɛt zʉꞋ yi Sɛ́ zúꞋu. A kɑ kúu pɔ tɑ́Ꞌ ŋkɑ́ ɛ́ kuꞋ. A kɑ ɡɔ́ ŋ́kúu, mbɔɔ ɡẅɛɛ mɛci pʉ̈ɔp, kɛ mɛ́ pɔ́ɔ-fɔŋ nɛnyɛt mbɔ̌ Sɛ́ pɔ́. A kɑ lɔk pɔ kwɑꞋ mɛci mɛ́ ŋ́kúu. Yɔ pɑ́Ꞌ ɑ kɑ cẅɛɛtɛ́nɛ wɛkŋɛ ndɑ́tsɑ́ŋ pɔ́Ꞌɔ, tɑꞋ ŋkɑ́.

¹³ Ɛ́ kɑ pɔ́ yɛcɔ́ ŋkɑ́, pɛ́ tswɛt mɛci pʉ̈ɔp, kɛ mɛ́ pɛlúu-pɛfɔŋ ɔɔ, kɛ pfú yi ɛ́ fúnɛ nǔu mɔ́ɔ-fɔŋ ẅí pɛ́ tɔɔnɛ ɔɔ, ńtsẅɛtɛ mîmɑ́ mɛyúu nǔu pʉɔ pi ntsɛ́llɛ́ nu kɛpɔŋ nǔu pɔ́p, ɛ́ ɡɛ lɔ́Ꞌ mɛ nǔu mbʉʉ yɔp tɛ pɔ́p kuꞋ nɛpɛn ŋ́ɡúꞋlɛ Sɛ́.

¹⁴ Ɛ́ lɑɑ ḿbɔ́ yi ɛ́ kɑ pɔ́ pɔ́Ꞌɔ, mbɔ ŋkɑ́ yɛ́sʉ́Ꞌ nǔu pɑ́Ꞌ mɛci-Kɛlístɔ ɡʉ ḿbɔ́? A Kɛlístɔ ẅí Zẅikŋɛ kɛ́mɛ kɑ ɡɛ, ɑ lɔk tú yɛ́ ńnɔŋ pɔꞋ ẅí lɔ́Ꞌ kɑ́ pɔ́ nǔu pɔ́ mbi Sɛ́. Mɛci mɛ́ ɡʉ ńdɑ́Ꞌ suk ntsɛ́llɛ́-mɛfɑꞋ mi ɛ́ ŋ́ɡɑ́ pɔ nɛvú ẅí ɛ́ nǔu pɛkŋɛ tɛ tʉ́m yɛkŋɛ pɔɔ pɛn ŋ́ŋɑk wɛkŋɛ pɔ́, nɛpɔ́ yi pɛkŋɛ ɡʉ ɛ́fɑꞋ mbɔ̌ Sɛ́ ẅí ɑ ḿbɔ́ pɔ ɡú.

¹⁵ Yɔ yúu minɛ ɛ́ ɡɛnɛ Kɛlístɔ pɔ́ nǔu nu yɛcɔ́ kɑɑ yi ɛ́ yɛ fí, yi ɛ́ pɛn ńdɔk ḿbɔ́ pɑ́Ꞌ ŋwɑꞋnɛ lɔk ńtík nɛvú, ḿbɔ́ nɛnkɛ́m. A kɑ pfú ɛ́ pɔ́ nɛlɔk pɔ́Ꞌɔ, ɛ́fú ndɑ́tsɑ́ŋ yi mɛnu kɛpɔŋ-pʉɔmɛsɔŋ kɑ níꞋnɛ wɔ́p zúꞋu, ŋkɑ́ yi pɛ́ kɑ pɛ́t pɔ́ nǔu nu nduŋmbi kɑɑ, ńcẅɛɛtɛ wɔ́p. Ɛ́ kɛ́ fú pɔ́Ꞌɔ, pʉɔ pinɛ pɛ́ kɑ tsɔ́Ꞌnɛ wɔ́p, pɔ́p kuꞋ nɛcẅɛ́ɛ mɛyúu sʉ́Ꞌnɛ mi ɑ kɑ pʉ́nɛ, ɛ́ pɔ́ mi ɛ́ ɡʉ ńdɑ́Ꞌ ḿbɔ́ pɔ ɡú.

