Ɛ́bɛlʉʉ 7 - Kɑɑ Fí

Mɛlkisɛdɛk kɑ pɔ́ fɔɔ, ḿbɛn ḿbɔ́ nɔŋpɔꞋ

¹ Mɛlkisɛdɛk ɛ̂wɑ́ kɑ pɔ́ fɔɔ-pʉɔ-Sɑlɛm, ḿbɛn ḿbɔ́ nɔŋpɔꞋ-Sɛ́, Sɛ́ ẅí ɑ piꞋnɛ mbɑ kʉ̈ɔ́lɑ́. Ábɛlɛhɑ̂m kɑ pɔ́ yɛcɔ́ lɛ́Ꞌ yi ɑ kɑ ɡʉnɛ ntsɔ, ńtɔ́ ńdʉ̈ɔ́Ꞌ pɛfɔɔ tɛ ńzɑ́ɑ, ńjʉ́ wɔ́p, ḿbɔ́ ḿbɛn nzʉʉ, Mɛlkisɛdɛk ɡʉ ńzɑ́Ꞌ wɛ́, ńníꞋ mbɔ́tnɛ nǔu wɛ́.

² A ɡɑptɛ yúu pi ɑ lɔknɛ ɛ́fú ntsɔ nji nɛɡɛ́m, ŋ́ɡɑ́ tɑ́Ꞌ nji mbɔ̌ wɛ́. Lík-Mɛlkisɛdɛk lɔk ńcú ŋɡɔ: «Fɔɔ-nu yi ɛ́ tʉ́ʉnɛ ndʉ́ŋndʉŋ», ɑ pɛn ḿbɔ́ fɔɔ-pʉɔ-Sɑlɛm pɔ́Ꞌɔ, ńdɔk ḿbɔ́ fɔɔ-mbɔ́tnɛ.

³ Pɛ́ kɑ́ jí tɑ́t pɛ Mɛlkisɛdɛk pɔ́. Pɛ́ kɑ́ jí mɑ́ wɛ pɔ́, ŋ́kɛ́ mbɔɔ jí tsɛ́nndɑ́ yi ɑ fúnɛ nǔu pɔ́, pɛ́ kɑ́ tɔ́ nǔu yɛcɔ́ zʉꞋ tsɛt ŋwɑꞋnɛ-Sɛ́ ńzúꞋ pɛ́ cú nu nǔu nɛpí wɛ́ pɔ́, ŋ́kɛ́ mbɔɔ zúꞋ pɛ́ cú nu nǔu nɛvú wɛ pɔ́. Ɛ́ pɔ́ pɔ́Ꞌɔ, ɑ lɔk ḿbɔ́ pɑ́Ꞌ mɔ́ɔ-Sɛ́, mbíꞋŋɡɔ ɑ nɔŋpɔꞋ ẅí ɑ pɔ́ pɔ ɡú.

⁴ Pʉʉ jʉ́ɔ pɑ́Ꞌ Mɛlkisɛdɛk lɔknɛ ḿbɔ́ mɑ́mɑ́ ŋu pɔ́Ꞌɔ, jʉ́ ẅí Ábɛlɛhɑ̂m, mɑ̂ɑŋɡɑpnjẅɛt-Pɑíslɑyɛ̂l, kɑ lɔknɛ yúu ɛ́fú ntsɔ, ŋ́ɡɑp nji nɛɡɛ́m, ŋ́ɡɑ́ tɑ́Ꞌ nji mbɔ̌ wɛ́.