¹⁶ Ḿbɔ́ pɛ́ pɔɔ zɛɛ ɛ́fúŋ ŋwɑꞋnɛ yi ŋu kɑ lɔknɛ ńtík nɛvú nɛ́ kɛ́ pɔ́ yi ŋɡɑŋ pfú tɛ pɛ́ jʉ́ɔ pɔ́.

¹⁷ Ŋu zɛɛ ḿbɔ́ tɛ ḿpfú lɑ ŋwɑꞋnɛ yi ɑ lɔknɛ ńtík nɛvú nɛ́ cẅɛt, pɛ́ lɔk ɛ́fúŋ yɛcɔ́ nu. A lɑɑ ḿbɛ́t ḿbɔ́ pɔ ntʉʉ, yîyɑ́ ŋwɑꞋnɛ cẅɛt, pɛ́ pɔɔ lɔk ɛ́fúŋ yɛcɔ́ nu pɔ́.

¹⁸ Ɛ́ yúu yi ɛ́ kɑ ɡɛnɛ pɛ́ pɔɔ ńnɔŋ mbɑ nduŋmbi kɑɑ kɛ́ tswɛt mɛci pɔ́.

¹⁹ Mɔ̌sɛ̂ɛ kɑ fúŋnɛ mbʉ́ʉ mi Sɛ́ kɑ cúnɛ ɑ ŋwɑꞋnɛ tsɛt ŋwɑꞋnɛ-nɛpʉ́ʉ, ɛ́fúŋ mbi lɑ́Ꞌ tsʉʉ tɛ mîmɑ́ mbʉ́ʉ ḿmɛ, ɑ tíi mɛci pɔ́ɔ-fɔŋ, ńtɛmtɛ nǔu mɛ́ pʉ̈ɔp, ńníꞋ ŋki nǔu, ḿbɛ́ɛ tsɑ́ŋ nɛɡíi ni pɛ́ fúŋnɛ ŋɡɔ nɛsɔt, ŋ́kɑ́tɛ mɛnuk-njinjɔ mi ɛ́ pɑŋ pɑŋnɛ nǔu tú, ńcʉ̈ɔꞋ nǔu, ńzɑt nǔu kwɑꞋ ŋwɑꞋnɛ, ḿbɛn ńzɑt nǔu pʉɔtsʉʉ, ḿbɔ́ ńzɑt ḿbɔ́ ńcú ŋɡɔ:

²⁰ Mɔnɛ mɛci-kɑɑ minɛ Sɛ́ cúnɛ ŋɡɔ kɔɔ pʉʉ lɑ́Ꞌ ńdɔk ḿmɑꞋ kwɑŋɛ,

²¹ ḿbɛn ńzɑt mɛci nǔu ntɑp mbɑ nǔu yúu tsʉʉ yi pɑnɔŋpɔꞋ lɔknɛ ɛ́fɑꞋ.

²² Pɛ́ lɑɑ ńdíŋɛ nǔu ntɛ́ yɛ́ nɛpʉ́ʉ-Mɔ̌sɛ̂ɛ, mbɔ ḿbɔ́ pɛ́ cú ŋɡɔ pɛ́ lɔk mɛci-mɛnɑɑ, suk lɔ́Ꞌ nǔu nɛlʉ́m mɛyúu. Pɛ́ pɛn ńjí ŋɡɔ: Pɛ́ lɑɑ ŋ́kɛ́ mbɔɔ tswɛt mɛci pɔ́, Sɛ́ kɛ́ mbɔɔ mɛfɑɑnɛ pʉɔmɛsɔŋ likŋɛ.

PɔꞋ ẅí Kɛlístɔ kɑ lɔknɛ túmbʉʉ yɛ́ ńnɔŋ, fú nǔu ŋumɛsɔŋ ńjɛ́p mɛnu kɛpɔŋ

²³ Ɛ́ lɑɑ ḿbɔ́ yi ɛ́ kɑ pɔ́ ḿbíkŋɛ ŋɡɔ pɛ́ lɔk ntɛ́ yi pɛ́ lɛ́Ꞌlɛ́nɛ lɑ́, ńcẅɛɛtɛ lɔ́Ꞌ nǔu yúu mi pɛ́ kẅíinɛ, ɛ́ pɔ́ mi pɛ́ kɑ pɔ́ ńdɔk fʉꞋnɛ mi ɛ́ tʉ́nɛ́pú fʉꞋnɛ́nɛ, mbɔ ɛ́ ɡʉ nǔu kwɑꞋ mîmɑ́ mɛyúu mi ɛ́ tʉ́nɛ́pú, ɛ́ píkŋɛ ŋɡɔ pɛ́ nɔŋ pɔꞋ ẅí ɛ́ pɔŋnɛ ńdɛɛ ẅîwɑ́.