⁵ Nɛpʉ́ʉ-Mɔ̌sɛ̂ɛ píkŋɛ mbɔ̌ pɑnɔŋpɔꞋ pi pɔ́p lɔk ḿbɔ́ njẅɛt-Lɛ́vi ŋɡɔ, pɔ́p píkŋɛ mbɔ̌ Pɑíslɑyɛ̂l ŋɡɔ pɔ́p ɡɑptɛ mbɑ kʉ̈ɔ́lɑ́ yi pɔ́p ɡẅɛɛnɛ, ŋ́ɡɑptɛ nji nɛɡɛ́m, ŋ́ɡɑ́ tɑ́Ꞌ nji mbɔ̌ pɔ́p pɑnɔŋpɔꞋ, ḿbíkŋɛ pɔ́Ꞌɔ, mbɔ̌ pɔ́ɔpɛ́mɑ́ pɔ́p, lɑ pɔ́p pɛtsʉʉ pɔ́ ɛ́fú pɔ nǔu njẅɛt-Ábɛlɛhɑ̂m.

⁶ Mɛlkisɛdɛk ŋkɑɑ ŋu nǔu njẅɛtndɑ́-Lɛ́vi pɔ́, lɑ́ Ábɛlɛhɑ̂m ɡɑptɛ yúu pɛ́ nji nɛɡɛ́m, ŋ́ɡɑ́ tɑ́Ꞌ nji mbɔ̌ wɛ́, ɑ cẅɛ́ɛ, ńníꞋ mbɔ́tnɛ nǔu wɛ́ ẅí Sɛ́ kɑ kɑꞋnɛ yúu mbɔ̌ wɛ́.

⁷ Pɛ́ zɛɛ ńjí sʉ́Ꞌnɛ ŋɡɔ ŋu ẅí ɑ níꞋnɛ mbɔ́tnɛ lɛɛ ŋu ẅí ɑ cẅɛ́ɛnɛ mbɔ́tnɛ.

⁸ PɑnɔŋpɔꞋ pi pɔ́p lɔknɛ ḿbɔ́ njẅɛt-Lɛ́vi, pi pɔ́p cẅɛ́ɛnɛ tɑ́Ꞌ nji nǔu yúu nji nɛɡɛ́m, pɔ́p pʉɔ pi pɔ́p nɑ́ŋnɛ ḿpfútɛ. Lɑ́ ŋ́ɡʉ nǔu Mɛlkisɛdɛk ẅí ɑ kɑ cẅɛ́ɛnɛ tɑ́Ꞌ nji nǔu nji nɛɡɛ́m, ɑ ŋu ẅí ɑ ḿbɔ́ pɔ ɡú, pɑ́Ꞌ ŋwɑꞋnɛ-Sɛ́ sɛ́ ɛ́sẅíi wɛkŋɛ pɔ́Ꞌɔ.

⁹ Ɛ́ lɑɑ ḿbɔ́ pɛkŋɛ cú ŋɡɔ pʉɔ-Lɛ́vi pi pɔ́p cẅɛ́ɛnɛ tɑ́Ꞌ nji, nǔu nji nɛɡɛ́m, kɑ ɡɑ́ yɔ́p tɑ́Ꞌ nji nǔu nji nɛɡɛ́m mbɔ̌ Mɛlkisɛdɛk, pɔ́Ꞌɔ ńdɛɛ nǔu Ábɛlɛhɑ̂m.

¹⁰ MbíꞋŋɡɔ ɛ́ kɑ pɔ́ lɛ́Ꞌ yi Mɛlkisɛdɛk kɑ ɡʉnɛ ńzɑ́Ꞌ Ábɛlɛhɑ̂m, Lɛ́vi pɔ́ yɛ́ sɛ́, ńdɛɛ nǔu pɑ́Ꞌ ɑ kɑ pɔ́nɛ nɛpɛm-Ábɛlɛhɑ̂m, ŋɡɑpnjẅɛt wɔp.

¹¹ Nɛpʉ́ʉ-Pɑíslɑyɛ̂l píkŋɛ ŋɡɔ pɛ́ lɔk pɔ pʉɔ-njẅɛt-Lɛ́vi ŋ́ɡɛ pɑnɔŋpɔꞋ. Pɔ́p pɔ́ pɑnɔŋpɔꞋ nǔu ntɛ́ yi Álɔŋ kɑ pɔ́nɛ yɛ́. Yúu kɑ pɔ́ pɛ́Ꞌnɛ mbɔɔ jɑ́k nǔu yɔ́p ntɛ́ nɛnɔŋ pɔꞋ pɔ́, mbɔ nɛnɑ́ wɔ́p, ńtsʉ́Ꞌ ńdɔɔ pɔ wɛcɔ́ nɔŋpɔꞋ pɔ nǔu ntɛ́ yɛ́ Mɛlkisɛdɛk kɑ pɔ́ ŋ́ɡʉ cẅɛ́lɛ́ nǔu kʉ̈ɔ́?

¹² Ntɛ́ yɛ́ nɛlɔk ńtsɔ́Ꞌ pɑnɔŋpɔꞋ lɑɑ ńzɛɛ ŋ́kúpmɛ, mbɔ nɛpʉ́ʉ ɡẅɛɛ nɛkúpmɛ yɛ́.

¹³ Pɛ́ cú mɔnɛ mɛnu pɑ́Ꞌɑ mbíꞋ Tsɑpʉɔ wɛkŋɛ. Jʉ́ ẅí ɑ fúnɛ nǔu yɛcɔ́ njẅɛt yɛ́, yi wɛcɔ́ ŋu kɑ pɔ́ ɛ́fú nǔu ɛ́fɑ́Ꞌ fɑꞋ zʉꞋ yi pɛ́ nɔŋnɛ pɔꞋ zúꞋu pɔ́.

¹⁴ Pʉɔ pɛtsʉʉ zɛɛ ḿbɔ́ ńjí ŋɡɔ, Tsɑpʉɔ wɛkŋɛ fúnɛ nǔu njẅɛt-Jẅídɑ, njẅɛt yi Mɔ̌sɛ̂ɛ ŋkɑɑ ŋ́kẅíi lík yɔ́p ŋkɑ́ yi ɑ kɑ pɔ́ ńcú nu nǔu pɑnɔŋpɔꞋ pɔ́.

Yɛ́su nɔŋpɔꞋ nǔu ntɛ́ yɛ́ Mɛlkisɛdɛk

¹⁵ Yúu mi pɛ́ ɡʉ ɛ́fú nǔu ńniitɛ ńzúꞋ nu yi pɛ́ ńdɑ́Ꞌmɔ́ ńzɛ nɛcú, ɛ́ pɑ́Ꞌ wɛcɔ́ nɔŋpɔꞋ ẅí ɑ kɑ cẅɛtnɛ, nǔu ntɛ́-Mɛlkisɛdɛk.

¹⁶ A kɑ́ ɡɔ́ ḿbɔ́ nɔŋpɔꞋ pɑ́Ꞌɑ, ɛ́ fú nǔu nɛcɔ́ nɛpʉ́ʉ ni pɛ́ kɑ zɑ́pnɛ ŋɡɔ pʉɔmɛsɔŋ nɛn nǔu pɔ́. Ɛ́ fú pɔ nǔu mɛtʉʉ mi ɛ́ nǔu yɛ luk. Ẅîwɑ́ nɛpɔ́ pɔ́ luk kɛ́mɛ,

¹⁷ mbɔ pɛ́ kɑ ŋwɑꞋnɛ nu ntɛ́ wɛ́ ŋɡɔ: «Ɔ nɔŋpɔꞋ ẅi ɑ ɡʉ ńdɑ́Ꞌ ḿbɔ́ pɔ wɛ́tɛ́ nǔu mɛŋɡuꞋ mɛŋɡuꞋ, nǔu ntɛ́-Mɛlkisɛdɛk».

¹⁸ Pɛ́ lɔk pɔ́Ꞌɔ, ḿbiitɛ ńtsɛ́t ndwɛn ndúŋ ẅí pɛ́ kɑ piitɛ ńtík ŋɡɔ pɛ́ nɛn nǔu, mbíꞋŋɡɔ yúu kɑ jɑ́k nǔu ẅîwɑ́ ndúŋ, ɛ́ pɛn mbɔɔ cẅɛ́lɛ́.