²⁴ Kɛlístɔ kɑ zɛɛ ḿbɔɔ kúu tsɛt zʉꞋ yi pɛ́ nɔŋnɛ pɔꞋ zúꞋu, ɛ́ pɔ́ yi pʉɔmɛsɔŋ kɑ lɔknɛ mbɔ́ mɔ́p ńniitɛ ńdɔk ɛ́fʉꞋ kwɑꞋ yîyɑ́ yi ɛ́ tʉ́nɛ́pú pɔ́. A kɑ kúu pɔ kwɑꞋ tʉ́nɛ́pú, lɑ́ ɑ ŋkɔ̂ɔnɛ ńdɔk yɛkŋɛ nu ḿbɔ́ nɛjɔ́ŋ Sɛ́.

²⁵ A ŋ́kɑɑ kúu zúꞋu pɑ́Ꞌ ɑ ɡʉ ńdɔk tú yɛ́ nɔŋ pɔꞋ mɛŋkɑ́ tɛ ńzɑ́ɑ, pɑ́Ꞌ nɔŋpɔꞋ wɛ ɡwɛ́ kɑ pɔ́ ŋ́kúu tsɛt kwɑꞋ zʉꞋ-Sɛ́, mɛŋɡuꞋ mɛŋɡuꞋ, ńdɔk mɛci-nɑɑ ńnɔŋ pɔꞋ pɔ́.

²⁶ MbíꞋŋɡɔ ɛ́ kɑ pɔ́ pɛ́Ꞌnɛ ḿbɔ́ pɔ́Ꞌɔ, mbɔ tɛ fú pɑ́Ꞌ Sɛ́ kɑ niitɛ́nɛ ndǔmbí, Kɛlístɔ kɑ ɡẅɛɛ nɛnɑ́ŋ ńjʉ́ɔ ŋɡʉ̈ɔ́Ꞌ, ḿpfú ḿbɛn ḿpfú. Lɑ́ pɛkŋɛ jí ŋɡɔ ŋkɑ́ kɑ pɔ́ tɛ ŋ́kuꞋ, ɑ cẅɛt pɔ tɑ́Ꞌ ŋkɑ́, ɛ́ kuꞋ pɔ́Ꞌɔ, ɑ lɔk túmbʉʉ yɛ́ ńnɔŋ pɔꞋ nɛlɔk ḿbík nu kɛpɔŋ.

²⁷ Pɑ́Ꞌ Sɛ́ kɑ zɑ́pnɛ ŋɡɔ wɛ́tɛ́ ŋumɛsɔŋ lɑ́ ɡʉ ŋ́kɛ́ ḿpfú pɔ pɑ́Ꞌ jʉ́ Sɛ́ ɡʉ ńtsɔ́Ꞌtɛ ntsɑŋ-ŋɡɑŋ lɑ́,

²⁸ ɛ́ ndʉ́ŋndʉŋ pɑ́Ꞌ ɑ kɑ ɡɛ Kɛlístɔ lɔk túmbʉʉ yɛ́, ńnɔŋ pɔꞋ pɔ tɑ́Ꞌ ŋkɑ́, nɛlɔk ńjɛ́p mɛnu kɛpɔŋ pʉɔ tɛ ńzɑ́ɑ. A ɡʉ ŋ́ɡɛ ḿbɛn ńcẅɛt nǔu mbɑ́ɑtɛ yɛ́pɑ́. A pɔɔ pɛn ńtɔ́ ŋkɑ́ yîyɑ́ nɛjɛ́p mɛnu kɛpɔŋ-pʉɔmɛsɔŋ pɔ́. A tɔ́ pɔ́Ꞌɔ, nɛɡɛ pʉɔ pi pɔ́p sɛ́ ńzẅíꞋlɛ wɛ́ luk.