¹⁹ Pɔ́Ꞌɔ mbíꞋŋɡɔ nɛpʉ́ʉ-Mɔ̌sɛ̂ɛ ŋkɑɑ ɡɛ tɛ yɛcɔ́ yúu kuꞋ nǔu ntɛ́ yi Sɛ́ sɛ́ ŋ́kɔŋ pɔ́. Ɛ́ ŋkɔ̂ɔnɛ, mbɔ Sɛ́ kɑ tík yɛcɔ́ ndúŋ fí, kwɑŋɛ yɛkŋɛ nɑ́ŋ ŋkɔ̂ɔnɛ ńtsʉ́Ꞌ ńtʉ́ʉ pɔ nǔu. Ɛ́ pɔŋ ńdɛɛ wɛcɔ́, mbíꞋŋɡɔ pɛkŋɛ ńdɛɛ nǔu ŋ́ɡʉ tɛ ŋ́kúu nɛjɔ́ŋ Sɛ́.

²⁰ Ɛ́ pɛn ḿbɔ́ ḿbɔŋ, mbíꞋŋɡɔ Sɛ́ kɑ ɡɔ́ tík nɔŋpɔꞋ wɛ ɡwɛ́ wɛ ẅîwɑ́ ndúŋ, ńcú nu tɛ ŋ́kɑɑ. PɑnɔŋpɔꞋ pɛ́ pɛlʉ́m kɑ ɡɔ́ ńcẅɛt nǔu njẅɛt-Lɛ́vi, Sɛ́ pɔɔ cú nu tɛ ŋ́kɑɑ pɔ́,

²¹ lɑ́ ɛ́ ɡʉ nǔu Yɛ́su, ɑ ɡɔ́ ńtsʉ́Ꞌ NɔŋpɔꞋ wɛ ɡwɛ́, Sɛ́ cú nu mbɔ̌ wɛ́ tɛ ŋ́kɑɑ ŋɡɔ: «Mɔ Tsɑpʉɔ, mɔ cúnɛ tɛ ŋ́kɑɑ Mɔ ŋ́ɡʉ ńdɑ́Ꞌ ŋ́kúpmɛ nu yí n cúnɛ pɔ́.» N cú ŋɡɔ: «Ɔ NɔŋpɔꞋ, ńdɑ́Ꞌ ḿbɔ́ pɔ wɛ́tɛ́ nǔu mɛŋɡuꞋ mɛŋɡuꞋ.»

²² Ɛ́ kɑ fú nǔu, Sɛ́ lɔk Yɛ́su ŋ́ɡɛ nɛlẅíi yɔ kɑɑ fí yi ɛ́ pɔŋnɛ ńdɛɛ yɛcɔ́.

²³ Yúu mi ɛ́ pɛn ḿbɔ́ nǔu pɔ́ ŋɡɔ: PɑnɔŋpɔꞋ pɛ́ njẅɛt-Lɛ́vi kɑ ɡɔ́ ńzɑ́ɑ zɑ́ɑnɛ mbíꞋŋɡɔ nɛvú kɑ pɔ́ ńtɔꞋ wɔ́p nɛ́ kɛ́ ńdɑ́Ꞌ ɛ́fɑꞋ fɑꞋ yɔ́p fɑꞋnɛ tɛ mbɔɔ lɑ́Ꞌ ḿpfú pɔ́.

²⁴ Lɑ́ ɛ́ kɛ́ ŋ́ɡʉ nǔu Yɛ́su, mbɔ yɑ́ fɑꞋ-nɔŋpɔꞋ kɑ́ pɔ́ yi mbɔ wɛcɔ́ ŋu ndɛꞋ fɑꞋ pɔ́, mbíꞋŋɡɔ jʉ́ Yɛ́su ɡʉ ńdɑ́Ꞌ ḿbɔ́ pɔ ɡú, nǔu mɛŋɡuꞋ mɛŋɡuꞋ.

²⁵ Yúu mi ɛ́ pɛn ŋ́ɡɛ ɑ kuꞋ nɛɡɛ pʉɔ pi pɔ́p sɛ́ ńdɔk wɛ́ ŋ́kẅɛ́Ꞌlɛ ńtɔ́ nɛ́ nɛjɔ́ŋ-Sɛ́, pɔ́p luk pɔ tɑ́Ꞌ ŋkɑ́. Pɔ́Ꞌɔ mbíꞋŋɡɔ jʉ́ Yɛ́su pɔ́ pɔ ɡú, pɑ́Ꞌ ɑ ɡʉ ńcɛꞋlɛ Sɛ́ nǔu tú yɔ́p.

²⁶ A lɔk ḿbɔ́ NɔŋpɔꞋ wɛ ɡwɛ́ ẅí ɛ́ kɑ pɔ́ ḿbíkŋɛ mbɔ̌ pɛkŋɛ. A kwɑꞋ mɔ́ɔ-Sɛ́, ḿbɔ́ mbúꞋ nǔu mbɑ kʉ̈ɔ́lɑ́, ḿbɔ́ kɛ́ yɛcɔ́ nu kɛpɔŋ nǔu wɛ́, pɔ́p pɑɡɛ mɛnu kɛpɔŋ kɑ́ tɛ́m yɛcɔ́ nu pɔ́, mbɔ Sɛ́ kɑ tsẅíkŋɛ wɛ́ tɛ tʉ́ tɛ yɛcɔ́ yúu kɑ́ pɛn ńdɛɛ wɛ́ tʉ́ pɔ́.

²⁷ A kɑ́ pɔ́ pɑ́Ꞌ pɛcɔ́ pɑnɔŋpɔꞋ pɛɡwɛ́ pi pɔ́p kɑ ɡẅɛɛnɛ nɛnɔŋ pɔꞋ lɛ́Ꞌ tsʉʉ pɔ́. Pɔ́p kɑ pɔ́ ḿbiitɛ ńnɔŋ pɔꞋ nǔu mɔ́p mɛnu kɛpɔŋ, lɑ ḿbɛn ńnɔŋ pɔꞋ nǔu mɛnu kɛpɔŋ pɛcɔ́ pʉɔ. A kɑ nɔŋ wɛ́ pɔꞋ pɔ tɑ́Ꞌ ŋkɑ́, ɛ́ pɔ́ pɑ́Ꞌ ɑ kɑ ɡɑ́nɛ túmbʉʉ yɛ́ nǔu tʉ́ mbɑ́ŋtɛ pɑ́ŋtɛ́nɛ, ɛ́ kuꞋ pɔ́Ꞌɔ.

²⁸ Nɛpʉ́ʉ-Mɔ̌sɛ̂ɛ zɛɛ ŋ́ɡɛ pɛ́ lɔk ŋumɛsɔŋ ẅi mbɑp-mbʉʉ yɛ pɔ́t pɑꞋ yɛ pɛcɔ́ pʉɔ ŋ́ɡɛ NɔŋpɔꞋ wɛ ɡwɛ́. Lɑ́ nu yi Sɛ́ kɑ zɑ́pnɛ nɛpʉ́ʉ-Mɔ̌sɛ̂ɛ ḿbɛn ńtɑ́ɑ ńcú tɛ ŋ́kɑɑ, ɛ́ kɑ ɡɛ ɑ lɔk Mɔ́ɔ nɛ ẅi ɑ kɑ lɑ́Ꞌ mɔ́ ŋ́kuꞋ nǔu mbɑ kʉ̈ɔ́lɑ́ yi jʉ́ Sɛ́ kɑ pɔ́ ńzẅíꞋlɛ wɛ́ nǔu, ńdɔk ŋ́ɡɛ NɔŋpɔꞋ wɛ ɡwɛ́ nǔu mɛŋɡuꞋ mɛŋɡuꞋ.